(vovworld) - ເມື່ອໄປຢ້ຽມຢາມມ໋ອງກ໋າຍ, ແຂວງກວາງນິງ, ນັກທ່ອງທ່ຽວບໍ່ພຽງແຕ່ມີໂອກາດໄດ້ໄປຕະຫຼາດຊາຍແດນ, ຢ້ຽມຢາມດ່ານຊາຍແດນ, ພັກເຊົາຢູ່ແຄມແມ່ນ້ຳກາລອງ ຫຼືໄປຈ່າໂກມູ້ຍງອກ ອາບນ້ຳທະເລ ກໍ່ຄືແວ່ຢາມມູ້ຍຈ່າວິ້, ຫາດຊາຍທະເລຕອນເໜືອສຸດຂອງຫວຽດນາມ, ຖ່າຍຮູບເພື່ອເປັນທີ່ລະລຶກເທົ່ານັ້ນ, ນັກທ່ອງທ່ຽວຍັງມີໂອກາດໄດ້ຮັບປະທານອາຫານເຍື່ອງພິເສດສະເພາະຂອງເຂດດິນນີ້ອີກດ້ວຍ.
ນະຄອນມ໋ອງກ໋າຍ
(ພາບ: ອິນເຕີແນດ)
ກ່ອນຈະເດີນທາງໄປນະຄອນມ໋ອງກ໋າຍ, ພວກເພື່ອນຜູ້ທີ່ເຄີຍໄປມ໋ອງກ໋າຍໄດ້ແນະນຳໃຫ້ພວກຂ້າພະເຈົ້າວ່າ: “ຢ່າລືມຮັບປະທານເຍື່ອງອາຫານພິເສດສະເພາະຕ່າງໆຢູ່ມ໋ອງກ໋າຍ ຄື: ນົກເປັດນ້ຳອ່ອມ, ເຂົ້າປຽກສິນທະເລ,… ”.
ພາຍຫຼັງເດີນທາງຈາກນະຄອນຫຼວງຮ່າໂນ້ຍ ເປັນເວລາ 5 ຊົ່ວໂມງ, ຮອດ ເວລາ 18 ໂມງ, ພວກຂ້າພະເຈົ້າໄດ້ໄປຮອດນະຄອນມ໋ອງກ໋າຍ. ຢູ່ທີ່ນີ້, ພວກຂ້າພະເຈົ້າໄດ້ຮັບການຕ້ອນຮັບຢ່າງອົບອູ່ນສຸດຈິດສຸດໃຈຈາກບັນດາອ້າຍເອື້ອຍນ້ອງທີ່ເຮັດວຽກຢູ່ສະພາປະຊາຊົນນະຄອນ. ໃນຄາບເຂົ້າຕ້ອນຮັບພວກຂ້າພະເຈົ້າມີອາຫານຫຼາຍເຍື່ອງ. ອ້າຍ ຮ່ວາງວັນທື, ຮອງປະທານສະພາປະຊາຊົນນະຄອນໄດ້ເວົ້າກັບຜູ້ຮັບໃຊ້ແນະນຳໃຫ້ພວກຂ້າພະເຈົ້າກ່ຽວກັບອາຫານແຕ່ລະເຍື່ອງ.
“ນີ້ແມ່ນອາຫານນົກເປັດນ້ຳອ່ອມ ໂດຍພໍ່ຄົວຄົນຈີນປຸງແຕ່ງ. ອາຫານເຍື່ອງນີ້ແມ່ນຄົວກັບນ້ຳສະອີວ, ເຫັດຫອມ, ຢາພື້ນເມືອງ ແລະ ເຄື່ອງເທດອື່ນອີກ. ແຂກມາກິນເຄີຍເອີ້ນອາຫານເຍື່ອງນີ້ວ່າແກງນົກເປັດນ້ຳ. ອາຫານນີ້ແມ່ນດີໃຫ້ສຸຂະພາບ”.
ນົກເປັດນ້ຳອ່ອມກັບຢາພື້ນເມືອງ
(ພາບ: ອິນເຕີແນດ)
ໄປຢ້ຽມຢາມມ໋ອງກ໋າຍ, ນອກຈາກກິນສິນທະເລແລ້ວ, ນົກເປັດນ້ຳ ແມ່ນອາຫານທີ່ຂາດບໍ່ໄດ້ໃນລາຍການອາຫານທີ່ຄວນຮັບປະທານ. ອາຫານເຍື່ອງທີ່ປຸງແຕ່ງຈາກ ນົກເປັດນ້ຳມີລົດຊາດຂອງອາຫານຈີນ, ເພາະວ່າເຄື່ອງເທດເພື່ອປຸງແຕ່ງອາຫານເຍື່ອງນີ້ລ້ວນແຕ່ແມ່ນຂອງຈີນ. ນາງ ແຫ້ງ, ຜູ້ຮັບໃຊ້ຂອງຮ້ານອາຫານໃຫ້ຮູ້ວ່າ, ສາມາດປຸງແຕ່ງນົກເປັດນ້ຳເປັນອາຫານຫຼາຍເຍື່ອງໄດ້:
“ນົກເປັດນ້ຳທີ່ນຳມາປຸງແຕ່ງແຊບທີ່ສຸດແມ່ນມີນ້ຳໜັກປະມານ 4 ສະຫຼຶງ, ແລະ ຖືກລ້ຽງຢູ່ມ໋ອງກ໋າຍ. ນົກເປັດນ້ຳສາມາດປຸງແຕ່ງເປັນອາຫານ 8 ເຍື່ອງຄື: ນົກເປັດນ້ຳໜຶ້ງ, ນົກເປັດນ້ຳອົບ, ນົກເປັດນ້ຳຂົ້ວ, ນົກເປັດນ້ຳຂົ້ວເກືອ, ນົກເປັດນ້ຳຄົວ, ເຂົ້າປຽກນົກເປັດນ້ຳ, ເຂົ້າໜຽວນົກເປັດນ້ຳ, ນົກເປັດນ້ຳອ່ອມໃນໝໍ້ດິນ”.
ເມື່ອເວົ້າເຖິງເຍື່ອງອາຫານນົກເປັດນ້ຳ, ອ້າຍທື ໄດ້ແນະນຳດ້ວຍຄວາມເອກອ້າງທະນົງໃຈວ່າ, ນີ້ແມ່ນອາຫານບຳລຸງສຸຂະພາບ. ປະຈຸບັນ, ຢູ່ມ໋ອງກ໋າຍ ມີຫຼາຍຟາມລ້ຽງນົກເປັດນ້ຳ. ນອກຈາກອາຫານເຍື່ອງຕ່າງໆທີ່ປຸງແຕ່ງຈາກນົກເປັດນ້ຳແລ້ວ, ປາທູອ່ອມໝາກເຂືອສີອິດກໍ່ແມ່ນອາຫານພິເສດສຳລັບຜູ້ທີ່ໄປມ໋ອງກ໋າຍ ເທື່ອທຳອິດຄືພວກຂ້າພະເຈົ້າ.
“ນີ້ແມ່ນ ປາທູອ່ອມໝາກເຂືອສີອິດ, ໃນອາຫານເຍື່ອງນີ້ມີໝາກເຂືອສີອິດ, ໝາກເຜັດຂຽວ, ໝາກເຜັດແດງ, ເຫັດຫອມ, ອາຫານເຍື່ອງນີ້ແມ່ນຂອງຈີນ, ແຕ່ເມື່ອນຳເຂົ້າຫວຽດນາມ, ເຂົາເຈົ້າໄດ້ເອົາຜັກອີ່ເລີດ, ຜັກຫອມເຮືອດ ໃສ່ຕື່ມເຮັດໃຫ້ອາຫານເຍື່ອງນີ້ຫອມ ແລະ ແຊບກວ່າ.
ປາທູອ່ອມໝາກເຂືອສີອິດ
(ພາບ: ອິນເຕີແນດ)
ໄປມ໋ອງກ໋າຍ ຖ້າຫາກບໍ່ໄດ້ກິນເຂົ້າປຽກສິນທະເລ ແມ່ນບໍ່ທັນເຂົ້າໃຈໝົດກ່ຽວກັບເຂດດິນແຫ່ງນີ້. ອ້າຍ ຫງວຽນຫວຽດເດິກ, ຢູ່ບໍລິສັດທ່ອງທ່ຽວ ຫື້ວງິ (Huu Nghi) ກວາງນິງ, ໃຫ້ຮູ້ວ່າ, ອ້າຍໄດ້ໄປຫຼາຍແຫ່ງ ແລະ ກິນເຂົ້າປຽກຫຼາຍປະເພດແລ້ວ, ແຕ່ເຫັນວ່າເຂົ້າປຽກສິນທະເລຢູ່ມ໋ອງກ໋າຍ ມັນມີລົດຊາດພິເສດ ແລະ ແຊບຫຼາຍ.
“ເມື່ອເວົ້າເຖິງມ໋ອງກ໋າຍ, ແມ່ນເຕື້ອງເຖິງເຂົ້າປຽກສິນທະເລ, ບໍ່ພຽງແຕ່ຄົວພ້ອມກັບສິນທະເລເທົ່ານັ້ນ, ຫາກຍັງຄົວກັບຊີ້ນປະເພດອື່ນໆອີກ. ເຂົາເຈົ້າເຄີຍເວົ້າວ່າ, ສາວເດີ່ມຮ່າ, ໄກ່ຕຽນອຽນ, ໝູມ໋ອງກ໋າຍ. ໃນເຂົ້າປຽກສິນທະເລມີ ກຸ້ງ, ປູ, ໄສ້ໝູ່, ຕັບ, ໝາກຫົວໃຈໝູ, ພັກຫອມ, ເຄື່ອງເທດ…”
ເຂົ້າປຽກສິນທະເລ
(ພາບ: ອິນເຕີແນດ)
ຕາມອ້າຍ ເດິກແລ້ວ, ຢາກຮັບປະທານອາຫານທຸກເຍື່ອງຂອງມ໋ອງກ໋າຍໃຫ້ໝົດນັ້ນ, ນັກທ່ອງທ່ຽວຕ້ອງມີເວລາຢູ່ທີ່ນີ້ນັບເປັນເດືອນ. ອາຫານຢູ່ ມ໋ອງກ໋າຍ ອຸດົມສົມບຸນດ້ວຍຫຼາຍເຍື່ອງ. ເພາະວ່າມ໋ອງກ໋າຍ ແມ່ນນະຄອນຕິດກັບຊາຍແດນ, ທັງແມ່ນແຫ່ງທີ່ມີພື້ນຖານເສດຖະກິດພັດທະນາ ດັ່ງນັ້ນຈຶ່ງດຶງດູດປະຊາຊົນຈາກທຸກແຖບຖີ່ນມາດຳລົງຊີວິດ, ທຳມາຫາກິນຢູ່ທີ່ນີ້ ແລະ ເຂົາເຈົ້າກໍ່ໄດ້ນຳເອົາວິທີປຸງແຕ່ງອາຫານຂອງແຕ່ລະເຂດໄປພ້ອມ. ດັ່ງນັ້ນ, ມາຢ້ຽມຢາມມ໋ອງກ໋າຍ ແມ່ນມາຕະຫຼາດອາຫານທີ່ອຸດົມສົມບຸນດ້ວຍຫຼາຍເຍື່ອງ, ຫຼາຍປະເພດ, ພ້ອມກັບວິທີປຸງແຕ່ງອາຫານທີ່ແຕກຕ່າງກັນ.