ອາທິດຜ່ານມາ, ພວກຂ້າພະເຈົ້າໄດ້ຮັບໂທລະສັບຈາກທ່ານຜູ້ຟັງ, ຜູ້ອ່ານລາວຫຼາຍທ່ານ. ໃນນັ້ນສ່ວນຫຼາຍໄດ້ເອົາໃຈໃສ່ເປັນພິເສດເຖິງສະພາບສະຖານະການທັງຢູ່ພາຍໃນປະເທດ ຫວຽດນາມ ແລະ ຕ່າງປະເທດ. ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກເຮົາຂໍຕອບບາງຄຳຖາມເຊິ່ງທ່ານຜູ້ຟັງສົນໃຈ.
ໃນໂທລະສັບ ທີ່ໂທຫາລາຍການ, ເພື່ອນໝອນແກ້ວ, ແຂວງ ວຽງຈັນ ໄດ້ແບ່ງປັນວ່າ: ຂ້າພະເຈົ້າໄດ້ຮູ້ວ່າ, ມີຫຼາຍບົດຂຽນໃນແວບໄຊ vovworld.vn ໄດ້ແນະນຳກ່ຽວກັບຄວາມງາມ, ທັດສະນີຍະພາບ, ສະຖານທີ່ທຳມະຊາດຕ່າງໆ, ປະເທດຊາດ, ຊາວ ຫວຽດນາມ. ແຕ່ຂ້າພະເຈົ້າມັກລາຍການ “ພາບສາລະຄະດີ” ແລະ “ຄົ້ນຫາ ຫວຽດນາມ” ທີ່ສຸດ, ຍ້ອນຜ່ານ 2 ລາຍການນີ້, ຂ້າພະເຈົ້າສາມາດຮູ້ລະອຽດກ່ວາກ່ຽວກັບສະຖານທີ່, ທັດສະນີຍະພາບແຫ່ງຕ່າງໆຂອງ ຫວຽດນາມ. ຜ່ານລາຍການ “ຄົ້ນຫາ ຫວຽດນາມ”, ຂ້າພະຮູ້ສຶກຄືວ່າຕົນເອງພວມໄດ້ໄປທ່ອງທ່ຽວດ້ວຍຄວາມນຶກຄິດ, ສ່ວນຜ່ານບັນດາຮູບຖ່າຍຂອງລາຍການ “ພາບສາລະຄະດີ” ຂ້າພະເຈົ້າໄດ້ເຫັນປະຈັກຕາຄວາມງາມທຸກດ້ານຂອງ ຫວຽດນາມ. ອັນໄດ້ປະກອບສ່ວນແນະນຳໃຫ້ແຂກຕ່າງປະເທດຄືຂ້າພະເຈົ້າບັນດາສະຖານທີ່ທ່ອງທ່ຽວທີ່ດຶງດູດ ແລະ ຈັບອົກຈັບໃຈ. ຂອບໃຈພາກພາສາລາວຫຼາຍໆ.
ເພື່ອນໝອນແກ້ວ ທີ່ຮັກແພງ, ໃນແວບໄຊ: vovworld.vn ຂອງພວກເຮົາໄດ້ອັບແດດພາບສາລະຄະດີ, ບົດຂຽນໃນແຕ່ລະອາທິດ. ຫວັງວ່າເພື່ອນຈະສືບຕໍ່ຕິດຕາມ ແລະ ປະກອບຄຳເຫັນໃຫ້ແກ່ລາຍການ. ເພື່ອນຢ່າລືມແນະນຳໃຫ້ໝູ່ເພື່ອນຮູ້ກ່ຽວກັບແວບໄຊຂອງພວກເຮົາ. ຂໍຂອບໃຈ.
ເຈົ້າແຂວງແຂວງຫົວພັນ ຄຳຮູ່ງ ເຮືອງວົງສີ, ທ່ານ ຫງວຽນຊວນຟຸກ
|
ສ່ວນເພື່ອນ ຕຸຕີ ອິນທະວົງ, ແຂວງຫົວພັນ ໄດ້ໂທລະສັບຫາລາຍການໂດຍຖາມວ່າ: ຂ້າພະເຈົ້າເອົາໃຈໃສ່ເປັນພິເສດເຖິງບັນດາຂ່າວຄາວກ່ຽວກັບແຂວງຫົວພັນເວົ້າສະເພາະ ແລະ ປະເທດລາວເວົ້າລວມ, ພິເສດແມ່ນບັນດາການຢ້ຽມຢາມ ແລະ ເຮັດວຽກຂອງການນຳແຂວງ, ລັດຖະບານ… ຢູ່ຕ່າງປະເທດ. ໃນຕົ້ນອາທິດ, ເຈົ້າແຂວງແຂວງຫົວພັນມີການຢ້ຽມຢາມ, ເຮັດວຽກຢູ່ແຂວງ ຮ່ວາບີ່ງ ແລະ ເຂົ້າຢ້ຽມຂ່ຳນັບທ່ານຮອງນາຍົກລັດຖະມົນຕີ ຫງວຽນຊວນຟຸກ, ຂ້າພະເຈົ້າຢາກຮູ້ຂໍ້ມູນທີ່ພົ້ນເດັ່ນໃນການຢ້ຽມຢາມຄັ້ງນີ້?.
ເພື່ອນ ຕຸຕີ ທີ່ຮັກແພງ, ວັນທີ 17/8 ຜ່ານມາ, ທີ່ສຳນັກງານລັດຖະບານ, ທ່ານ ຫງວຽນຊວນຟຸກ, ກຳມະການກົມການເມືອງ, ຮອງນາຍົກລັດຖະມົນຕີ, ປະທານອະນຸກຳມະການຮ່ວມມື ຫວຽດນາມ - ລາວ ໄດ້ໃຫ້ການຕ້ອນຮັບທ່ານ ຄຳຮູ່ງ ເຮືອງວົງສີ, ເລຂາຄະນະພັກ, ເຈົ້າແຂວງແຂວງຫົວພັນ ເຂົ້າຢ້ຽມຂ່ຳນັບ. ທ່ານເລຂາຄະນະພັກ, ເຈົ້າແຂວງແຂວງຫົວພັນ ຄຳຮູ່ງ ເຮືອງວົງສີ ໄດ້ລາຍງານໂດຍຫຍໍ້ໝາກຜົນຂອງການຢ້ຽມຢາມ ແລະ ເຮັດວຽກຢູ່ແຂວງຮ່ວາບີ່ງ, ຢັ້ງຢືນການຮ່ວມມືລະຫວ່າງແຂວງ ຮ່ວາບີ່ງ ແລະ ແຂວງ ຫົວພັນແມ່ນການສືບທອດມູນເຊື້ອປະຕິວັດຂອງ 2 ພັກ, 2 ລັດກ່ອນນີ້. ທ່ານເລຂາຄະນະພັກ, ເຈົ້າແຂວງແຂວງຫົວພັນ ຄຳຮູ່ງ ເຮືອງວົງສີ ຫວັງວ່າ: ລັດຖະບານ ຫວຽດນາມ ແລະ ແຂວງ ຮ່ວາບີ່ງ ສືບຕໍ່ຍຸ້ແຮງການຮ່ວມມືກັບແຂວງ ຫົວພັນກ່ຽວກັບຂົງເຂດສາທາລະນະສຸກ, ສົມທົບກັບບັນດາໂຮງໝໍໃຫຍ່, ສົ່ງນັກຊ່ຽວຊານການແພດໄປຝຶກອົບຮົມ, ປິ່ນປົວພະຍາດຢູ່ບັນດາໂຮງໝໍຂອງແຂວງຫົວພັນ. ພ້ອມທັງສ້າງເງືຶ່ອນໄຂໃຫ້ພະນັກງານການແພດຂອງແຂວງ ຫົວພັນ ໄປ ຫວຽດນາມ ເພື່ອຍົກສູງລະດັບຄວາມຮູ້ ແລະ ຮ່ຳຮຽນເອົາບົດຮຽນຈາກຫວຽດນາມ. ທ່ານຮອງນາຍົກລັດຖະມົນຕີ ຫງວຽນຊວນຟຸກ ໃຫ້ຮູ້ວ່າ: ໄລຍະຈະມາເຖິງ, ລັດຖະບານ ຫວຽດນາມ ສືບຕໍ່ໜູນຊ່ວຍລາວ ທັງດ້ານທຶນຮອນເພື່ອພັດທະນາເສດຖະກິດ, ສັງຄົມ ແລະ ເພີ່ມຈຳນວນນັກຮຽນ, ນັກສຶກສາໄປຮຽນຢູ່ຫວຽດນາມ. ພ້ອມທັງສະເໜີໃຫ້ແຂວງຫົວພັນ ສົມທົບກັນຢ່າງແໜ້ນແຟ້ນກັບອະນຸກຳມະການ ຫວຽດນາມ - ລາວ, ລາວ - ຫວຽດນາມ ແລກປ່ຽນບັນດາອົງການກ່ຽວຂ້ອງເປັນປະຈຳເພື່ອຊຸກຍຸ້ການຮ່ວມມື, ສະເໜີບັນດາຂໍ້ລິເລີ່ມແທດຈິງເພື່ອປະຕິບັດຍຸດທະສາດຮ່ວມມື ຫວຽດນາມ - ລາວ ຢູ່ແຂວງ ຫົວພັນ ແລະ ແຂວງ ຊຽງແຂວງ.
ເພື່ອນ ເກດຕິສັກ, ແຂວງ ຈຳປາສັກໄດ້ໂທລະສັບຫາລາຍການຖາມວ່າ: ອາທິດຜ່ານມາ, ໃນລາຍການ “ສີສັນ 54 ຊົນເຜົ່າ ຫວຽດນາມ” ມີບົດຂຽນກ່ຽວກັບ ພິນຈາປີຂອງຊາວເຜົ່າ ຣາລາຍ, ຂ້າພະເຈົ້າມັກບົດຂຽນດັ່ງກ່າວຫຼາຍ ຍ້ອນວ່າຜ່ານບົດຂຽນຂ້າພະເຈົ້າເຂົ້າໃຈກ່ວາກ່ຽວກັບວັດທະນະທຳທີ່ຫຼາຍຮູບແບບຂອງຊາວເຜົ່າ ຣາລາຍ. ຢູ່ປະເທດຂ້າພະເຈົ້າກໍມີຫຼາຍຊົນເຜົ່າດຳລົງຊີວິດຢູ່ຮ່ວມກັນ ແລະ ແຕ່ລະເຜົ່າມີຈຸດວັດທະນະທຳທີ່ເປັນເອກະລັກສະເພາະ. ເລື່ອງສຳຄັນຂອງພວກເຮົາໃນປະຈຸບັນແມ່ນເຮັດແນໃດເພື່ອອະນຸລັກຮັກສາບັນດາຈຸດວັດທະນະທຳສະເພາະນັ້ນໄວ້ໃຫ້ຄົນລຸ້ນຫຼັງ.
ພວກຂ້າພະເຈົ້າມີຄວາມປິຕິຊົມຊື່ນເປັນຢ່າງຍິ່ງເມື່ອເພື່ອນ ເກດຕິສັກ ໄດ້ເອົາໃຈໃສ່ຕິດຕາມບັນດາລາຍການຂອງພວກເຮົາ. ຖ້າຜູ້ຟັງ, ຜູ້ອ່ານທ່ານໃດສົນໃຈເຖິງບົດຂຽນດັ່ງກ່າວສາມາດອ່ານ, ຟັງຄືນໃນແວບໄຊ vovworld.vn ຂອງພວກເຮົາ. ນອກຈາກນັ້ນແລ້ວ, ພວກເຮົາຂໍມອບບົດເພງ “ພິນຈາປີ” ຂອງນັກປະພັນດົນຕີ ເຈີ່ນຕ໋ຽນ, ບົດເພງນີ້ໄດ້ຮັບການປະດິດແຕ່ງກ່ອນນີ້ດົນແລ້ວແຕ່ຍັງໄດ້ຮັບຄວາມນິຍົມຊົມຊອບຈາກມິດເພງມາຮອດປະຈຸບັນ. ເຊີນທ່ານຜູ້ຟັງ, ຜູ້ອ່ານຮັບຟັງບົດເພງດັ່ງກ່າວໄດ້ເລີຍ.
ບົດເພງ “ພິນຈາປີ”
ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນ ແລະ ຄຳຖາມຂອງຜູ້ຟັງບາງທ່ານທີ່ຝາກມາລາຍການໃນອາທິດຜ່ານມາ. ຖ້າຫາກ ຜູ້ຟັງ, ຜູ້ອ່ານທ່ານໃດມີຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການພວກເຮົາໄດ້ເລີຍໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼື ອີແມວ laovov@yahoo.com, laovov5@gmail.com