ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກຂ້າພະເຈົ້າຂໍຄັດສະເໜີເນື້ອໃນຈົດໝາຍ ແລະ ຕອບບາງຄຳຖາມທີ່ທ່ານຜູ້ຟັງຝາກມາໃນອາທິດຜ່ານມາ. ເຊີນທ່ານຕິດຕາມຮັບຟັງ.
ໃນອາທິດ, ເພື່ອນ ຫງວຽນວັນແຕ້ວ, ເຈີ່ນງອກຮ່າ, ແສງພະຈັນ, ດອກໄມ້... ໄດ້ຝາກອີແມວ, ໂທລະສັບອວຍພອນລາຍການໃນໂອກາດວັນສ້າງຕັ້ງວິທະຍຸກະຈາຍສຽງ ຫວຽດນາມ ຄົບຮອບ 69 ປີ, ໃນນັ້ນ ອີແມວຂອງທ່ານ ຫງວຽນວັນແຕ້ວ, ເຊິ່ງແມ່ນຜູ້ຟັງສະໜິດສະໜົມຂອງລາຍການພາກພາສາລາວເວົ້າສະເພາະ ແລະ ຂອງວິທະຍຸກະຈາຍສຽງ ຫວຽດນາມ ເວົ້າລວມ, ໄດ້ຂຽນວ່າ: ເນື່ອງໃນໂອກາດສະເຫຼີມສະຫຼອງ 69 ປີແຫ່ງວັນສ້າງຕັ້ງວິທະຍຸກະຈາຍສຽງ ຫວຽດນາມ (7/9), ຂ້າພະເຈົ້າຂໍອວຍພອນໃຫ້ບັນນາທິການ, ນັກຂ່າວ, ໂຄສົກ... ຂອງວິທະຍຸກະຈາຍສຽງ ຫວຽດນາມທຸກຄົນ ມີສຸຂະພາບເຂັມແຂງ ແລະ ປະສົບຜົນສຳເລັດໃນວຽກງານຂອງຕົນ, ອວຍພອນໃຫ້ວິທະຍຸກະຈາຍສຽງ ພັດທະນາພ້ອມກັບປະເທດຊາດຢ່າງບໍ່ຢຸດຢັ້ງ, ໄດ້ໃຫ້ຂ່າວຢ່າງທັນການເພື່ອຕອບສະໜອງຄວາມຕ້ອງການຂອງຜູ້ຟັງ, ຜູ້ອ່ານ.
ສະເພາະຂ້າພະເຈົ້າເອງ, ແມ່ນຜູ້ນິຍົມຟັງວິທະຍຸແຕ່ຄາວຍັງນ້ອຍ ແລະ ນັບຖືພວກອ້າຍເອື້ອຍທີ່ສຸດ ຍ້ອນຍາມໃດກໍ່ຍົກສູງຄຸນນະທາດປະຕິວັດ, ບໍ່ຫວາດຫວົ່ນຕໍ່ຄວາມຫຍຸ້ງຍາກລຳບາກໃນການຕໍ່ຕ້ານ ກໍ່ຄືໃນໄລຍະສັນຕິພາບ. ໃນຊຸມປີແຫ່ງຕໍ່ສູ້ຕ້ານສົງຄາມທຳລາຍຂອງຈັກກະພັດ ອາເມລິກາ, ຄິດສະເລ່ຍແຕ່ລະຄົນຕ້ອງຮັບມືກັບລະເບີດນັບເປັນໂຕນແຕ່ວິທະຍຸກະຈາຍສຽງ ຫວຽດນາມ ຍັງຄົງອອກອາກາດເປັນປະຈຳເພື່ອໃຫ້ຂ່າວກ່ຽວກັບບັນດາໄຊຊະນະຂອງກອງທັບ ແລະ ປະຊາຊົນ ຫວຽດນາມ. ປະຈຸບັນ, ວິທະຍຸກະຈາຍສຽງໄດ້ຮູບຮູບການສື່ສານອີນເຕີເນັດຕື່ມອີກເຮັດໃຫ້ຜູ້ຟັງ, ຜູ້ຊົມທັງພາຍໃນ ແລະ ຕ່າງປະເທດໄດ້ເຫັນຮູບພາບກ່ຽວກັບ, ບາດກ້າວພັດທະນາຢ່າງບໍ່ຢຸດຢັ້ງຂອງພັກ ແລະ ປະຊາຊົນ ຫວຽດນາມ. ອີກເທື່ອໜຶ່, ຂ້າພະເຈົ້າຂໍອວຍພອນໃຫ້ວິທະຍຸກະຈາຍສຽງ ຫວຽດນາມ ນັບມື້ນັບພັດທະນາທັງດ້ານຄຸນນະພາບ ແລະ ເນື້ອໃນຢ່າງບໍ່ຢຸດຢັ້ງ.
ພວກເຮົາຂໍຂອບໃຈທ່ານ ແຕ້ວ ທີ່ໄດ້ຝາກຄຳອວຍພອນອັນດີງາມເຖິງພວກເຮົາ. ບັນດາຈົດໝາຍ, ອີແມວທີ່ທ່ານຜູ້ຟັງ, ຜູ້ອ່ານຝາກມາໃຫ້ພວກເຮົາແມ່ນແຫຼ່ງລະດົມກຳລັງໃຈອັນໃຫຍ່ຫຼວງສຳລັບພວກຂ້າພະເຈົ້າ.
ການປູກຜັກຕາມມາດຖານ VietGap
(ພາບປະກອບ)
ທ່ານ ວົງສະເນຫາ, ແຂວງ ຫົວພັນ ໄດ້ຝາກອີແມວມາຍັງລາຍການດ້ວຍເນື້ອໃນທີ່ວ່າ: ຂ້າພະເຈົ້າຮັບຟັງລາຍການຊົນນະບົດໃໝ່ຜ່ານວິທະຍຸ, ພາກພາສາລາວ ໃນນັ້ນໄດ້ເຕື້ອງເຖິງມາດຖານ VietGap ໃນການຜະລິດກະສິກຳ. ຂ້າພະເຈົ້າຢາກຮູ້ແຈ້ງກ່ວາກ່ຽວກັບມາດຖານນີ້.
ທ່ານ ວົງສະເນຫາ ທີ່ເຄົາລົບ, ມາດຖານ VietGap ໂດຍກະຊວງກະສິກຳ ແລະ ພັດທະນາຊົນນະບົດ ຫວຽດນາມ ປະກາດໃຊ້ ແລະ ໄດ້ເສີມຂະຫຍາຍຜົນສັກສິດນັບແຕ່ຕົ້ນປີ 2008. ພວກຂ້າພະເຈົ້າຂໍແນະນຳໂດຍຫຍໍ້ດັ່ງຕໍ່ໄປນີ້. VietGap (ແມ່ນຄຳເວົ້າຫຍໍ້ຂອງ: Vietnamese Good Agricultucal Practices) ມີຄວາມໝາຍແມ່ນການຜະລິດກະສິກຳຕົວຈິງທີ່ດີຢູ່ ຫວຽດນາມ ໂດຍອີງໃສ່ 4 ມາດຖານຄື:
+ ມາດຖານກ່ຽວກັບເຕັກນິກການຜະລິດ
+ ຄວາມປອດໄພດ້ານທັນຍາຫານລວມມີບັນດາມາດຕະການຮັບປະກັນປອດສານພິດເມື່ອເກັບກ່ຽວຜະລິດຕະພັນກະເສດ.
+ ສະພາບແວດລ້ອມແຫ່ງການເຮັດວຽກ, ຈຸດປະສົງແມ່ນເພື່ອສະກັດກັ້ນການສວຍໃຊ້ກຳລັງແຮງງານຂອງຊາວກະສິກອນ.
+ ຊອກຫາຕົ້ນກຳເນີດຂອງຜະລິດຕະພັນ. ມາດຖານນີ້ ອານຸຍາດໃຫ້ກຳນົດບັນດາບັນຫາຈາກຂອດຜະລິດຕະຫຼອດຮອດການຈຳໜ່າຍຜະລິດຕະພັນ.
ພາຍຫຼັງໄດ້ອ່ານບົດສາລະຄະດີ “ເຂົ້າປຸ້ນຫອຍ - ອາຫານທີ່ເປັນມູນເຊື້ອຂອງ ຫວຽດນາມ”, ນັກສຶກສາບາງຄົນຂອງສະຖາບັນການປົກຄອງແຫ່ງຊາດ ຫວຽດນາມ ໄດ້ໂທລະສັບມາລາຍການຖາມກ່ຽວກັບທີ່ຢູ່ຂອງຮ້ານເຂົ້າປຸ້ນດັ່ງກ່າວ. ພວກເພື່ອນທີ່ຮັກແພງຮ້ານເຈົ້າປຸ້ນຂອງ ເອື້ອຍຖາວ ຕັ້ງຢູ່ເຮືອນເລກທີ 2A ຖະໜົນ ຫງວຽນກາວ, ຕາແສງ ດົງມາກ, ເມືອງ ຮາຍບ່າຈຶງ, ຮ່າໂນ້ຍ. ຮ້ານນີ້ເປີດປະຕູແຕ່ເວລາ 5 ໂມງ 30 ນາທີ ຮອດ 14 ໂມງແຕ່ລະມື້.
ລາຍການໂອ້ລົມກັບເພື່ອນລາວຂອງພວກເຮົາຂໍ້ສິ້ນສຸດລົງພຽງເທົ່ານີ້. ຖ້າຫາກຜູ້ໃດມີຄວາມສົນໃຈ ແລະ ຢາກປະກອບຄຳເຫັນໃຫ້ລາຍການກະລຸນາສົ່ງຈົດໝາຍມາຍັງລາຍການໂດຍຈ່າໜ້າຊອງວ່າ: ວິທະຍຸກະຈາຍສຽງຫວຽດນາມ-ພາກພາສາລາວ-ເຮືອນເລກທີ 45 ຖະໜົມບາຈ້ຽວ-ຮ່າໂນ້ຍ ຫຼືໂທລະສັບມາໂດຍກົງຕາມເບີໂທ: 0084.43.8256631, ອີແມວ: Laovov@yahoo.com ຫຼື laovov5@gmail.com. ພວກເຮົາຍິນດີຕ້ອນຮັບ ແລະ ພ້ອມແລ້ວຈະຕອບຄຳຖາມຂອງທ່ານທຸກປະການ. ຂໍຂອບໃຈທ່ານທີ່ໄດ້ຕິດຕາມຮັບຟັງ ແລະ ຊົມລາຍການຂອງພວກເຮົາ.