(vovworld) - ອາທິດຜ່ານມາ, ພາກພາສາລາວວິທະຍຸກະຈາຍສຽງ ຫວຽດນາມ ໄດ້ຮັບຈົດໝາຍ, ອີແມວຈາກທ່ານຜູ້ຟັງ, ໃນນັ້ນສະແດງຄວາມສົນໃຈເຖິງຫຼາຍບັນຫາ, ພິເສດແມ່ນປະກົດການອາກາດຢູ່ເຂດພູດອຍພາກເໜືອ ຫວຽດນາມ. ໃນລາຍການ “ໂອ້ລົມກັບເພື່ອນລາວ” ພາກນີ້, ພວກເຮົາຂໍແນະນຳເຖິງປະກົດການນີ້. ສ່ວນໃນສຸດທ້າຍຂອງລາຍການ, ພວກຂ້າພະເຈົ້າຂໍໂຄສະນາເຖິງທ່ານຜູ້ຟັງຂ່າວທີ່ໜ້າສົນໃຈ. ເຊີນທ່ານຕິດຕາມຮັບຟັງ.
ການກະກຽມເຄື່ອງຂອງຂອງຄະນະ
ເພື່ອນ ວັນນິດາ, ຢູ່ແຂວງ ອັດຕະປື ໄດ້ສົ່ງອີແມວມາຍັງລາຍການດ້ວຍເນື້ອໃນວ່າ: ເວລາຜ່ານມາ, ຂ້າພະເຈົ້າໄດ້ຮັບຂ່າວທີ່ວ່າ: ລະບົບກະຈາຍສຽງພາກພາສາຕ່າງປະເທດ VOV5 ໄດ້ຈັດຕັ້ງການເຄື່ອນໄຫວກຸສົນຢູ່ເຂດພູດອຍພາກເໜືອ ຫວຽດນາມ. ຂ້າພະເຈົ້າຂໍຖາມວ່າ: ພວກເຈົ້າເຄີຍຈັດຕັ້ງການເຄື່ອນໄຫວກຸສົນຄືແນວນັ້ນບໍ່ ແລະ ວິທີຂົນຂວາຍຜູ້ເຂົ້າຮ່ວມຄືແນວໃດ?
ແມ່ນແທ້, ທ້າຍເດືອນ 11 ຜ່ານມາ, ຄະນະປະຕິບັດງານຂອງລະບົບກະຈາຍສຽງພາກພາສາຕ່າງປະເທດ - ວິທະຍຸກະຈາຍສຽງ ຫວຽດນາມ ຫາກໍ່ຈັດຕັ້ງການເຄື່ອນໄຫວຢ້ຽມຢາມ ແລະ ມອບຂອງຂວັນໃຫ້ແກ່ປະຊາຊົນ ແລະ ນັກຮຽນທີ່ທຸກຍາກຢູ່ຕາແສງ ແຊນເທື້ອງ, ເມືອງ ເມື່ອງແຍ໋, ແຂວງ ດ້ຽນບຽນ ເຊິ່ງແມ່ນຕາແສງໃນເຂດພູດອຍຕິດກັບລາວ. ຂອງຂວັນເກືອບ 400 ພູດເຊິ່ງລວມມີ: ຜ້າຫົ່ມ, ເສື້ອກັນໜາວ, ເຄື່ອງໃຊ້ໄມ້ສອຍທີ່ຈຳເປັນ ທີ່ມອບໃຫ້ພໍ່ແມ່ປະຊາຊົນ ນັ້ນແມ່ນນ້ຳໃຈຂອງບັນດາພະນັກງານ, ນັກຂ່າວ, ບັນນາທິການໃນລະບົບກະຈາຍສຽງພາກພາສາຕ່າງປະເທດຝາກໃຫ້ ໃນລາຍການທີ່ມີຊື່ວ່າ “ຄວາມອົບອຸ່ນຢູ່ເຂດຊາຍແດນ”, ເພື່ອນຳລະດູບານໃໝ່ຢູ່ເຂດທົ່ງພຽງມາໃຫ້ເຂດຊາຍແດນ. ເພື່ອປະຕິບັດການເຄື່ອນໄຫວກຸສົນນີ້, ຄະນະຊາວໜຸ່ມ VOV5 ໄດ້ມີຂໍ້ລິເລີ່ມສ້າງກອງທຶນເພື່ອເດັກນ້ອຍເຂດພູດອຍ, ໃນນັ້ນຮຽກຮ້ອງໃຫ້ພະນັກງານ, ບັນນາທິການໃນລະບົບກະຈາຍສຽງພາກພາສາຕ່າງປະເທດທຸກຄົນບໍລິຈາກເງິນມື້ລະ 2.000 ດົ່ງ, ດ້ວຍພະນັກງານທັງໝົດກ່ວາ 100 ຄົນ, ທ້າຍປີພວກຂ້າພະເຈົ້າໄດ້ມີເງິນປະມານ 70 ລ້ານດົ່ງ ເພື່ອຊື້ຂອງຂວັນໃຫ້ປະຊາຊົນ ແລະ ເດັກນ້ອຍເຂດພູດອຍ. ເຖິງວ່າການເຄື່ອນໄຫວນີ້ຫາກໍ່ໄດ້ຮັບການຈັດຕັ້ງ 2, 3 ປີມານີ້ ແຕ່ໄດ້ຮັບການຕອບສະໜອງຢ່າງສຸດຈິດສຸດໃຈຈາກບັນດາສະມາຊິກຊາວໜຸ່ມ, ພະນັກງານ, ບັນນາທິການໃນ VOV5, ພວກຂ້າພະເຈົ້າຮູ້ສຶກເອກອ້າງທະນົງໃຈ. ໃນປີໃໝ່, ພວກຂ້າພະເຈົ້າໄດ້ມີແຜນການຈັດຕັ້ງການເຄື່ອນໄຫວນີ້ດ້ວຍຂະໜາດໃຫຍ່ກ່ວາ. ຂໍຂອບອົບຂອບໃຈທີ່ນາງ ວັນນິດາ ໄດ້ສົນໃຈເຖິງການເຄື່ອນໄຫວຕ່າງໆຂອງ VOV5.
ຫິມະຕົກຢູ່ ຊາປາ
ອາທິດຜ່ານມາ, ພວກເຮົາກໍ່ໄດ້ຮັບໂທລະສັບ ແລະ ອີແມວຈາກທ່ານຜູ້ຟັງລາວ, ກໍ່ຄືນັກສຶກສາ ຫວຽດນາມ ທີ່ພວມຮຳ່ຮຽນຢູ່ ລາວ ຄື: ທ່ານ ຄຳພັນ, ແຂວງ ຫຼວງພະບາງ, ທ່ານ ບຸນເລີດ, ແຂວງ ຫົວພັນ, ເພື່ອນ ເຈີ່ນວຽດຮູ່ງ, ຫາຍຮ່າ ຢູ່ວຽງຈັນ. ເມື່ອໄດ້ຮັບຊົມພາບສາລະຄະດີໃນແວບໄຊ vovworld.vn, ທ່ານຜູ້ຟັງມີຄວາມເອົາໃຈໃສ່ເຖິງສະພາບອາກາດຢູ່ ຫວຽດນາມເວົ້າລວມ ແລະ ຢູ່ເຂດພູດອຍພາກເໜືອ, ພິເສດແມ່ນປະກົດການຫິມະຕົກທີ່ສຸດ.
ຕາມປົກກະຕິແລ້ວ, ໃນຊຸມວັນໜາວສຸດຂອງລະດູໜາວ, ບາງສະຖານທີ່ຢູ່ເຂດພູສູງທາງທິດເໜືອຂອງ ຫວຽດນາມ, ໂດຍສະເພາະແມ່ນ ຊາປາ ແຂວງ ລາວກາຍ. ເຫດການນີ້ເຄີຍປະກົດຂຶ້ນໃນເດືອນ 1, ຕົ້ນເດືອນ 2 ແຕ່ພິເສດໃນປີນີ້, ເມື່ອຫາກໍ່ກ້າວເຂົ້າສູ່ລະດູໜາວໄດ້ເກີດເຫດຫິມະຕົກ ໃນກາງເດືອນ 12 ຢູ່ບາງແຫ່ງໃນເຂດພູດອຍພາກເໜືອຄື: ນະຄອນ ຊາປາ, ແຂວງ ລາວກາຍ ຫິມະຕົກໜາເຖິງ 10 cm. ໃນຕອນເຊົ້າວັນທີ 16/12 ຢູ່ເຂດ ດົ່ງວັນ, ເມວວາກ (ແຂວງ ຮ່າຢາງ) ກໍ່ມີຫິມະຕົກແຕ່ບໍ່ຫຼາຍ. ສຳລັບປະເທດຢູ່ໃນເຂດຮ້ອນຄື ຫວຽດນາມ, ເຫດການຫິມະຕົກແມ່ນບໍເຄີຍມີ. ໃນປີໜຶ່ງ, ຫິມະເຄີຍຕົກເທື່ອໜຶ່ງຢູ່ບາງສະຖານທີ່ຂອງເຂດພູດອຍພາກເໜືອ, ດັ່ງນັ້ນໄດ້ດຶງດູດຜູ້ມາຊົມເປັນຈຳນວນຫຼວງຫຼາຍ. ແຕ່ເຫດການຫິມະຕົກນີ້ກໍ່ແມ່ນສັນຍານກ່າວເຕືອນກ່ຽວກັບອາກາດບໍ່ເປັນປົກກະຕິທີ່ເກີດຂຶ້ນຢູ່ ຫວຽດນາມ ເວົ້າສະເພາະ ແລະ ຢູ່ໃນໂລກເວົ້າລວມ.
ເມື່ອຫິມະຕົກ, ຜັກ, ຕົ້ນໄມ້ໃບຫຍ້າ, ສັດລ້ຽງຂອງຊາວກະສິກອນລ້ວນແຕ່ຖືກຜົນກະທົບ. ທ້າວ ຫງວຽນເຟື້ອງຢູ້ງ, ຜູ້ຫາກໍ່ໄປທ່ອງທ່ຽວຢູ່ນະຄອນ ຊາປາ ໃນໂອກາດມີຫິມະຕົກ ແບ່ງປັນວ່າ:
“ຂ້າພະເຈົ້າເຄີຍຮຳ່ຮຽນຢູ່ ລັດເຊຍ ດັ່ງນັ້ນ ຫິມະຕົກແມ່ນເລື່ອງທຳມະດາສຳລັບຂ້າພະເຈົ້າ, ແຕ່ຄວາມໜາວຈັດ, ອາກາດຢູ່ ຫວຽດນາມ ຕ່າງຫາກຫຼາຍ, ໜາວກ່ວາຫຼາຍ. ໄປທ່ອງທ່ຽວ ຊາປາ ຖືກກັບໂອກາດຫິມະຕົກ, ເຫັນວ່າພືດຜັກຂອງປະຊາຊົນຖືກເສຍຫາຍ, ເດັກນ້ອຍບໍ່ມີເສື້ອກັນໜາວຢ່າງພຽງພໍ ຂ້າພະເຈົ້າຮູ້ສຶກເຈັບປວດຫຼາຍ. ຖະໜົນຫົນທາງຖືກຫິມະປົກຄຸມ ກໍ່ຄວາມຫຍຸ້ງຍາກ ແລະ ອັນຕະລາຍໃຫ້ແກ່ການໄປມາ. ນີ້ກໍ່ແມ່ນຄວາມວິຕົກວັງວົນຍ້ອນມັນສະແດງໃຫ້ເຫັນຄວາມບໍ່ເປັນປົກກະຕິຂອງດິນຟ້າອາກາດເຊິ່ງປະຈຸບັນ ຫວຽດນາມ ພວມຮັບມື.”
ປະຈຸບັນ, ອາກາດຢູ່ບັນດາແຂວງພາກເໜືອ ຫວຽດນາມ ໜາວພໍສົມຄວນແຕ່ 7 – 20 ອົງສາ, ສະເພາະບັນດາແຂວງພູດອຍທາງພາກເໜືອອາກາດຕຳ່ກ່ວານ້ອຍໜຶ່ງ. ນ້ຳແຂງ, ຫິມະກໍ່ລະລາຍໝົດແລ້ວ ແຕ່ອາກາດຍັງໜາວຈັດຢູ່, ພິເສດແມ່ນໃນຕອນຄຳ່.
ນັບແຕ່ປີ 2014, ໃນລາຍການ “ໂອ້ລົມກັບເພື່ອນລາວ”, ແຕ່ລະເດືອນພວກເຮົາຈະມີຄຳຖາມສຳລັບທ່ານຜູ້ຟັງ. ຖ້າຫາກຜູ້ຟັງທ່ານໃດມີຄຳຕອບຖືກຕ້ອງ ແລະ ໄວທີ່ສຸດຈະໄດ້ຮັບຂອງຂວັນຈາກລາຍການ. ພິເສດ, ຖ້າຜູ້ຟັງທ່ານໃດເຄີຍສົ່ງຄຳຕອບຖືກຕ້ອງໃຫ້ພວກຂ້າພະເຈົ້າເປັນປະຈຳຈະໄດ້ຮັບຂອງຂວັນພິເສດໃນທ້າຍປີ. ຂໍສົ່ງຄຳຖາມໃຫ້ພວກເຮົາຕາມສະຖານທີ່: ພາກພາສາລາວ, ວິທະຍຸກະຈາຍສຽງ ຫວຽດນາມ 45 ຖະໜົນ ບ່າຈ້ຽວ, ຮ່າໂນ້ຍ. ເບີໂທ 0084.438256631 ຫຼື ອີແມວ: laovov@yahoo.com. ທ່ານຈົ່ງຮັບຟັງລາຍການໃນອາທິດໜ້າ ແລະ ຕອບຄຳຖາມຂອງລາຍການເດີ.