(vovworld) - ໂດຍແມ່ນຊາວຫວຽດນາມ, ໃຜໆກໍ່ຢາກໄດ້ມາຢ້ຽມຢາມມູຍກ່າເມົາ, ເຊິ່ງແມ່ນຕອນດິນໃຕ້ສຸດຂອງຫວຽດນາມ. ມາຢ້ຽມຢາມກ່າເມົາ ແມ່ນມາຢ້ຽມຢາມທະເລ, ປ່າໄມ້ ແລະ ໄດ້ສຳພັດກັບຫຼັກໝາຍອະທິປະໄຕຂອງປະເທດຊາດ.
ມູຍກ່າເມົາແມ່ນແຫຼມແຫ່ງໜຶ່ງຢູ່ຕອນໃຕ້ສຸດຂອງຫວຽດນາມ, ທີ່ຂຶ້ນກັບບ້ານ ມູຍ, ຕາແສງເດິດມູຍ, ເມືອງງອກຮ໋ຽນ, ຫ່າງຈາກນະຄອນກ່າເມົາກວ່າ 100 ກມ. ເດິດມູຍກ່າເມົາ ໄດ້ຮັບການຂຸດຄົ້ນເມື່ອທ້າຍສະຕະວັດທີ 17, ຕົ້ນສະຕະວັດທີ 18.
ຫຼັກໝາຍປະຊາທິປະໄຕ GPS0001 ຢູ່ບ່ອນໃຕ້ສຸດຂອງຫວຽດນາມ
(ພາບ: google.com.vn)
ລ່ອງເຮືອຈາກນະຄອນໂຮ່ຈີມິນໄປຍັງຕາແສງເດິດມູຍ ພາຍໃນເວລາ 3 ຊົ່ວໂມງ, ເພື່ອນຈະເຫັນປະຈັກຕາຊີວິດຂອງຊາວເດິດມູຍ, ດ້ວຍເຮືອນນ້ອຍໆທີ່ໂປໂລອອກລຽບຕາມສອງພາກຝັ່ງ, ຮ້ານຂາຍສິນຄ້າ, ສະ ຖານນີເກັບຊີ້ສິນທະເລ, ຕະຫຼາດ… ອາກາດຢູ່ທີ່ນີ້ເຢັນສະບາຍ ແລະ ສະຫງົບສຸກ
ເຮືອຈັກທີ່ຂົນສົ່ງແຂກມາຢ້ຽມຢາມມູຍກ່າເມົາບໍ່ແມ່ນເລື່ອງທີ່ໃໝ່ອ່ຽມສຳຫຼັບປະຊາຊົນຢູ່ແຫ່ງນີ້ອີກ. ຍ້ອນເຫດນັ້ນ, ເມື່ອເຂົ້າມາຮອດຝັ່ງໄດ້ມີລົດຈັກຫຼາຍຄັນລໍຖ້າເພື່ອເຊີນເພື່ອນໄປຄົ້ນຫາເຂດດິນແຫ່ງນີ້. ເອື້ອຍ Huong Giang ພ້ອມກັບເພື່ອນກຸ່ມໜຶ່ງ, ມາຈາກນະຄອນຫຼວງຮ່າໂນ້ຍ ແບ່ງປັນວ່າ:
”ພວກຂ້າພະເຈົ້າແມ່ນຜູ້ທີ່ມັກໄປທ່ອງທ່ຽວ ໄດ້ມາຢ້ຽມຢາມເດິດ ມູຍ ແລະ ເຫັນວ່າປະຊາຊົນຢູ່ທີ່ນີ້ມີຄວາມສະໜິດສະໜົມຮັກແພງແຂກຄົນ, ອັນໄດ້ສ້າງຄວາມປະທັບໃຈໃຫ້ແກ່ພວກຂ້າພະເຈົ້າ ກ່ຽວກັບເຂດດິນແດນແຫ່ງນີ້. ການທ່ອງທ່ຽວຄົ້ນພົບເດິດມູຍຂອງພວກຂ້າພະເຈົ້າແມ່ນຕິດພັນກັບຊາວກະສີກອນທີ່ເຮັດອາຊີບຂົນສົ່ງແຂກຢູ່ທີ່ນີ້. ເຂົາເຈົ້າຮູ້ຈັກດີເຂດດິນແຫ່ງນີ້, ດັ່ງນັ້ນພວກຂ້າພະເຈົ້າມີຄວາມອຸ່ນອ່ຽນໃຈທີ່ສຸດ. ສິ່ງສຳຄັນແມ່ນລາຄາຖືກ, ແລະ ພາຫະນະເພື່ອໄປທ່ອງທ່ຽວຄົ້ນຫາຢູ່ທີ່ນີ້ ດ້ວຍ ລົດຈັກແມ່ນສະດວກທີ່ສຸດ”.
ກາເມົາຕອນດິນໃຕ້ສຸດຂອງຫວຽດນາມ
(ພາບ: google.com.vn)
ສະຖານທີ່ທຳອິດທີ່ແຂກຢາກມາຢາມນັ້ນແມ່ນຕອນໃຕ້ສຸດຂອງປະ ເທດຊາດ, ເຊິ່ງຂີດໝາຍ ດ້ວຍຫຼັກໝາຍ GPS0001. ເມື່ອໄດ້ສຳພັດກັບຫຼັກໝາຍປະຊາທິປະໄຕ, ອ້າຍ Phan Anh Tuan ພ້ອມກັບຄະນະນັກທ່ອງທ່ຽວທີ່ມາຈາກເລິມດົ່ງ ລ້ວນແຕ່ຮູ້ສຶກສະເທືອນໃຈ.
”ນີ້ແມ່ນເທື່ອທຳອິດທີ່ຂ້າພະເຈົ້າມາແຫ່ງນີ້. ໂດຍແມ່ນຊາວຫວຽດນາມຜູ້ໜຶ່ງ, ເຄີຍໄດ້ອ່ານ, ໄດ້ຟັງຫຼາຍກ່ຽວກັບມູຍກ່າເມົາແລ້ວ, ແຕ່ເມື່ອມາແຫ່ງນີ້ຈຶ່ງສາມາດຮູ້ໄດ້ໝົດວ່າ ປະເທດຕົນຍາວຄືແນວໃດ. ຜ່ານ ປື້ມໜັງສືພິມ, ສື່ມວນຊົນ, ຂ້າພະເຈົ້າບໍ່ທັນນຶກເຫັນໄດ້, ແຕ່ມາແຫ່ງນີ້ຈຶ່ງຮັບຮູ້ໄດ້ຄວາມສັກກະລະບູຊາຂອງປະເທດຊາດ”.
ປ່າສະຫງວນ ມູຍກ່າເມົາ ແມ່ນແຫ່ງດຶງດູດນັກທ່ອງທ່ຽວມາຢາມ
(ພາບ: google.com.vn)
ປ່າສະຫງວນ ມູຍກ່າເມົາ ກໍ່ແມ່ນສະຖານທີ່ດຶງດູດນັກທ່ອງທ່ຽວມາຢາມ. ໃນແຕ່ລະປີ, ເນື້ອທີ່ດິນຂອງປ່າສະຫງວນໄດ້ຮັບການຂະຫຍາຍອອກສູ່ທະເລນັບສິບແມດ. ນີ້ກໍ່ແມ່ນສິ່ງທີ່ດຶງດູດນັກທ່ອງທ່ຽວຫຼາຍຄົນມາຢ້ຽມຢາມ. ລະບົບພືດພັນອຸດົມສົມບູນ ດ້ວຍຫຼາຍປະເພດທີ່ຫາຍາກ. ສ່ວນສັດກໍ່ມີຫຼາຍປະເພດເຊັ່ນກັນ. ອ້າຍ Nguyen Chi Lam, ພະນັກງານປ່າສະຫງວນມູຍກ່າເມົາ, ໃຫ້ຮູ້ວ່າ:
”ປ່າສະຫງວນມີເນື້ອທີ່ທັງໝົດແມ່ນ 41.000 ເຮັກຕາ, ໃນປ່າມີສັດທີ່ມີຄ່າຫາຍາກຫຼາຍປະເພດ ເຊິ່ງມີຊື່ໃນປື້ມປົກແດງ ໝາຍເຖິງປື້ມກ່ຽວກັບສັດອັນລ້ຳຄ່າຄື: ລີງຫາງຍາວ, ງູຈົງອາງນ້ຳ, ນົກນ້ຳ. ”.
ກ່ຽວກັບພືດພັນໃນປ່າຊາຍເລນມີ 22 ປະເພດ. ໃນນັ້ນມີຮາກໄມ້ບາງປະເພດສາມາດຮັກສາດິນສັນດອນບໍ່ໃຫ້ດິນເຊາະເຈື່ອນ ສ້າງເປັນປ່າໄມ້ປ້ອງກັນແຄມທະເລ… ຕາມບັນດານັກວິທະຍາສາດແລ້ວ, ລະບົບປ່າຊາຍເລນຢູ່ທີ່ນີ້ມີພືດພັນ, ສັດສາວາສິ່ງຫຼາຍອັນດັບສອງຢູ່ໂລກ, ພຽງແຕ່ຖັດຈາກປ່າຊາຍເລນ Amazon ຢູ່ອາເມລິກາໃຕ້ ເທົ່ານັ້ນ. ທ່ານ Ly Hoang Tien, ປະທານຄະນະກຳມະການປະຊາຊົນຕາແສງ ເດິດມູຍ, ໃຫ້ຮູ້ວ່າ:
”ເດິດມູຍມີປ່າສະຫງວນແຫ່ງໜຶ່ງໄດ້ຮັບການຮັບຮອງວ່າແມ່ນເຂດສະສົມຊີວະນາໆພັນຂອງໂລກ, ແມ່ນສະຖານທີ່ທ່ອງທ່ຽວ, ພັກຜ່ອນຢ່ອນອາລົມ ແລະ ຄົ້ນຄ້ວາວິທະຍາສາດ. ປະຈຸບັນ, ປ່າສະຫງວນຍັງຮົກເຮື້ອວ່າງເປົ່າ, ບໍ່ທັນໄດ້ຮັບການລົງທຶນຢ່າງເໝາະສົມ. ຖ້າໄດ້ຮັບການລົງທຶນ, ພວກຂ້າພະເຈົ້າຄິດວ່າ, ນີ້ແມ່ນທ່າສະດວກປະກອບສ່ວນປັບປຸງຊີວິດການເປັນຢູ່ຂອງປະຊາຊົນໃຫ້ດີກວ່າເກົ່າ”
ສ່ວນອາຫານການກິນຢູ່ເດິດມູຍ ກໍ່ສ້າງຄວາມດຶງດູດນັກທ່ອງທ່ຽວເມື່ອມາແຫ່ງນີ້ເປັນພິເສດ. ບັນດາເຍື່ອງອາຫານພື້ນເມືອງ ທີ່ເຂັ້ມຂົ້ນ ດ້ວຍລົດຊາດອາຫານສົດຂອງພືດພັກ, ປູປານາໆຊະນິດ, ທັງແຊບນົວ ປະກອບກັບສຽງດົນຕີພື້ນເມືອງທີ່ອ່ອນຫວານຂອງທ້ອງ ຖິ່ນໄດ້ເຮັດ ໃຫ້ນັກທ່ອງທ່ຽວທຸກຄົນທີເຄີຍມາແຫ່ງນີ້ບໍ່ມີວັນທ່ີຈະລືມໄດ້