(vovworld) - ໂດຍໄດ້ຮັບຂ່າວວ່າປະຊາຊົນບັນດາແຂວງທາງທິດເໜືອຂອງພາກກາງປະສົບກັບຄວາມເສຍຫາຍ ຍ້ອນຝົນຕົກນ້ຳແກ່ງຖ້ວມເມື່ອທ້າຍເດືອນ 8 ຕົ້ນເດືອນ 9 ຜ່ານມາ, ທ່ານ Tran Thanh Long (ຢູ່ເຮືອນເລກ 56 ຖະໜົນ ຫວູຟ້າມຮ່າມ, ຈູງຮ່ວາ, ເມືອງເກົ່າໄຢ໋, ຮ່າໂນ້ຍ) ໄດ້ສະໜັບສະໜູນເຂົ້າສານ 10 ໂຕນ ເພື່ອຊ່ວຍເຫຼືອພໍ່ແມ່ປະຊາຊົນໃນເຂດດັ່ງກ່າວ. ດ້ວຍນ້ຳໃຈ “ຮັກແພງຊ່ວຍເຫຼືອມະນຸດດ້ວຍກັນ” - ນີ້ແມ່ນມູນເຊື້ອອັນດີງາມຂອງຊາວຫວຽດນາມ. ນັບແຕ່ສິບປີມານີ້, ທ່ານ Tran Thanh Long ເຄີຍມີການກະທຳຄືດັ່ງກ່າວ, ເພື່ອປະກອບສ່ວນແບ່ງປັນຄວາມທຸກຍາກກັບຜູ້ປະສົບເຄາະຮ້າຍ.
ທ່ານ Trần Thành Long ມອບເຂົ້າສານສະໜັບສະໜູນ
ໃຫ້ສູນກາງສະພາກາແດງຫວຽດນາມ (ພາບ: An ninh thủ đô)
ແຕ່ລະເທື່ອເມື່ອໄດ້ຮັບຂ່າວພາຍຸພັດເຂົ້າບັນດາແຂວງພາກກາງຫວຽດນາມ, ທ່ານ Tran Thanh Long ກໍ່ຮູ້ສຶກສະເທືອນໃຈຫຼາຍ. ປີໃດພາຍຸນ້ຳຖ້ວມກໍ່ເກີດຂຶ້ນຢູ່ບັນດາແຂວງທາງພາກກາງຫວຽດນາມ, ສິ່ງດັ່ງກ່າວພາໃຫ້ທ່ານບໍ່ສາມາດອຸ່ນອ່ຽນໃຈໄດ້. ໂດຍແມ່ນຜູ້ໜຶ່ງທີ່ໄດ້ຮັບການກຳເນີດ ແລະ ເຕີບໃຫຍ່ຢູ່ເຂດພາກກາງ, ທ່ານ Tran Thanh Long ຈຶ່ງມີຄວາມເຂົ້າໃຈຢ່າງເລິກເຊິ່ງເຖິງຄວາມຫຍຸ້ງຍາກຂອງພໍ່ແມ່ປະຊາຊົນຢູ່ທີ່ນີ້. ເຖິງວ່າເຂົາເຈົ້າຈະດຸໝັ່ນຂະຫຍັນພຽນຄືແນວໃດກໍ່ບໍ່ສາມາດສ້າງຄວາມຮັ່ງມີໄດ້ ຍ້ອນຕ້ອງດຳລົງຊີວິດຮ່ວມກັບພາຍຸນ້ຳຖ້ວມ. ເມື່ອເຫັນຮູບພາບປະຊາຊົນຕ້ອງທຸ້ມເຫື່ອເທແຮງຮັບມືກັບນ້ຳແກ່ງນ້ຳຖ້ວມ, ເຮືອນຊານຖືກເປ່ເພ, ຂາດເຄື່ອງກິນຂອງໃຊ້, ທ່ານ Tran Thanh Long ບໍ່ສາມາດເບິ່ງລ້າໆໄດ້.
“ໃນໄລຍະນີ້, ຂ້າພະເຈົ້າເອງກໍ່ປະສົບກັບຄວາມຫຍຸ້ງຍາກຫຼາຍຢ່າງ, ແຕ່ຍັງມີເງື່ອນໄຂດີກວ່າຫຼາຍຄົນ, ມີບາງຄົນເຮືອນຊານຖືກນ້ຳພັດໄປ ຕ້ອງນອນກາງດິນກິນກາງຫຍ້າ, ບໍ່ມີເຄື່ອງນຸ່ງຂອງກິນ. ຂ້າພະເຈົ້າເຫັນອົກເຫັນໃຈກັບຄວາມ ຫຍຸ້ງຍາກຂອງເຂົາເຈົ້າທີ່ສຸດ. ດັ່ງນັ້ນເມື່ອໄດ້ຮັບຂ່າວວ່າປະຊາຊົນພາກກາງຖືກພາຍຸນ້ຳຖ້ວມ, ຂ້າພະເຈົ້າກໍ່ສະໜັບສະໜູນເຂົ້າສານ 10 ໂຕນໃຫ້ແກ່ເຂົາເຈົ້າ.ໃນໄລຍະຈະມາເຖິງ, ຂ້າພະເຈົ້າຍັງສະໜັບສະໜູນໃຫ້ປະຊາຊົນຢູ່ເຂດໄຕບັກອີກດ້ວຍ, ນີ້ແມ່ນນ້ຳໃຈຂອງຂ້າພະເຈົ້າທີ່ມີຕໍ່ຜູ້ປະສົບເຄາະຮ້າຍ”.
ໂດຍແມ່ນຊາວຫວຽດນາມຜູ້ໜຶ່ງ, ບໍ່ມີໃຜສາມາດເມີນເສີຍຕໍ່ສະພາບຫຍຸ້ງຍາກຂອງຊາວພາກກາງ ເມື່ອປະສົບກັບໄພນ້ຳຖ້ວມ, ເພື່ອກອບກູ້ເອົາຊີວິດໄດ້. ດັ່ງນັ້ນ, ທ່ານ Long ຈຶ່ງສະໜັບສະໜູນເຂົ້າສານໃຫ້ເຂົາເຈົ້າເພື່ອຜ່ານຜ່ານຜ່າຄວາມຫຍຸ້ງຍາກ. ຮັບຮູ້ນ້ຳໃຈກຸສົນຂອງທ່ານ Long ທີ່ສະຫງວນໃຫ້ແກ່ຜູ້ປະສົບກັບໄພທຳມະຊາດ. ທ່ານ Doan Van Thai, ເລຂາທິການໃຫຍ່ສະພາກາແດງຫວຽດນາມ, ໃຫ້ຮູ້ວ່າ:
“ອ້າຍ Long ໄດ້ເຂົ້າຮ່ວມການເຄື່ອນໄຫວຫຼາຍຢ່າງ ເພື່ອສະໜັບສະໜູນປະຊາຊົນທີ່ປະສົບກັບໄພນ້ຳຖ້ວມ, ໄພທຳມະຊາດຢູ່ທຸກແຖບຖີ່ນຂອງປະເທດ. ບາງຄັ້ງອ້າຍ Long ໄດ້ໄປມອບຂອງຂວັນໂດຍກົງ, ບາງເທື່ອກໍ່ຜ່ານອົງການຈັດຕັ້ງຕ່າງໆເພື່ອມອບຂອງຂວັນໃຫ້ແກ່ເຂົາເຈົ້າ.”.
ໂດຍແມ່ນຜູ້ທີ່ເຄີຍຜ່ານຊີວິດທີ່ຫຍຸ້ງຍາກ, ລຳບາກ, ທ່ານຈຶ່ງເຂົ້າໃຈໄດ້ຄວາມທຸກຈົນດັ່ງກ່າວ. ພາຍຫຼັງອອກຈາກກອງທັບ, ດ້ວຍສອງຝາມືເປົ່າ, Tran Thanh Long ຕ້ອງເຮັດວຽກງານຫຼາຍຢ່າງເພື່ອຫາເງິນລ້ຽງຊີບຄື: ເປັນຊ່າງໄມ້, ຊ່າງຈອດ, ຊ່າງຂຸດໜອງ, ຂຸດນ້ຳສ້າງ… ດ້ວຍຄວາມດຸໝັ່ນຂະຫຍັນພຽນ, ຊີວິດຂອງທ່ານກໍ່ດີຂຶ້ນເທື່ອລະກ້າວ, ແຕ່ທ່ານບໍ່ສາມາດລືມໄລຍະເວລາທີ່ທຸກຍາກລຳບາກຂອງຕົນໄດ້. ດັ່ງນັ້ນ, ຍາມໃດທ່ານກໍ່ກຽມພ້ອມຊ່ວຍເຫຼືອໃຫ້ຜູ້ທີ່ທຸກຍາກ. ທ່ານ Tran Huu Nhung ຢູ່ແຂວງດັກລັກ ແມ່ນຜູ້ປະສົບກັບຄວາມຫຍຸ້ງຍາກ, ເມຍເຄີຍເປັນຄົນເຈບ, ທີ່ດິນໄຮ່ນາຂອງຄອບຄົວນ້ອຍໆບໍ່ຮັບປະກັນໃຫ້ລູກ 5 ຄົນ ໄປຮຽນໄດ້. ທ່ານ Tran Thanh Long ໄດ້ຊ່ວຍຫາວຽກເຮັດງານທຳໃຫ້ອ້າຍຢູ່ຮ່າໂນ້ຍ ແລະ ປະຈຸບັນ, ຊີວິດຂອງຄອບຄົວອ້າຍ Nhung ກໍ່ໄດ້ດີກວ່າເກົ່າແລ້ວ. ເມື່ອເວົ້າເຖິງການກະທຳຂອງທ່ານ Long ອ້າຍ Nhung ໄດ້ເວົ້າດ້ວຍຄວາມຕື້ນຕັນໃຈວ່າ:
“ອ້າຍ Long ໄດ້ຊ່ວຍນ້ອງຫາວຽກເຮັດງານທຳ ແລະ ເຊົ່າບ່ອນກິນບ່ອນຢູ່, ອ້າຍໄດ້ຊ່ວຍເຫຼືອຜູ້ທຸກຍາກຫຼາຍຄົນ, ອ້າຍ Long ແມ່ນຄົນໃຈບຸນ, ຂ້າພະເຈົ້າຈະພະຍາຍາມຮ່ຳຮຽນຕາມແບບຢ່າງຂອງລາວໃນການເອົາໃຈໃສ່ຊ່ວຍເຫຼືອຜູ້ທຸກຍາກ”.
ທ່ານ Long ຄິດວ່າວຽກງານກຸສົນແມ່ນມາຈາກສາຍຈິດມິດໃຈ, ບໍ່ແມ່ນວ່າເປັນຜູ້ຮັ່ງມີຈຶ່ງສາມາດເຮັດໄດ້. ສຳລັບທ່ານແລ້ວ ເຮັດວຽກງານກຸສົນແມ່ນປະກອບສ່ວນແບ່ງປັນຄວາມເສຍຫາຍ, ຊ່ວຍເຫຼືອຜູ້ປະສົບເຄາະຮ້າຍຜ່ານຜ່າຄວາມຫຍຸ້ງຍາກ.