(vovworld)-ໃນອາທິດຜ່ານມາ, ລາຍການພາກພາສາລາວ ວິທະຍຸກະຈາຍສຽງຫວຽດນາມ ໄດ້ຮັບຈົດໝາຍຈາກເພື່ອສຸດທະສອນ, ຢູ່ແຂວງວຽງຈັນ, ເພື່ອນ ຖາວອນຢູ່ເມືອງຫຼາ ແຂວງອຸດົມໄຊ…ໂດຍແບ່ງປັນວ່າ: ພວກເພື່ອນມັກທີ່ສຸດບັນດາບົດເພງກ່ຽວກັບນະຄອນຫຼວງຮ່າໂນ້ຍ ຊື່ງໄດ້ອອກອາກາດໃນລາຍການເພງສະເຫຼີມສະຫຼອງວັນປົດປ່ອຍນະຄອນຫຼວງຮ່າໂນ້ຍ ຄືວັນທີ 10/10 ທີ່ຜ່ານມາ.
(ພາບ: dulichsenvang.com.vn )
ທ່ານເພັດສະຫວັນ ຢູ່ແຂວງອັດຕະປື ໄດ້ໂທລະສັບມາລາຍການປະກາດວ່າ: ໃນໄລຍະຜ່ານມາ,ທ່ານບໍ່ສາມາດຮັບຟັງລາຍການຜ່ານເຄືອຂ່າຍອິນເຕີແນັດໄດ້, ທ່ານເສຍດາຍທີ່ສຸດຍ້ອນບໍ່ໄດ້ຮັບຂ່າວຈາກວິທະຍຸ. ແຕ່ປະຈຸບັນ, ທ່ານສາມາດຮັບຟັງເປັນປົກະຕິແລ້ວ.
ເພື່ອນຄຳຜອງ, ນັກສຶກສາມະຫາວິທະຍາໄລແຫ່ງຊາດລາວ ໄດ້ສົ່ງອີແມວມາລາຍການໂດຍຖາມວ່າ: ກອງປະຊຸມສະໄໝສາມັນເທື່ອທີ 6 ສະພາແຫ່ງຊາດຫວຽດນາມ ຊຸດທີ 13 ດຳເນີນໃນເວລາຈັກມື້ ແລະ ປະຈຸບັນແມ່ນອາທິດເຮັດວຽກເທົາໃດແລ້ວ? ເພື່ອນຄຳຜອງ ແລະ ທ່ານຜູ້ຟັງຜູ້ອ່ານທີ່ເຄົາລົບ! ກອງປະຊຸມສະໄໝສາມັນເທື່ອທີ 6 ສະພາແຫ່ງຊາດຫວຽດນາມ ຊຸດທີ 13 ດຳເນີນໃນເວລາ 40 ມື້ ແລະ ປະຈຸບັນແມ່ນອາທິດເຮັດວຽກທີ 4 ແລ້ວ.
(ພາບ:My Binh)
ໃນອາທິດທີ່ຜ່ານມາ, ພວກເຮົາໄດ້ຮັບຈົດໝາຍຈາກເພື່ອນແສງອາພອນ, ພອນສະຫວັນ ຢູ່ແຂວງຈຳປາສັກ ໂດຍຖາມວ່າ: ຢູ່ຫວຽດນາມ ມີຜູ້ລ້ຽງນົກປະດັບບໍ່ ແລະ ຊາວຫວຽດນາມ ເຄີຍພົບປະແລກປ່ຽນກ່ຽວກັບວີທີລ້ຽງນົກບໍ່? ເພື່ອຊ່ວຍພວກທ່ານຊອກຮູ້ບັນຫານີ້, ເຊີນທ່ານພ້ອມກັບນັກຂ່າວວິທະຍຸກະຈາຍສຽງຫວຽດນາມ ເຂົ້າຮ່ວມ “ງານປະກວດສຽງນົກກະຈາບຮ້ອງທັງລອງປີ 2013“.
(ພາບ:My Binh)
ໃນທ່າມກາງສຽງວົນແຊວ, ອຶກກະທຶກຄຶກໂຄມຂອງ “ງານປະກວດສຽງນົກກະຈາບຮ້ອງທັງລອງປີ 2013, ສຽງນົກຮ້ອງ “triu, uyt, triu triu huyt“ ຍາມຂຶ້ນຍາມລົງຂອງນົກນ້ອຍ, ໜ້າຮັກຫຼາຍໂຕທີ່ປະດັບດ້ວຍຂົນທີ່ມີສີຫຼາກຫຼາຍ, ສຽງນົກກະຈາບໄດ້ພາໃຫ້ຜູ້ຄົນເຮົາທັງຫຼາຍນຶກເຫັນບັນຍາກາດປອດໂປ່ງສະຫງົບສຸກ…
ງານປະກວດໄດ້ດຶງດູດການເຂົ້າຮ່ວມຂອງ 75 ສະໂມສອນນົກກະຈາບ ດ້ວຍນົກ 850 ໂຕ, ພິເສດມີທັງການເຂົ້າຮ່ວມຂອງຜູ້ລ້ຽງນົກມາຈາກບັນດາແຂວງທາຍບິງ, ນາມດິງ, ເງະອານ, ເຫ້ວ, ດ່ານັງ….ອີກດ້ວຍ. ອ້າຍຮ່ວາວິງ, ສະໂມສອນນົກກະຈາບແທກເທິດ-ຮ່າໂນ້ຍ, ຜູ້ໄດ້ລ້ຽງນົກເປັນເວລາ 3 ປີແບ່ງປັນວ່າ: ຕ້ອງເລືອກນົກໂຕງາມ, ລ້ຽງນົກໃຫ້ດີ ແລະ ຜູ້ລ້ຽງກໍ່ຕ້ອງມີຄວາມຮັກແພງພິເສດຕໍ່ນົກອີກດ້ວຍ. ອ້າຍມັກລ້ຽງນົກ ກະຈາບຍ້ອນວ່າ:
“ນົກກະຈາບງາມຫຼາຍ, ລ້ຽງງ່າຍ, ນົກປະເພດອື່ນ ລ້ຽງຍາກກ່ວາ, ນອກນັ້ນ, ສຽງຮ້ອງຂອງມັນກໍ່ມ່ວນອີກ. ກ່ອນເຂົ້າຮ່ວມງານປະກວດ, ຂ້ອຍຕ້ອງລ້ຽງມັນຢ່າງລະອຽດທີ່ສຸດ, ຕ້ອງອາບນ້ຳ ຕາກແດດໃຫ້ນົກເປັນປະຈຳ ແລະ ລ້ຽງດ້ວຍອາຫານສົດ“.
(ພາບ:My Binh)
ໃນເດີນຂອງໂຮງຮຽນປະຖົມຫງອກເລິມ-ເມືອງລອງບຽນ-ຮ່າໂນ້ຍ, ນອກຈາກຜູ້ລ້ຽງນົກກ່ວາ 700 ຄົນພ້ອມກັບບັນດາໂຕນົກທີ່ນຳມາເຂົ້າຮ່ວມງານປະກວດແລ້ວ, ຍັງມີຜູ້ເຂົ້າຊົມເປັນຈຳນວນຫຼວງຫຼາຍ. ເພື່ອນຫງວຽນຫງອກດຽບ, ຢູ່ອຽນວຽນ ມີຄວາມປະທັບໃຈທີ່ສຸດຍ້ອນໄດ້ເຫັນປະຈັກຕາງານປະກວດສຽງນົກຮ້ອງເປັນຄັ້ງ ທຳອິດ:
“ຂ້ອຍຢາກຮູ້ຢາກເຫັນນົກກະຈາບທີ່ສຸດ, ສະນັ້ນຈຶ່ງມານີ້ຊົມເບິ່ງ, ເພື່ອນຂອງຂ້ອຍຢູ່ສະໂມສອນນົກກະຈາບໂຮ້ຍລິມ ໄດ້ຊວນຂ້ອຍໄປ. ນົກງາມຫຼາຍ, ສຽງຮ້ອງກໍ່ມ່ວນ ໃນງານປະກວດມີນົກຫຼາຍໂຕຄືແນວນີ້, ຄະນະກວດສອບຈະໃຫ້ຄະແນນຍາກທີ່ສຸດ“.
ຫງວຽນຊວນຟອງ, ຢູ່ສະໂມສອນນົກກະຈາບເຫງ້ຍໂດ ເວົ້າດ້ວຍຄວາມມ່ວນຊື່ນວ່າ: ສະໂມສອນຂອງລາວໄດ້ນຳນົກ 7 ໂຕມາເຂົ້າຮ່ວມງານປະກວດ ແລະ ມີ 3 ໂຕໄດ້ຮັບເລືອກເຂົ້າຮອບທີ 4 ແລ້ວ:
“ຂ້ອຍຢາກເຂົ້າຮ່ວມງານປະກວດເພື່ອຢາກຮູ້, ນົກຂອງຕົນມີສຽງຮ້ອງຄືແນວໃດ ໃນງານປະກວດຂະໜາດໃຫ່ຍນີ້. ນອກຈາກນັ້ນແມ່ນຢາກຮ່ຳຮຽນເອົາບົດຮຽນກ່ຽວກັບວິທີລ້ຽງນົກ, ວິທີເລືອກນົກດີ ຈາກຜູ້ລ້ຽງນົກອື່ນ. ຂ້ອຍເຫັນວ່າ ນີ້ແມ່ນງານປະກວດທີ່ນຳເອົາຜົນປະໂຫຍດຫຼາຍຢ່າງມາໃຫ້ທຸກຄົນ“
ເມື່ອອັດງານປະກວດ, ຄະນະຈັດຕັ້ງໄດ້ມອບລາງວັນທີ 1 ໃຫ້ນົກຂອງ ສະໂມສອນນົກກະຈາບຫງວຽນແຄງຕວານ, ລາງວັນທີ 2 ໃຫ້ນົກຂອງ ສະໂມສອນນົກກະຈາບແບກດັງ ແລະ ລາງວັນທີ 3 ໃຫ້ນົກຂອງ ສະໂມສອນນົກກະຈາບຫງອກຕາວ ພ້ອມກັບລາງວັນຊົມເຊີຍອີກຫຼາຍລາງວັນ…./.