(vovworld) - ໂດຍຫ່າງຈາກຮ່າໂນ້ຍ ໄປທາງທິດໃຕ້ປະມານກວ່າ 100 ກ.ມ, ແທງຮ໋ວາ ແມ່ນແຂວງທີ່ມີທັດສະນີຍະພາບທີ່ລືຊື່ໃນທົ່ວປະເທດຫຼາຍແຫ່ງ. ຢູ່ທີ່ນີ້ມີຝັ່ງທະເລຍາວຢຽດ ດ້ວຍຫາດຊາຍທະເລທີ່ສວຍງາມ, ພ້ອມກັບປູຊະນີຍະສະຖານປະຫວັດສາດບູຮານຫຼາຍແຫ່ງ. ສິ່ງມະຫັດສະຈັນຂອງດິນແດນແຫ່ງນີ້ສະແດງອອກໃນສະຖານທີ່ແຕ່ລະແຫ່ງ, ໃນນັ້ນມີບັນດາປັດໃຈແຫ່ງເລື່ອງລາວທີ່ມີຈິງ, ສັກສິດ. ແລະ ໜຶ່ງໃນບັນດາສິ່ງຈັບອົກຈັບໃຈນັ້ນແມ່ນຫ້ວຍປາຜີ ຢູ່ໝູ່ບ້ານມໍ໋ງອກ, ຕາແສງເກິມເລືອງ, ເມືອງ ເກິມຖູຍ, ແຂວງແທງຮ໋ວາ.
(ພາບ: google.com.vn)
ຈາກເມືອງເກິມຖູຍ (ທີ່ຫ່າງຈາກນະຄອນແທງຮ໋ວາ 70 ກ.ມ) ໄປທາງທິດຕາເວັນຕົກສ່ຽງເໜືອປະມານກວ່າ 10 ກ.ມ, ຂ້າມຂົວແຂວນເກິມເລືອງ, ນັກທ່ອງທ່ຽວຈະໄປຮອດຫ້ວຍປາຜີ ຢູ່ບ້ານມໍ໋ງອກ ຂອງຊາວເຜົ່າເມື່ອງ. ຢູ່ທີ່ນີ້ມີຫ້ວຍງາມທີ່ສຸດ, ດ້ວຍປານັບພັນໂຕຈົນເຕັມຫ້ວຍນ້ຳ. ຊາວທ້ອງຖີ່ນເວົ້າວ່າ, ປາຢູ່ຫ້ວຍງອກມີຮູບຮ່າງຄ້າຍຄືກັນກັບປາກິນຫຍ້າ, ແຕ່ຄີ ແລະຫາງປາພັດມີລາຍສີແດງ ແລະ ເຫຼື້ອມແວວວາວພາຍໃຕ້ແສງຕາເວັນ. ພິເສດ, ຖ້າຫາກນ້ຳຫ້ວຍປ່ຽນສີ, ປາກໍ່ຈະປ່ຽນສີໄປນຳ. ເຖິງວ່າຫ້ວຍບໍ່ເລິກ, ແລະປາມີຫຼາຍກໍ່ຕາມ, ແຕ່ເມື່ອພວກເຮົາສຳພັດໃສ່ປາກໍ່ບໍ່ລອຍໄປ. ຫ້ວຍງອກ ຍາວພຽງປະມານ 150 ມ, ກວ້າງປະມານ 3 ມ ເທົ່ານັ້ນ, ແຕ່ນ້ຳສ່ອງໃສ, ດັ່ງນັ້ນນັກທ່ອງທ່ຽວສາມາດເຫັນແຈ້ງປາລອຍນ້ຳແຕ່ລະຝູງ. ຍິ່ງຫຍັບມໍ່ເຂົ້າກັບຕີນພູເທົ່າໃດ, ຍິ່ງມີປາໃຫຍ່ຫຼາຍໂຕເທົ່ານັ້ນ. ຢູ່ປາກຖ້ຳມີປານັບພັນໂຕ, ບາງໂຕໜັກເຖິງສິບກິໂລກຼາມ. ເຖິງວ່າ, ປາຢູ່ນີ້ຫຼາຍເຕັມຫ້ວຍ, ແຕ່ສິ່ງທີ່ແປກປະຫຼາດນັ້ນແມ່ນ ນ້ຳຫ້ວຍບໍ່ມີກິ່ນຄາວ. ໃນຍາມກາງເວັນ, ປາຈາກຖ້ຳລອຍອອກນອກ, ສ່ວນໃນຍາມກາງຄືນປາຈາກທາງນອກຈະລອຍເຂົ້າຖ້ຳກ້ອງພູ. ຊາວທ້ອງຖີ່ນຍັງເວົ້າວ່າ, ຝູງປານີ້ໄດ້ແຜ່ພັນມາເປັນເວລານັບຮ້ອຍປີແລ້ວ, ແຕ່ບໍ່ມີໃຜກ້າກິນປາຢູ່ຫ້ວຍນີ້ເທື່ອ. ອ້າຍ Trieu Duc Phuc, ຊາວທ້ອງຖີ່ນ, ເວົ້າວ່າ
”ນີ້ແມ່ນປະເພນີທີ່ມີມາແຕ່ດົນນານຂອງພໍ່ແມ່ປະຊາຊົນຢູ່ທີ່ນີ້, ຝູງປາມີຄວາມໃກ້ສິດສະໜິດສະໜົມກັບມະນຸດ, ເຖິງວ່ານັກທ່ອງທ່ຽວມາແຫ່ງນີ້ກໍ່ໃຫ້ປາກິນເຫຍື່ອ, ແຕ່ບໍ່ສົ່ງຜົນສະທ້ອນເຖິງຝູງປາເທື່ອ, ປາຍັງຄົງລອຍນ້ຳທຳມະດາ, ສະແດງຄວາມໃກ້ສິດສະໜິດສະໜົມກັບມະນຸດ”.
(ພາບ: google.com.vn)
ຊາວທ້ອງຖີ່ນໃຫ້ຮູ້ວ່າ, ໃນຖ້ຳແຫ່ງນີ້ມີໜອງທີ່ກວ້າງໃຫຍ່, ເຂົາເຈົ້າຖືວ່າ, ນີ້ແມ່ນແຫ່ງສະໜອງອາຫານຕົ້ນຕໍ່ໃຫ້ປາ, ດັ່ງນັ້ນເຖິງວ່າຈະມີປາຫຼາຍໂຕຄືແນວນັ້ນ, ແຕ່ມັນຍັງຍືນຍົງຄົງຕົວ ແລະ ແຜ່ພັນເປັນຈຳນວນຫຼວງຫຼາຍຢູ່. ສຳຫຼັບປະຊາຊົນຢູ່ໝູ່ບ້ານງອກ, ປາແຫ່ງນີ້ໄດ້ກາຍເປັນສັດມົງຄຸນ, ດັ່ງນັ້ນເຂົາເຈົ້າຈຶ່ງເອີ້ນວ່າປາຜີ. ປະຊາຊົນຢູ່ທີ່ນີ້ເຄົາລົບນັບຖືປາຢູ່ຫ້ວຍງອກ ແລະເລົ່າຂານກັນມາເລື່ອງລາວກ່ຽວກັບຕົ້ນກຳເນີດຂອງປາປະເພດນີ້. ແມ່ເຖົ້າ Ha Thi Xau, ຜູ້ອາຍຸສູງໃນໝູ່ບ້ານ, ໃຫ້ຮູ້ວ່າ
”ປາຢູ່ທີ່ນີ້ແມ່ນປາຜີ. ດັ່ງນັ້ນ, ເຖິງວ່າຈະມີປາເຕັມຫ້ວຍກໍ່ຕາມ, ແຕ່ບໍ່ມີໃຜກ້າກິນເທື່ອ”.
(ພາບ: google.com.vn)
ຕາມການເວລາ, ປະຊາຊົນໃນທ້ອງຖີ່ນໄດ້ຖືປາໃນຫ້ວຍງອກ ແມ່ນສັດມົງຄຸນ. ຊາວທ້ອງຖີ່ນເວົ້າວ່າ, ຜູ້ໃດໂຊກດີຈະເຫັນປາໂຕໃຫຍ່ທີ່ໜັກເຖິງ 40 ກິໂລກຼາມລອຍນ້ຳພ້ອມກັບຝູງປານ້ອຍອີກ. ສຳຫຼັບທ້ອງຖີ່ນທີ່ມີພູຜາປ່າໄມ້, ແມ່ນ້ຳລຳເຊທີ່ສວຍງາມ, ດ້ວຍບັນດາເລື່ອງລາວອັນມະຫັດສະຈັນກ່ຽວກັບຝູງປາໃນຫ້ວຍງອກນັ້ນ. ປະຈຸບັນ, ຫ້ວຍປາຜີ ເກິມເລືອງ ໄດ້ກາຍເປັນສະຖານທີ່ທ່ອງທ່ຽວທີ່ຈັບອົກຈັບໃຈຂອງແຂວງແທງຮ໋ວາ. ນອກຈາກຫ້ວຍປາຜີແລ້ວ, ເມືອງເກິມເລືອງ ໃນປະຈຸບັນຍັງຄົງຮັກສາລະບົບປ່າດົງດິບ ດ້ວຍສັດສາວາສິ່ງ, ພືກສາສາດທີ່ເປັນເອກະລັກສະເພາະຂອງເຂດຮ້ອນ, ບັນດາຖ້ຳທີ່ເລິກລັບ, ມະຫັດສະຈັນ, ຢູ່ຕີນພູແມ່ນໝູ່ບ້ານຂອງຊາວເຜົ່າເມື່ອງ, ດ້ວຍການເຄື່ອນໄຫວວັດທະນະທຳທີ່ເປັນມູນເຊື້ອຄື: ຕ່ຳຜ້າພື້ນເມືອງ, ກິນເຫຼົ້າໄຫ, ນັ້ນແມ່ນສະຖານທີ່ທ່ອງທ່ຽວທີ່ດຶງດູດນັກທ່ອງທ່ຽວມາຢ້ຽມຢາມຫ້ວຍປາຜີອັນມະຫັດສະຈັນນັບມື້ນັບຫຼາຍ.