ຈົດໝາຍສະບັບທຳອິດທີ່ພວກຂ້າພະເຈົ້າໄດ້ຮັບໃນອາທິດຜ່ານມາ ແມ່ນຈົດໝາຍຂອງເພື່ອນ ສີສັດທາ ຢູ່ແຂວງ ສາລະວັນ, ຜູ້ຟັງໃໝ່ຂອງລາຍການ. ເພື່ອນໄດ້ຖາມມາວ່າ, ນອກຈາກລາຍການກະຈາຍສຽງພາກພາສາລາວແລ້ວ, VOV ຍັງມີລາຍການກະຈາຍສຽງພາສາຕ່າງປະເທດໃດແດ່?

ວິທະຍຸກະຈາຍສຽງ ຫວຽດນາມ ມີລາຍການກະຈາຍສຽງ 12 ພາສາຕ່າງປະເທດ. ນອກຈາກລາຍການພາກພາສາລາວແລ້ວ, ຍັງມີລາຍການກະຈາຍສຽງພາກພາສາ ອັງກິດ, ຝລັ່ງ, ຈີນ, ໄທ, ກຳປູເຈຍ, ອິນໂດເນເຊຍ, ລັດເຊຍ, ເຢຍລະມັນ, ແອັດສະປາຍ, ຍີ່ປຸ່ນ ແລະ  ສ.ເກົາຫຼີ. ເພື່ອນສາມາດຕິດຕາມບັນດາລາຍການດັ່ງກ່າວ ແລະ ລາຍການກະຈາຍສຽງພາກພາສາ ຫວຽດ ຮັບໃຊ້ຊາວ ຫວຽດນາມ ອາໄສ ຢູ່ຕ່າງປະເທດ ໃນເວັບໄຊ vovworld.vn. ພິເສດ, ສຳລັບທ່ານຜູ້ຟັງໃດທີ່ກຳລັງຮຽນພາສາຕ່າງປະເທດ, ເວັບໄຊຂອງພວກຂ້າພະເຈົ້າກໍເປັນໜຶ່ງໃນບັນດາທາງເລືອກທີ່ໜ້າໄວ້ເນື້ອເຊື່ອໃຈ ເພື່ອຝຶກພາສາຕ່າງປະເທດຂອງທ່ານໄດ້.

ພະລາດຊະວັງທັງລອງ - ມໍລະດົກວັດທະນະທຳໂລກ

ນອກຈາກແບ່ງປັນຄວາມຮູ້ສຶກຂອງຜູ້ຟັງແລ້ວ, ຕໍ່ໄປ ພວກຂ້າພະເຈົ້າຂໍຕອບບາງຄຳຖາມທີ່ຜູ້ຟັງໄດ້ຝາກເຖິງລາຍການໃນອາທິດຜ່ານມາ.

ເພື່ອນ ຈຳປາພັນ ຢູ່ແຂວງ ຈຳປາສັກ ໄດ້ຝາກຈົດໝາຍເຖິງລາຍການອວຍພອນວັນມໍລະດົກວັນທະນະທຳ ຫວຽດນາມ ວັນທີ 23 ພະຈິກ ແລະ ຖາມວ່າ: ຫວຽດນາມ ມີມໍລະດົກໃດແດ່ທີ່ໄດ້ຮັບການຮັບຮອງຈາກອົງການ UNESCO ເປັນມໍລະດົກໂລກ?

ໄລ່ຮອດເດືອນ ພຶດສະພາ ປີ 2023, ຫວຽດນາມ ມີ 8 ມໍລະດົກໄດ້ຮັບການຮັບຮອງຈາກອົງການ UNESCO ວ່າ ເປັນມໍລະດົກໂລກ. ໃນນັ້ນ ມີ 5 ມໍລະດົກວັດທະນະທຳ, 2 ມໍລະດົກທຳມະຊາດ ແລະ 1 ມໍລະດົກໂລກປະສົມ. ປ່າສະຫງວນແຫ່ງຊາດ ຟອງຍາແກ໋ບ່າງ, ອ່າວຮະລອງ ແມ່ນວັດທະນະທຳທຳມະຊາດ. ເຂດຮ່ອງຮອຍເມື່ອງເກົ່າ ເຫວ້, ຄຸ້ມຖະໜົນເກົ່າ ໂຮ້ຍອານ, ເຂດສວນທາດ ໝີເຊີນ, ເຂດຮ່ອງຮອຍພະລາດຊະວັງທັງລອງ ແລະ ກຳແພງລາດຊະວົງ ໂຮ່ ແມ່ນບັນດາມໍລະດົກວັດທະນະທຳ. ເຂດທັດສະນີຍະພາບ ຈ່າງອານ ແມ່ນມໍລະດົກປະສົມແຫ່ງໜຶ່ງດຽວຂອງ ຫວຽດນາມ ແລະ ອາຊີຕາເວັນອອກສ່ຽງໃຕ້ ແລະ ແມ່ນ 1 ຈຳນວນ 38 ມໍລະດົກທີ່ໄດ້ຮັບການຮັບຮອງຈາກອົງການ UNESCO.

ຄຳຖາມຕໍ່ໄປແມ່ນຂອງເພື່ອນ ສົມບູນ ຢູ່ນະຄອນຫຼວງ ວຽງຈັນ. ເພື່ອນ ສົມບູນ ຢາກຮັບຟັງລາຍການແນະນຳກ່ຽວກັບຄຸ້ມຖະໜົນເກົ່າ ຮ່າໂນ້ຍ.

ຖະໜົນ ຮ່າງໝ໋າ ແມ່ນເຂດຂາຍເຄື່ອງບູຊາເຮັດດ້ວຍເຈ້ຍ, ເຄື່ອງປະດັບປະດາເຮືອນຊານ

ຮ່າໂນ້ຍ ມີຄວາມເອກອ້າງທະນົງໃຈເມື່ອມີຖະໜົນເກົ່າຫຼາຍສາຍ ຫຼື ຍັງເປັນທີ່ຮູ້ຈັກກັນດີວ່າ “ຮ່າໂນ້ຍ ຖະໜົນຄຸ້ມເມືອງເກົ່າ 36 ສາຍ”. ຖະໜົນຄຸ້ມເມືອງເກົ່າ ຮ່າໂນ້ຍ ສ່ວນໃຫຍ່ແມ່ນຕັ້ງຢູ່ເມືອງ ຮວ່ານກຽມ, ເມືອງໃຈກາງຂອງນະຄອນຫຼວງ, ມີເນື້ອທີ່ທັງໝົດປະມານ 100 ເຮັກຕາ. ຖະໜົນແຕ່ລະສາຍໃນຄຸ້ມເມືອງເກົ່າ ລ້ວນແຕ່ນຳມາເຊິ່ງຄວາມຮູ້ສຶກທີ່ພິເສດ. ຕົວຢ່າງ ຖະໜົນ ຮ່າງບົງ ແມ່ນບ່ອນທີ່ມີຊື່ສຽງກັບບັນດາຜະລິດຕະພັນຄື ຜ້າຫົ່ມງິ້ວ, ຖະໜົນ ຮ່າງໝ໋າ ແມ່ນເຂດຂາຍເຄື່ອງບູຊາເຮັດດ້ວຍເຈ້ຍ, ເຄື່ອງປະດັບປະດາເຮືອນຊານ, ສ່ວນຖະໜົນ ຮ່າງກວາດ ແມ່ນເຂດທີ່ໄດ້ຮັບຈັກກັນດີກັບການຂາຍຊຸດອາພອນ ແລະ ເຄື່ອງສະແດງເທິງເວທີຂອງສິລະປະພື້ນເມືອງ. ໃນສະໄໝລາດຊະວົງ ຫຼີ - ເຈີ່ນ ປະມານສະຕະວັດທີ 11, ສະຖານທີ່ແຫ່ງນີ້ແມ່ນສູນການຄ້າຂອງເມືອງຫຼວງ ທັງລອງ. ບັນດາກິດຈະກຳ, ເຮືອນຊານບ້ານຊ່ອງຢູ່ຖະໜົນຄຸ້ມເມືອງເກົ່າ ໄດ້ຮັບການກໍ່ສ້າງຕາມສະຖາປັດຕະຍາກຳ ຄຣາດຊິກ, ດ້ວຍເຮືອນຫຼັງນ້ອຍໆ, ຫຼັງຄາມຸງດ້ວຍດິນຂໍ ແລະ ຝາເຮືອນໄດ້ທາສີເຫຼືອງເປັນສີຕົ້ນຕໍ, ອັນໄດ້ສ້າງເຂດນີ້ກາຍເປັນເຂດທີ່ມີຄວາມເປັນເອກະລັກ ແລະ ເຂັ້ມຂຸ້ນໄປດ້ວຍລັກສະນະປະຫວັດສາດ. ສິ່ງດັ່ງກ່າວໄດ້ສ້າງເປັນຮູບພາບທີ່ມີຄວາມຫຼາກຫຼາຍ ແລະ ອຸດົມສົມບູນໃນວັດທະນະທຳການຄ້າທີ່ເປັນມູນເຊື້ອຂອງ ຮ່າໂນ້ຍ.

  ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນຂອງທ່ານຜູ້ຟັງທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຟັງຈະສືບຕໍ່ຝາກຈົດໝາຍ, ອີເມວ ຫຼື ໂທລະສັບມາຫາລາຍການ ເພື່ອປະກອບຄຳເຫັນຊ່ວຍລາຍການຂອງພວກເຮົາໃຫ້ນັບມື້ນັບດີກວ່າເກົ່າ. ພວກເພື່ອນກໍ່ສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ ຫຼື ໂທມາໂດຍກົງກໍ່ໄດ້ ຕາມເບີໂທ 0084.243.8256631 ຫຼື ອີເມວ laovov5@gmail.com. ທ່ານຜູ້ຟັງກໍ່ສາມາດເຂົ້າເບິ່ງໃນເວບໄຊ vovworld.vn.

ຂໍຂອບໃຈ!