(vovworld)- ເມືອງກີມເຊີນແຂວງ ນິງບີງ ບໍ່ພຽງແຕ່ມີຊື່ສຽງດ້ວຍບັນດາກຸ່ມໂບດຫີນ ຟາດຢ້ຽມ ຊື່ງແມ່ນກິດຈະກຳສະຖາປັດຕະຍະກຳທີ່ເປັນເອກະລັກສະເພາະເທົ່ານັ້ນ ຫາກຍັງແມ່ນເຂດດິນຂອງບັນດາຜະລິດຕະພັນສິລະປະຫັດຖະກຳເຮັດດ້ວຍຜືທີ່ເປັນມູນເຊື້ອອີກດ້ວຍ. ບັນດາຜະລິດຕະພັນເຮັດດ້ວຍຜື ຂອງ ກີມເຊີນ ຍາມໃດກໍໄດ້ຮັບຄວາມນິຍົມຈາກຜູ້ໃຊ້ສອຍຢູ່ພາຍໃນປະເທດ ແລະ ຕ່າງປະເທດເປັນຈຳນວນຫລວງຫລາຍ ຍ້ອນຄຸນນະພາບທົນທານ, ງາມຕາ ແລະ ລະອຽດລະອໍ. ອາຊີບນີ້ໄດ້ກາຍເປັນຄວາມເອກອ້າງທະນົງໃຈຂອງປະຊາຊົນກີມເຊີນ.
ບັນດາຜະລິດຕະພັນດ້ວຍຜື
|
ໄປລຽບຕາມເສັ້ນທາງນ້ອຍເຂົ້າເຂດປູຊະນີຍະສະຖານປະຫວັດສາດ ໂບດຫີນຟາດຢ້ຽມ ທີ່ຂຶ້ນກັບເມືອງ ກີມເຊີນ, ທ່ານຈະພົບເຫັນບັນດາຜະລິດຕະພັນເຮັດດ້ວຍຜືທີ່ມີຫລາຍຮູບແບບ, ມີສີສັນງາມຕາເຊັ່ນ: ໝວກ, ເກີບ… ຖືກວາງຂາຍຢູ່ຮ້ານຂາຍເຄື່ອງທີ່ລະນຶກ. ນີ້ແມ່ນບັນດາຜະລິດຕະພັນໂດຍສີມືຄ່ອງແຄ້ວຂອງຊາວ ກີມເຊີນຜະລິດເອງ. ຖ້າທ່ານມາຢ້ຽມຢາມ ເມືອງກີມເຊີນ ໃນມື້ແດດຮ້ອນ, ຈະເຫັນຜືສົດ, ຜືແຫ້ງ, ຜືຖືກຍ້ອມສີສັນຫລາກຫລາຍພວມຕາກແດດຢູ່ລຽມຕາມຄັນຄູ, ທົ່ງຫຍ້າທີ່ກວ້າງໃຫຍ່ຫລືກຳແພງ. ເມື່ອລົມພັດມາ, ທ່ານຈະຮູ້ສຶກໄດ້ກິ່ນຫອມຂອງດອກຜື ປົນກັບກິ່ນຫອມຂອງເຂົ້າສຸກເຫລືອງເຕັມທົ່ງນາ.
ຕາມຄຳບອກເລົ່າຂອງຜູ້ເຖົ້າຜູ້ແກ່ຢູ່ ກີມເຊີນ ແລ້ວ, ຫງວຽນກົງຈື ບຸລຸດຜູ້ມືຊື່ສຽງໄດ້ຮັບການເຊີດຊູຈາກ ປະຊາຊົນ ກີມເຊີນວ່າ ແມ່ນຜູ້ກໍ່ຕັ້ງອາຊີບຜະລິດເຄື່ອງສິລະປະຫັດຖະກຳດ້ວຍຜື. ເພີ່ນໄດ້ນຳເອົາອາຊີບປູກຕົ້ນຜື ແລະ ຕ່ຳຜື ມາສອນໃຫ້ຊາວກີມເຊີນ. ສຳລັບປະຊາຊົນເຂດທະເລ ກີມເຊີນແລ້ວ, ອາຊີບຜະລິດເຄື່ອງສິລະປະຫັດຖະກຳດ້ວຍຜື ບໍ່ພຽງແຕ່ແມ່ນອາຊີບເສີມຄວາມງາມເທົ່ານັ້ນ ຫາກຊາວທ້ອງຖິ່ນຖືວ່ານີ້ແມ່ນອາຊີບທີ່ນຳມາເຊິ່ງລາຍຮັບ ບໍ່ແມ່ນຫນ້ອຍ ໃຫ້ແກ່ເຂົາເຈົ້າອີກດ້ວຍ.
ຕ່ຳສາດ ແລະ ຜະລິດເຄື່ອງສິລະປະຫັດຖະກຳດ້ວຍຜື ແມ່ນວິວັດການອອກແຮງງານທີ່ຫຍຸ້ງຍາກລຳບາກຂອງຊາວກີມເຊີນ. ຂັ້ນຕອນຜະລິດທັງໝົດລ້ວນແຕ່ເຮັດດ້ວຍມື, ຮຽກຮ້ອງນາຍຊ່າງຕ້ອງມີສີມືອັນຄ່ອງແຄ້ວ, ລະອຽດລະອໍ, ລະມັດລະວັງ ຈາກຂັ້ນຕອນຄັດເລືອກຕົ້ນຜື, ຕາກຜືໃຫ້ແຫ້ງຕະຫລອດຮອດວິທີຕ່ຳຜື. ທ່ານ ໂດ໋ດີງດືກ, ຢູ່ ຕາແສງ ດົງເຮືອງ ເມືອງ ກີມເຊີນ, ຜູ້ມີປະສົບການຕ່ຳສາດມາເປັນເວລາ 40 ປີ ໃຫ້ຮູ້ວ່າ:
“ພວກຂ້າພະເຈົ້າຕ້ອງຄັດເລືອກຜືສົດງາມ, ສະຫມ່ຳສະເຫມີ ແລະ ບໍ່ໃຫຍ່ປານໃດ ເວລາຕ່ຳຈຶ່ງງາມ. ພວກຂ້າພະເຈົ້າຊື້ຜືເປັນໂຕນ ແລະ ນຳໄປຕາກແດດ ແລ້ວມ້ຽນໄວ້ ເພື່ອຮັບໃຊ້ການຜະລິດໃນຕະຫລອດປີ.”
ກີມເຊີນ ມີສາດ 2 ປະເພດ ຖືກຕ່ຳດ້ວຍມື ນັ້ນແມ່ນສາດສີຂາວຂອງຕົ້ນຜື ແລະ ສາດຍ້ອມສີເປັນລວດລາຍທີ່ງາມຕາ. ສະເລ່ຍ ມື້ຫນຶ່ງ ຄົນງານຜູ້ຫນຶ່ງສາມາດຕ່ຳສາດໄດ້ 1 ຜືນ.
ຜືຍ້ອມເປັນສີສັນຫລາກຫລາຍກ່ອນທີ່ຜະລິດ
ເຄື່ອງສິລະປະຫັດຖະກຳ
ພາບ:dulichnamchau.com
|
ຍ້ອນຄວາມຮຽກຮ້ອງຕ້ອງການນັບມື້ນັບສູງຂອງຕະຫລາດ, ບັນດາຜະລິດຕະພັນເຮັດດ້ວຍຜືຢູ່ ກີມເຊີນ ຍາມໃດກໍພັດທະນາຢ່າງບໍ່ຢຸດຢັ້ງ ແລະ ຜະລິດຕາມທ່າອ່ຽງນິຍົມຂອງລູກຄ້າຢູ່ພາຍໃນປະເທດ ແລະ ສາກົນ. ປະຈຸບັນ ເຄື່ອງສິລະປະຫັດຖະກຳດ້ວຍຜືຢູ່ ກີມເຊີນ ໄດ້ສົ່ງໄປຂາຍຢູ່ຫລາຍທ້ອງຖິ່ນພາຍໃນປະເທດ ແລະ ສົ່ງອອກໄປຍັງຫລາຍປະເທດໃນໂລກ. ຜະລິດຕະພັນແຕ່ລະປະເພດເຖິງວ່າແມ່ນວັດຖຸ ຫລືເຄື່ອງສິລະປະຫັດຖະກຳດ້ວຍຜືກໍລ້ວນແຕ່ແມ່ນໝາກຜົນແຫ່ງວິວັດການປະດິດສ້າງຂອງນາຍຊ່າງ. ປ້າ ຫວູທິດາວ, ຢູ່ບ້ານ ກຽນທາຍ ໃຫ້ຮູ້ວ່າ:
“ຜືເຮັດເຄື່ອງທີ່ລະນຶກເປັນຫລາຍປະເພດ. ຕົວຢ່າງຄື: ກະເປົາ, ຫີບ, ສັດ…ນາຍຊ່າງຕ້ອງອອກແບບແນວໃດໃຫ້ງາມຕາເພື່ອດຶງດູດນັກທ່ອງທ່ຽວຕ່າງປະເທດ. ສະນັ້ນ ເຮັດອາຊີບນີ້ຮຽກຮ້ອງຕ້ອງມີຫົວຄິດປະດິດສ້າງ, ປ່ຽນໃຫມ່ຮູບແບບເປັນປະຈຳ.”
ບັນດາປະສົບການ, ທັກສະໃນການຕ່ຳສາດ ແລະ ຜະລິດບັນດາຜະລິດຕະພັນ ດ້ວຍຜື ຍັງສືບຕໍ່ໄດ້ຮັບການຮັກສາໄວ້ຈາກປະຊາຊົນກີມເຊີນ. ຢູ່ລະບຽງເຮືອນ ຫລື ເດີນບ້ານ ແມ່ນບ່ອນທີ່ແມ່ຍິງ ກີມເຊີນ ເຄີຍນັ່ງຕ່ຳຜື, ສອນໃຫ້ກັນວິທີເຮັດບັນດາຜະລິດຕະພັນໃຫມ່ດ້ວຍຜື.
ບັນດານັກທ່ອງທ່ຽວເຄີຍຊື້ເຄື່ອງສິລະປະຫັດຖະກຳດ້ວຍຜືເພື່ອເປັນຂອງຂວັນມອບໃຫ້ໝູ່ເພື່ອນ
ພາບ: vtr.org.vn |
ອາຊີບປູກຜື ແລະ ຜະລິດບັນດາຜະລິດຕະພັນດ້ວຍຜື ພວມກາຍເປັນອາຊີບທີ່ເປັນມູນເຊື້ອຂອງ ກີມເຊີນ. ນີ້ແມ່ນອາຊີບທີ່ມີມາແຕ່ດົນນານຢູ່ ກີມເຊີນ ແລະ ຕິດພັນກັບປະຊາຊົນແຕ່ລະຄົນຕະຫລອດຊີວິດ. ສະນັ້ນ ເຖິງວ່າຊາວກີມເຊີນຈະທຳມາຫາກິນຢູ່ຫ່າງໄກ ແຕ່ຍາມໃດກໍຄິດເຖິງອາຊີບທີ່ເປັນມູນເຊື້ອຂອງບ້ານເກີດເມືອງນອນຕົນ. ເພື່ອນ ຢວານມີງແທງ, ນັກສຶກສາມະຫາວິທະຍາໄລການຄ້າ ແບ່ງປັນວ່າ:
“ເມື່ອກັບເມືອບ້ານ ນ້ອງຮູ້ສຶກມີຄວາມອົບອຸ່ນຫລາຍເມື່ອໄດ້ເຫັນປະຈັກຕາບັນດາຜະລິດຕະພັນເຮັດດ້ວຍຜື ຊື່ງແມ່ນບັນດາວັດຖຸທີ່ນ້ອງລື້ງເຄີຍແຕ່ຄາວຍັງນ້ອຍ. ສະນັ້ນ ມີເວລາຫວ່າງ ນ້ອງພ້ອມກັບຄອບຄົວຜະລິດເຄື່ອງສິລະປະຫັດຖະກຳຫລາຍປະເພດ ທັງຂາຍ, ທັງເປັນຂອງຕ້ອນໃຫ້ໝູ່ເພື່ອນ.”
ພາຍຫລັງໄປຢ້ຽມຢາມ ໂບດຟາດຢ້ຽມ, ນັກທ່ອງທ່ຽວແຕ່ລະຄົນ ລ້ວນແຕ່ເລືອກເຟັ້ນໃຫ້ຕົນຜະລິດຕະພັນເຮັດດ້ວຍຜືບາງຢ່າງໃນຮ້ານຂາຍເຄື່ອງເປັນທີ່ລະນຶກຢູ່ອ້ອມໂບດ ຫລືລຽບຕາມເທດສະບານ ຟາດຢ້ຽມ ເພື່ອເປັນເຄື່ອງທີ່ລະນຶກ ຫລືມອບໃຫ້ໝູ່ເພື່ອນ, ຍາດຕິພິ່ນ້ອງເປັນຂອງຂວັນ. ບັນດາຜະລິດຕະພັນດັ່ງກ່າວເປັນເອກະລັກສະເພາະ, ມີຄວາມທົນທານ, ງາມຕາ ພຽງແຕ່ມີຢູ່ ກີມເຊີນ ແຂວງ ນີງບີງ ເທົ່ານັ້ນ.