(vovworld) - ໃນອາທິດ, ພວກຂ້າພະເຈົ້າໄດ້ຮັບຈົດໝາຍ ແລະ ອີແມວຫຼາຍສະບັບຈາກທ່ານຜູ້ຟັງ, ຜູ້ອ່ານລາວຝາກມາຍັງພາກພາສາລາວ, ວິທະຍຸກະຈາຍສຽງ ຫວຽດນາມ. ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກເຮົາຂໍຄັດສະເໜີເນື້ອໃນຈົດໝາຍ ແລະ ຕອບຈົດໝາຍຈາກທ່ານຜູ້ຟັງ, ຜູ້ອ່ານ.
ສົ້ມກຸງກິນກັບເຂົ້າປຸ້ນ ແລະ ຊີ້ນລວກ
ເພື່ອນທຳມະວົງ, ຢູ່ແຂວງຄຳມ່ວນ ໄດ້ຝາກອີແມວເຖິງລາຍການດ້ວຍເນື້ອໃນວ່າ: “ຂ້າພະເຈົ້າມີເພື່ອນ ຫວຽດນາມ ຄົນໜຶ່ງ, ພວກຂ້າພະເຈົ້າໄດ້ຮຽນນຳກັນຢູ່ມະຫາວິທະຍາໄລແຫ່ງຊາດລາວເປັນເວລາ 4 ປີແລ້ວ, ເມື່ອລາວກັບເມືອປະເທດກໍ່ເຄີຍຂຽນຈົດໝາຍໃຫ້ຂ້າພະເຈົ້າ. ຕົ້ນເດືອນ 6 ຜ່ານມາ, ຄອບຄົວຂອງລາວໄດ້ໄປທ່ອງທ່ຽວທະເລ ດ່ານັ້ງ ແລະ ໄດ້ຝາກໃຫ້ຂ້າພະເຈົ້ານຳ້ແຈ່ວປອງໜຶ່ງຂຽນວ່າ “ມ້ຳຕົມຈົວ ຢິເກີນ” ເປັນຂອງຕ້ອນ ແຕ່ລາວບໍ່ໄດ້ເວົ້າວິທີນຳໃຊ້ນຳ້ແຈ່ວນີ້ຄືແນວໃດ? ຂ້າພະເຈົ້າຢາກໄດ້ແນະນຳວິທີນຳໃຊ້ນຳ້ແຈ່ວນີ້ ກໍ່ຄືຕົ້ນກຳເນີດຂອງມັນ”
ເພື່ອນ ທຳມະວົງ ທີ່ເຄົາລົບ, ນຳ້ແຈ່ວ “ມ້ຳຕົມຈົວ ຢີ່ເກີນ” ແມ່ນນຳ້ແຈ້ວປະເພດໜຶ່ງຂອງພາກກາງ ຫວຽດນາມ, ພິເສດແມ່ນຂອງ ເຫ້ວ, ເຫ້ວ ກໍ່ແມ່ນນະຄອນມີນຳ້ແຈ່ວເຮັດດ້ວຍສົ້ມກຸງໂດ່ງດັ່ງທີ່ສຸດ. ນຳ້ແຈ່ວສົ້ມກຸງມີສີແດງ. ເມື່ອປຸງແຕ່ງນຳ້ແຈ່ວປະເພດນີ້ຕ້ອງເລືອກກຸງສົດ, ລ້າງໃຫ້ສະອາດດ້ວຍນຳ້ເກືອ. ແລ້ວດອງໃນເຫຼົ້າຂາວໃຫ້ກຸງສຸກແດງ. ຫຼັງຈາກນັ້ນ, ເອົາກຸງມາຂົນກັບເຂົ້າໜຽວ, ໝາກເພັດ, ຫົວຂີງ ແລະ ຫົວຜັກທຽມທີ່ໄດ້ຊອຍເປັນເສັ້ນ ແລ້ວໃສ່ໃນໄຫດ້ວຍດິນເຜົາ ໃນເວລາ 5 – 7 ວັນ ມັນຈະເປັນສົ້ມກຸງ. ມີຫຼາຍເຄື່ອງໝາຍສົ້ມກຸງທີ່ມີຊື່ສຽງໃນນັ້ນມີ ສົ້ມກຸງຢີ່ເກີນ, ຍືດຮ່ວາງ... ເພື່ອນສາມາດກິນສົ້ມກຸງກັບເຂົ້າປຸ້ນ, ຈຳ້ຊີ້ນລວກ, ຫຼື ພັນຊີ້ນພັນຜັກກໍ່ແຊບ.
+++
ເພື່ອນພອນສະຫວັນ, ແຂວງ ວຽງຈັນໄດ້ຝາກ ອີແມວ ມາຍັງລາຍການໂດຍຖາມວ່າ: “ເມື່ອອ່ານບົດຕ່າງໆໃນແວບໄຊຂອງພວກເພື່ອນ, ຂ້າພະເຈົ້າເຄີຍເຫັນຄຳສັບຕ່າງໆຄື: ວັດ, ສາລາ, ວິຫານ, ຫໍບູຊາ, ຫໍຜີ. ຂ້າພະເຈົ້າຢາກຮູ້ແຈ້ງກ່ວາຄວາມໝາຍຂອງບັນດາສັບດັ່ງກ່າວ?”
ວັດແຫ່ງໜຶ່ງຂອງ ຫວຽດນາມ
ທ່ານ ພອນສະຫວັນ ທີ່ເຄົາລົບ, ວັດແມ່ນບ່ອນເຄື່ອນໄຫວ ແລະ ໂຄສະນາເຜີຍແຜ່ສາສະໜາພຸດ, ແມ່ນບ່ອນ, ດຳເນີນຊີວິດ, ຖືສິນກິນບວດ ແລະ ສິດສອນສາສະໜາພຸດຂອງບັນດາ, ພະສົງສຳມະເນນ, ພຸດທະສາສະນິກກະຊົນ. ທຸກຄົນ, ນັບທັງຜູ້ບໍ່ຖືສາສະໜາພຸດກໍ່ສາມາດມາຢາມ, ບູຊາ, ທ່ຽວຊົມ ຫຼື ຮັບຟັງການສິດສອນຄຳພີ ແລະ ດຳເນີນພິທີທາງສາສະໜາພຸດກໍ່ໄດ້. ສາລາແມ່ນບ່ອນບູຊາຜີຫຼັກບ້ານ, ພ້ອມທັງແມ່ນບ່ອນເຕົ້າປະຊຸມ, ປຶກສາຫາລືວຽກງານຂອງປະຊາຊົນໃນບ້ານ. ສາລາໄດ້ຮັບຖືວ່າແມ່ນສູນດຳເນີນຊີວິດທາງດ້ານວັດທະນະທຳຕິດພັນກັບປະຊາຊົນ ແລະ ມີສີສັນພິເສດສະເພາະຂອງພື້ນຖານອະລິຍະທຳເຂົ້ານາທາມ ຫວຽດນາມ. ວິຫານ ແມ່ນກິດຈະກຳສະຖານປັດຕະຍາກຳໄດ້ຮັບການກໍ່ສ້າງເພື່ອບູຊາ ອໍລະຫັນ ຫຼື ຕົວພະຍານປະຫວັດສາດ ທີ່ໄດ້ຮັບຖືວ່າເຄົາລົບນັບຖືຄືວ່າອໍລະຫັນ. ຢູ່ ຫວຽດນາມ ບັນດາວິຫານໄດ້ຮັບການກໍ່ສ້າງເພື່ອຈົດຈຳບຸນຄຸນຂອງບັນດານັກວິລະຊົນຜູ້ມີຄຸນງາມຄວາມດີຕໍ່ປະເທດຊາດ ແລະ ຄຸນງາມຄວາມດີຂອງບຸກຄົນທີ່ມີຕໍ່ທ້ອງຖິ່ນ. ຫໍບູຊາ ແມ່ນປູຊະນີຍະສະຖານວັດທະນະທຳ ໃນການເຫຼື້ອມໃສບູຊາພື້ນເມືອງຂອງ ຫວຽດນາມ ມີຂອບຂະໜາດນ້ອຍກ່ວາ ວິຫານ. ບັນດາເປົ້າໝາຍທີ່ໄດ້ຮັບການບູຊາໃນຫໍບູຊາ ມີຫຼາຍຮູບແບບທີ່ສຸດເຊິ່ງສະແດງອອກຜ່ານຊື່ຂອງຫໍບູຊາ. ສ່ວນຫໍຜີ, ແມ່ນສະຖາປັດຕະຍາກຳນ້ອຍທີ່ເຄີຍຕັ້ງໃນສວນຄອບຄົວ.
+++
ໃນໂທລະສັບເຖິງລາຍການ, ເພື່ອນ ບຸນຕາ ແຂວງ ຫຼວງພະບາງ, ເພື່ອນບົວທອງ, ວັນທາ, ຢູ່ນະຄອນຫຼວງ ວຽງຈັນ ຢາກຮູ້ຂໍ້ມູນຂ່າວກ່ຽວກັບ “ງານມະໂຫລານສິລະປະ ຫວຽດນາມ, ລາວ, ກຳປູເຈຍ, ມຽນມາ ແລະ ໄທ ປີ 2016”.
ເພື່ອນ ບຸນຕາ, ບົວທອງ, ວັນທາ ທ່ີຮັກແພງ! ງານມະໂຫລານສິລະປະ ຫວຽດນາມ, ລາວ, ກຳປູເຈຍ, ມຽນມາ ແລະ ໄທ ປີ 2016, ໂດຍກົມສິລະປະການສະແດງ, ກະຊວງວັດທະນະທຳ ກິລາ ແລະ ທ່ອງທ່ຽວ ເປັນເຈົ້າພາບຈັດຕັ້ງ, ໃນເດືອນ 7 ຈະມາເຖິງຢູ່ແຂວງກວາງຈິ້. ງານມະໂຫລານສິລະປະ ຫວຽດນາມ, ລາວ, ກຳປູເຈຍ, ມຽນມາ ແລະ ໄທ ແມ່ນວັນບຸນສິລະປະຄັ້ງໃຫຍ່ຂອງບັນດາປະເທດໃນພາກພື້ນ, ແມ່ນໂອກາດເພື່ອໃຫ້ນັກສິລະປິນບັນດາປະເທດໄດ້ພົບປະ, ແລກປ່ຽນບົດຮຽນ, ຮັບເອົາບັນດາສິ່ງຍອດຍິ່ງໃນການປະດິດຄິດສ້າງສິລະປະ. ນີ້ກໍ່ແມ່ນໂອກາດເພື່ອໃຫ້ບັນດາປະເທດໄດ້ຮັດແໜ້ນຄວາມສາມັກຄີ, ນຳ້ໃຈມິດຕະພາບໃນປະຊາຄົມ ອາຊຽນ ໃນຂົງເຂດວັດທະນະທຳສິລະປະ. ເຂົ້າຮ່ວມງານມະໂຫລານມີບັນດາລາຍການສະແດງສິລະປະ, ສະແດງໃຫ້ເຫັນຄວາມງາມທີ່ເປັນເອກະລັກສະເພາະຂອງປະເທດຊາດ, ປະຊາຊົນ, ຜົນງານຂອງບັນດາປະເທດໃນກຸ່ມ ອາຊຽນ, ພິເສດແມ່ນນຳ້ໃຈສາມັກຄີຂອງບັນດາປະເທດ ຫວຽດນາມ, ລາວ, ກຳປູເຈຍ, ມຽນມາ ແລະ ໄທ. ພວກຂ້າພະເຈົ້າຈະໃຫ້ຂ່າວກ່ຽວກັບເຫດການດັ່ງກ່າວ, ຖ້າຜູ້ຟັງ ແລະ ຜູ້ອ່ານທ່ານໃດສົນໃຈສາມາດອ່ານ ແລະ ຮັບຟັງໃນແວບໄຊ vovworld.vn ຂອງພວກຂ້າພະເຈົ້າໃນໄລຍະຈະມາເຖິງເນາະ.
ທ່ານ ຜູ້ຟັງທີ່ເຄົາລົບ, ດັ່ງທີ່ກ່າວມາຂ້າງເຖິງແມ່ນເນື້ອໃນຄຳເຫັນຂອງທ່ານຜູ້ຟັງບາງທ່ານ ທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຟັງຈະສືບຕໍ່ຝາກຈົດໝາຍ, ອີແມວ ຫຼື ໂທລະສັບມາຫາລາຍການເພື່ອປະກອບຄຳເຫັນຊ່ວຍລາຍການຂອງພວກເຮົາ ໃຫ້ນັບມື້ມັບດີກວ່າເກົ່າ. ພວກເພື່ອນສາມາດຝາກຈົດໝາຍມາຍັງລາຍການໂດຍຈ່າລະຊ່ອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼື ອີແມວ laovov5@gmail.com.