(vovworld) - ຕາແສງເກາະຊອງຕືໄຕ (ຢູ່ທິດຕາເວັນຕົກ), ເມືອງເຈື່ອງຊາ, ແຂວງແຄ໋ງຮ່ວາ, ຕັ້ງຢູ່ທິດເໜືອຂອງໝູ່ເກາະເຈື່ອງຊາ. ຜູ້ໃດມາຢ້ຽມຢາມເກາະຊອງຕືໄຕ ກໍ່ລ້ວນແຕ່ມີຄວາມປະທັບໃຈຕໍ່ຫ້ອງຮຽນນ້ອຍໆໃຕ້ຮົ່ມໄມ້ຫູກວາງ, ພ້ອມກັບສຽງຫັດອ່ານຂອງນັກຮຽນ ປະສານກັບສຽງຄື້ນທະເລທົບໃສ່ຝັ່ງ. ເຖິງວ່າຫ້ອງຮຽນ ແລະ ຊີວິດການເປັນຢູ່ຂອງບັນດາຄູສອນຢູ່ທີ່ນີ້ຍັງປະສົບກັບຄວາມຫຍຸ້ງຍາກ, ຂາດເຂີນຫຼາຍຢ່າງ ເມື່ອທຽບໃສ່ເຂດດິນຕໍ່ແຜ່ນກໍ່ຕາມ, ແຕ່ເຂົາເຈົ້າພັດມີອຸດົມຄະຕິລວມ ນັ້ນແມ່ນນຳເອົາຄວາມຮູ້ມາສິດສອນໃຫ້ພວກນ້ອງນັກຮຽນຢູ່ເມືອງເກາະ ທີ່ຫ່າງໄກ ເພື່ອອະນາຄົດທີ່ສົດໃສຢູ່ທີ່ນີ້.
ຫ້ອງຮຽນຢູ່ເກາະຊອງຕືໄຕ
(ພາບອິນເຕີແນດ)
ຕາແສງທີ່ມີໂຮງຮຽນແຫ່ງດຽວ ແລະ ໂຮງຮຽນທີ່ມີຫ້ອງຮຽນໜຶ່ງດຽວນັ້ນແມ່ນຈຸດພິເສດເມື່ອເຕື້ອງເຖິງໂຮງຮຽນຢູ່ເກາະຊອງຕືໄຕ. ຫ້ອງຮຽນແມ່ນຫ້ອງການເຮັດວຽກຂອງຄະນະກຳມະການປະຊາຊົນຕາແສງ, ໃນຫ້ອງຮຽນມີໂຕະສອງໜ່ວຍ ຖືກຈັດວາງເປັນລະບຽບຮຽບຮ້ອຍ ພ້ອມກັບກະດານນ້ອຍໆ. ຖັນແຖວຄູສອນຕົ້ນຕໍ່ແມ່ນພະນັກງານຕາແສງ. ທັງຕາແສງຊອງຕືໄຕ ມີນັກຮຽນທັງໝົດ 7 ຄົນ ຖືກແບ່ງເປັນ 5 ຫ້ອງ (ແຕ່ຫ້ອງປໍ 1 ເຖິງຫ້ອງປໍ 5). ຄູສອນ ດ່ວານກວກທ໋າຍ, ບ້ານເກີດຢູ່ເມືອງນິງຮ່ວາ, ແຂວງແຄ໋ງຮ່ວາ, ສະມັກໃຈໄປປະຕິບັດງານຢູ່ເກາະຊອງຕືໄຕ ນັບແຕ່ປີ 2008 ຕາມຄຳຮຽກຮ້ອງຊາວໜຸ່ມອາສາສະໝັກກໍ່ສ້າງທະເລເກາະຂອງບ້ານເກີດເມືອງນອນ. ຫວນຄືຊຸມວັນທຳອິດເມື່ອຮັບໜ້າທີ່ສອນນັກຮຽນຢູ່ທີ່ນີ້. ອ້າຍຄູ ດ່ວານກວກທ໋າຍ, ແບ່ງປັນວ່າ:
“ປີທຳອິດຂ້າພະເຈົ້າສອນນັກຮຽນຫ້ອງປໍ 1, ຂ້າພະເຈົ້າບໍ່ຄິດວ່າເປັນຄູສອນລຳບາກຄືແນວນັ້ນ. ສອນນັກຮຽນ ປໍ 1 ຫັດອ່ານຍາກຫຼາຍ, ມີບາງບົດຮຽນສອນໄປສອນມາຫຼາຍເທື່ອແລ້ວ ແຕ່ນັກຮຽນກໍໍ່ບໍ່ເຂົ້າໃຈ. ດັ່ງນັ້ນ, ເມື່ອເຫັນນັກຮຽນຂອງຕົນອ່ານອອກຂຽນເປັນແລ້ວ, ຂ້າພະເຈົ້າຮູ້ສຶກພາກພູມໃຈທີ່ສຸດ”.
ຫ້ອງຮຽນລວມໃຫ້ນັກຮຽນຢູ່ທີ່ນີ້ກວ້າງພຽງ 20 ຕາລາງແມັດເທົ່ານັ້ນ, ຄູສອນ ແຕ່ລະຄົນຕ້ອງຮຽບຮຽງຕຳລາຮຽນແຕ່ 7 – 10 ວິຊາ ແລະ ສິດສອນໃຫ້ນັກຮຽນແຕ່ລະຄົນຢ່າງລະອຽດ. ພ້ອມກັບການສອນວັດທະນະທຳຢູ່ຊັ້ນປະຖົມແລ້ວ, ນັບແຕ່ປີ 2009, ອ້າຍຄູ ເລິນ ຍັງຮັບຜິດຊອບສອນໃຫ້ເດັກນ້ອຍອະນຸບານອີກດ້ວຍ.
“ຫ້ອງຮຽນມີນັກຮຽນບາງຄົນເທົ່ານັ້ນ, ແຕ່ພວກຂ້າພະເຈົ້າຕ້ອງແບ່ງເປັນຫຼາຍຫ້ອງ ແຕ່ຫ້ອງປໍ 1 ເຖິງຫ້ອງ ປໍ 5 ນັບທັງຫ້ອງອະນຸບານອີກ ເພື່ອສ້າງຄວາມສະດວກໃຫ້ແກ່ການສິດສອນ ແລະ ໃຫ້ພວກນ້ອງກຳບົດຮຽນໄດ້ດີກວ່າ. ນັບແຕ່ປີ 2009, ຂ້າພະເຈົ້າຍັງຮັບໜ້າທີ່ສອນເດັກນ້ອຍອະນຸບານຕື່ມອີກ. ໃນປີທຳອິດເຫັນວ່າການສິດສອນປະສົບກັບຄວາມຫຍຸ້ງຍາກຫຼາຍ, ແຕ່ຮອດປີທີສອງທີສາມ, ດ້ວຍການແນະນຳຂອງຫ້ອງອະນຸບານ ສັງກັດພະແນກສຶກສາ ບຳລຸງສ້າງແຂວງແຄ໋ງຮ່ວາ, ຂ້າພະເຈົ້າກໍ່ມີຄວາມຮູ້ຕື່ມອີກກ່ຽວກັບວິທີສິດສອນເດັກອະນຸບານ ”.
ຫ້ອງຮຽນຢູ່ເກາະຊອງຕືໄຕ
(ພາບອິນເຕີແນດ) ເຖິງວ່າອຸປະກອນ ແລະ ເງື່ອນໄຂສິດສອນຍັງຂາດເຂີນ ເມື່ອທຽບໃສ່ເຂດດິນຕໍ່ແຜ່ນກໍ່ຕາມ, ແຕ່ດ້ວຍຄວາມສຸດຈິດສຸດໃຈຂອງຄູສອນ ພ້ອມກັບຄວາມມານະພະຍາຍາມດຸໝັ່ນຮ່ຳຮຽນ, ພວກນ້ອງນັກຮຽນໃນເກາະໄດ້ຮັບເອົາບົດຮຽນຢ່າງວ່ອງໄວ ແລະ ເຂົ້າໃຈບົດຮຽນໄດ້ດີ.
ກ້າວເຂົ້າສູ່ສົກຮຽນໃໝ່, ພວກນ້ອງນັກຮຽນຈະໄດ້ຮຽນພາສາອັງກິດຕື່ມອີກ. ຄູສອນພາສາອັງກິດແມ່ນທ່ານໝໍ, ຮ້ອຍໂທ ຫງວຽນວັນຕຸ່ງ. ຜູ້ທີ່ໄດ້ຮຽນຈົບມະຫາວິທະຍາໄລແພດສາດຮ່າໂນຍ ແລະ ພະອາຈານ ທິກແທ໋ງແທ່ງ ຢູ່ວັດຊອງຕືໄຕ. ພະອາຈານ ທິກແທ໋ງແທ່ງ ໃຫ້ຮູ້ວ່າ:
“ພະນັກງານຕາແສງໄດ້ເຊີນອັດຕະມາສອນພາສາອັງກິດໃຫ້ພວກຫຼານ ເພື່ອໃຫ້ພວກຫຼານສາມາດຮຽນຕໍ່ຢູ່ດິນຕໍ່ແຜ່ນໄດ້. ວິທີສອນພາສາອັງກິດຂອງອັດຕະມາວິແມ່ນສອນໃນທຸກສະຖານະການ, ທຸກເວລາ, ເມື່ອກິນ, ເມື່ອລະຫຼິ້ນ, ເມື່ອຮ້ອງເພງ. ພວກນ້ອງນິຍົມທີ່ສຸດ, ແຕ່ລະເທື່ອເມື່ອເຂົ້າວັດພວກນ້ອງມັກລົມກັນຢ່າງມ່ວນຊື່ນ ”.
ຫ້ອງຮຽນຢູ່ເກາະຊອງຕືໄຕ
(ພາບອິນເຕີແນດ) ລາອອກຈາກຊອງຕືໄຕ ໃນຍາມສາຍັນ. ແຕ່ເຫັນວ່າໃນຫ້ອງຮຽນ, ພວກນ້ອງນັກຮຽນຍັງເມົາມົວຫັດອ່ານ, ຫັດຂຽນຢູ່. ໃນເກາະທີ່ຫ່າງໄກ, ເຖິງວ່າຍັງຂາດເຂີນທັງດ້ານວັດຖຸ ແລະ ຈິດໃຈກໍ່ຕາມ, ແຕ່ບໍ່ສາມາດກີດຂວາງຄວາມສຸດຈິດສຸດໃຈ, ມັກຮ່ຳຮຽນຂອງນັກຮຽນໃນເກາະໄດ້. ສິ່ງດັ່ງກ່າວເຮັດໃຫ້ພວກຂ້າພະເຈົ້າມີຄວາມເຊື່ອໝັ້ນຕື່ມອີກຕໍ່ພວກນ້ອງ - ຜູ້ສືບທອດລຸ້ນພໍ່ລຸ້ນອ້າຍປົກປັກຮັກສາອະທິປະໄຕເຂດທະເລ, ເກາະຂອງປະເທດຊາດ.