(vovworld) - ສຳຫຼັບເມືອງ ນູ໋ຍແທ່ງ, ແຂວງ ກວາງນາມ, ປະຊາຊົນຢູ່ທີ່ນີ້ຜູ້ໃດກໍ່ຮູ້ສຶກເອກອ້າງທະນົງໃຈເມື່ອເຕື້ອງເຖິງລຸງ Nam Cong, ໝາຍເຖິງປະທານສະພາແຫ່ງລັດ Vo Chi Cong. ແລະ ຄວາມເອກອ້າງທະນົງໃຈນີ້ຍິ່ງທະວີຄູນຂຶ້ນຕື່ມ, ເມື່ອຫວ່າງແລ້ວນີ້, ເຂດອະນຸສະຖານ Vo Chi Cong ທີ່ຂຶ້ນກັບບ້ານ ເຄືອງມີ໋, ຕາແສງຕາມຊວນ 1, ເປັນກຽດໄດ້ຮັບໃບຮັບຮອງວ່າແມ່ນປູຊະນີຍະສະຖານລະດັບຊາດ, ໃນໂອກາດສະເຫຼີມສະຫຼອງ 100 ປີ ແຫ່ງວັນຄ້າຍວັນເກີດປະທານສະພາແຫ່ງລັດ Vo Chi Cong.
![ຮູບພາບຂອງ Nam Cong ຍືນຍົງຄົງຕົວຕະຫຼອດໄປ - ảnh 1](https://photo-cms-vovworld.zadn.vn/w730/uploaded/vovworld/bcgmbuiq/2012_08_17/nam%20cong3.jpg)
ເຂດອະນຸສະຖານ Vo Chi Cong
(ພາບ: google.com.vn)
ເຂດອະນຸສະຖານປະທານສະພາແຫ່ງລັດ Vo Chi Cong ໄດ້ຮັບການກໍ່ສ້າງຂຶ້ນກ່ອນນີ້ 10 ປີ, ໂດຍຟື້ນຟູຮູບເດີມຂອງເຂດເຮືອນເກົ່າ, ດັ່ງນັ້ນ, ເຂດອະນຸສະຖານ Vo Chi Cong ຍັງຄົງຮັກສາຄວາມລຽບງ່າຍຂອງບ້ານນາໃນເຂດທົ່ງພຽງແຂວງກວາງນາມ, ມີຮົ້ວດ້ວຍແຖວຕົ້ນໄມ້ທີ່ຂຽວອຸ່ມທູ່ມ, ຕົ້ນໝາກທີ່ປູກເປັນແຖວຊື່ຈັດ. ເຮືອນ 2 ຫຼັງໄດ້ຮັບການປຸກສ້າງຕາມແບບເຮືອນບູຮານຂອງແຂວງກວາງນາມ, ແທ່ນບູຊາຕັ້ງຢູ່ໃຈກາງເຮືອນ, ທັງສອງເບື້ອງມີສອງຫ້ອງ, ຢູ່ເບື້ອງໜ້າມີລະບຽງ. ໃນຫໍວາງສະແດງເຊິ່ງຕັ້ງຢູ່ໃຈກາງເຂດອະນຸສະຖານ, ຫໍພິພິດທະພັນກວາງນາມ ໄດ້ແນະນຳ ວັດຖຸພັນ50ຊິ້ນ, ເອກະສານ ແລະ ຮູບພາບຂະໜາດໃຫຍ່, ນ້ອຍເກືອບ 200 ແຜ່ນ ທີ່ກ່ຽວຂ້ອງໂດຍກົງເຖິງຊີວິດແຫ່ງການເຄື່ອນໄຫວປະຕິວັດຂອງສະຫາຍ Vo Chi Cong ນັບແຕ່ປີ 1945 ມາຮອດປະຈຸບັນ. ຄືໂທລະສັບຕັ້ງໂຕະ, ຈານໃສ່ອາຫານ, ບີດົງໃສ່ນ້ຳຢາພື້ນເມືອງ, ຊຸດເຄື່ອງມືການແພດ, ຖົງຜ້າ, ປືນສັ້ນ, ແຜນທີ່ການທະຫານ ເຊິ່ງລຸງ Nam Cong ນຳໃຊ້ໃນຊຸມປີປະຕິບັດງານຢູ່ສູນກາງກົມພາກໃຕ້ ແລະ ເຂດພັກການທະຫານເຂດ 5 (1961-1966). ນອກນັ້ນຍັງມີຮູບພາບ 2 ຊຸດ ແລະ ອາລະບ້ັມຮູບ 4 ຫົວທີ່ສະແດງໃຫ້ເຫັນອາລົມຈິດອັນສະໜິດສະໜົມຂອງທ່ານທີ່ມີຕໍ່ພວກຫຼານເຍົາວະຊົນ, ອະນຸຊົນ, ກັບບ້ານເກີດເມືອງນອນກວາງນາມ - ດ່ານັ້ງ, ປະຊາຊົນ, ເພື່ອນມິດສະຫາຍຢູ່ບ່ອນທີ່ທ່ານເຄີຍຕໍ່ສູ້ ແລະ ປະຕິບັດງານ, ບັນດາຮູບພາບກ່ຽວກັບການຢ້ຽມຢາມສະໜາມຮົບເກົ່າ… ໃນຈຳນວນວັດຖຸພັນທີ່ວາງສະແດງຢູ່ອະນຸສະຖານຍັງມີປື້ມບັນທຶກການຢ້ຽມຢາມເຮືອນເກົ່າຂອງລຸງ Nam Cong. ໃນປື້ມນັ້ນລຸງຂຽນວ່າ: ຂ້າພະເຈົ້າຮູ້ສຶກຕື້ນຕັນໃຈທີ່ສຸດ ເມື່ອໄດ້ກັບມາຢ້ຽມຢາມເຂດອະນຸສະຖານ ໂດຍຄະນະພັກ ແລະ ອຳນາດການປົກຄອງແຂວງກວາງນາມ ກໍ່ສ້າງຂຶ້ນ. ກັບມາຢ້ຽມຢາມບ້ານເກີດເມືອງນອນ, ຂ້າພະເຈົ້າຫວນຄືນອະນຸສອນອັນເລິກເຊິ່ງຫຼາຍຢ່າງໃນຍາມເຍົາໄວ ແລະ ໃນຊຸມເດືອນປີທຳອິດເຂົ້າຮ່ວມການປະຕິວັດ … ໃນບໍລິເວນເຂດອະນຸສະຖານຍັງມີສວນຕົ້ນໄມ້, ໜອງລ້ຽງປາຄາວຍັງມີຊີວິດລຸງ Nam Cong ນິຍົມທີ່ສຸດ. ທ່ານ Dinh Hai, ຫົວໜ້າພະແນກ ວັດທະນະທຳ - ກິລາ ແລະ ທ່ອງທ່ຽວແຂວງກວາງນາມ, ໃຫ້ຮູ້ວ່າ:
”ໃນຊຸມປີຜ່ານມາ, ພວກຂ້າພະເຈົ້າໄດ້ດຳເນີນການຊອກຫາ, ຮຽບຮຽງບັນດາເອກະສານ, ຮູບພາບ ກໍ່ຄືວັດຖຸພັນກ່ຽວກັບສະຫາຍ Vo Chi Cong. ເນື່ອງໃນໂອກາດສະເຫຼີມສະຫຼອງ 100 ປີ ແຫ່ງວັນຄ້າຍວັນເກີດປະທານສະພາແຫ່ງລັດ Vo Chi Cong, ພວກຂ້າພະເຈົ້າໄດ້ສົມທົບກັບຫໍພິພິດທະພັນປະຫວັດສາຫວຽດນາມ, ບັນດາອົງການກ່ຽວຂ້ອງ, ບັນດາແຫ່ງທີ່ສະຫາຍເຄີຍເຮັດວຽກ ເພື່ອຊອກຫາເອກະສານຕື່ມອີກ. ນອກນັ້ນ, ພວກຂ້າພະເຈົ້າກໍ່ຈະສືບຕໍ່ດຳເນີນການຄົ້ນຫາ, ເພີ່ມເຕີມບັນດາວັດຖຸພັນໃນທ້ອງຖີ່ນ ກໍ່ຄືເອກະສານໃນຄອບຄົວສະຫາຍຕື່ມອີກ ເພື່ອມີວັດຖຸພັນ ແລະ ເອກະສານກ່ຽວກັບຊີວິດ ແລະ ພາລະກິດຂອງສະຫາຍຢ່າງຄົບຖ້ວນ”
![ຮູບພາບຂອງ Nam Cong ຍືນຍົງຄົງຕົວຕະຫຼອດໄປ - ảnh 2](https://photo-cms-vovworld.zadn.vn/w730/uploaded/vovworld/bcgmbuiq/2012_08_17/nam%20cong%201.jpg)
ພິທີຮັບໃບຮັບຮອງເຂດອະນຸສະຖານ Vo Chi Congແມ່ນປູຊະນີຍະສະຖານລະດັບຊາດ
(ພາບ: google.com.vn)
ປະຈຸບັນ, ເຂດອະນຸສະຖານປະທານສະພາແຫ່ງລັດ Vo Chi Cong ພວມໄດ້ຮັບການບຸລະນະ, ຍົກລະດັບເພື່ອເໝາະສົມກັບທັດສະນີຍະພາບ, ສະຖາປັດຕະຍະກຳ, ພ້ອມທັງສະແດງໃຫ້ເຫັນຄວາມນັບຖື, ຄວາມຮູ້ບຸນຄູນຂອງປະຊາຊົນທົ່ວປະເທດທີ່ມີຕໍ່ການອຸທິດສ່ວນອັນໃຫຍ່ຫຼວງຂອງທ່ານເຂົ້າໃນພາລະກິດປະຕິວັດຂອງພັກ ແລະ ຂອງຊາດຫວຽດນາມ. ທ່ານ Dinh Hai ຫົວໜ້າພະແນກວັດທະນະທຳ - ກິລາ ແລະ ທ່ອງທ່ຽວແຂວງກວາງນາມ, ໃຫ້ຮູ້ວ່າ:
”ເຂດອະນຸສະຖານ Vo Chi Cong ໄດ້ຮັບການຮັບຮອງວ່າແມ່ນເຂດປູຊະນີຍະສະຖານລະດັບຊາດ ອັນໄດ້ເປັນການຢັ້ງຢືນກ່ຽວກັບດ້ານປະຫວັດສາດ, ມູນຄ່າຂອງເຂດປູຊະນີຍະສະຖານ, ທັງແມ່ນຄວາມເອກອ້າງທະນົງໃຈຂອງປະຊາຊົນກວາງນາມ, ປະຊາຊົນເມືອງນູ໋ຍແທ່ງ, ຕາແສງເຕິນຊວນ. ແຫ່ງທີ່ໄດ້ກຳເນີດວິລະຊົນຂອງຊາດ, ຜູ້ນຳດີເດັ່ນທີ່ໄດ້ປະກອບສ່ວນເຂົ້າໃນພາລະກິດປົກປັກຮັກສາປະເທດສັງຄົມນິຍົມ. ພວກເຮົາຈະມານະພະຍາຍາມຮັກສາ ແລະ ເສີມຂະຫຍາຍຄຸນຄ່າຂອງເຂດປູຊະນີຍະສະຖານແຫ່ງນີ້ໃຫ້ກາຍເປັນສະຖານທີ່ເພື່ອໃຫ້ປະຊາຊົນ, ພິເສດແມ່ນຊາວໜຸ່ມ, ເຍົາວະຊົນ, ນັກສຶກສາມາຢ້ຽມຢາມ, ຄົ້ນຄ້ວາ ແລະ ຊອກຮູ້ກ່ຽວກັບຊີວິດຂອງສະຫາຍ Vo Chi Cong”.
![ຮູບພາບຂອງ Nam Cong ຍືນຍົງຄົງຕົວຕະຫຼອດໄປ - ảnh 3](https://photo-cms-vovworld.zadn.vn/w730/uploaded/vovworld/bcgmbuiq/2012_08_17/nam%20cong%202.jpg)
ເຂດອະນຸສະຖານ Vo Chi Cong
(ພາບ: google.com.vn)
ໃນຊຸມມື້ນີ້, ເຂດອະນຸສະຖານປະທານສະພາແຫ່ງລັດ Vo Chi Cong ຍາມໃດກໍ່ຕ້ອນຮັບປະຊາຊົນບັນດາແຂວງຢູ່ອ້ອມຂ້າງ ແລະ ປະຊາຊົນທີ່ມາຈາກທ້ອງຖີ່ນຕ່າງໆໃນທົ່ວປະເທດມາຢ້ຽມຢາມເປັນຈຳນວນຫຼວງຫຼາຍ. ເພື່ອນ Nguyen To Nhu ຊາວໜຸ່ມມະຫາວິທະຍາໄລວິທະຍາສາດສັງຄົມ ແລະ ວັດທະນະທຳມະນຸດນະຄອນ ໂຮ່ຈີມິນ ແບ່ງປັນວ່າ:
”ສຳຫຼັບຂ້າພະເຈົ້າແລ້ວ, ໄດ້ມາຢ້ຽມຢາມບ້ານເກີດເມືອງນອນຂອງລຸງ Vo Chi Cong ໃນຄັ້ງນີ້ ແມ່ນມີຄວາມໝາຍທີ່ສຸດ. ຂ້າພະເຈົ້າເຫັນວ່າວັດຖຸພັນທັງໝົດທີ່ຕິດພັນກັບຊີວິດການເຄື່ອນໄຫວປະຕິວັດຂອງລຸງຄື ເກີບຢາງ, ໄມ້ຄ້ອນເທົ້າ, ວິທະຍຸ… ລ້ວນແຕ່ທຳມະດາງ່າຍດາຍຄືດັ່ງຕົວລຸງເອງ”.
ທ່ານປະທານສະພາແຫ່ງລັດ Vo Chi Cong ແມ່ນພະນັກງານການນຳທີ່ດີເດັ່ນ, ຍາມໃດກໍ່ຍົກອອກບັນດາຂໍ້ຕົກລົງທີ່ຖືກຕ້ອງໃນຈຸດເວລາທີ່ສຳຄັນ. ໃນຕະຫຼອດເກືອບ 80 ປີ ແຫ່ງການເຄື່ອນໄຫວປະຕິວັດ, ຍາມໃດທ່ານກໍ່ມີຄວາມໃກ້ຊິດກັບປະຊາຊົນ, ມີຫົວຄິດປະດິດສ້າງ ແລະ ມີການຕົກລົງທີ່ເດັດຂາດໃນຄວາມຄິດ ແລະ ການກະທຳ ເພື່ອປະເທດຊາດ ແລະ ເພື່ອປະຊາຊົນ. ບັນດາວັດຖຸພັນຂອງທ່ານທີ່ໄດ້ຮັກສາໄວ້ໃນເຂດອະນຸສະຖານ ຈະແມ່ນສາງເອກະສານອັນລ້ຳຄ່າຂອງຊາວບ້ານເຄືອງມີ໋, ຕາແສງຕາມຊວນ 1, ເມືອງນູ໋ແທ່ງ, ແຂວງກວາງນາມເວົ້າສະເພາະ ແລະ ຂອງຊາດຫວຽດນາມເວົ້າລວມ.