(vovworld) – ຍັງມີເວລາບໍ່ດົນອີກກໍ່ຈະຮອດບຸນປີໃໝ່ປະຈຳຊາດ, ປີມະເມຍ. ໃນຊຸມມື້ນີ້, ໝູ່ບ້ານປູກດອກໄມ້ຊາແດກ, ແຂວງດົ່ງທາບ ມີຄວາມຟົດຟື້ນຍິ່ງຂຶ້ນ. ນີ້ແມ່ນບ່ອນປູກດອກໄມ້ນັບຮ້ອຍຊະນິດ, ທັງແມ່ນແຫ່ງສະໜອງດອກໄມ້ໃນໂອກາດບຸນປີໃໝ່ດ້ວຍຂະໜາດໃຫຍ່ສຸດຢູ່ພາກຕາເວັນຕົກ. ຍ້ອນເຫດນັ້ນ, ໂອກາດນີ້ທຸກຄົນ, ທຸກຄອບຄົວຢູ່ອ້ອມເທດສະບານຊາແດກ ມີຄວາມເບີກບານມ່ວນຊື່ນຄືດັ່ງພວມຕ້ອນຮັບບຸນປີໃໝ່ກ່ອນເວລາ.
ການບົວລະບັດດອກດາວເຮືອງຢູ່ບ້ານຊາແດກ
ໝູ່ບ້ານປູກດອກໄມ້ຊາແດກ, ຫ່າງຈາກເທດສະບານຊາແດກ, ແຂວງ ດົ່ງທາບ, ປະມານ 4 ກມ. ຢູ່ລຽບຕາມທາງຫຼວງ 8, ຕອນແຕ່ຕາແສງເຕິນ ກວີ໋ດົງ ເຖິງ ເຕິນແຄ໋ງດົງ ແຂວງດົ່ງທາບ ແມ່ນບັນດາທົ່ງດອກໄມ້ນາໆຊະນິດ, ດ້ວຍສີຫຼາກຫຼາຍ. ໂດຍຕ່າງກັບຮູບພາບທີ່ລິ້ງເຄີຍຂອງສວນດອກໄມ້ຕ່າງໆທີ່ປູກເປັນໜານຊື່ຖັດ. ຫາກດອກໄມ້ຢູ່ທີ່ນີ້ພັດປູກເທິງຮ້ານ, ຢູ່ໃຕ້ແມ່ນຄອງນຳ້. ດັ່ງນັ້ນບັນດາຜູ້ປູກດອກໄມ້ຕ້ອງພາຍເຮືອໄປບົວລະບັດ ແລະ ເກັບດອກໄມ້.
ເພື່ອກະກຽມດອກໄມ້ຮັບໃຊ້ບຸນປີໃໝ່ປີມະເມຍ, ບັນດາຄອບຄົວໃນໝູ່ບ້ານຊາແດກ ໄດ້ລົງທຶນປູກດອກໄມ້ຊະນິດຕ່າງໆເຊັ່ນ: ດອກເປັນຈະມາດດວງໃຫຍ່, ເປັນຈະມາດ Tiger, ເປັນຈະມາດແນວໃຕ້ຫວັນ, ດອກກຸຫຼາບ. ມີບາງຄອບຄົວກໍ່ລົງທຶນປູກດອກໄມ້ແນວພັນໃໝ່ອີກ… ຢູ່ຕາແສງເຕິນແຄ໋ງດົງ, ໄດ້ປູກດອກເປັນຈະມາດດວງໃຫຍ່ໃນເນື້ອທີ່ກວ່າ 25 ເຮັກຕາ, ດ້ວຍເກືອບ 200.000 ເຕົ້າ, ໂດຍສຸມໃສ່ບັນດາບ້ານຄື: ແຄ໋ງເຫງຍ, ແຄ໋ງເຍິນ, ດົງເຮ່. ປະຈຸບັນ, ເປັນຈະມາດແນວພັນນີ້ພັດທະນາໄດ້ດີ, ອັນໄດ້ສ້າງຄວາມເບີກບານມ່ວນຊື່ນໃຫ້ປະຊາຊົນຢູ່ທີ່ນີ້. ປ້າ ຫງວຽນທິຮັ່ງ, ຜູ້ປູກດອກເປັນຈະມາດດວງໃຫຍ່ຢູ່ຊາແດກ, ໃຫ້ຮູ້ວ່າ:
“ໃນຈຸດເວລານີ້ພວກຂ້າພະເຈົ້າພຽງແຕ່ຫົດນຳ້ເທົ່ານັ້ນ. ດິນຟ້າອາກາດເອື້ອອຳນວຍຄວາມສະດວກ. ປີນີ້ມີຫຼາຍງານບຸນດອກໄມ້ຍາມລະດູບານໃໝ່, ດັ່ງນັ້ນຄວາມຕ້ອງການດອກໄມ້ກໍ່ຫຼາຍ“.
ເຕົ້າດອກໄມ້ທີ່ປູກເປັນໜານຊື່ຖັດເທິງຮ້ານ ມາຢາມໝູ່ບ້ານປູກດອກໄມ້ຊາແດກໃນບໍ່ວ່າເດືອນໃດກໍ່ຮູ້ສຶກວ່າພວມຢູ່ໃນໂລກແຫ່ງມະຫັດສະຈັນທີ່ເຕັມໄປດ້ວຍສີສັນຫຼາກຫຼາຍ ແລະ ກິ່ນຫອມຫວນຂອງດອກໄມ້ນາໆຊະນິດ, ດອກຮັກເຮ່ (dahlia), ດອກກ້ວຍໄມ້, ດອກເໝີຍ, ດອກດາວເຮືອງ (marigold), ຕົ້ນໝາກເຜັດປະດັບ…ເບັ່ງບານສີສັນ ແລະ ສົ່ງກິ່ນຫອມຫວນໄປທົ່ວທຸກແຫ່ງ. ແຕ່ດອກໄມ້ທີ່ຫຼາຍກວ່າໝູ່ຢູ່ທີ່ນີ້ແມ່ນດອກກຸຫຼາບ. ປະຈຸບັນ, ໝູ່ບ້ານຊາແດກ ຍັງປູກດອກກຸຫຼາບກວ່າ 50 ແນວຄື: ດອກກຸຫຼາບສີຊຳ້ແດງ, ດອກກຸຫຼາບ Grada ສີຊຳ້ບົວ, ດອກກຸຫຼາບ Cleopatre ສີບົວ, ດອກກຸຫຼາບ Masseillle ສີຂາວ, ດອກກຸຫຼາບ Elizabet ສີບົວອ່ອນ, ດອກກຸຫຼາບConfidence ສີເຫຼືອງ, ດອກກຸຫຼາບ Maccasa ສີສົ້ມ… ທ່ານ ຫງວຽນຮ່ວາງມົ້ງ, ຢູ່ຕາແສງເຕິນກວີ໋ດົງ, ໃຫ້ຮູ້ວ່າ:
“ພວກຂ້າພະເຈົ້າຍັງຄົງຮັກສາແນວພັນດອກໄມ້ທີ່ເປັນມູນເຊື້ອຄືດອກເປັນຈະມາດ, ດອກກຸຫຼາບ… ປະຈຸບັນ, ເຂົາເຈົ້ານິຍົມດອກໄມ້ຊະນິດນີ້ຫຼາຍ, ດັ່ງນັ້ນໃນ ປີກວ່າທີ່ຜ່ານມາຈຶ່ງຂາຍໄດ້ດີ“.
ດອກໄມ້ເບັ່ງບານສີສັນຢ່າງສວຍງາມ ໂດຍຕັ້ງຢູ່ແຄມແມ່ນ້ຳຕ່ຽນຢາງ ທີ່ມີລົມພັດ, ແສງຕາເວັນຕະຫຼອດປີ ແລະ ແຫຼ່ງດິນສັນດອນຂອງແມ່ນ້ຳ, ພ້ອມກັບການບົວລະບັດຢ່າງຄ່ອງແຄ້ວຂອງປະຊາຊົນຢູ່ທີ່ນີ້ ໄດ້ສ້າງເປັນດອກໄມ້, ຕົ້ນໄມ້ປະດັບຫຼາຍຊະນິດທີ່ມີຄູນຄ່າ, ປະກອບສ່ວນເພີ່ມຄວາມງາມໃຫ້ຊີວິດຂອງມະນຸດ. ບໍ່ພຽງແຕ່ຄືແນວນັ້ນ, ດອກໄມ້ ແລະ ຕົ້ນໄມ້ປະດັບເຫຼົ່ານີ້ຍັງນຳມາເຊິ່ງຄວາມອີ່ມໜຳສຳລານ ແລະ ຄວາມຜາສຸກໃຫ້ແກ່ປະຊາຊົນຢູ່ທີ່ນີ້. ປະຈຸບັນ, ຊາວໝູ່ບ້ານຊາແດກ ພາກພູມໃຈທີ່ສຸດ ເມື່ອມີພໍ່ຄ້າຊາວຂາຍມາຈ່ອງຊື້ດອກໄມ້ດ້ວຍຈຳນວນຫຼາຍ. ເອື້ອຍ ເຈິ່ນທິເຮ (Tran Thi Hue), ຜູ້ປູກດອກໄມ້ຫຼາຍຊະນິດຄື: ດອກດາວເຮືອງ (marigold), ດອກເປັນຈະມາດ Tiger, ດອກບົວ, ດອກຫ່ອນໄກ່....ເພື່ອຮັບໃຊ້ບຸນປີໃໝ່ປະຈຳຊາດ, ໃຫ້ຮູ້ວ່າ, ປີນີ້ໝູ່ບ້ານປູກດອກໄມ້ມ່ວນຫຼາຍ, ເພາະວ່າໃນໂອກາດບຸນປີໃໝ່ປະຈຳຊາດນີ້, ຄິດສະເລ່ຍແລ້ວຜູ້ປູກດອກໄມ້ແຕ່ລະຄອບຄົວສາມາດຫາກຳໄລໄດ້ 100 ລ້ານດົ່ງ/ເຮັກຕາ.
“ພໍ່ຄ້າຊາວຂາຍທີ່ມາຈາກຫຼາຍແຫ່ງຄື ຮ່າໂນ້ຍ, ນະຄອນໂຮ່ຈີມິນ ເພື່ອຊື້ດອກໄມ້. ເຂົາເຈົ້ນຕ້ອງການຄືແນວໃດ, ພວກຂ້າພະເຈົ້າກໍ່ສະໜອງຄືແນວນັ້ນ. ເຖິງແນວນັ້ນກໍ່ຕາມ, ການປູກດອກໄມ້ກໍ່ລຳບາກຫຼາຍ, ຕ້ອງບົວລະບັດຕະຫຼອດມື້“.
ລົດຂົນສົ່ງດອກໄມ້ໄປຍັງທ້ອງຖີ່ນຕ່າງໆໃນທົ່ວປະເທດ ເມື່ອລະດູບານໃໝ່ວຽນມາ, ກໍ່ແມ່ນເວລາທີ່ໝູ່ບ້ານປູກດອກໄມ້ຊາແດກ ມີບັນຍາກາດຟົດຟື້ນຄືໃນງານບຸນ. ລົດແຕ່ລະຂະບວນໄດ້ຫຼັ່ງໄຫຼກັນມາຂົນສົ່ງດອກໄມ້, ຕົ້ນໄມ້ປະດັບໄປຍັງແຂວງ, ນະຄອນຕ່າງໆ ເພື່ອຮັບໃຊ້ປະຊາຊົນໃນໂອກາດບຸນປີໃໝ່ປະຈຳຊາດ. ດອກໄມ້ ແລະ ຕົ້ນໄມ້ປະດັບຢູ່ທີ່ນີ້ ໄດ້ນຳມາເຊິ່ງຄຸນຄ່າດ້ານເສດຖະກິດສູງ; ກາຍເປັນກຳລັງໜູນຢ່າງແຮງເພື່ອໃຫ້ນະຄອນສ້າງແຜນຮ່າງພັດທະນາຊາແດກເປັນນະຄອນແຫ່ງດອກໄມ້ໃນອະນາຄົດ.
ນັບແຕ່ດົນນານມາແລ້ວ, ໝູ່ບ້ານທີ່ມີດອກໄມ້ເບັ່ງບານຕະຫຼອດປີ ໄດ້ກາຍເປັນສະຖານທີ່ດຶງດູດນັກທ່ອງທ່ຽວມາຢາມເປັນຈຳນວນຫຼວງຫຼາຍ, ພິເສດແມ່ນໃນໂອກາດບຸນປີໃໝ່, ລະດູບານໃໝ່ວຽນມາ. ບໍ່ພຽງແຕ່ໄດ້ເຫັນດອກໄມ້ຫຼາຍຊະນິດດ້ວຍສີຫຼາກຫຼາຍເທົ່ານັ້ນ, ມາແຫ່ງນີ້ນັກທ່ອງທ່ຽວຍັງຮັບຮູ້ໄດ້ບັນຍາກາດປອດໂປ່ງ, ເຕັມໄປດ້ວຍກິ່ນຫອມຫວນຂອງດອກໄມ້ ແລະ ໄດ້ພ້ອມກັບປະຊາຊົນຢູ່ທີ່ນີ້ພາຍເຮືອໄປເກັບດອກໄມ້ອີກດ້ວຍ.