(vovworld) - ໂດຍຕ່າງກັບຊຸມປີກ່ອນໆ,ໃນລະດູຮ້ອນປີນີ້ ຍ້ອນສະພາບເສດຖະກິດປະສົບກັບຄວາມຫຍຸ້ງຍາກ, ນັກທ່ອງທ່ຽວ ຫວຽດນາມ ເຄີຍເລືອກເຟັ້ນບັນດາລາຍການທ່ອງທ່ຽວທີ່ປະຢັດດ້ວຍໄລຍະສັ້ນໄປຍັງບັນດາປະເທດໃກ້ຄຽງຄື: ໄທ, ລາວ, ກຳປູເຈຍ ແລະ ມ້ຽນມາ ແທນໃຫ້ການໄປທ່ອງທ່ຽວເຖິງບັນດາປະເທດອື່ນຄື: ສິງກະໂປ, ມາເລເຊຍ ຫລືບັນດາປະເທດເອີລົບ.
ວັດພະແກ້ວ ຢູ່ ນະຄອນຫລວງ ບາງກອກປະເທດໄທ
ພາບ:internet
|
ໄທແມ່ນປະເທດມີສະຖານທີ່ທ່ອງທ່ຽວທີ່ລືຊື່ຫລາຍແຫ່ງຄື: ວັດພໍ່, ວັດພະແກ້ວ, ຫາດຊາຍທະເລ ພັດທະຍາ, ເກາະພູເກດ ແລະ ຊາວໄທກໍເປັນຄົນທີ່ ສະຫນິດສະຫນົມ ນັ້ນແມ່ນການເລືອກເຟັ້ນຕົ້ນຕໍຂອງຊາວ ຫວຽດນາມ ຫລາຍຄົນ. ແຕ່ລະປີຮອດເດືອນ 6, 7 ແລະ ເດືອນ 8, ຈຳນວນນັກທ່ອງທ່ຽວ ຫວຽດນາມ ຈົດທະບຽນໄປທ່ອງທ່ຽວຢູ່ໄທເປັນຈຳນວນຫລວງຫລາຍ. ສາຍເຫດໃດທີ່ຂະແຫນງທ່ອງທ່ຽວໄທສ້າງຄວາມດຶງດູດນັກທ່ອງທ່ຽວຄືແນວນັ້ນ, ອາດຈະແມ່ນຄວາມຊຳນານງານໃນການບໍລິການ. ອ້າຍ Nguyen Hai ຜູ້ອຳນວຍການບໍລິສັດທ່ອງທ່ຽວສາກົນ Hai Son ໃຫ້ຮູ້ວ່າ:
“ນັບແຕ່ກ່ອນມາຮອດປະຈຸບັນ, ໄທແມ່ນປະເທດທີ່ລືຊື່ກ່ຽວກັບຂະແຫນງບໍລິການ, ທ່ອງທ່ຽວ ແລະ ບັນດາລາຍການທ່ອງທ່ຽວໄທຂອງບໍລິສັດພວກຂ້າພະເຈົ້າໄດ້ດຶງດູດນັກທ່ອງທ່ຽວຫລາຍທີ່ສຸດ. ວິທີດຳເນີນທຸລະກິດທ່ອງທ່ຽວຂອງເຂົາເຈົ້າກໍແຕກຕ່າງກັນ. ລັດຖະບານໄທ ເຜີຍແຜ່ວິທີເຮັດບໍລິການທ່ອງທ່ຽວໃຫ້ແກ່ແຕ່ລະຄົນ. ພິເສດ ຍາມໃດລາຄາກໍເປັນປົກກະຕິ ນັບທັງບໍລິການລະຫລິ້ນ ແລະ ການຊຶ້ເຄື່ອງຂອງ.”
ຍ້ອນມີບັນດານະໂຍບາຍສົ່ງເສີມການທ່ອງທ່ຽວຂອງລັດຖະບານໄທ, ປີ 2011 ຈຳນວນນັກທ່ອງທ່ຽວ ຫວຽດນາມ ໄປຢ້ຽມຢາມໄທ ບັນລຸຕົວເລກ 337.000 ເທື່ອຄົນ. ແລະ ໃນປີ 2012 ຂະແຫນງທ່ອງທ່ຽວໄທ ວາງຄາດໝາຍຍົກຕົວເລກດັ່ງກ່າວຂຶ້ນຕື່ມ 10%. ທ່ານ Nguyen Van Thu ຜູ້ອຳນວຍການບໍລິສັດ Donna tour ໄທ ສາຂາ ຫວຽດນາມ ໃຫ້ຮູ້ວ່າ: ນັບແຕ່ຕົ້ນປີມາຮອດປະຈຸບັນ, ບໍລິສັດ Donna tuor ໄດ້ຕ້ອນຮັບນັກທ່ອງທ່ຽວ ຫວຽດນາມ 25.000 ເທື່ອຄົນ ແລະ ກາຍເປັນບໍລິສັດນຳຫນ້າຂອງໄທ ກ່ຽວກັບການຕ້ອນຮັບຈຳນວນນັກທ່ອງທ່ຽວມາຈາກ ຫວຽດນາມ.
ສຳລັບ ມ້ຽນມາ, ລາຍການທ່ອງທ່ຽວໄປຢ້ຽມຢາມທາດຄຳ Shewedagon ຢູ່ ນະຄອນຫລວງເກົ່າ Yangon ແມ່ນຫນຶ່ງໃນບັນດາສະຖານທີ່ລືຊື່ສ້າງຄວາມດູດດື່ມ. ມາຢ້ຽມຢາມ ມ້ຽນມາ ນັກທ່ອງທ່ຽວຈະໄດ້ທ່ຽວຊົມ ທາດແລະວັດວາອາຣາມໃນທຸກແຫ່ງຫົນ, ຊ້ຳບໍ່ຫນຳຢູ່ບັນດາກິດຈະກຳສະຖາປັດຕະຍະກຳ. ວັດທະນະທຳຢູ່ທີ່ນີ້ເຂັ້ມຂົ້ນໄປດ້ວຍສີສັນສາສະຫນາ ແລະ ກໍຄ້າຍຄືບັນດາປະເທດຢູ່ໃນພາກພື້ນ ອາຊຽນ, ສາສະຫນາພຸດສວມບົດບາດທີ່ຕັ້ງສຳຄັນໃນຊີວິດທາງດ້ານວັດທະນະທຳ ແລະ ຈິດໃຈຂອງຊາວ ມ້ຽນມາ. ປະຈຸບັນ ລາຍການທ່ອງທ່ຽວໄປຍັງ ມ້ຽນມາພວມໄດ້ຮັບການເລືອກເຟັ້ນຈາກນັກທ່ອງທ່ຽວ ຫວຽດນາມ ເພາະວ່າ ການເດີນທາງໄປເຖິງມ້ຽນມາບໍ່ໄກປານໃດ ແລະ ລາຄາກໍບໍ່ແພງ.
ວັດວາອາຮາມຢູ່ ມ້ຽນມາ
ພາບ: internet
|
ໂດຍແມ່ນປະເທດໃກ້ຄຽງກັບ ຫວຽດນາມ, ສປປ ລາວ ມີບັນດາສະຖານທີ່ທ່ອງທ່ຽວທີ່ລືຊື່ຄື: ທາດຫລວງ, ເມືອງຫລວງພະບາງ, ວັດຊຽງຄວນ ໄດ້ດຶງດູດນັກທ່ອງທ່ຽວຫວຽດນາມ ເປັນຈຳນວນຫລວງຫລາຍ. ເມື່ອທຽບກັບປະເທດໄທທີ່ຟົດຟື້ນ, ຂະຫຍັນຂັນເຄື່ອນ,ແລະຫວຽດນາມທີ່ພວມພັດທະນາ, ສ່ວນລາວແມ່ນດິນແດນທີ່ສະຫງົບງຽບໄດ້ສ້າງຄວາມປະທັບໃຈໃຫ້ນັກທ່ອງທ່ຽວທີ່ສຸດ. ນັກທ່ອງທ່ຽວຕ່າງປະເທດ ຫລາຍຄົນຮູ້ຈັກເຖິງປະເທດລ້ານຊ້າງ ບໍ່ສະເພາະແຕ່ຍ້ອນຄວາມງາມແບບສະຫງົບງຽບທຳມະຊາດເທ່ົານັ້ນ ຫາກຍ້ອນຄວາມສະຫນິດສະຫນົມຂອງປະຊາຊົນລາວ ແລະ ພື້ນຖານໂຄງລ່າງການທ່ອງທ່ຽວກໍສະດວກສະບາຍ. ເອື້ອຍ Nguyen Ha An ຊາວ ຮ່າໂນ້ຍໄປທ່ອງທ່ຽວຢູ່ ລາວຫາກັບຄືນເມືອປະເທດ ໃຫ້ຮູ້ວ່າ:
“ສິ່ງທີ່ດຶງດູດນັກທ່ອງທ່ຽວໄປຢ້ຽມຢາມລາວ ນັ້ນແມ່ນປະຊາຊົນລາວມີຄວາມຮັກແພງແຂກຄົນ ແລະ ສະຫນິດສະຫນົມ, ຄ່າບໍລິການກໍປົກກະຕິ, ນັບທັງໃນໂອກາດບຸນຫົດນ້ຳ. ໃນຊຸມວັນບຸນຫົດນ້ຳນັ້ນ ນັກທ່ອງທ່ຽວສາມາດເຊົ່າຫ້ອງພັກດ້ວຍລາຄາປະມານ 10 USDຕໍ່ຄືນ. ”
ອັງກໍວັດ ຢູ່ ກຳປູເຈຍ
ພາບ: internet
|
ໃນລາຍການໄປທ່ອງທ່ຽວບັນດາປະເທດຢູ່ອາຊີຕາເວັນອອກສຽງໃຕ້, ຂະແຫນງທ່ອງທ່ຽວ ກຳປູເຈຍ ເຖິງວ່າບໍ່ທັນພັດທະນາຄືບາງປະເທດໃນພາກພື້ນກໍຕາມ ແຕ່ກຳປູເຈຍ ກໍແມ່ນປະເທດສວຍງາມດ້ວຍປູຊະນີຍະສະຖານຫລາຍແຫ່ງທີ່ດຶງດູດນັກທ່ອງທ່ຽວ. ນັ້ນກໍແມ່ນຄວາມຮູ້ສຶກຂອງທ່ານນາງ Thuy Minh ແລະ ນັກທ່ອງທ່ຽວ ຫວຽດນາມ ຫລາຍຄົນ.
“ໄປທ່ອງທ່ຽວ ກຳປູເຈຍ ນັກທ່ອງທ່ຽວຈະໄດ້ໄປຢ້ຽມຢາມ Angkorwat, Angkorthom ດ້ວຍຄວາມງາມແບບເກົ່າແກ່ ແລະ ສະຖາປັດຕະຍະກຳທີ່ຍອດຢ້ຽມຊອງຊາວເຜົ່າຂະແມ. ຜ່ານໄລຍະນັບພັນປີກໍ່ບໍ່ເຮັດໃຫ້ສິລະປະຄວັດສະຫລັກຢູ່ເທິງໂງ່ນຫີນທີ່ກໍ່ສ້າງວິຫານແຫ່ງນີ້ຖືກຫາຍໄປ. ຍ້ອນຄວາມງາມແບບດັ້ງເດີມຂອງປູຊະນີຍະສະຖານແຫ່ງນີ້ໄດ້ເຮັດໃຫ້ນັກທ່ອງທ່ຽວທຸກລຸ້ນ, ທຸກໄວ ບໍໍ່ຮູ້ສຶກວ່າອິດເມື່ອຍ ແລະ ພະຍາຍາມຄົ້ນຫາສິ່ງມະຫັດສະຈັນທີ່ໄດ້ຮັບການກໍ່ສ້າງມາແຕ່ດົນນານ ແຕ່ປະຈຸບັນຍັງຄົງເຕັມໄປດ້ວຍສິ່ງເລິກລັບ ແລະ ເປັນປິດສະໜາ.”
ດ້ວຍລາຄາບໍ່ສູງປານໃດ, ນັກທ່ອງທ່ຽວ ຫວຽດນາມສາມາດເລືອກເຟັ້ນ ລາຍການທ່ອງທ່ຽວໄປລາວ, ໄທ ແລະ ກຳປູເຈຍໃນເວລາ 3 ວັນ ໃຫ້ແກ່ຕົນເອງ ເພື່ອຄົ້ນຫາຄວາມງາມຂອງບັນດາພື້ນຖານວັດທະນະທຳທີ່ມີມາແຕ່ດົນນານ, ແລະ ຮັບຊົມທິວທັດທຳມະຊາດສວຍງາມຂອງແຕ່ລະປະເທດ. ຄຽງຂ້າງນັ້ນ ນັກທ່ອງທ່ຽວຍັງໄດ້ຮັບການຕ້ອນຮັບຈາກປະຊາຊົນທ້ອງຖິ່ນຢ່າງສະຫນິດສະຫນົມ ພ້ອມກັບບັນດາບໍລິການດີທີ່ສຸດ ນີ້ແມ່ນປັດໃຈທີ່ສ້າງຄວາມດູດດື່ມສຳລັບຊາວຫວຽດນາມ.