ນັກກິລາແລ່ນແລະລານ ຫງວຽນແທງຟຸກ ໄດ້ເຮັດໃຫ້ວົງການນັກວິຊາການ ແລະ ຜູ້ນິຍົມໃນທົ່ວປະເທດຕົກສະເງີ້ ເມື່ອໄດ້ຮັບຫຼຽນທອງສຳຫຼັບກິລາປະເພດຍ່າງໄລຍະທາງ 20 ກມ ດ້ວຍເວລາ 1 ໂມງ 35 ນາທີ ໃນການແຂ່ງຂັນກິລາຊິງຊະນະເລີດອາຊີ ເຊິ່ງຫາກໍ່ຈັດຂຶ້ນຢູ່ຍີ່ປຸ່ນ. ເປັນອັນວ່າ, ພາຍຫຼັງ 32 ປີ, ກິລາປະເພດແລ່ນແລະລານຂອງຫວຽດນາມຈຶ່ງໄດ້ຮັບຜົນງານປະທັບໃຈຄືດັ່ງກ່າວ. ເພື່ອຮັບຜົນງານປະທັບໃຈນີ້, ຫງວຽນແທງຟຸກ ຕ້ອງມີການເຝິກແອບຢ່າງບໍ່ຮູ້ອິດບໍ່ຮູ້ເມື່ອຍ. ນັກຂ່າວວິທະຍຸກະຈາຍສຽງຫວຽດນາມຂໍແນະນຳ ແທງຟຸກ, ນັກກິລາທີ່ໄດ້ຮັບການເຊີດຊູຈາກຜູ້ນິຍົມວ່າ ແມ່ນພະລາຊີນີແລ່ນແລະລານ. ເຊີນທ່ານຮັບຟັງ.
ໂດຍແມ່ນຄົນຕົວນ້ອຍໆແຕ່ແຂງແກ່ນ, ຫງວຽນແທງຟຸກ - ສະຖິຕິລະດັບຊາດຂອງກິລາປະເພດແລ່ນແລະລານຫວຽດນາມ ໄດ້ສະແດງຄວາມພາກພູມໃຈເມື່ອລົງສະໜາມບິນກັບເມືອບ້ານຢູ່ ດ່ານັ້ງ ພາຍຫຼັງໄດ້ຮັບໄຊຊະນະຢ່າງຂາດຂັ້ນທີ່ການແຂ່ງຂັນກິລາຊິງຂັນອາຊີເຊິ່ງຈັດຂຶ້ນຢູ່ຍີ່ປຸ່ນ.
”ສຳຫຼັບຂ້າພະເຈົ້າແລ້ວ, ນີ້ແມ່ນຄວາມຜາສຸກອັນໃຫຍ່ຫຼວງທີ່ສຸດ, ຍ້ອນວ່ານີ້ແມ່ນການແຂ່ງຂັນທີ່ຂ້ຽວຂາດ, ດັ່ງນັ້ນຂ້າພະເຈົ້າຈຶ່ງຕັ້ງໜ້າເຝິກແອບຢ່າງບໍ່ອູ້ອິດບໍ່ຮູ້ເມື່ອຍເພື່ອຍາດເອົາໄຊຊະນະໃຫ້ສົມກັບຄວາມມານະພະຍາຍາມຂອງຕົນໃນໄລຍະຜ່ານມາ”
ໃນຕະຫຼອດ 7 ປີຜ່ານມາ, ດ້ວຍຫຼຽນຄຳນັບ 10 ຫຼຽນ, ສ້າງສະຖິຕິລະດັບຊາດໄດ້ຫຼາຍສະຖິຕິ, ແລ້ວທຳລາຍສະຖິຕິໂດຍຕົນເອງສ້າງຂຶ້ນໄດ້ຫຼາຍສະຖິຕິນັ້ນ. ນັກກິລາ ຫງວຽນແທງຟຸກ ປຽບເໝືອນໂຕເຜີ້ງທີ່ດຸໝັ່ນຂະຫຍັນພຽນໃນການເຝິກແອບເພື່ອສ້າງສະຖິຕິລະດັບຊາດ. ປີ 2011, ກ່ອນທີ່ຈະເດີນທາງໄປຮ່ວມ ຊີເກັມ 26 ເຊິ່ງຈັດຂຶ້ນຢູ່ ອິນໂດເນເຊຍນັ້ນ, ຫງວຽນແທງຟຸກ ແມ່ນຜູ້ສຸດທ້າຍທີ່ໄດ້ຄັດເລືອກເຂົ້າບັນຊີລາຍຊື່ນັກກິລາ ແລ່ນແລະລານຫວຽດນາມ 41 ຄົນທີ່ໄດ້ເຂົ້າຮ່ວມການແຂ່ງຂັນ. ເວລານັ້ນ, ວົງການນັກວິຊາການຍັງເປັນຫ່ວງວ່າ ນັກກິລາຄົນດ່ານັ້ງຜູ້ນີ້ ຍັງໜຸ່ມແໜ້ນຫຼາຍ, ບໍ່ທັນມີປະສົບການໃນການແຂ່ງຂັນກິລາລະດັບສາກົນ. ແຕ່ວ່າ, ໃນການແຂ່ງຂັນລະດັບສາກົນຄັ້ງທຳອິດນີ້, ຫງວຽນແທງຟຸກ ໄດ້ນຳເອົາຫຼຽນຄຳທຳອິດໃນກິລາຍ່າງໄລຍະທາງ 20 ກມ ມາໃຫ້ຂະແໜງກິລາຫວຽດນາມ.
ຜູ້ນິຍົມກິລາປະເພດແລ່ນແລະລານຢູ່ນະຄອນ ດ່ານັ້ງ ຍັງຄົງຈື່ຈຳ ວ່າ ແທງຟຸກ ແມ່ນສາວນ້ອຍ, ຄົນຜີວດຳ ຢູ່ເຂດບ້ານນາໃນຕາແສງພູດອຍ ຮ່ວາເຊີນ, ເມືອງຮ່ວາວາງ ໄດ້ຮັບເຂົ້າໃນທິມກິລາແລ່ນແລະລານ. ເມື່ອເຫັນວ່າເອື້ອຍຂອງຕົນເມົາມົວກັບກິລາປະເພດນີ້, ນ້ອງຊາຍ ຫງວຽນແທງງຶງ ກໍຂໍພໍ່ແມ່ໃຫ້ລົງມາຢູ່ທົ່ງພຽງເພື່ອແອບຍ່າງກັບເອື້ອຍ. ສຳຫຼັບເອື້ອຍນ້ອງ ຫງວຽນແທງຟຸກ, ຫງວຽນແທງງຶງ ແລ້ວ, ການຍ່າງແມ່ນເລື່ອງທຳມະດາຢູ່.
ກ່ອນທີ່ອອກເດີນທາງ, ການນຳນະຄອນ, ຂະແໜງກິລາ ແລະຜູ້ນິຍົມຢູ່ນະຄອນ ດ່ານັ້ງ ໄດ້ສະແດງຄວາມເຊື່ອໝັ້ນວ່າ ແທງຟຸກ ຈະໄດ້ຮັບຜົນງານ, ແຕ່ບໍ່ມີໃຜຄິດໄດ້ວ່າ, ນາງຈະໄດ້ຮັບຜົນງານສູງຄືແນວນັ້ນ. ໃນຊຸມມື້ແຂ່ງຂັນຊິງຊະນະເລີດອາຊີຜ່ານມາ, ຍ້ອນຕ້ອງເຝິກແອບຫຼາຍ, ນາງຈຶ່ງຖືກຫຼຸດນ້ຳໜັກຈາກ 44 kg ລົງ 41 kg . ເມື່ອກັບມາຮອດບ້ານແລ້ວ, ແທງຟຸກພຽງແຕ່ພັກຜ່ອນສອງ, ສາມມື້ເພື່ອຟື້ນຟູສຸຂະພາບແລະກຳລັງແຮງຄືນໃໝ່, ແລ້ວຈະສືບຕໍ່ໄລຍະທາງໃນຂ້າງໜ້າ ດ້ວຍຄວາມປາຖະໜາ ແລະ ຄວາມໄຝ່ຝັນຫຼາຍຢ່າງ
”ຖ້າຫາກວ່າ, ການນຳສູນເຝິກແອບ ແລະ ບຳລຸງສ້າງນັກກິລາ ດ່ານັ້ງ, ພະແນກວັດທະນະທຳ - ກິລາ ແລະ ທ່ອງທ່ຽວ ດ່ານັ້ງ ກໍ່ຄືກົມໃຫຍ່ກິລາກາຍະກຳ ສ້າງເງື່ອນໄຂໃຫ້ ຟຸກ ໄດ້ເຂົ້າຮ່ວມການແຂ່ງຂັນລະດັບສາກົນຫຼາຍກວ່າ, ຟຸກຈະມີບົດຮຽນຫຼາຍ ແລະ ມີຄວາມເຊື່ອໝັ້ນຕົນເອງກວ່າ. ຟຸກຕ້ອງການມີບົດຮຽນແຂ່ງຂັນລະດັບສາກົນທີ່ສຸດ, ເພື່ອກະກຽມເງື່ອນໄຂດີທີ່ສຸດຖ້າຫາກໄດ້ເຂົ້າຮ່ວມການແຂ່ງຂັນ Olympic ”.
ແທງຟຸກພ້ອມກັບພີ່ນ້ອງ (ພາບ: bongdaplus.vn)
ໃນການແຂ່ງຂັນຊິງຊະນະເລີດຢູ່ອາຊີ, ເຊິ່ງຫາກໍ່ຈັດຂຶ້ນຢູ່ຍີ່ປຸ່ນຫວ່າງແລ້ວນີ້, ນັກກິລາ ຫງວຽນແທງຟຸກ ສືບຕໍ່ເຮັດໃຫ້ວົງການນັກວິຊາການ ແລະ ຜູ້ນິຍົມໃນທົ່ວປະເທດຕົກສະເງີ້, ເມື່ອຍາດໄດ້ຫຼຽນທອງກິລາປະເພດຍ່າງໄລຍະທາງ 20 ກມ ດ້ວຍເວລາ 1ໂມງ 35 ນາທີ, ນີ້ແມ່ນສິ່ງມະຫັດສະຈັນ ພາຍຫຼັງທີ່ ແທງຟຸກ ໄດ້ມານະພະຍາຍາມເຝິກແອບພ້ອມກັບຄູເຝິກ ແລະ ໝູ່ເພື່ອນ ເປັນເວລາ 4 ເດືອນ. ນາງສາວ ດ່ານັ້ງ ຫງວຽນແທງຟຸກ ໄດ້ກາຍເປັນນັກກິລາ ແລ່ນແລະລານຜູ້ທຳອິດໃນປະຫວັດຂອງກິລາຫວຽດນາມ ທີ່ໄດ້ຂ້າມຜ່ານມາດຖານ B Olympic, ແລະຈະໄດ້ເຂົ້າຮ່ວມ Olympic ລອນດອນ 2012 ຢ່າງເປັນທາງການ. ທ່ານ ເລແທງບິ່ງ, ຮອງຜູ້ອຳນວຍການສູນເຝິກແອບກິລາແຫ່ງຊາດ ດ່ານັ້ງ, ຢັ້ງຢືນວ່າ:
”ທາງສູນໄດ້ແນະນຳ ແລະ ໃຫ້ນ້ອງ ຟຸກ ເຝິກແອບກ່ອນນີ້ 1 ປີແລ້ວ. ເພື່ອກະກຽມເງື່ອນໄຂດີທີ່ສຸດໃຫ້ນ້ອງເຂົ້າຮ່ວມການແຂ່ງຂັນ Olympic ລອນດອນ 2012. ຜົນງານຂອງນ້ອງແມ່ນໄດ້ລື່ນກາຍຄາດໝາຍໂດຍຄະນະຄູເຝິກວາງອອກ. ໃນໄລຍະຈະມາເຖິງ, ຄະນະຄູເຝິກຈະສຸມໃສ່ແຜນການທີ່ການນຳກົມໃຫຍ່ກິລາກາຍະກຳ ແລະ ສູນເຝິກແອບກິລາແຫ່ງຊາດ ດ່ານັ້ງ ໄດ້ເຊັນອະນຸມັດ ແລະ ໃນອະນາຄົດນ້ອງຈະກ້າວໜ້າກວ່າ”.
ຫວັງວ່າ, ພ້ອມກັບຜົນງານປະທັບໃຈນີ້ຂອງ ຫງວຽນແທງຟຸກ, ບັນດານັກກິລາແລ່ນແລະລານຫວຽດນາມຄື ເຈືອງແທງຮັ່ງ, ຫວູທິເຮືອງ, ຫວຽດແອງ… ຍິ່ງມີຄວາມເຊື່ອໝັ້ນຕົນເອງກວ່າ ເພື່ອປະສົບຜົນສຳເລັດໃນການແຂ່ງຂັນຮອບຄັດເລືອກ Olympic.