(vovworld)-ໝູ່ບ້ານວັດທະນະທຳ- ທ່ອງທ່ຽວ ບັນດາເຜົ່າຫວຽດນາມ ຢູ່ ດົງໂມ, ເທດສະບານ ເຊີນໄຕ, ຮ່າໂນ້ຍ ແມ່ນສະຖານທີ່ວາດພາບບັນດາຄຸນຄ່າວັດທະນະທຳທີ່ເປັນເອກະລັກສະເພາະຂອງ 54 ຊົນເຜົ່າຫວຽດນາມ ເພື່ອແນະນຳໃຫ້ປະຊາຊົນພາຍໃນປະເທດ ແລະ ເພື່ອນມິດສາກົນ. ໂດຍໄດ້ນຳເຂົ້າເຄື່ອນໄຫວແຕ່ປີ 2010, ມາຮອດປະຈຸບັນ, ໝູ່ບ້ານວັດທະນະທຳ-ທ່ອງທ່ຽວບັນດາເຜົ່າ ຫວຽດນາມ ແມ່ນສະຖານທີ່ທ່ອງທ່ຽວທີ່ດູດດື່ມ ແລະ ມີຄວາມສາມາດບົ່ມຊ້ອນດ້ວຍຜະລິດຕະພັນທ່ອງທ່ຽວ ຫລາຍຢ່າງ ທີ່ເປັນເອກະລັກສະເພາະ ແລະ ມີຫລາຍຮູບຫລາຍແບບ.ບົດຂຽນຂອງນັກຂ່າວ ອຽນຫງອກ.
ເຮືອນຣົງຂອງບັນດາເຜົ່າໄຕງວຽນ
ພາບ:vtv.vn
|
ໃນໄລຍະເກືອບ 5 ປີຜ່ານມາ, ໝູ່ບ້ານວັດທະນະທຳ-ທ່ອງທ່ຽວບັນດາເຜົ່າ ຫວຽດນາມ ດຶງດູດແຂກ ປະມານ 900 ເທື່ອຄົນ ມາຢ້ຽມຊົມ, ຄົ້ນຄ້ວາ ແລະ ຊອກຮູ້. ບັນດາການເຄື່ອນໄຫວວາດພາບງານບຸນຕ່າງໆຄື: ບຸນແຂ່ງງົວ ໄບນູຍ ແຂວງ ອານຢາງ, ຕະຫລາດແຫ່ງຄວາມຮັກ ເຄົາວາຍ ແຂວງ ຮ່າຢາງ, ງານບຸນ ອອກອອມບອກ, ຕະຫລາດນ້ຳ ພາກໃຕ້, ຕະຫລາດນັດເຂດພູສູງພາກເຫນືອ… ແມ່ນບັນດາການເຄື່ອນໄຫວທີ່ດຶງດູດແຂກມາຊົມເຖິງ 10.000 ເທື່ອຄົນ/ ມື້. ທ່ານ ຫງວຽນວັນຕວນ, ນັກທ່ອງທ່ຽວມາຈາກແຂວງ ກວ໋າງນີງ ໃຫ້ຮູ້ວ່າ:
“ສະຖານທີ່ທ່ອງທ່ຽວນີ້ໄດ້ນຳມາເຊິ່ງຜົນປະໂຫຍດຫລາຍຢ່າງໃຫ້ແກ່ປະຊາຊົນ, ມີຫລາຍຄົນຢາກມາຢ້ຽມຊົມ ໝູ່ບ້ານວັດທະນະທຳ-ທ່ອງທ່ຽວບັນດາເຜົ່າ ຫວຽດນາມ. ຂ້າພະເຈົ້າເອງກໍເຫັນວ່າ ໝູ່ບ້ານວັດທະນະທຳນີ້ງາມຫລາຍ ແລະ ສ້າງຄວາມປະທັບໃຈທີ່ສຸດ. ເຂດຂອງຊົນເຜົ່າ ຂະແມ ໄດ້ຮັບການກໍ່ສ້າງສວຍງາມ ແລະ ໃຫຍ່ໂຕ.”
ດ້ວຍການເຄື່ອນໄຫວຫລາຍຢ່າງທີ່ເປັນເອກະລັກສະເພາະແລະສ້າງຄວາມປະທັບໃຈ, ບັນດາເຫດການຢູ່ ໝູ່ບ້ານວັດທະນະທຳ-ທ່ອງທ່ຽວບັນດາເຜົ່າ ຫວຽດນາມ
ໄດ້ເຮັດໃຫ້ນັກທ່ອງທ່ຽວມີຄວາມເຂົ້າໃຈກ່ຽວກັບວັດທະນະທຳທີ່ດູດດື່ມຂອງບັນດາເຜົ່າ. ຢູ່ທີ່ນີ້ ປະຊາຊົນ ແລະ ນັກທ່ອງທ່ຽວໄດ້ພົບປະແລກປ່ຽນ, ຊອກຮູ້ ແລະ ເຂົ້າຮ່ວມງານບຸນ, ຮີດຄອງປະເພນີຕ່າງໆ ດ້ວຍສີສັນສະເພາະ ຊື່ງບໍ່ແມ່ນຜູ້ໃດກໍມີໂອກາດໄດ້ຮັບຊົມ. ຈາກພິທີພາວະນາຂໍໃຫ້ມີຄວາມຢູ່ເຢັນເປັນສຸກ, ດິນຟ້າອາກາດເອື້ອອຳນວຍຄວາມສະດວກ ຂອງຊາວເຜົ່າ ໂລໂລຢູ່ ແຂວງຮ່າຢາງ, ພິທີປູກເຂົ້າຂອງຊາວເຜົ່າ ເບີເຣົາ ຢູ່ ແຂວງ ກອນຕູມ ຕະຫລອດຮອດບຸນແຂ່ງມ້າຂອງຊາວເຜົ່າມົ້ງ ຢູ່ ບັກຮ່າ ແລະອື່ນໆ. ທັງໝົດເຫຼົ່ານັ້ນລ້ວນແຕ່ຖືກວາດພາບຢ່າງມີຊີວິດຊີວາ ແລະ ດູດດື່ມ. ບັນດາການເຄື່ອນໄຫວວັດທະນະທຳທີ່ເປັນເອກະລັກສະເພາະນັ້ນ ໄດ້ສ້າງເປັນຜະລິດຕະພັນການທ່ອງທ່ຽວມີລັກສະນະສະເພາະຂອງ ໝູ່ບ້ານວັດທະນະທຳ-ທ່ອງທ່ຽວບັນດາເຜົ່າ ຫວຽດນາມ. ເມື່ອເຕື້ອງເຖິງຄວາມສາມາດບົ່ມຊ້ອນການພັດທະນາທ່ອງທ່ຽວ, ທ່ານ ເລີມວັນຄາງ, ຮອງຫົວຫນ້າຄະນະຄຸ້ມຄອງ ໝູ່ບ້ານວັດທະນະທຳ-ທ່ອງທ່ຽວບັນດາເຜົ່າ ຫວຽດນາມ ໃຫ້ຮູ້ວ່າ:
“ກ່ຽວກັບດ້ານທ່ອງທ່ຽວ, ໝູ່ບ້ານວັດທະນະທຳ-ທ່ອງທ່ຽວບັນດາເຜົ່າ ຫວຽດນາມ ມີບັນດາທ່າໄດ້ປຽບຄື: ຫ່າງຈາກນະຄອນຫລວງຮ່າໂນ້ຍ ພຽງ 40 ກິໂລແມັດ ແລະ ຂີ່ລົດໂອໂຕເສຍເວລາພຽງ 30 ນາທີ. ໝູ່ບ້ານວັດທະນະທຳແຫ່ງນີ້ ມີເນື້ອທີ່ 1500 ເຮັກຕາ, ມີທິວທັດທຳມະຊາດສວຍງາມ, ໃນນັ້ນ 900 ເຮັກຕາແມ່ນຫນອງນຳ້, ສ່ວນຍັງເຫລືອແມ່ນເຂດປ່າໄມ້,ໂນນພູ. ໝູ່ບ້ານວັດທະນະທຳ-ທ່ອງທ່ຽວບັນດາເຜົ່າ ຫວຽດນາມ ຍັງແມ່ນສະຖານທີ່ທ່ອງທ່ຽວໃນລະບົບສະຖານທີ່ທ່ອງທ່ຽວທາງທິດຕາເວັນຕົກຂອງ ຮ່າໂນ້ຍ. ປັດໄຈ ທັງໝົດເຫຼົ່ານັ້ນ ໄດ້ສ້າງທ່າໄດ້ປຽບເພື່ອຂຸດຄົ້ນການທ່ອງທ່ຽວ ໝູ່ບ້ານວັດທະນະທຳ-ທ່ອງທ່ຽວບັນດາເຜົ່າ ຫວຽດນາມ.”
ໝູ່ບ້ານວັດທະນະທຳໄດ້ດຶງດູດນັກທ່ອງທ່ຽວເຂົ້າຊົມເປັນຈຳນວນຫລາຍ
ພາບ:vtc.vn
|
ດ້ວຍທີ່ຕັ້ງສະດວກ, ສວຍງາມ ແລະ ທິດທາງສຸມໃສ່ຂຸດຄົ້ນບັນດາຄຸນຄ່າວັດທະນະທຳ ໝູ່ບ້ານວັດທະນະທຳ-ທ່ອງທ່ຽວບັນດາເຜົ່າ ຫວຽດນາມ ພວມຄ່ອຍໆຢັ້ງຢືນທີ່ຕັ້ງບົດບາດຂອງຕົນ. ຕາມທ່ານ ເຈີນຫືວເຊີນ, ຫົວຫນ້າພະແນກວັດທະນະທຳ ກິລາ ແລະ ທ່ອງທ່ຽວ ແຂວງ ລາວກາຍແລ້ວ, ເພື່ອລະດົມປະຊາຄົມເຂົ້າຮ່ວມບັນດາເຫດການຢ່າງສຸດຂີດ ຄວນຮັບປະກັນຜົນປະໂຫຍດໃຫ້ເຂົາເຈົ້າ ແລະ ຄວນເພີ່ມທະວີບັນດາແຫລ່ງລາຍຮັບອື່ນ.
“ພວກເຮົາຄວນມີກົນໄກຫນຶ່ງ ນັ້ນແມ່ນເຮັດແນວໃດເພື່ອໃຫ້ປະຊາຊົນທັງຮັບຜົນປະໂຫດ ທັງຫັນບັນດາເຫດການສັງຄົມໂດຍໄວ. ບັນດາເຫດການນັ້ນ ຕ້ອງມີນັກອຸປະຖຳລາຍໃຫຍ່ ແລະ ຕ້ອງເຮັດແນວໃດເພື່ອດຶງດູດນັກທ່ອງທ່ຽວ. ບັນດາງານບຸນທີ່ຈັດຂຶ້ນ ຕ້ອງຂາຍປີ້ໃຫ້ຜູ້ຢາກເຂົ້າຊົມ ເພື່ອເອົາເງິນຮັບຮັບໃຊ້ໃຫ້ເຫດການອື່ນ.”
ຄຽງຄູ່ກັນນັ້ນ ເພື່ອພັດທະນາຄວາມສາມາດບົ່ມຊ້ອນໃນການທ່ອງທ່ຽວ, ທ່ານ ລືວເຍີນວີງ, ຜູ້ອຳນວຍການໃຫຍ່ບໍລິສັດທ່ອງທ່ຽວຫຸ້ນສ່ວນຫວຽດນາມ ຍົກຄຳເຫັນວ່າ:
“ນອກຈາກບັນດາເຫດການຊື່ງພວກເຮົາໄດ້ຈັດຕັ້ງຂຶ້ນດ້ວຍຂອບຂະຫນາດໃຫຍ່, ສ້າງອິດທີພົນຊື່ສຽງ ແລະ ເຄື່ອງໝາຍ ໝູ່ບ້ານວັດທະນະທຳ-ທ່ອງທ່ຽວບັນດາເຜົ່າ ຫວຽດນາມ ແລ້ວ ແມ່ນຕ້ອງມີການຮ່ວມືກັບບັນດາວິສາຫະກິດທ່ອງທ່ຽວ, ສ້າງຜະລິດຕະພັນວັດທະນະທຳ. ໃນໝູ່ບ້ານວັດທະນະທຳ ຕ້ອງມີພາກສ່ວນສະເພາະກິດກ່ຽວກັບການທ່ອງທ່ຽວເຫດການ, ກອງປະຊຸມ, ການສຳມະນາ. ຄວາມຮັບຜິກຊອບຂອງພາກສ່ວນນີ້ ແມ່ນສະຫນອງຂໍ້ມູນຂ່າວສານຢ່າງຄົບຖ້ວນໃຫ້ແກ່ບັນດາບໍລິສັດທ່ອງທ່ຽວ ເພື່ອໃຫ້ພວກຂ້າພະເຈົ້ານຳເຂົ້າບັນດາລາຍການທ່ອງທ່ຽວ. ບັນດາວິສາຫະກິດທ່ອງທ່ຽວ ມີບົດບາດເປັນຂົວຕໍ່ກັບນັກທ່ອງທ່ຽວດ້ວຍບັນດາຜະລິດຕະພັນຂອງໝູ່ບ້ານວັດທະນະທຳ.”
ນັບແຕ່ເມື່ອນຳເຂົ້າເຄື່ອນໄຫວມາຮອດປະຈຸບັນ, ໝູ່ບ້ານວັດທະນະທຳ-ທ່ອງທ່ຽວບັນດາເຜົ່າ ຫວຽດນາມໄດ້ຕອບສະຫນອງບັນດາຄວາມຕ້ອງການກ່ຽວກັບຊີວິດທາງດ້ານວັດທະນະທຳ ແລະ ຈິດໃຈ, ການລະຫລິ້ນບັນເທິງ, ການເຄື່ອນໄຫວວັດທະນະທຳ, ຍົກສູງຄວາມຮັບຮູ້ຂອງວົງຄະນາຍາດໃນການອະນຸລັກຮັກສາ, ເສີມຂະຫຍາຍບັນດາຄຸນຄ່າວັດທະນະທຳຊົນເຜົ່າ ທັງແມ່ນການເຄື່ອນໄຫວວັດທະນະທຳ ປະກອບສ່ວນອະນຸລັກຮັກສາ, ເສີມຂະຫຍາຍຄຸນຄ່າ ແລະ ເຊີດຊູວັດທະນະທຳຂອງ 54 ຊົນເຜົ່າຫວຽດນາມ.