(vovworld) - ໃນອາທິດຜ່ານມາ, ລະບົບກະຈາຍສຽງພາກພາສາຕ່າງປະເທດແຫ່ງຊາດ, ວິທະຍຸກະຈາຍສຽງຫວຽດນາມ ໄດ້ຮັບຈົດໝາຍ, ອີແມວ ໂທລະສັບ 149 ສະບັບຈາກຜູ້ຝັງຢູ່ຫຼາຍປະເທດໃນໂລກ. ໃນນັ້ນລາຍກະຈາຍສຽງພາກພາສາລາວ ໄດ້ຮັບອີແມວ, ໂທລະສັບ 4 ສະບັບຈາກທ່ານຜູ້ຟັງລາວ. ໃນລາຍການໂອ້ລົມກັບເພື່ອນລາວ ມື້ນີ້, ພວກເຮົາຂໍຄັດສະເໜີເນື້ອໃນຈົດໝາຍ ແລະ ຕອບບາງຄຳຖາມເຊິ່ງທ່ານຜູ້ຟັງໄດ້ຝາກມາລາຍການ.
ເພື່ອນ ແກ້ວຕາ ວັນລະສິນ ຢູ່ແຂວງ ຊຽງຂວາງ ໄດ້ຝາກຈົດໝາຍມາຍັງລາຍການດ້ວຍເນື້ອໃນວ່າ: “ຂ້າພະເຈົ້າຮູ້ວ່າ, ໃນເດືອນ 7 ນີ້ ຢູ່ ຫວຽດນາມ ຈະຈັດຕັ້ງການເຄື່ອນໄຫວຫຼາຍຢ່າງເພື່ອສະເຫຼີມສະຫຼອງວັນທະຫານເສຍອົງຄະ, ນັກຮົບເສຍສະຫຼະຊີວິດເພື່ອຊາດ 27/7. ນອກຈາກນັ້ນ, ຍັງມີການເຄື່ອນໄຫວການສະເຫຼີມສະຫຼອງ 55 ປີແຫ່ງວັນຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນ ຫວຽດນາມ. ຂ້າພະເຈົ້າຢາກຮູ້ແຈ້ງກ່ວາກ່ຽວກັບການເຄື່ອນໄຫວເຫຼົ່ານັ້ນ?”
ບັນດາບຸກຄົນດີເດັ່ນໄດ້ຮັບໃບຍ້ອງຍໍໃນກອງປະຊຸມໃຫຍ່
ເພື່ອນ ແກ້ວຕາ ວັນລະສິນ ທີ່ຮັກແພງ, ການຈັດຕັ້ງພິທີສະເຫຼີມສະຫຼອງ 55 ປີແຫ່ງວັນວິນາດສະກຳທາດພິດສີສົ້ມ/ດີໂອຊິນ ຢູ່ ຫວຽດນາມ ແມ່ນໂອກາດເພື່ອຕີລາຄາຮອບດ້ານ, ເລິກເຊິ່ງກ່ວາກ່ຽວກັບຄວາມອັນຕະລາຍ, ລະດັບເສຍຫາຍຍ້ອນສົງຄາມເຄມີກໍ່ຂຶ້ນຕໍ່ສະພາບແວດລ້ອມແຫ່ງການດຳລົງຊີວິດ ແລະ ສຸຂະພາບຂອງມະນຸດ. ພ້ອມທັງ, ຂົນຂວາຍປະຊາຊົນທຸກຊັ້ນວັນນະ, ບັນດາອົງການ, ສ່ວນບຸກຄົນທັງພາຍໃນ ແລະ ຕ່າງປະເທດສືບຕໍ່ຊ່ວຍເຫຼືອຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນກ່ຽວກັບດ້ານວັດຖຸ ແລະ ຈິດໃຈ, ສ້າງຄວາມເອົາໃຈໃສ່, ສະໜັບສະໜູນຫາງສຽງທັງພາຍໃນ ແລະ ສາກົນສຳລັບການຕໍ່ສູ້ທວງເອົາຄວາມຍຸຕິທຳຂອງຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນ ຫວຽດນາມ. ປີ 2016 ນີ້ ກໍ່ແມ່ນປີທີ່ຈັດຕັ້ງການເຄື່ອນໄຫວສະເຫຼີມສະຫຼອງເຫດການນີ້ຫຼາຍທີ່ສຸດ, ໃນນັ້ນມີ: ກອງປະຊຸມໃຫຍ່ແຂ່ງຂັນ “ເພື່ອຜູ້ປະສົບເຄາະຮ້າຍຈາກທາດພິດສີສົ້ມ” ທົ່ວປະເທດຄັ້ງທີ 3 (ຈັດຕັ້ງໃນວັນທີ 12 – 13/7); ກອງປະຊຸມສຳມະນາວິທະຍາສາດສາກົນ “ຕີລາຄາຜົນຮ້າຍຈາກທາດພິດສີສົ້ມ/ດີໂອຊີນ ໂດຍ ອາເມລິກາ ນຳໃຊ້ໃນສົງຄາມຢູ່ ຫວຽດນາມ” (8 – 9/8), ງານໂຮມຊຸມນຸມສະເຫລີມສະຫຼອງ 55 ປີແຫ່ງວັນວິນາດສະກຳທາດພິດສີສົ້ມ (10/8). ນອກຈາກນັ້ນແລ້ວ, ຈະມີການເຄື່ອນໄຫວຈຳນວນໜຶ່ງຄື: ງານວາງສະແດງທາດພິດສີສົ້ມ - ມະໂນທຳ ແລະ ຄວາມຍຸຕິທຳ ຢູ່ຫໍພິພິຕະພັນປະຫວັດສາດການທະຫານ ຫວຽດນາມ ແຕ່ວັນທີ 2/8 – 29/9/2016, ມອບຂອງຂວັນໃຫ້ບັນດາຄອບຄົວຜູ້ປະສົບເຄາະຮ້າຍຈາກທາດພິດສີສົ້ມ, ມອບເຮືອນແຫ່ງສາຍຈິດມິດໃຈໃຫ້ບັນດາຜູ້ປະສົບເຄາະຮ້າຍຈາກທາດພິດສີສົ້ມຢູ່ແຂວງ ນີງບີ່ງ. ເຖິງວ່າສົງຄາມໄດ້ ສິ້ນສຸດລົງກ່ອນນີ້ 1/3 ສະຕະວັດແລ້ວກໍ່ຕາມ ແຕ່ວິນາດສະກຳສີສົ້ມຍັງຄົງກໍ່ຜົນເສຍຫາຍຢ່າງໜັກໜ່ວງທີ່ສຸດສຳລັບສິ່ງແວດລ້ອມແຫ່ງການດຳເນີນຊີວິດ ແລະ ສຸຂະພາບຂອງມະນຸດ. ປະຈຸບັນ, ຫວຽດນາມ ມີກ່ວາ 4,8 ລ້ານຄົນຍັງຕິດທາດພິດສີສົ້ມ, ໃນນັ້ນມີກ່ວາ 3 ລ້ານຄົນແມ່ນຜູ້ປະສົບເຄາະຮ້າຍຈາກ 80 ລ້ານລິດທາດພິດເຄມີທີ່ ອາເມລິກາ ຫວ່ານລົງຫວຽດນາມ ໃນໄລຍະ 1961 -1971.
+++
ທ່ານ ສົມໄຊ ໄຊຍະຈັກ, ແຂວງ ຫົວພັນໄດ້ໂທລະສັບຫາລາຍການ ແລະ ຢາກຮັບຟັງບັນດາບົດເພງກ່ຽວກັບການຍ້ອງຍໍຊົມເຊີຍທະຫານເສຍອົງຄະ, ນັກຮົບເສຍສະຫຼະຊີວິດເພື່ອຊາດ.
ທ່ານ ສົມໄຊ ທີ່ເຄົາລົບ, ໃນອາທິດແຕ່ວັນທີ 25 – 31/7, ພວກຂ້າພະເຈົ້າໄດ້ຈັດລາຍການເພງສະເຫຼີມສະຫຼອງວັນທະຫານເສຍອົງຄະ, ນັກຮົບເສຍສະຫຼະຊີວິດເພື່ອຊາດ (27/7). ນອກຈາກຮັບຟັງທາງວິທະຍຸແລ້ວ, ທ່ານສົມໄຊ ແລະ ບັນດາມິດເພງສາມາດຮັບຟັງຄືນໃນແວບໄຊ: vovworld.vn ຂອງພວກເຮົາ.
ຄະນະນັກເຕັກນິກລາວ
ເພື່ອນ ວັນລິດາ, ແຂວງ ວຽງຈັນ ໄດ້ໂທລະສັບເຖິງລາຍການ, ແບ່ງປັນວ່າ: “ຂ້າພະເຈົ້າມີເພື່ອນຄົນໜຶ່ງເຮັດວຽກຢູ່ວິທະຍຸກະຈາຍສຽງແຫ່ງຊາດ ລາວ. ອາທິດກ່ອນ, ເມື່ອໄປຢາມບ້ານຂອງລາວ, ຂ້າພະເຈົ້າໄດ້ຮູ້ວ່າລາວພວມເຂົ້າຮ່ວມຊຸດເຝິກອົບຮົມດ້ານເຕັກນິກໄລຍະສັ້ນໂດຍ ວິທະຍຸກະຈາຍສຽງ ຫວຽດນາມ (VOV) ຈັດຕັ້ງ. ຜ່ານທາງລາຍການ, ຂ້າພະເຈົ້າຢາກຮູ້ຕື່ມອີກກ່ຽວກັບຊຸດເຝິກອົບຮົມນີ້ໄດ້ບໍ່?”
ເພື່ອນ ວັນລິດາ ທີ່ຮັກແພງ, ຫວ່າງແລ້ວນີ້ VOV ໄດ້ເປີດຊຸດເຝິກອົບຮົມຮຽນກ່ຽວກັບດ້ານເຕັກນິກໃຫ້ແກ່ບັນດານັກເຕັກນິກທີ່ມາຈາກ 18 ແຂວງ, ນະຄອນຂອງປະເທດລ້າງຊ້າງທີ່ສວຍງາມ. ຊຸດຮຽນນີ້ແກ່ຍາວແຕ່ວັນທີ 31/6 – 15/7, ນອກຈາກໄດ້ຮຽນບັນດາທັກສະໃນການບູລະນະສ້ອມແປງ, ແກ້ໄຂບັນຫາທີ່ເຄີຍເກີດຂຶ້ນສຳລັບອຸປະກອບທີ່ທັນສະໄໝໃນການກະຈາຍສຽງ, ໂທລະພາບ. ນອກຈາກນັ້ນ, ບັນດານັກສຳມະນາກອນທີ່ເຂົ້າຮ່ວມຊຸດເຝິກອົບຮົມນີ້ຍັງໄດ້ໄປທັດສະນະສຶກສາ, ຢ້ຽມຢາມບັນດາທັດສະນີຍະພາບຂອງ ຮ່າໂນ້ຍ ແລະ ບັນດແຂວງພາກເໜືອອີກດ້ວຍ. ນີ້ແມ່ນລາຍການພົວພັນແລກປ່ຽນ, ຮ່ວມມືລະຫວ່າງ VOV ແລະ ບັນດາອົງການສື່ມວນຊົນຂອງລາວ. ທ່ານ ວິຢາ, ມາຈາກສະຖານີກະຈາຍສຽງ - ໂທລະພາບແຂວງຫົວພັນ, ໃຫ້ຮູ້ວ່າ:
ສຽງຂອງທ່ານ ວິຢາ
ດັ່ງທີ່ກ່າວມາຂ້າງເຖິງແມ່ນເນື້ອໃນຄຳເຫັນຂອງທ່ານຜູ້ຟັງ ບາງທ່ານທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຝັງຈະສືບຕໍ່ຝາກຈົດໝາຍ, ອີແມວ ຫຼື ໂທລະສັບມາຫາລາຍການເພື່ອປະກອບຄຳເຫັນຊ່ວຍລາຍການຂອງພວກເຮົາໃຫ້ນັບ ມື້ນັບດີກວ່າເກົ່າ.
ພວກເພື່ອນສາມາດຝາກຈົດໝາຍມາຍັງ ລາຍການໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼື ອີແມວ
laovov5@gmail.com.