(vovworld) – ມ໋ອງກ໋າຍ ຕັ້ງຢູ່ທາງທິດຕາເວັນອອກສຽງເໜືອຂອງຫວຽດນາມ. ມາຢ້ຽມຢາມມ໋ອງກ໋າຍ, ນັກທ່ອງທ່ຽວໄດ້ເຈືອຈານເຂົ້າກັບທຳມະຊາດ, ໄດ້ຍ່າງໄປຢູ່ຕາມຫາດຊາຍທະເລຈ່າໂກ, ເຊິ່ງແມ່ນຫາດຊາຍທະເລຍາວກວ່າໝູ່ຂອງຫວຽດນາມ, ກໍ່ຄືໄດ້ແວ່ຢາມບັນດາສະຖານທີ່ທີ່ລືຊື່ຄື ແຫຼມຊາຫວີ, ສາລາຈ່າໂກ, ສາລາຂົວກາລອງ… ແລະ ໄດ້ຮັບປະທານເຍື່ອງອາຫານທະເລທີ່ເປັນເອກະລັກສະເພາະຂອງມ໋ອງກ໋າຍ. ພິເສດນັກທ່ອງທ່ຽວຍັງມີໂອກາດໄດ້ໄປຊື້ເຄື່ອງຂອງຢູ່ສູນການຄ້າມ໋ອງກ໋າຍ, ແມ່ນໜຶ່ງໃນບັນດາຕະຫຼາດທີ່ຄຶດໂຄມໜາແໜ້ນຢູ່ດ່ານຊາຍແດນຂອງຫວຽດນາມ.
ຕະຫຼາດໃຈກາງມ໋ອງກ໋າຍ
ນັບແຕ່ຮຸ່ງເຊົ້າ, ເມື່ອບໍ່ທັນເຫັນແຈ້ງໜ້າຄົນ, ບ່ອນຈອດລົດຂອງສູນການຄ້າມ໋ອງກ໋າຍ ຫຼືເອື້ນວ່າຕະຫຼາດໃຈກາງມ໋ອງກ໋າຍ ໄດ້ອຶກກະທຶກນຶກນັນ ດ້ວຍລົດຂົນສົ່ງສິນຄ້າເຂົ້າອອກຫຼາຍຄັນ. ສູນການຄ້າມ໋ອງກ໋າຍ ແມ່ນຕຶກຫຼັງໃຫຍ່ ຖືກກໍ່ສ້າງຕາມສະຖາປັດຕະຍະກຳທີ່ທັນສະໄໝ, ໃຫຍ່ໂຕໂອໂຖງ. ຜູ້ຂາຍເຄື່ອງຂອງຢູ່ໃນສູນ, ນອກຈາກນັກທຸລະກິດຫວຽດນາມ ແລ້ວ ຍັງມີນັກທຸລະກິດຈີນຫຼາຍຄົນ, ເຂົາເຈົ້າສ່ວນຫຼາຍແມ່ນມາຈາກແຂວງ ຕຸງຮຶງ.
ຕະຫຼາດມ໋ອງກ໋າຍ ແມ່ນແດນສະຫວັນທີ່ສະຫງວນໃຫ້ແກ່ຜູ້ນິຍົມຊື້ເຄື່ອງຂອງ, ຢູ່ທີ່ນີ້ລວມມີສິນຄ້າຫຼາຍປະເພດທີ່ອຸດົມສົມບຸນ. ສິນຄ້າສ່ວນຫຼາຍແມ່ນມາຈາກຈີນຄືໝໍ້ inox, ໝໍ້ຕົ້ມປາດ້ວຍໄຟຟ້າ, ຜ້າ, ໂສ້ງເສື້ອ, ກະເປົາ, ເຄື່ອງເອເລກໂຕນິກ…. ເຈົ້າຂອງຮ້ານສິນຄ້າ 533, ຢູ່ຊັ້ນ 3, ຕະຫຼາດໃຈກາງມ໋ອງກ໋າຍ, ໃຫ້ຮູ້ວ່າ:
“ພວກເຮົາຂາຍສິນຄ້າໂດຍບໍ່ຕ້ອງຜ່ານຄົນກາງດັ່ງນັ້ນລາຄາກໍ່ຖືກກວ່າ, ຊື້ອັນໃດຢູ່ທີ່ນີ້ກໍ່ຖືກກວ່າຢູ່ບ່ອນອື່ນ. ນັກທ່ອງທ່ຽວໄປຕະຫຼາດຊື້ເຄື່ອງຂອງເພື່ອເປັນຂອງຂວັນ ແລະ ເປັນທີ່ລະນຶກການທ່ອງທ່ຽວມ໋ອງກ໋າຍ“.
ຕະຫຼາດໃຈກາງມ໋ອງກ໋າຍ
ສູນການຄ້າມ໋ອງກ໋າຍ ກ່ອນນີ້ພຽງແຕ່ແມ່ນຕະຫຼາດຂາຍຍົກເທົ່ານັ້ນ, ແຕ່ພາຍຫຼັງໄດ້ຮັບການກໍ່ສ້າງຄືນໃໝ່, ຕະຫຼາດເລີ່ມຂາຍຍ່ອຍເພື່ອຮັບໃຊ້ໃຫ້ແກ່ລູກຄ້າ, ໃນນັ້ນສ່ວນຫຼາຍແມ່ນນັກທ່ອງທ່ຽວ.
ຢູ່ສູນການຄ້າມ໋ອງກ໋າຍ, ເຈົ້າຂອງຮ້ານສິນຄ້າສ່ວນຫຼາຍແມ່ນຄົນຈີນ, ກວມເຖິງ 90%. ດັ່ງນັ້ນແຕ່ລະຮ້ານເຄີຍມີຜູ້ຂາຍເຄື່ອງ 2 ຄົນ, ແມ່ນຄົນຫວຽດ ແລະ ຄົນຈີນ. ບັນດາເຈົ້າຂອງຮ້ານສິນຄ້າທັງຊັບຊ້ອນສິນຄ້າ, ທັງເຊື້ອເຊີນລູກຄ້າເປັນພາສາຫວຽດ ແລະ ພາສາຈີນ. ລູກຄ້າສາມາດໃຊ້ເງິນດົ່ງຂອງຫວຽດນາມ ຫຼືເງິນຢວນຂອງຈີນກໍ່ໄດ້. ອ້າຍ ຮ່ວາງເລິມ, ນັກທ່ອງທ່ຽວຜູ້ໜຶ່ງໃຫ້ຮູ້ວ່າ:
“ທ່າທີຮັບໃຊ້ລູກຄ້າຂອງຜູ້ຂາຍເຄື່ອງແມ່ນສຸພາບຄ່ຽມຄົມ. ຖ້າລູກຄ້າຈະຊື້ຫຼືບໍ່ຊື້ສິນຄ້າເຂົາເຈົ້າກໍ່ດີໃຈຢູ. ນີ້ແມ່ນຕະຫຼາດໃຈກາງ, ຂາຍຍົກແມ່ນຕົ້ນຕໍ່ ດັ່ງນັ້ນບໍ່ຕ້ອງຕໍ່ລາຄາຫຼາຍ”.
ຢູ່ຊັ້ນ 3 ຂອງຕະຫຼາດ ຍັງມີບັນດາຮ້ານຢາພື້ນເມືອງ, ທັງຂາຍຢາ, ທັງມີບັນດາໝໍຢາພື້ນເມືອງ ເປັນຄົນຫວຽດ ຫຼືຄົນຈີນນັ່ງຈັບເບິ່ງຊີບພະຈອນ, ບົ່ງມະຕິພະຍາດ ແລະ ໃຫ້ຢາ. ສິ່ງດັ່ງກ່າວສ້າງເປັນຈຸດພິເສດສະເພາະໃຫ້ຕະຫຼາດດ່ານຊາຍແດນມ໋ອງກ໋າຍ ນີ້.
(ພາບປະກອບ)
ພາຍຫຼັງໄດ້ຮັບຄຳແນະນຳຢ່າງລະອຽດຈາກເຈົ້າຂອງຮ້ານຢາພື້ນເມືອງ, ພວກຂ້າພະເຈົ້າໄດ້ເລືອກຊື້ກາລະບູນ 10 ແກ້ວ ເພື່ອມອບໃຫ້ພໍ່ເຖົ້າແມ່ເຖົ້າ, ເພາະວ່າພໍ່ຕູ້ ຮ່ວາງວັນອານ ເຈົ້າຂອງຮ້ານຢາພື້ນເມືອງ ຮ່ວາງເລິມດົ່ງ ໄດ້ແນະນຳວ່າກາລະບູນ ນີ້ແມ່ນດີທີ່ສຸດໃຫ້ແກ່ຜູ້ເຖົ້າ. ເມື່ອໂອ້ລົມກັບພວກເຮົາ, ພໍ່ຕູ້ ອານ ໃຫ້ຮູ້ວ່າ, ປີນີ້ພໍ່ຕູ້ມີອາຍຸເກືອບ 80 ປີ ແລະ ໄດ້ຕິດພັນກັບສູນການຄ້ານີ້ ນັບແຕ່ຊຸມປີຕົ້ນແຫ່ງການສ້າງຕັ້ງ.
“ຂ້າພະເຈົ້າຂາຍເຄື່ອງຢູ່ທີ່ນີ້ມາເປັນເວລາ 24 ປີແລ້ວ ແລະ ເຫັນວ່າຕະຫຼາດນີ້ນັບມື້ນັບພັດທະນາ. ກ່ອນນີ້ມັນພຽງແຕ່ແມ່ນຕະຫຼາດຊັ້ນດຽວເທົ່ານັ້ນ, ແຕ່ປະຈຸບັນໄດ້ກາຍເປັນຕະຫຼາດ 5 ຊັ້ນ. ຊັ້ນ 1 ຂາຍເຄື່ອງອາໄຫຼ່ກົນຈັກຕ່າງໆເຊັ່ນເຄື່ອງອາໄຫຼ່ລົດໃຫຍ່, ກ່ຳປັ່ນ, ຈັກກ່ຽວເຂົ້າ.... ຊັ້ນ 2 ຂາຍໂສ້ງເສື້ອ, ຊັ້ນ 3 ຂາຍສິນຄ້າທຸກຢ່າງ”.
ພໍ່ຕູ້ ອານ ໃຫ້ຮູ້ຕື່ມອີກວ່າ:
“ຈຸດພິເສດຂອງຕະຫຼາດ ແມ່ນພຽງຂາຍເຄື່ອງແຕ່ເວລາ 7 – 12 ໂມງເທົ່ານັ້ນ, ນີ້ແມ່ນຕະຫຼາດຂາຍຍົກເປັນຕົ້ນຕໍ່. ຕະຫຼາດເລີກໄວຄືແນວນັ້ນຍ້ອນວ່າ, ຕອນເຊົ້າລູກຄ້າທີ່ມາຈາກທຸກແຫ່ງໄດ້ມາຊື້ເຄື່ອງຂອງ, ພາຍຫຼັງຂາຍສິນຄ້າໝົດແລ້ວ, ບັນດາເຈົ້າຂອງຄົນຈີນກໍ່ກັບເມືອເລີຍບໍ່ຢູ່ຕະຫຼາດອີກ”.
ການໂອ້ລົມລະຫວ່າງພວກຂ້າພະເຈົ້າກັບພໍ່ຕູ້ ຮ່ວາງວັນອານ ສິ້ນສຸດລົງ ກົງກັບເວລາທີ່ບັນດາເຈົ້າຂອງຮ້ານສິນຄ້າພວມເກັບມ້ຽນເຄື່ອງຂອງໄວ້. ຖ້າຫາກຜູ້ໃດໄດ້ມາຢ້ຽມຢາມມ໋ອງກ໋າຍ, ໄປຢ້ຽມຢາມເຂດຕະຫຼາດແຫ່ງນີ້ກໍ່ຢາກກັບມາອີກ ເພາະວ່າໃນເວລາສັ້ນໆພຽງຕອນເຊົ້າເທົ່ານັ້ນ ຈະບໍ່ສາມາດຄົ້ນຫາສິ່ງທີ່ຈັບອົກຈັບໃຈຕື່ມອີກຢູ່ແຫ່ງນີ້ໄດ້.