ຄັດສະເໜີບາງຄຳເຫັນ ແລະ ຕອບຈົດໝາຍ, ອີແມວເຊິ່ງທ່ານຜູ້ຟັງ ໄດ້ຝາກມາລາຍການ
Minh Duc -
(vovworld) – ໃນອາທິດຜ່ານມາ, ພາກພາສາລາວ ວິທະຍຸກະຈາຍສຽງ ຫວຽດນາມ ໄດ້ຮັບຈົດໝາຍ, ອີແມວ, ໂທລະສັບຈາກທ່ານຜູ້ຟັງລາວ ຫຼາຍທ່ານ. ຜ່ານລາຍການທ່ານຜູ້ຟັງຢາກຊອກຮູ້ກ່ຽວກັບຫວຽດນາມ ຫຼາຍກວ່າ. ໃນລາຍການໂອ້ລົມກັບເພື່ອນລາວພາກນີ້, ພວກຂ້າພະເຈົ້າຂໍຄັດສະເໜີບາງຄຳເຫັນ ແລະ ຕອບຈົດໝາຍ, ອີແມວເຊິ່ງທ່ານຜູ້ຟັງໄດ້ຝາກມາລາຍການ.
ລຸງ ເພັດສະຫວັນ ສີຊານົນ ຢູ່ແຂວງອັດຕະປື ໄດ້ໂທລະສັບຫາລາຍການສະແດງຄວາມຊົມເຊີຍເນື່ອງໃນໂອກາດວັນຊາດຫວຽດນາມ 02/09 ແລະຂໍ້ອວຍພອນບັນນາທິການວິທະຍຸກະຈາຍສຽງຫວຽດນາມ ພາກພາສາລາວທຸກຄົນມີສຸຂະພາບເຂັ້ມແຂງ, ບັນລຸຜົນສຳເລັດໃນໜ້າທີ່ວຽກງານຂອງຕົນ.
ງານວາງສະແດງເອກະສານດ້ວຍຫົວຂໍ້ວ່າ “ວັດທະນະທຳອາຊຽນ”
(ພາບ: vietnamplus.vn)
ເພື່ອນ ໄຊວົງມະຈັນ, ນັກສຶກສາລາວ ພວມຮໍ່າຮຽນ ຢູ່ສະຖາບັນສື່ສານ ໄດ້ສົ່ງອີແມວມາຍັງລາຍການໂດຍຖາມວ່າ; ຂ້າພະເຂົ້າໄດ້ຮັບຂ່າວວ່າ, ຢູ່ຮ່າໂນ້ຍ ຈະຈັດງານວາງສະແດງເອກະສານດ້ວຍຫົວຂໍ້ວ່າ “ວັດທະນະທຳອາຊຽນ”. ຂ້າພະເຈົ້າບໍ່ຮູ້ວ່າ ຈະຈັດຂຶ້ນໃນເວລາໃດ? ແລະ ຢູ່ບ່ອນໃດ?
ເພື່ອນໄຊວົງມະຈັນ ທີ່ຮັກແພງ, ກະຊວງວັດທະນະທຳກິລາ ແລະ ທ່ອງທ່ຽວຫວຽດນາມ ໄດ້ຈັດງານວາງສະແດງດ້ວຍຫົວຂໍ້ວ່າ “ວັດທະນະທຳອາຊຽນ” ແຕ່ວັນທີ 28/08 ຫາວັນທີ 15/09. ນີ້ແມ່ນການເຄື່ອນໄຫວເນື່ອງໃນໂອກາດສະເຫຼີມສະຫຼອງ 69 ປີແຫ່ງວັນຊາດຫວຽດນາມ (02/09/1945 – 02/09/2014), 47 ປີແຫ່ງວັນສ້າງຕັ້ງອາຊຽນ ແລະ 19 ປີແຫ່ງວັນຫວຽດນາມ ເຂົ້າເປັນສະມາຊິກອາຊຽນ. ດ້ວຍເອກະສານທີ່ພົ້ນເດັ່ນ, ອຸດົມສົມບູນເກືອບ 1.000 ຢ່າງ. ງານວາງສະແດງໄດ້ຈັດເປັນ 4 ເນື້ອໃນຄື: ການປະຕິວັດເດືອນສິງຫາ ແລະ ວັນຊາດຫວຽດນາມ 02/09; ບັນດາຜົນງານຂອງຫວຽດນາມ ນັບແຕ່ວັນເລີ່ມຕົ້ນປ່ຽນໃໝ່ມາຮອດປະຈຸບັນ; ເສດຖະກິດ, ວັດທະນະທຳ, ສັງຄົມ, ທະເລ, ໝູ່ເກາະ ອາຊີຕາເວັນອອກສຽງໃຕ້; ອາຊຽນ ແລະ ບັນດາການເຄື່ອນໄຫວຂອງຫວຽດນາມ ສຳລັບອາຊຽນ... ຈຸດພົ້ນເດັ່ນຂອງງານວາງສະແດງ ແມ່ນໂຄສະນາບັນດາເອກະສານສະແດງຄວາມເຫັນດີເຫັນພ້ອມ ແລະ ສະເໝີຕົ້ນສະເໝີປາຍຂອງບັນດາປະເທດອາຊຽນ ໃນການສະໜັບສະໜູນຫວຽດນາມ ປົກປັກຮັກສາເອກະລາດອະທິປະໄຕທະເລ, ໝູ່ເກາະຢູ່ທະເລຕາເວັນອອກ; ກ່ຽວກັບບົດບາດເປັນເຈົ້າການ, ຄວາມຮັບຜິດຊອບ ແລະ ຄວາມຕັ້ງໜ້າຂອງຫວຽດນາມ ໃນການຊຸກຍູ້ວິວັດທະນານການເຊື່ອມຕໍ່ພາກພື້ນ, ຮັກສາສັນຕິພາບ, ສະຖຽນລະພາບ ແລະ ນຳອາຊຽນໃຫ້ກາຍເປັນອົງການເຊື່ອມຕໍ່ທີ່ນັບມື້ນັບແໜ້ນແຟ້ນກວ່າ, ກ້າວໄປເຖິງປະຊາຄົມລວມໃນປີ 2015.
(ບຸນເຕັດ ແມ່ນບຸນເຕັດ ໂດກເລີບ ຂອງຊາວເຜົ່າມົ້ງ ຢູ່ມົກເຈົາ)
ແລະກໍ່ໃນອາທິດຜ່ານມາ, ພວກຂ້າພະເຈົ້າໄດ້ຮັບອີແມວຈາກເພື່ອນ ໄຊສົມພອນ ທີ່ຟາກມາລາຍການໂດຍແບ່ງປັນວ່າ: ໃນໄລຍະຜ່ານມາ, ຂ້າພະເຈົ້າໄດ້ໄປຢ້ຽມຢາມປະຊາຄົມຊາວເຜົ່າມົ້ງ, ຢູ່ມົກເຈົາ, ເຊີນລາ. ຂ້າພະເຈົ້າໄດ້ຍິນວ່າ ປະຊາຊົນຢູ່ທີ່ນີ້ໄດ້ມີ 2 ບຸນປີໃໝ່ (ໝາຍເຖິງບຸນເຕັດ), ນອກຈາກບຸນເຕັດທີ່ເປັນມູນເຊື້ອແລ້ວ ປະຊາຊົນຢູ່ທີ່ນີ້ຍັງຈັດບຸນເຕັດ ໂດກເລີບ ອີກດ້ວຍ. ຕອນທີ່ຂ້າພະເຈົ້າມາຍັງບໍ່ທັນຮອດເວລາຈັດຕັ້ງ, ສະນັ້ນຂ້າພະເຈົ້າຢາກໃຫ້ທາງລາຍການແນະນຳໂດຍຫຍໍ້ກ່ຽວກັບບຸນເຕັດດັ່ງກ່າວ.
ເພື່ອນ ໄຊສົມພອນ ທີ່ຮັກແພງ: ຊາວເຜົ່າມົ້ງ ຢູ່ມົກເຈົາ, ເຊີນລາ ມີ 2 ບຸນເຕັດ ແມ່ນບຸນເຕັດ ໂດກເລີບ ແລະ ບຸນເຕັດທີ່ເປັນມູນເຊື້ອ. ພາຍຫຼັງປະຕິວັດເດືອນສິງຫາ ແລະ ປະທານໂຮ່ຈິມິນ ອ່ານຖະແຫຼງປະກາດເອກະລາດເມື່ອປີ 1945 ມາຮອດປະຈຸບັນ, ປະຊາຊົນຊາວເຜົ່າມົ້ງ ຢູ່ມົກເຈົາ ກໍ່ຈັດບຸນເຕັດໃໝ່ຕື່ມອີກ ເອີ້ນວ່າ ເຕັດ ໂດກເລີບ (ບຸນເຕັດແຫ່ງເອກະລາດ) ເພື່ອຕ້ອນຮັບວັນຊາດ 02/09 ແລະ ສະແດງຄວາມຮູ້ບຸນຄຸນຕໍ່ພັກ ແລະ ປະທານໂຮ່ຈິມິນ. ເຕັດ ໂດກເລີບ ຖືກຈັດຂຶ້ນເປັນເວລາ 3 ວັນ, ແຕ່ວັນທີ 31/08 ຮອດວັນທີ 02/09. ມາຢ້ຽມຢາມຊາວເຜົ່າມົ້ງ ໃນໂອກາດນີ້ ແຂກທ່ອງທ່ຽວ ບໍ່ພຽງແຕ່ໄດ້ຮັບຊົມບັນດາຊຸດອາພອນປະຈຳເຜົ່າມົ້ງເທົ່ານັ້ນ ຫາກຍັງໄດ້ເຂົ້າຮ່ວມບັນດາການເຄື່ອນໄຫວວັດທະນະທຳ, ກິລາ, ທ່ອງທ່ຽວພື້ນເມືອງທີ່ດູດດື່ມຄື: ດຶງເຊືອກ, ຍິງໜ້າ, ຟ້ອນ... ອີກດ້ວຍ.
(ໂຄມໄຟວັນບຸນໄຫວ້ພະຈັນ ປີ 2014)
ເພື່ອນ ສຸກມະລີວົງ, ຢູ່ນະຄອນຫຼວງວຽງຈັນ ໄດ້ສົ່ງອີແມວມາຍັງລາຍການ ໂດຍຖາມວ່າ: ຂ້າພະເຈົ້າຢາກຊອກຮູ້ກ່ຽວກັບບຸນໄຫວ້ພະຈັນ (ໝາຍເຖິງວັນບຸນສຳລັບເດັກ) ຢູ່ຮ່າໂນ້ຍ, ປີນີ້ວັນບຸນໄຫວ້ພະຈັນ ຖືກກັບມືໃດ? ຂ້າພະເຈົ້າໄດ້ຍິນວ່າ ວັນບຸນໄຫວ້ພະຈັນປີນີ້ຢູ່ຫວຽດນາມ ໄດ້ຂາຍໂຄມໄຟຮູບຮ່ວາງຊາ ແລະ ເຈື່ອງຊາ ເປັນຈຳນວນຫຼວງຫຼາຍແມ່ນບໍ່?
ເພື່ອນ ສຸກມະລີວົງ ທີ່ຮັກແພງ, ຍັງມີເວລາບໍ່ຮອດອາທິດກໍ່ຈະຮອດວັນບຸນໄຫວ້ພະຈັນ ຂອງເດັກນ້ອຍ. ວັນບຸນໄຫວ້ພະຈັນ ປີນີ້ຖືກຈັດຂຶ້ນໃນວັນທີ 08/09. ນອກຈາກບັນດາໂຄມໄຟທີ່ເປັນມູນເຊື້ອແລ້ວ, ປີນີ້ຍັງມີບັນດາໂຄມໄຟທີ່ຢັ້ງຢືນອະທິປະໄຕທະເລ, ໝູ່ເກາະ ເຊິ່ງໄດ້ອອກແບບຢ່າງງ່າຍດາຍຜ່ານຮູບເຮືອຫາປາຂອງຊາວປະມົງ ໃນນັ້ນມີແຖວໜັງສືຮ່ວາງຊາ ແລະ ເຈື່ອງຊາອີກດ້ວຍ. ບໍ່ພຽງແຕ່ແມ່ນເຄື່ອງຫຼິ້ນທຳມະດາເທົ່ານັ້ນ, ບັນດາໂຄມໄຟດັ່ງກ່າວຍັງມີລັກສະນະສຶກສາ, ຄວາມຮັກຕໍ່ປະເທດຊາດ, ຮັກສາອະທິປະໄຕຕໍ່ທະເລ, ໝູ່ເກາະຂອງຫວຽດນາມ ໃຫ້ເດັກອີກດ້ວຍ. ຢູ່ບັນດາຮ້ານຂາຍເຄື່ອງຫຼິ້ນຢູ່ຕາມຖະໜົນ ຮ່າງມ້າ, ຮ່າງເລືອກ, ເລືອງວັນການ... ຢູ່ຮ່າໂນ້ຍ ແລະ ຖະໜົນຂາຍໂຄມໄຟ ເລືອງຢື້ງອກ, ຫງວຽນອ໋ານ, ຟຸດິ້ງ... ຢູ່ນະຄອນໂຮ່ຈິມິນ ບັນດາຮູບໃນໂຄມໄຟຄື “ຫຼານມຸ່ງໄປສູ່ທະເລ, ໝູ່ເກາະ”, “ຫຼານຮັກທະເລໝູ່ເກາະຫວຽດນາມ”, “ຫຼານຮັກທະຫານທະເລຫວຽດນາມ”... ນອກຈາກນັ້ນ, ບັນດາໂຄມໄຟທີ່ມີຮູບ, ຊື່ຂອງນັກປະຫວັດສາດຄື ແທ໋ງຢ໋ອງ, ຮາຍບ່າຈຶງ... ກໍ່ໄດ້ຮັບການເລືອກຊື້ ເປັນຈຳນວນຫຼວງຫຼາຍ.
ດັ່ງທີ່ກ່າວມາຂ້າງເຖິງແມ່ນເນື້ອໃນຄຳເຫັນ ແລະ ຄຳຖາມຂອງຜູ້ຟັງບາງທ່ານທີ່ຝາກມາລາຍການໃນອາທິດຜ່ານມາ. ພວກເພື່ອນສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼື ອີແມວ laovov@yahoo.com, laovov5@gmail.com.
Minh Duc