(vovworld)- ອ່າວຮ້າລອງ ແມ່ນເຂດທະເລໝູ່ເກາະຂຶ້ນກັບແຂວງ ກວ໋າງນີງ, ຫ່າງຈາກນະຄອນຫລວງ ຮ່າໂນ້ຍທາງທິດຕາເວັນອອກສຽງເຫນືອ ປະມານ 180 ກິໂລແມັດ. ປີ 1994 ສະພາມໍລະດົກໂລກຂຶ້ນກັບຄະນະກຳມະການວັດທະນະທຳສຶກສາວິທະຍາສາດສປຊ ເປັນຄັ້ງທຳອິດຮັບຮອງອ່າວຮ້າລອງເປັນມໍລະດົກທຳມະຊາດໂລກ ຍ້ອນຄຸນຄ່າກ່ຽວກັບຫລັກຄວາມງາມ. ປີ 2000, ສະພາມໍລະດົກໂລກສືບຕໍ່ຮັບຮອງອ່າວຮ້າລອງແມ່ນມໍລະດົກໂລກຄັ້ງທີ 2 ຍ້ອນຄຸນຄ່າທໍລະນີສາດ. ມາຮອດປະຈຸບັນ, ທັດສະນີຍະພາບໃນໂລກທີ່ໄດ້ຮັບການຕີລາຄາຄືດັ່ງກ່າວແມ່ນບໍ່ມີຫລາຍ.
ອ່າວຮ້າລອງ
ພາບ:internet
|
ໃນລາຍການທ່ອງທ່ຽວ ຮ້າລອງ ພຽງເວລາຫນຶ່ງມື້, ນັກທ່ອງທ່ຽວບໍ່ ສາມາດຢ້ຽມຢາມອ່າວຮ້າລອງທັງໝົດໄດ້, ເພາະວ່າ ອ່າວຮ້າລອງ ມີເນື້ອທີ່ 1553 ຕາລາງກິໂລແມັດ ດ້ວຍເກາະໃຫຍ່ນ້ອຍທັງມີຊື່ ແລະ ບໍ່ມີຊື່ເກືອບ 2000 ແຫ່ງ. ເກາະຫີນນັບພັນແຫ່ງແມ່ນຜະລິດຕະພັນສິລິປະ ປະດິດສ້າງ ຂະໜາດໃຫຍ່ຂອງທຳມະຊາດ, ສ້າງເປັນທັດສະນີຍະພາບທີ່ສວຍງາມຂອງຮ້າລອງ. ເກາະແຕ່ລະແຫ່ງລ້ວນແຕ່ມີຮູບຮ່າງທີ່ແຕກຕ່າງກັນ. ສິ່ງທີ່ສ້າງຄວາມປະທັບໃຈທີ່ສຸດ, ນັ້ນແມ່ນ ເວລາລ່ອງເຮືອ... ຜ່ານບັນດາເກາະໃຫຍ່ນ້ອຍໄປຢ້ຽມຊົມອ່າວຮ້າລອງ. ເອື້ອຍ ຮ່ວາງທູ່ຍແອງ, ນັກທ່ອງທ່ຽວມາຈາກນະຄອນໂຮ່ຈິມີນ, ເປັນຄັ້ງທຳອິດມາຢ້ຽມຢາມອ່າວຮ້າລອງໃຫ້ຮູ້ວ່າ:
“ຂ້າພະເຈົ້າໄດ້ຮັບຊົມອ່າວຮ້າລອງຜ່ານຮູບເງົາ ແລະເຫັນວ່າງາມຫລາຍ. ແຕ່ມາບັດນີ້ ຂ້າພະເຈົ້າຈຶ່ງໄດ້ນັ່ງເທິງເຮືອໄປຢ້ຽມຊົມອ່າວຮ້າລອງ, ໄດ້ເຫັນປະຈັກຕາບັນດາຫນ່ວຍພູ ທີ່ໃຫຍ່ໂຕມະໂຫຖານ. ພວກຫລານໄປທ່ຽວນຳກໍມັກຫລາຍ ເພາະຍັງໄດ້ເຫັນນົກອີນຊີບິນຈາກພູລົງ. “
ອ່າວຮ້າລອງ ບໍ່ພຽງແຕ່ມີຄວາມງາມດ້ວຍຮູບຊົງຂອງພູຫີນ ນ້ຳທະເລທີ່ຂຽວສະອາດ ແລະ ທ້ອງຟ້າສົດໃສເທົ່ານັ້ນ, ຫາກຍັງສ້າງຄວາມດູດດື່ມດ້ວຍລະບົບຖ້ຳ ທີ່ສວຍງາມ ແລະ ມີຊີວິດຊີວາອືກດ້ວຍ.
ຖຳ້ ທຽນກຸງ
ພາບ:internet
|
ໃນລະບົບຖ້ຳຂອງອ່າວຮ້າລອງ ນັ້ນ, ຖຳ້ ທຽນກຸງ, ເດົາໂກ, ສຶງສົດ ມີຄວາມງາມມະຫັດສະຈັນເຮັດໃຫ້ນັກທ່ອງທ່ຽວເມື່ອເຂົ້າຢ້ຽມຊົມໃນຖຳ້ລ້ວນແຕ່ຮູ້ສຶກຕົກສະເຫງິ້ຕໍ່ຄວາມງາມຂອງຫີນຍ້ອຍດ້ວຍຮູບຮ່າງທີ່ແຕກຕ່າງກັນໂດຍທຳມະຊາດສ້າງຂຶ້ນກ່ອຍນີ້ນັບຮ້ອຍປີ. ອ້າຍ ໂດກວກຮຸ່ງ, ນັກທ່ອງທ່ຽວມາຈາກນະຄອນຫລວງ ຮ່າໂນ້ຍ ໃຫ້ຮູ້ວ່າ:
“ເມື່ອຍ່າງເຂົ້າຖ້ຳຮູ້ສຶກອາກາດເຢັນສະບາຍ. ຖ້ຳນີ້ຖືກຕັ້ງຊື່ວ່າສຶງສົດ (ຕົກສະເງີ້) ແມ່ນເໝາະສົມທີ່ສຸດ. ເພາະຜູ້ໃດເຂົ້າຖຳ້ກໍຕົກສະເຫງິ້ຕໍ່ຄວາມງາມທີ່ເປັນຫລາຍຮູບຫລາຍແບບຂອງຖຳ້ ໂດຍທຳມະຊາດດົນບັນດານໃຫ້.”
ສຳລັບນັກທ່ອງທ່ຽວຫລາຍຄົນແລ້ວ, ຮ້າລອງສວຍງາມກວ່າໝູ່ໃນຍາມສາຍັນ. ສ່ວນໃນຍາມຄຳ່ຄືນ ຮ້າລອງ ກໍສ້າງຄວາມປະທັບໃຈໃຫ້ນັກທ່ອງທ່ຽວ ດ້ວຍສີສັນຫລາກຫລາຍຂອງໄຟດອກທີ່ສ່ອງແສງຈາກບັນດາເຮືອທ່ອງທ່ຽວບົນທະເລ. ສຽງຄື້ນທະເລທົບໃສ່ຝັ່ງພ້ອມກັບສາຍລົມຢູ່ນອດທະເລພັດມາ ໄດ້ເຮັດໃຫ້ນັກທ່ອງທ່ຽວຮູ້ສຶກສະຫວາດສະເຫວີຍທີ່ສຸດ. ທ່ານ Paul, ນັກທ່ອງທ່ຽວມາຈາກ ຝລ່ັງ ເວົ້າວ່າ:
“ທິວທັດທຳມະຊາດຢູ່ອ່າວຮ້າລອງສວຍງາມຫລາຍ, ພວກຂ້າພະເຈົ້າມັກທີ່ສຸດ. ນີ້ແມ່ນແຫ່ງທີ່ສວຍງາມພິເສດ. ຖ້າຜູ້ໃດໄປຢ້ຽມຢາມຫວຽດນາມ ຈົ່ງມາຢ້ຽມ ອ່າວຮ້າລອງ. ເມື່ອກັບບ້ານ, ຂ້າພະເຈົ້າຈະໃຫ້ໝູ່ເພື່ອນ ແລະ ຄອບຄົວຊົມບັນດາຮູບຖ່າຍກ່ຽວກັບຮ້າລອງ.”
ດ້ວຍບັນດາຄຸນຄ່າພິເສດກ່ຽວກັບຫລັກຄວາມງາມຂອງ ອ່າວຮ້າລອງ ນັກທ່ອງທ່ຽວມາຢ້ຽມຢາມອ່າວຮ້າລອງ ບໍ່ພຽງແຕ່ຢ້ຽມຢາມສິ່ງມະຫັດສະຈັນຂອງໂລກເທົ່ານັ້ນ ຫາກຍັງຢ້ຽມຊົມຫໍພິພິດທະພັນທໍລະນີສາດອັນລຳ້ຄ່າທີ່ໄດ້ຮັບການຮັກສາໄວ້ຢູ່ກາງແຈ້ງມາເປັນເວລານັບ 300 ລ້ານປີອີກດ້ວຍ. ບັນດາຖຳ້ດັ່ງກ່າວແມ່ນພະຍານຫລັກຖານຢ່າງມີຊີວິດຊີວາກ່ຽວກັບລະດັບນຳ້ທະເລຜ່ານແຕ່ລະໄລຍະ. ສິ່ງແວດລ້ອມທໍລະນີສາດຂອງອ່າວຮ້າລອງ ຍັງແມ່ນແຫຼ່ງກຳເນີດບັນດາຄຸນຄ່າອື່ນຄື: ຊີວະນາໆພັນ, ວັດທະນະທຳບູຮານຄະດີ ແລະ ບັນດາຄຸນຄ່າວັດທະນະທຳມະນຸດອື່ນ. ສະນັ້ນ ແຂວງ ກວ໋າງນີງ ພວມດຳເນີນການຍື່ນສະເຫນີ UNESCO ຮັບຮອງອ່າວຮ້າລອງແມ່ນມໍລະດົກໂລກຄັ້ງທີ 3, ໂດຍອີງໃສ່ບັນດາຄຸນຄ່າກ່ຽວກັບບູຮານຄະດີ ແລະ ຊີວະນາໆພັນໃນອ່າວຮ້າລອງ. ເປັນອັນວ່າ ຮ້າລອງ ຈະສືບຕໍ່ຢືນຢັນແມ່ນທັດສະນີຍະພາບທີ່ຂາດບໍ່ໄດ້ໃນລາຍການທ່ອງທ່ຽວ ບັນດາສິ່ງມະຫັດສະຈັນທຳມະຊາດຂອງໂລກ.