(vovworld) – ຢູ່ແຂວງບິ່ງດິ້ງ ທາງທິດໃຕ້ຂອງພາກກາງ, ມີຫໍພິພິດທະພັນທີ່ໃສ່ຊື່ວິລະຊົນຊາວນາກວາງຈູງ - ຫງວຽນເຮ້, ຜູ້ນຳຂະບວນການລຸກຮຶ້ຂຶ້ນຂອງຊາວນາໄຕເຊີນໃນສະຕະວັດທີ 18. ຢູ່ທີ່ນີ້ຍັງຮັກສາ ແລະ ວາງສະແດງບັນດາວັດຖຸພັນສຳຄັນທີ່ກ່ຽວຂ້ອງເຖິງຂະບວນການໄຕເຊີນ. ຫໍພິພິດທະພັນກວາງຈູງ ແມ່ນໜຶ່ງໃນບັນດາສະຖານທີ່ ໄດ້ສ້າງຄວາມດຶງດູດບັນດານັກຄົ້ນຄ້ວາ ແລະ ນັກທ່ອງທ່ຽວທັງຢູ່ພາຍໃນ ແລະ ຕ່າງປະເທດເມື່ອມາຢ້ຽມຢາມບິ່ງດິ້ງ.
ຫໍພິພິດທະພັນກວາງຈູງ - ບິ່ງດິ້ງ
ຈາກນະຄອນກວີເຍີນ ໄປທາງທິດຕາເວັນຕົກກວ່າ 40 ກມ ຈະໄປຮອດເທດສະບານຟູ໋ຈ້ອງ, ເມືອງໄຕເຊີນ, ເຊິ່ງແມ່ນບ້ານເກີດຂອງ 3 ອ້າຍນ້ອງວິລະຊົນແຫ່ງຊາດນັ້ນແມ່ນ ຫງວຽນຍາກ, ຫງວຽນເຮ້, ຫງວຽນຫຼື. ຫໍພິພິດທະພັນໄດ້ຮັບການສ້າງຕັ້ງຂຶ້ນເມື່ອປີ 1978. ນີ້ແມ່ນຫໍພິພິດທະພັນຜູ້ທີ່ມີຊື່ສຽງໃຫຍ່ກວ່າໝູ່ ແລະ ແມ່ນໜຶ່ງໃນຈຳນວນ ຫໍພິພິດທະພັນທີ່ດຶງດູດແຂກມາຢ້ຽມຢາມ ແລະ ທ່ອງທ່ຽວ, ຮ່ຳຮຽນຫຼາຍທີ່ສຸດຂອງຫວຽດນາມ. ໃນບໍລິເວນຫໍພິພິດທະພັນ, ຫໍບູຊາໄຕເຊີນແມ່ນບ່ອນທຳອິດທີ່ແຂກທ່ອງທ່ຽວເຄີຍມາຈູດທູບທຽນບູຊາ ອາໄລຫາເຖິງບັນດາວິລະຊົນຊາວນາໃນຂະບວນການໄຕເຊີນ. ທ່ານເຈິ່ນງອກມີ, ຜູ້ດູແລຫໍບູຊາ, ໃຫ້ຮູ້ວ່າ:
“ຫໍບູຊາໄຕເຊີນ ຖືກກໍ່ສ້າງເທິງພື້ນເຮືອນເກົ່າຂອງ 3 ອ້າຍນ້ອງວິລະຊົນໃນຂະບວນການໄຕເຊີນ. ໃນຫໍບູຊາມີແທ່ນບູຊາ 10 ແທ່ນ. ຢູ່ໃຈກາງຫໍແມ່ນແທ່ນບູຊາລວມໃຫ້ບັນພະບຸລຸດວົງຕະກຸນຂອງ 3 ອ້າຍນ້ອງວິລະຊົນ. ສ່ວນ 3 ອ້າຍນ້ອງວິລະຊົນໄຕເຊີນ ຖືກບູຊາຢູ່ໃຈກາງແທ່ນຕົ້ນຕໍ່ ເຊິ່ງເອີ້ນວ່າ ໄຕເຊີນຕາມກຽດ “ໝາຍຄວາມວ່າສາມຄົນດີເດັ່ນກວ່າໝູ່ໃນຂະບວນການໄຕເຊີນ” , ສ່ວນເບື້ອງຂວາ ແລະ ເບື້ອງຊ້າຍ ແມ່ນບູຊານາຍ, ພົນທະຫານອ້າຍນ້ອງໃນຂະບວນການໄຕເຊີນ.”
ຫໍບູຊາໄຕເຊີນ
(ພາບອິນເຕີແນດ) ປະຈຸບັນ, ຢູ່ນອກຫໍບູຊາຍັງມີຕົ້ນຂາມ ແລະ ນ້ຳສ້າງທີ່ມີມາກ່ອນນີ້ເກືອບ 300 ປີ. ຕົ້ນຂາມນີ້ມີຄວາມໝາຍສຳຄັນພິເສດດ້ານວັດທະນະທຳ ແລະ ປະຫວັດສາດ, ແລະ ຖືກຖືວ່າເປັນສັນຍາລັກແຫ່ງພະລັງຊີວິດ, ຄວາມຍື່ນຍົງຂອງຂະບວນການໄຕເຊີນ. ສ່ວນນ້ຳສ້າງນີ້ຍັງໃສສະອາດຢູ່. ອ້າຍ ດັ້ງກົງເລິບ ພາລະກອນຢູ່ຫໍພິພິດທະພັນກວາງຈູງ, ໃຫ້ຮູ້ວ່າ:
“ກ່ອນນີ້ຊາວໝູ່ບ້ານລ້ວນແຕ່ນຳໃຊ້ນ້ຳໃນນ້ຳສ້າງແຫ່ງນີ້. ຫີນນຳນໍ່ທີ່ກໍ່ສ້າງນ້ຳສ້າງແມ່ນມີຫຼາຍທີ່ສຸດຢູ່ທີ່ນີ້, ມັນສາມາດກັ່ນຕອງນ້ຳໄດ້ດີ, ເມື່ອກໍ່ສ້າງລາດຊະວັງເຂົາເຈົ້າກໍ່ນຳໃຊ້ຫີນນຳນໍ່ປະເພດນີ້”.
ນ້ຳສ້າງໃນຫໍພິພິດທະພັນ
(ພາບອິນເຕີແນດ)
ຫໍພິພິດທະພັນໄດ້ວາງສະແດງ ເອກະສານ, ວັດຖຸພັນບູຮານ 11.000 ສິນ ແລະ ວັດຖຸພັນທີ່ໄດ້ຮັບການຟື້ນຟູນັບຮ້ອຍສິນໃນໄລຍະດຳເນີນຂະບວນການໄຕເຊີນຄືກອງເຮັດດ້ວຍໜັງຊ້າງຂອງຊາວເຜົ່າໄຕງວຽນ ທີ່ໃຊ້ໃນຂະບວນການໄຕເຊີນ, ກາຈ້ຳ, ລະຄັງທອງ, ສີລາ... ມາຢ້ຽມຢາມຫໍພິພິດທະພັນ, ນັກທ່ອງທ່ຽວມີຄວາມເຂົ້າໃຈກວ່າກ່ຽວກັບໄລຍະອັນສະຫງ່າອົງອາດ ແລະ ບັນດາເຈົ້າຊີວິດ ຜູ້ທີ່ໄດ້ຮັບຄວາມນິຍົມນັບຖືຈາກປະຊາຊົນໃນປະຫວັດສາດຂອງຫວຽດນາມອ້າຍ ເລິບ ແນະນຳວ່າ:
“ນີ້ແມ່ນສີລາສຸສານພໍ່ປູ່ຂອງ 3 ອ້າຍນ້ອງວິລະຊົນໃນຂະບວນການໄຕເຊີນ. ປີ 1990 ເມື່ອເຮັດທາງຢູ່ຟູ໋ລາກ, ເຊິ່ງແມ່ນບ້ານແມ່ຂອງ 3 ອ້າຍນ້ອງທີ່ຫ່າງຈາກຫໍພິພິດທະພັນ 3 ກມ, ປະຊາຊົນໄດ້ພົບເຫັນສີລາແຜ່ນນີ. ໃນແຜ່ນມີຮູບມັງກອນເຝົ້າ”.
ສີລາສຸສານພໍ່ປູ່ຂອງ 3 ອ້າຍນ້ອງວິລະຊົນໃນຂະບວນການໄຕເຊີນ
(ພາບອິນເຕີແນດ)
ການສະແດງມວຍສິລະປະ ແລະ ຕີກອງສູ້ຮົບກວາງຈູງ ໄດ້ຮັບຖືວ່າແມ່ນມໍລະດົກບໍ່ມີຮູບຮ່າງຂອງຂະບວນການໄຕເຊີນ ແລະ ສ້າງຄວາມດຶງດູດໃຫ້ແກ່ນັກທ່ອງທ່ຽວ. ດັ່ງນັ້ນເມື່ອມາຢ້ຽມຢາມຫໍພິພິດທະພັນກວາງຈູງ, ນັກທ່ອງທ່ຽວຈະໄດ້ຮັບຟັງສຽງກອງສູ້ຮົບ. ປ້າ ຫວໍທິທ້ວນ, ນັກສິລະປິນຜູ້ທີ່ສ້າງຄວາມສະເທືອນໃຈໃຫ້ແກ່ຜູ້ຟັງຈຳນວນຫຼວງຫຼາຍ ດ້ວຍສິລະປະໃນການຕີກອງ 12 ໜ່ວຍຢູ່ຫໍພິພິດທະພັນກວາງຈູງ ແລະ ຫຼາຍແຫ່ງທັງຢູ່ພາຍໃນ ແລະ ຕ່າງປະເທດ, ແມ່ນຜູ້ສືບທອດມູນເຊື້ອຂອງຄອບຄົວທີ່ມີ 9 ເຊັ່ນຄົນຕີກອງສູ້ຮົບກວາງຈູງ, ໃຫ້ຮູ້ວ່າ:
“ສຽງກອງມີ 3 ຕອນ, ຕອນທຳອິດ ສຽງກອງຊັກຊ້າ, ເພື່ອເຕົ້າໂຮມກຳລັງທະຫານກຽມພ້ອມເດີນທາງສູ້ຮົບ, ຕອນທີ 2 ສຽງກອງວ່ອງໄວແຮງກ້າ ເພື່ອປຸກລະດົມກຳລັງໃຈນັກຮົບຕໍ່ສູ້ຕ້ານສັດຕູ ແລະ ຕອນທີ 3 ສຽງກອງຟົດຟື້ນມ່ວນຊື່ນເພື່ອຊົມເຊີຍໄຊຊະນະ, ”
ຕີກອງສູ້ຮົບກວາງຈູງ
(ພາບອິນເຕີແນດ) ນັກວິລະຊົນກວາງຈູງ - ຫງວຽນເຮ້, ໄດ້ເຮັດໃຫ້ຂະບວນການລຸກຮຶ້ຂຶ້ນຂອງຊາວນາໄຕເຊີນ, ກາຍເປັນຂະບວນການປົດປ່ອຍຊາດ, ຂັບໄລເສິກຕ່າງດ້າວໄທ 50 000 ຄົນ ແລະ thanh 290 000 ຄົນມາຮຸກຮານຫວຽດນາມ, ປົກປັກຮັກສາເອກະລາດແຫ່ງຊາດໃນຊຸມປີ 1788-1802. ທ່ານ ຫງວຽນຈີ໋ດຶກ, ຢູ່ເມືອງເກິມຊວຽນ, ແຂວງຮ່າຕິ້ງ, ຜູ້ມາຢາມຫໍພິພິດທະພັນກວາງຈູງ, ໃຫ້ຮູ້ວ່າ:
“ກ່ອນນີ້ຂ້າພະເຈົ້າພຽງແຕ່ຮູ້ຂະບວນການນີ້ຜ່ານປື້ມໜັງສືເທົ່ານັ້ນ. ແຕ່ມາແຫ່ງນີ້ຂ້າພະເຈົ້າຈຶ່ງຮູ້ຢ່າງລະອຽກວ່າກ່ຽວກັບກົກເຄົ້າ ແລະ ການພັດທະນາຂອງຂະບວນການກວາງຈູງ ກໍ່ຄືມູນເຊື້ອຂອງຊາດຫວຽດນາມ”.
ຫໍພິພິດທະພັນກວາງຈູງ ບໍ່ພຽງແຕ່ແມ່ນປູຊະນີຍະສະຖານ, ປະຫວດສາດເທົ່ານັ້ນ, ຫາກຍັງແມ່ນສະຖານທີ່ທ່ອງທ່ຽວທີ່ດູດດື່ມຂອງບິ່ງດິ້ງ ອີກດ້ວຍ. ມາແຫ່ງນີ້, ນັກທ່ອງທ່ຽວຄືໄດ້ກັບຄືນສູ່ໄລຍະປະຫວັດສາດ ໄດ້ດຳລົງຊີວິດດ້ວຍຈິດໃຈນິຍົມມວຍ, ວິລະຊົນ, ສະຫງ່າຜ່າເຜີຍ, ເຈດຈຳນົງຕໍ່ສູ້ຢ່າງພິລະອາດຫານໃນປະຫວັດສາດອັນພິລະອາດຫານຂອງຂະບວນການລຸກຮຶ້ຂຶ້ນໄຕເຊີນ ແລະ ໄຊຊະນະດົງດັງຂອງກວາງຈູງ - ຫງວຽນເຮ້.