(vovworld)- ໃນແຜນທີ່ປະເທດຫວຽດນາມ, ມີ 4 ຂົ້ວ, ນັ້ນແມ່ນຂົ້ວຕາເວັນອອກ, , ຂົ້ວເຫນືອ, ຂົ້ວຕາເວັນຕົກ, ຂົ້ວໃຕ້. ຂົ້ວເຫນືອແມ່ນຂຶ້ນກັບ ຕາແສງ ຫລູງກູ ເມືອງດົງວັນ ແຂວງ ຮ່າຢາງ. ຢູ່ຈອມພູ ລອງເຊີນ ຫລືເອີ້ນວ່າພູຣົ່ງ (ມັງກອນ) ມີຄວາມສູງ 1.700 ແມັດ ເມື່ອທຽບໃສ່ຫນ້ານຳ້ທະເລ ຂຶ້ນກັບ ຕາແສງ ຫລູ໋ງກູ ແມ່ນບ່ອນຕັ້ງເສົາທຸງຊາດຫວຽດນາມ ແລະ ຫລູ໋ງກູ ຍາມໃດກໍແມ່ນສະຖານທີ່ທ່ອງທ່ຽວທີ່ຂາດບໍ່ໄດ້ໃນລາຍການທ່ອງທ່ຽວເຖິງເຂດໄຕບັກ (ເຂດຕາເວັນຕົກສຽງເຫນືອຫວຽດນາມ).
ເສົາທຸງຊາດ ຫລູງກູ ໄດ້ຮັບການກໍ່ສ້າງແຕ່ສະໄຫມລາຊະວົງ ລີ
ພາບ:internet
|
ແຂວງ ຮ່າຢາງ ແມ່ນຫ່າງຈາກນະຄອນຫລວງ ຮ່າໂນ້ຍ ກວ່າ 300 ກິໂລແມັດ. ແລະ ຫລູງກູ ແມ່ນບ່ອນສູງສຸດຂອງຂົ້ວເຫນືອ ຫວຽດນາມ. ຕາມປະຫວັດຄວາມເປັນມາແລ້ວ, ເສົາທຸງຊາດ ຫລູງກູ ໄດ້ຮັບການກໍ່ສ້າງແຕ່ສະໄຫມລາຊະວົງ ລີ. ເສົາທຸງນີ້ແມ່ນເຮັດດ້ວຍຕົ້ນແປກ ມີຄວາມສູງ 10 ແມັດ. ມາຮອດປີ 1887, ເສົາທຸງໄດ້ຮັບການກໍ່ສ້າງຄືນໃຫມ່ ແລະ ບູລະນະປະຕິສັງຂອນເປັນຫລາຍເທື່ອ ດ້ວຍຄວາມສູງ ແລະ ຂະຫນາດແຕກຕ່າງກັນ. ຮອດປີ 1978, ເສົາທຸງໄດ້ກໍ່ສ້າງຄືນໃຫມ່ ດ້ວຍຂະຫນາດໃຫຍ່ກວ່າ ແລະ ທຸງຊາດມີພື້ນສີແດງ ດາວສີເຫລືອງ, ກວ້າງ 54 ຕາແມັດ( ແມ່ນສະແດງໃຫ້ເຫັນ 54 ຊົນເຜົ່າ ຢູ່ຫວຽດນາມພວມ ດຳລົງຊີວິດຮ່ວມກັນ), ລວງຍາວ 9 ແມັດ, ລວງກວ້າງ 6 ແມັດ. ແລະມາຮອດປະຈຸບັນ, ເສົາທຸງມີຄວາມສູງ 33,15 ແມັດ, ໃນນັ້ນ ຕີນເສົາ ສູງ 20,25ແມັດ, ເສົາທຸງ ສູງ 12,9ແມັດ. ເສົາທຸງນີ້ ແມ່ນໄດ້ຮັບການອອກແບບຄ້າຍຄືເສົາທຸງ ຮ່າໂນ້ຍ. ວັນທີ 16/11/2009, ເສົາທຸງຫລູງກູ ຖືກຈັດເຂົ້າບັນຊີລາຍຊື່ປູຊະນີຍະສະຖານປະຫວັດສາດລະດັບຊາດ. ນາງ ຢຽມມີ, ນັກທ່ອງທ່ຽວ ມາຈາກ ນະຄອນ ໂຮ່ຈິມີນ ຮູ້ສຶກຕື້ນຕັນໃຈເມື່ອໄດ້ມາຢ້ຽມຢາມ ເສົາທຸງຫລູງກູ ແຫ່ງສັກກະລະບູຊາຂອງປະເທດຊາດ ໄດ້ແບ່ງປັນວ່າ:
“ຢູ່ທີ່ນີ້ ມີແຜ່ນສີລາຢັ້ງຢືນກ່ຽວກັບເສົາທຸງຊາດ ຫລູ໋ງກູ ເມືອງດົງວັນ ແຂວງ ຮ່າຢາງ. ຢືນຢູ່ທີ່ນີ້ ພວກເຮົາເຫັນໄດ້ຄວາມໃຫຍ່ໂຕມະໂຫຖານຂອງທຳມະຊາດ ແລະ ຍິ່ງຮູ້ສຶກເຖິງສິ່ງທີ່ສັກກະລະບູຊາກ່ຽວກັບອະທິປະໄຕຂອງປະເທດຊາດ.”
ຫລູ໋ງ ພາສາມົ້ງແມ່ນ ສາລີ ສະນັ້ນ ຫລູງກູ ໝາຍຄວາມວ່າ ຮອ່ມພູສາລີ. ແຕ່ດົນນານມາແລ້ວ, ທົ່ວທົ່ງນາ ແທ່ນຜາ ຊື່ງແມ່ນທົ່ງນາທີ່ກວ້າງໃຫຍ່ສຸດຢູ່ ຫລູ໋ງກູ ແລະ ຢູ່ທີ່ນີ້ ລ້ວນແຕ່ປູກສາລີ. ນີ້ແມ່ນວິທີອະທິບາຍຂອງຊາວເຜົ່າມົ້ງ. ສ່ວນຊາວເຜົ່າໂລໂລ ແມ່ນອະທິບາຍຕ່າງກັນກ່ຽວກັບຄວາມເປັນມາຂອງ ຫລູ໋ງກູ. ເຖິງຢ່າງໃດກໍຕາມ ປະຈຸບັນ ເສົາທຸງ ຫລູ໋ງກູ ຍັງແມ່ນບ່ອນສັກກະລະບູຊາ, ເປັນຂີດໝາຍແຫ່ງພາບພົດຂອງຊາດຫວຽດນາມ ແລະ ຍາມໃດກໍຝັງເລິກໃນດວງໃຈຂອງປະຊາຊົນຊົນບັນດາເຜົ່າສ່ວນຫນ້ອຍທີ່ພວມດຳລົງຊີວິດຢູ່ເຂດດິນແຫ່ງນີ້ ກໍຄືຂອງປະຊາຊົນຫວຽດນາມ ໝົດທຸກຄົນໃນທົ່ວປະເທດ.
ຢາກເຫັນປະຈັກຕາ ເສົາທຸງຊາດຫລູງກູ, ທ່ານຕ້ອງຂຶ້ນຂັ້ນໄດ 389 ຂັ້ນແມ່ນ ຮອດຈອມພູຣົ່ງ, ຕໍ່ຈາກນັ້ນ ທ່ານຕ້ອງຂຶ້ນຂັ້ນໄດເຮັດດ້ວຍເຫລັກກ້າ ຕື່ມອີກ 140 ຂັ້ນ ຈຶ່ງຈະຮອດເສົາທຸງຊາດ ຫລູງກູ. ຢູ່ຕີນເສົາ ລ້ວນແຕ່ໄດ້ປະດັບປະດາດ້ວຍຮູບແກະຄວັດສະຫລັກຫີນຂຽວ ທີ່ສ້າງຄວາມປະທັບໃຈ. ນັ້ນແມ່ນຮູບຄ້ອງບ້າງ ຊື່ງແມ່ນສັນຍາລັກຂອງວັດທະນະທຳຫວຽດນາມ, ບັນດາຮູບພາບກ່ຽວກັບຊີວິດ, ປະຊາຊົນ, ຮີດຄອງປະເພນີຂອງບັນດາເຜົ່າຢູ່ ຮ່າຢາງ ແລະ ໄລຍະປະຫວັດສາດຂອງຊາດຫວຽດນາມ.
ອ້າຍ ແຢງຕຽບ, ຊາວຫວຽດນາມ ອາໄສຢູ່ ເຊັກໂກ ຫາກໍໄປຢ້ຽມຢາມ ຮ່າຢາງ ແບ່ງປັນວ່າ:
“ຂ້າພະເຈົ້າເຫັນວ່າ ເສົາທຸງຊາດ ມີສິ່ງປະທັບໃຈຫລາຍຢ່າງ. ພິເສດ ຜືນທຸງມີຂະຫນາດ 54 ຕາແມັດ ແມ່ນ ຕົວເລກສະແດງໃຫ້ເຫັນ 54 ຊົນເຜົ່າອ້າຍນ້ອງຢູ່ຫວຽດນາມ. ນອກນັ້ນ ເສົາທຸງນີ້ແມ່ນໄດ້ກໍ່ສ້າງນັບແຕ່ສະໄຫມ ລີເທື່ອງກຽດ. ຂ້າພະເຈົ້າເຫັນວ່າ ບັນດາຂໍ້ມູນປະຫວັດສາດນີ້ແມ່ນມີປະໂຫຍດທີ່ສຸດ, ຂ້າພະເຈົ້າຈະແບ່ງປັນຄວາມຮູ້ດ້ານປະຫວັດສາດນີ້ໃຫ້ໝູ່ເພື່ອນ.”
ຢືນຢູ່ຂ້າງເສົາ ຫລູ໋ງກູ ຫລຽວເບິ່ງທາງລຸ່ມ, ຢູ່ຕີນພູ ແມ່ນບ້ານຂອງຊາວເຜົ່າ ໂລໂລ, ມີເກືອບ 80 ຄອບຄົວດຳລົງຊີວິດ ດ້ວຍພົນລະເມືອງ 400 ຄົນ ພ້ອມກັບບັນດາເນື້ອທີ່ນາຂັ້ນໄດທີ່ສວຍງາມ. ນອກນັ້ນ ເມື່ອລົງມາຕີນພູ, ນັກທ່ອງທ່ຽວ ຍັງໄດ້ເຂົ້າຊົມ ຫ້ອງວາງສະແດງບັນດາອຸປະກອນການຜະລິດ, ຊຸດອາພອນພື້ນເມືອງ ແລະ ບັນດາຜະລິດຕະພັນທີ່ເປັນເອກະລັກສະເພາະຂອງບັນດາເຜົ່າຢູ່ ຮ່າຢາງອີກດ້ວຍ.