ເພື່ອນໄຊຍະວົງ, ຢູ່ແຂວງຈຳປະສັກ ໄດ້ສົ່ງອີແມວມາຍັງລາຍການໂດຍຖາມວ່າ: ກອງປະຊຸມໃຫຍ່ສະຫະພັນລັດຖະສະພາສາກົນຄັ້ງທີ 132 (IPU 132) ຖືກຈັດຂຶ້ນໄປຢູ່ຮ່າໂນ້ຍ ໃນໄລຍະຜ່ານມາ, ໃນນັ້ນໄດ້ຮັບຮອງເອົາຖະແຫຼງການຮ່າໂນ້ຍ, ຂ້າພະເຈົ້າຂໍໃຫ້ທາງ VOV ພາກພາສາລາວ ແນະນຳໂດຍຫຍໍ້ກ່ຽວກັບຖະແຫຼງການນີ້ໄດ້ບໍ່?
ເພື່ອນໄຊຍະວົງ ທີ່ຮັກແພງ, ກອງປະຊຸມໃຫຍ່ສະຫະພັນລັດຖະສະພາສາກົນຄັ້ງທີ 132 (IPU 132) ດຳເນີນໄປຢູ່ຮ່າໂນ້ຍໃນລະຫວ່າງວັນທີ 28/03 – 01/04 ໄດ້ສິ້ນສຸດລົງ ແລະ ອອກຖະແຫຼງການຮ່າໂນ້ຍ. ຖະແຫຼງການຮ່າໂນ້ຍ ຢືນຢັນຄືນໃໝ່ວິໄສທັດຂອງ IPU ກ່ຽວກັບການພັດທະນາແບບຍືນຍົງຖືປະຊາຊົນເປັນໄຈກາງ, ໂດຍອີງໃສ່ການປະຕິບັດສິດທັງໝົດຂອງມະນຸດເພື່ອແນໃສ່ລົບລ້າງຄວາມທຸກຍາກດ້ວຍທຸກຮູບການ ແລະ ມອບສິດໃຫ້ແຕ່ລະບຸກຄົນ, ຖະແຫຼງການຮ່າໂນ້ຍ ກໍ່ໄດ້ໃຫ້ຄຳໝັ້ນສັນຍາກ່ຽວກັບການເຜີຍແຜ່ບັນດາຄາດໝາຍພັດທະນາແບບຍືນຍົງໃຫ້ຜູ້ມີສິດເລືອກຕັ້ງຢູ່ປະເທດຕ່າງໆ. ຖະແຫຼງການຮ່າໂນ້ຍ ຊີ້ແຈ້ງວ່າ: ໂດຍແມ່ນຕົວແທນຂອງປະຊາຊົນ, ພວກເຮົາຕ້ອງເອົາໃຈໃສ່ເຖິງເລື່ອງປົກປ້ອງສິດຜົນປະໂຫຍດຂອງລັດ ແລະ ຄວາມວັດທະນາຖາວອນລວມ. ພວກເຮົາໃຫ້ຄຳໝັ້ນສັນຍາປະກາດໃຊ້ບັນດາມາດຕາກ່ຽວກັບງົບປະມານ ແລະ ກົດໝາຍໃຫ້ເໝາະສົມກັບແຜນການພັດທະນາແຫ່ງຊາດ, ກຳນົດບັນດາຄາດໝາຍ ແລະ ຕົວເລກຄາດໝາຍນຳໃຊ້ກໍ່ຄືມາດຕະການສະໜອງແຫຼ່ງການເງິນ. ແຕ່ລະປີບັນດາລັດຖະບານຕ້ອງລາຍງານຕໍ່ລັດຖະສະພາກ່ຽວກັບການປະຕິບັດແຜນການແຫ່ງຊາດ. ລັດຖະສະພາ, ຮັບເອົາຄຳເຫັນຈາກຜູ້ມີສິດເລືອກຕັ້ງເປັນປະຈຳ ເພື່ອຕີລາຄາວິວັດການຜັນຂະຫຍາຍປະຕິບັດຕົວຈິງ. ພວກເຮົາສະເໜີສານຈຸດສຸມຂອງ ຖະແຫຼງການຮ່າໂນ້ຍ ພ້ອມກັບແຈ້ງການ Quito ກ່ອນນີ້, ຈະໄດ້ຮັບການສ່ອງແສງໃນຜົນງານຂອງກອງປະຊຸມໂລກຄັ້ງທີ 4 ປະທານບັນດາລັດຖະສະພາໂລກ, ຜ່ານນັ້ນສະໜອງເນື້ອໃນໃຫ້ກອງປະຊຸມສຸດຍອດຂອງສະຫະປະຊາຊາດໃນເດືອນ 9.
ເພື່ອນເພັດມະລີ, ຢູ່ແຂວງໄຊຍະບຸລີ ສົ່ງອີແມວມາຍັງລາຍການໂດຍຖາມວ່າ: ໃນໄລຍະມາຫວຽດນາມເຂົ້າຮ່ວມ IPU 132 ຢູ່ຮ່າໂນ້ຍ, ຄະນະຜູ້ແທນຂັ້ນສູງສະພາແຫ່ງຊາດລາວ ໂດຍທ່ານນາງປານີ ຢາທໍ່ຕູ້ ນຳໜ້າ ໄດ້ມີບັນດາການເຄື່ອນໄຫວພົບປະກັບການນຳໃດແດ່ຂອງຫວຽດນາມ? ຂ້າພະເຈົ້າຢາກຮູ້ໂດຍຫຍໍ້ກ່ຽວກັບການເຄື່ອນໄຫວຂອງທ່ານນາງປະທານສະພາແຫ່ງຊາດລາວ ຢູ່ຫວຽດນາມ ໄດ້ບໍ່?
ເພື່ອນເພັດມະລີ ທີ່ຮັກແພງ, ໃນໄລຍະຢູ່ຢ້ຽມຢາມຫວຽດນາມ, ທ່ານນາງປະທານສະພາແຫ່ງຊາດລາວ ປານີ ຢາທໍ່ຕູ້ ໄດ້ມີການພົບປະເຈລະຈາກັບທ່ານປະທານສະພາແຫ່ງຊາດ ຫງວຽນຊິງຮຸ່ງ; ເຂົ້າຢ້ຽມຂໍ່ານັບທ່ານເລຂາທິການໃຫຍ່ ຫງວຽນຟຸຈ້ອງ ແລະ ທ່ານປະທານປະເທດ ເຈືອງເຕີນຊາງ; ພົບປະເຈລະຈາກັບທ່ານນາຍົກລັດຖະມົນຕີ ຫງວຽນເຕີນຢຸງ. ທີ່ບັນດາການພົບປະເຈລະຈາ, 2 ຝ່າຍລ້ວນແຕ່ຢືນຢັນ ຖືເປັນສຳຄັນ, ປາດຖະໜາ ແລະ ຕັດສິນໃຈເພີ່ມທະວີສາຍພົວພັນມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານລະຫວ່າງ 2 ລັດ, 2 ສະພາແຫ່ງຊາດກວ່າອີກ; ພ້ອມທັງສືບຕໍ່ສະໜັບສະໜູນເຊິ່ງກັນ ແລະ ກັນ, ສົມທົບກັນຢ່າງແໜ້ນແຟ້ນບົນເວທີປາໄສພາກພື້ນ ແລະ ສາກົນ. 2 ຝ່າຍກໍ່ແລກປ່ຽນບັນດາເນື້ອໃນເພື່ອແນໃສ່ຊຸກຍູ້ການຮ່ວມມືຮອບດ້ານ ລະຫວ່າງ 2 ລັດ, 2 ສະພາແຫ່ງຊາດໃນທຸກຂົງເຂດຄື: ການເມືອງ, ເສດຖະກິດ, ສັງຄົມ, ການສຶກສາ, ພິເສດແມ່ນການພັດທະນາແຫຼ່ງຊັບພະຍາກອນມະນຸດ ແລະ ຜັນຂະຫຍາຍບັນດາເອກະສານ, ຂໍ້ຕົກລົງຮ່ວມມື 2 ຝ່າຍຢ່າງເຂັ້ມງວດ. 2 ຝ່າຍກໍ່ເຊື່ອໝັ້ນຢ່າງແນວແນ່ວ່າ, ເລື່ອງຍູ້ແຮງບັນດາການຢ້ຽມຢາມ, ເຮັດວຽກລະຫວ່າງການນຳຂັ້ນສູງຂອງ 2 ພັກ, 2 ລັດ ແລະ 2 ສະພາແຫ່ງຊາດໃນໄລຍະຜ່ານມາ ກໍ່ຄືໃນອະນາຄົດ ຈະສືບຕໍ່ປັບປຸງນ້ຳໃຈສາມັກຄີມິດຕະພາບແບບພິເສດ ແລະ ນຳການພົວພັນລະຫວ່າງ 2 ປະເທດ ໃຫ້ກ້າວເຂົ້າສູ່ລວງເລິກກວ່າອີກ.
ເພື່ອນ ບົວລີ ແສງຄຳ, ຢູ່ແຂວງຫົວພັນ ສົ່ງອີແມວມາຍັງລາຍການໃຫ້ຮູ້ວ່າ, ຂ້າພະເຈົ້າໄດ້ຊົມພາບສາລະຄະດີໃນເວັບໄຊພາກພາສາລາວຂອງ VOV ກ່ຽວກັບງານຕະຫຼາດນັດທ່ອງທ່ຽວສາກົນຫວຽດນາມ - ຮ່າໂນ້ຍ 2015, ຂ້າພະເຈົ້າມີຄວາມປະທັບໃຈທີ່ສຸດຕໍ່ຂອບຂະໜາດຂອງງານຕະຫຼາດນັດ ແລະ ຂ້າພະເຈົ້າຢາກຮູ້ບາງຂໍ້ມູນກ່ຽວກັບງານຕະຫຼາດນັດດັ່ງກ່າວ.
ເພື່ອນ ບົວລີ ແສງຄຳ ທີ່ຮັກແພງ, ງານຕະຫຼາດນັດທ່ອງທ່ຽວສາກົນຫວຽດນາມ - ຮ່າໂນ້ຍ 2015 (VITM Hanoi 2015) ຖືກຈັດຂຶ້ນຢູ່ຮ່າໂນ້ຍ ໃນລະຫວ່າງວັນທີ 03 – 06/04, ດ້ວຍການເຂົ້າຮ່ວມຂອງບັນດາວິສາຫະກິດທ່ອງທ່ຽວ ທີ່ມາຈາກ 25 ປະເທດ ແລະ ເຂດແຄ້ວນ, VITM ໄດ້ກາຍເປັນງານຕະຫຼາດນັດທ່ອງທ່ຽວສາກົນທີ່ມີຂອບຂະໜາດໃຫຍ່ໃນພາກພື້ນ. VITM Hanoi 2015 ໄດ້ຮັບການຈັດຕັ້ງດ້ວຍຫົວຂໍ້ວ່າ “ຫວຽດນາມ - ປະເທດແຫ່ງບັນດາມໍລະດົກ”, VITM Hanoi 2015 ໄດ້ສຸມໃສ່ໂຄສະນາບັນດາມໍລະດົກທຳມະຊາດ ແລະ ວັດທະນະທຳຂອງຫວຽດນາມ ເຊິ່ງໄດ້ຮັບການຮັບຮອງຈາກ UNESCO, ບັນດາສະຖານທີ່ໄດ້ສ້າງຄວາມດຶງດູດນັກທ່ອງທ່ຽວ. ບັນດາບໍລິສັດທ່ອງທ່ຽວໄດ້ແນະນຳຜະລິດຕະພັນທ່ອງທ່ຽວນັບພັນຢ່າງ ທີ່ຢູ່ງານຕະຫຼາດນັດ. ຢູ່ທີ່ນີ້, ບັນດາບໍລິສັດທ່ອງທ່ຽວປະເທດຕ່າງໆມີໂອກາດໂຄສະນາຜະລິດຕະພັນທ່ອງທ່ຽວຂອງຕົນໃຫ້ບັນດາບໍລິສັດທ່ອງທ່ຽວ ແລະ ນັກທ່ອງທ່ຽວຫວຽດນາມ. ນອກຈາກນັ້ນ, ງານຕະຫຼາດນັດຍັງຈັດເວທີປາໄສທ່ອງທ່ຽວສາກົນ ເພື່ອໃຫ້ບັນດານັກຮຽນຮູ້, ນັກຄຸ້ມຄອງ, ການນຳວິສາຫະກິດທ່ອງທ່ຽວ ແລກປ່ຽນກ່ຽວກັບທ່າອ່ຽງ, ກຳນົດທິດ, ມາດຕະການແກ້ໄຂ, ພັດທະນາການທ່ອງທ່ຽວຫວຽດນາມ ແລະ ໂລກ, ຈັດຕັ້ງບັນດາການເຄື່ອນໄຫວສົ່ງເສີມການທ່ອງທ່ຽວ, ບຳລຸງສ້າງ ແລະ ສ້າງວຽກເຮັດງານທຳ, ໂຄສະນາວັດທະນະທຳ ແລະ ເຍື່ອງອາຫານພື້ນເມືອງອີກດ້ວຍ.
ດັ່ງທີ່ກ່າວມາຂ້າງເທິງແມ່ນເນື້ອໃນຄຳຖາມຂອງຜູ້ຟັງບາງທ່ານທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຟັງຈະສືບຕໍ່ຝາກຈົດໝາຍ, ອີແມວ ຫຼື ໂທລະສັບມາຫາລາຍການເພື່ອປະກອບຄຳເຫັນ ຊ່ວຍລາຍການນັບມື້ນັບດີກວ່າເກົ່າ. ພວກເພື່ອນສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼືສົ່ງອີແມວດ້ວຍລະຫັດ laovov@yahoo.com ຫຼື laovov5@gmail.com. ພວກເຮົາຍິນດີຕ້ອນຮັບ ແລະ ພ້ອມແລ້ວທີ່ຈະຕອບສະໜອງຕາມຄວາມປະສົງຂອງທຸກໆທ່ານ.