(vovworld)-ໂດຍໄດ້ຮັບການຂະໜານນາມວ່າ ເຂດດິນແດນແຫ່ງໂຕມັງກອນລົງນັ້ນ, ຄວາມງາມຂອງອ່າວຮ້າລອງ ບໍ່ສາມາດພັນລະນາໄດ້ໝົດ. ສຳລັບຊາວ ຫວຽດນາມແລ້ວ, ນີ້ແມ່ນຄວາມເອກອ້າງທະນົງໃຈ, ສ່ວນສຳລັບຊາວຕ່າງ ປະເທດ, ອ່າວຮ້າລອງ ແມ່ນແດນສະຫວັນເພື່ອສາມາດພັກຜອນຢ່ອນ ອາລົມ ແລະ ຄົ້ນພົບ. ອ່າວຮ້າລອງ ແມ່ນສະຖານທີທ່ອງທ່ຽວທີ່ມີຊື່ສຽງ ແລະ ສວຍງາມຂອງ ຫວຽດນາມ.
ຂີ່ເຣືອນ້ອຍໄປທ່ຽວອ່າວຮ້າລອງ
(ພາບ:baoquangninh.com.vn)
ຖ້າທ່ານເດີນທາງຈາກນະຄອນຫຼວງ ຮ່າໂນ້ຍ ດ້ວຍລົດໂອໂຕປະມານ 3-4 ຊົ່ວໂມງ, ທ່ານຈະໄປຮອດອ່າວຮ້າລອງ ເຂດດິນທີ່ງາມເໝືອນດັ່ງຮູບແຕ້ມ, ອ່າວຮ້າລອງ ຂຶ້ນກັບແຂວງ ກວາງນິງ, ນອນໃນທາງທິດຕາເວັນຕົກອ່າວພາກເໜືອ, ຫ່າງຈາກນະຄອນຫຼວງ ຮ່າໂນ້ຍ ປະມານ 200 ກມ. ອ່າວຮ້າລອງ ງາມດັ່ງໃນຝັນດ້ວຍເກາະຫີນປຸນເກືອບ 2000 ແຫ່ງຊື່ງຕັ້ງກະແຈກກະຈາຍໃນເນື້ອທີ່ 1500 ກມ ມົນທົນ. ມາຮ້າລອງ ແຂກທ່ອງທ່ຽວສາມາດໄປທ່ຽວຊົມອ່າວຮ້າລອງ ດ້ວຍເຮືອນ້ອຍ ແລະ ແຂກທ່ອງທ່ຽວຈະໄດ້ຢ້ຽມຢາມພູເຂົາຫີນປຸນໃຫ່ຍນ້ອຍທີ່ຕັ້ງກະແຈກກະຈາຍບົນທະເລສ້າງເປັນຮູບພາບທີ່ມີສີຫລາກຫຼາຍ ທັງສວຍງາມ ແລະ ແປກປະຫຼາດ. ເມື່ອໄປຢ້ຽມຢາມອ່າວຮ້າລອງດ້ວຍເຮືອນ້ອຍ, ແຂກທ່ອງທ່ຽວຈະໄດ້ເຂົ້າຖ້ຳແຫ່ງຕ່າງໆທີ່ມີຊື່ສຽງຄື: ຖ້ຳ ສືງສົດ, ຖ້ຳທຽນກູງ….ລະບົບຖ້ຳຢູ່ນີ້ໄດ້ຮັບການບູລະນະສ້ອມແປງເພື່ອຮັບໃຊ້ແຂກທ່ອງທ່ຽວສາມາດເຂົ້າຢ້ຽມຊົມຢ່າງງ່າຍດາຍ ດ້ວຍລະບົບຂັ້ນໄດ ແລະ ໄຟເຍືອງທາງ ແຕ່ຍັງຮັກສາຄວາມງາມດັ້ງເດີມໄວ້ໄດ້ຢູ່. ທ່ານທອງວັນ ບູນບົວທອງ, ຮອງຜູ້ອຳນວຍການໂທລະພາບແຫ່ງຊາດລາວ ເວົ້າວ່າ:
“ຈຸດພິເສດຢູ່ເມືອງມໍລະດົກແຫ່ງນີ້ແມ່ນ ມີບ່ອນທ່ອງທ່ຽວຫຼາຍແຫ່ງ, ເປັນຕົ້ນແມ່ນແມ່ນ້ຳທີ່ກ້ວາງໃຫຍ່ ແລະ ມີຖ້ຳຫຼາຍບ່ອນ, ຖ້ຳມີຊື່ສຽງ, ທາງໃນກໍສ່ວນສົດງົດງາມເປັນໜ້າທ່ອງທ່ຽວຂອງຕ່າງປະເທດ ແລະ ຂອງຊາວຫວຽດນາມ ເມືອທຽບໃສ່ບ່ອນອື່ນໆເຫັນວ່າຢູ່ທີ່ນີ້ສວຍສົດງົດງາມ. ຄືມື້ນີ້ເອງ, ພວກເຮົາກໍໄດ້ຂີ່ເຮືອເດີນທາງຕັ້ງແຕ່ເຊົ້າ, ກິນເຂົ້າຢູ່ເທິງເຮືອ, ເດີນອີກຈົນຮອດຕອນແລງໆ, ຮູ້ສຶກເບີກບານໃຈ ແລະ ເປັນບ່ອນທີ່ເໝາະສົມໃຫ້ແກ່ການພັກຜ່ອນ, ບ່ອນດີເລີດຖ້າທຽບໃສ່ບ່ອນທີ່ຜ່ານມາ..“
ແຂກທ່ອງທ່ຽວມາຮ້າລອງ ດ້ວຍກຳປັ່ນ
(ພາບ: tin.lukhach24h.com)
ມາທ່ອງທ່ຽວອ່າວຮ້າລອງ, ແຂກທ່ອງທ່ຽວຍັງຈະໄດ້ໄປຢ້ຽມຊົມບັນດາທີວທັດທຳມະຊາດທີ່ລືຊື່ ແລະ ສວຍງາມທີ່ສຸດ, ໃນນັ້ນມີວັດ ລອງຕຽນ ຊື່ງແມ່ນວັດແຫ່ງໃຫ່ຍກ່ວາໝູ່ຢູ່ ຮ້າລອງ. ມີສະຖານທີ່ອີກແຫ່ງໜື່ງທີ່ແຂກທ່ອງທ່ຽວຄວນມາຢາມ ນັ້ນແມ່ນກຸ່ມປູສະນີຍະສະຖານເຂດພູ ບາຍເທີ ແປ່ວ່າບົດກະວີ ຊື່ງແມ່ນເຂດປູສະນີຍະສະຖານທີ່ມີຄຸນຄ່າສຳຄັນດ້ານວັດທະນະທຳປະຫວັດສາດຢູ່. ແຫ່ງນີ້ຍັງໄດ້ຮັກສາບົດກະວີຫຼາຍບົດທີ່ໄດ້ຄວັດສະຫຼັກເທິງແຜ່ນຫີນຂອງເຈົ້າຊີວິດຫວຽດນາມ ຈຳນວນໜື່ງ ຊື່ງໄດ້ຊົມຍ້ອງຄວາມສວຍງາມຂອງອ່າວຮ້າລອງ. ມາຮ້າລອງ ແຂກທ່ອງທ່ຽວຍັງຈະໄດ້ເຂົ້າຢ້ຽມບັນດາເຂດລ້ຽງປູກສິນທະເລປະເພດຕ່າງໆ ແລະ ສາມາດຊື້ຢູ່ກັບທີ່ເລີຍ, ແລ້ວບອກຜູ້ບໍລິການຢູ່ທີ່ນີ້ປຸງແຕ່ງໃຫ້ທ່ານຮັບປະທານອາຫານສົດຂອງທະເລໄດ້ເລີຍ. ໃນການຢ້ຽມຢາມອ່າວຮ້າລອງເປັນເວລາ 2 ວັນ, ທ່ານທອງວັນ ບູນບົວທອງ, ຮອງຜູ້ອຳນວຍການໂທລະພາບແຫ່ງຊາດລາວ ໄດ້ມີຄວາມປະທັບໃຈຢ່າງເລິກເຊີ່ງກ່ຽວກັບປະຊາຊົນຢູ່ທີ່ນີ້ທີ່ສຸດ:
“ປະເທດຫວຽດນາມແມ່ນປະເທດທີ່ສວຍສົດງົດງາມ ມີທະເລອ້ອມຈອດ, ຜ່ານການມາຄັ້ງນີ້, ມາຮອດບ່ອນທ່ອງທ່ຽວທີ່ເປັນມໍລະດົມ: ດິນຟ້າອາກາດ, ສະຖານທີ່ທ່ອງທ່ຽວເຫັນວ່າມີບັນຍາກາດດີ. ໂດຍສະເພາະແມ່ນຊາວ ກວາງນິນ ທີ່ດຳລົງຊີວິດຢູ່ເມືອງມໍລະດົກແຫ່ງນີ້ ລ້ວນແຕ່ມີຄວາມສະໜິດສະໜົມ. ເວລາທັກທາປາໄສ, ໂອ້ລົມກັນເຫັນວ່າເຂົ້າອົກເຂົ້າໃຈກັນ ເມື່ອໄດ້ມາຫວຽດນາມເຫັນວ່າຄືກັນກັບບ້ານຕົວເອງ ຄືເປັນຄອບຄົວດຽວກັນມ ຊາວ ກວາງນິນ ຮັບຕ້ອນແຂກຕ້ອນຄົນທີ່ໄປມາທ່ອງທ່ຽວດີເລີດຖ້າທຽບໃສ່ພາກອື່ນໆຂອງຫວຽດນາມ. ອາຫານການກິນເປັນອາຫານທີ່ແຊບ, ສົດ, ຂ້າເຈົ້າຈະຕອບສະໜອງ, ຈະຫາແຕ່ສິ່ງທີ່ສົດໆມາໃຫ້ນັກທ່ອງທ່ຽວ..“
ຖ້ຳທຽນກູງ-ຮ້າລອງ
(ພາບ:halong.info.vn)
ຮ້າລອງ ກໍແມ່ນແຫ່ງເຕົ້າໂຮມຊີວະນາໆພັນ ດ້ວຍບັນດາລະບົບຊີວະພາບທີ່ພົ້ນເດັ່ນຄື: ລະບົບຊີວະພາບປ່າຊາຍເລນ, ລະບົບຊີວະພາບປະກາລັງ ລະບົບຊີວະພາບປ່າເຂດຮ້ອນ…ຢູ່ຮ້າລອງຍັງມີສັດ ແລະພືດສາສາດນາໆປະເພດ, ໃນນັ້ນມີບາງປະເພດພຽງແຕ່ມີບັຢູ່ແຫ່ງນີ້ເທົ່ານັ້ນ. ດ້ວຍບັນດາຄຸນຄ່າພິເສດຄືດັ່ງກ່າວ, ອ່າວຮ້າລອງ ໄດ້ຮັບການຮັບຮອງວ່າແມ່ນມໍລະດົກທຳມະຊາດໂລກຢ່າງເປັນທາງການເຖິງ 2 ຄັ້ງ, ຄືໃນປີ 1994 ແລະ ປີ 2000. ໃນທ້າຍປີ 2011, ອ່າວຮ້າລອງ ໄດ້ຮັບການຄັດເລືອກເປັນ 1 ໃນສິ່ງມະຫັດສະຈັນທຳມະຊາດໃໝ່ 7 ແຫ່ງຂອງໂລກ ໂດຍອົງການ New seven Woder ຈັດຂຶ້ນ.
ເຊີນທ່ານມາຢ້ຽມຢາມອ່າວຮ້າລອງເພື່ອຮັບຮູ້ທີວທັດທຳມະຊາດ, ປະຊາຊົນຢູ່ທີ່ນີ້ ກໍຄືເຍື່ອງອາຫານພິເສດພຽງແຕ່ມີຢູ່ ຮ້າລອງເທົ່ານັ້ນ. ບາງເທື່ອທ່ານໄດ້ຟັງຫຼາຍກ່ຽວກັບອ່າວຮ້າລອງແລ້ວ ແຕ່ທ່ານຈະຮູ້ສຶກແປກປະຫຼາດໃຈ ເມື່ອໄດ້ເຫັນປະຈັກຕາອ່າວຮ້າລອງ ເຂດດິນແດນທີ່ສວຍງາມດັ່ງໃນຝັນຂອງປະເທດ ຫວຽດນາມ ຢ່າງແນ່ນອນ.