ເຫດການທີ 1. ການສຳຫຼວດກວດກາ, ຕຳນິຕິຊົມຕົນເອງ ແລະ ຕຳນິຕິຊົມເພື່ອນສະຫາຍຕາມມະຕິສູນກາງທີ 4 (ຊຸດທີ 11) ກາຍເປັນການດຳເນີນຊີວິດດ້ານການເມືອງຢ່າງເລິກເຊິ່ງກວ້າງຂວາງ, ເຂັ້ມງວດໃນທົ່ວພັກ, ໃນເບື້ອງຕົ້ນໄດ້ນຳມາເຊິ່ງປະສິດທິຜົນຢ່າງຕັ້ງໜ້າ
ການສຳຫຼວດກວດກາ, ຕຳນິຕິຊົມຕົນເອງ ແລະ ຕຳນິຕິຊົມເພື່ອນສະຫາຍຕາມມະຕິສູນກາງທີ 4 ໄດ້ດຶງດູດຄວາມສົນໃຈຂອງພະນັກງານ, ສະມາຊິກພັກ ແລະ ປະຊາຊົນໃນທົ່ວປະເທດ. ນີ້ແມ່ນວຽກງານເປັນປະຈຳ, ຍາວນານ ແລະ ຮອບດ້ານໃນການກໍ່ສ້າງພັກ, ເຊິ່ງກ່ຽວຂ້ອງເຖິງຄວາມເປັນຕາຍຂອງພັກ, ການຍື່ນຍົງຄົງຕົວຂອງລະບອບ. ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ໋ຈ້ອງ ຢືນຢັນວ່າ “ບົດຮຽນຕົວຈິງຂອງປະຫວັດສາດຫວຽດນາມ ໄດ້ສະແດງໃຫ້ເຫັນວ່າ, ເມື່ອພັກເຮົາຮັບຮູ້ໄດ້ຄວາມຜິດພາດ, ຂໍ້ຂາດຕົກບົກຜ່ອງ ແລະ ຕັດສິນໃຈແກ້ໄຂ, ກຳລັງແຮງຂອງພັກຍິ່ງໄດ້ຮັບການຍົກສູງຂຶ້ນ; ປະຊາຊົນຍິ່ງມີຄວາມເຊື່ອໝັ້ນ, ຮັກແພງ ແລະ ສະໜັບສະໜູນພັກ. ໃນສະພາບການທີ່ເຕັມໄປດ້ວຍຄວາມຫຍຸ້ງຍາກ, ການທ້າທາຍໃນປະຈຸບັນ, ສິ່ງດັ່ງກ່າວຍິ່ງມີຄວາມຈຳເປັນທີ່ສຸດ.”
ກົມການເມືອງຈັດຕັ້ງກອງປະຊຸມພະນັກງານທົ່ວປະເທດແນະນຳການສຳຫຼວດກວດກາ
ຕຳນິຕິຊົມຕົນເອງ ແລະ ຕຳນິຕິຊົມເພື່ອນສະຫາຍຕາມມະຕິສູນກາງທີ 4 ຊຸດທີ XI
ເຫດການທີ 2, ມີຫຼາຍເນື້ອໃນທີ່ສຳຄັນໄດ້ຮັບການປຶກສາຫາລື ແລະ ຕົກລົງໃນກອງປະຊຸມສະໄໝສາມັນເທື່ອທີ 4 (ສະພາແຫ່ງຊາດຫວຽດນາມ ຊຸດທີ 13)
ທີ່ກອງປະຊຸມສະໄໝສາມັນເທື່ອທີ 4 (ສະພາແຫ່ງຊາດຫວຽດນາມຊຸດທີ 13), ສະພາແຫ່ງຊາດໄດ້ໃຫ້ຄຳເຫັນກ່ຽວກັບການປັບປຸງລັດຖະທຳມະນູນປີ 1992 ແລະ ຮ່າງກົດໝາຍວ່າດ້ວຍທີ່ດິນ (ສະບັບປັບປຸງ); ຮັບຮອງເອົາມະຕິກ່ຽວກັບການລົງມະຕິໄວ້ວາງໃຈ ສຳລັບບັນດາຕຳແໜ່ງໂດຍສະພາແຫ່ງຊາດ, ສະພາປະຊາຊົນເລືອກຕັ້ງ ຫຼືເຊັນອະນຸມັດ. ນີ້ແມ່ນການຫັນເປັນລະອຽດບັນດາເນື້ອໃນເຊິ່ງກອງປະຊຸມຄະນະບໍລິຫານງານສູນກາງພັກຄັ້ງທີ 5, ຄັ້ງທີ 6 (ຊຸດທີ 11) ຂອງພັກໄດ້ຕົກລົງ.
ກອງປະຊຸມສະໄໝສາມັນເທື່ອທີ 4, ສະພາແຫ່ງຊາດຊຸດທີ XIII ປະສົບຜົນສຳເລັດຢ່າງຈົບງາມ
ເຫດການທີ 3. ເສດຖະກິດຫວຽດນາມ ຍັງຄົງເປັນປົກກະຕິ ແລະ ຮັກສາລະດັບເຕີບໂຕ ດ້ວຍລະດັບ GDP ເພີ່ມຂຶ້ນກວ່າ 5%, ໄພເງິນເຟີ້ຕ່ຳກວ່າ 7%
ນີ້ແມ່ນຄວາມມານະພະຍາຍາມອັນໃຫຍ່ຫຼວງຂອງທົ່ວພັກ, ທົ່ວກອງທັບ, ທົ່ວປວງຊົນ ໃນເງື່ອນໄຂພື້ນຖານເສດຖະກິດຍັງບໍ່ທັນໄດ້ຮັບການແກ້ໄຂຢ່າງມີປະສິດທິຜົນ, ໄພທຳມະຊາດເກີດຂຶ້ນຢ່າງຕໍ່ເນື່ອງ, ການກະທົບຈາກການປ່ຽນແປງຂອງດິນຟ້າອາກາດ, ພ້ອມກັບຜົນສະທ້ອນບໍ່ໜ້ອຍຈາກວິກິດການເສດຖະກິດໂລກ. ບັນດາມາດຕະການສ້າງໂຄງປະກອບລັດວິສາຫະກິດ, ຕະຫຼາດການເງິນ, ທະນາຄານ ແລະ ການລົງທຶນຄືນໃໝ່ ໄດ້ຮັບການຜັນຂະຫຍາຍໃນເບື້ອງຕົ້ນ. ໃນສະພາບທີ່ການຜະລິດອຸດສາຫະກຳປະສົບກັບຄວາມຫຍຸ້ງຍາກນັ້ນ, ແຕ່ການຜະລິດກະສີກຳຍັງຄົງພັດທະນາ, ປະກອບສ່ວນຮັກສາເສດຖະກິດສັງຄົມເປັນປົກກະຕິ: ຍອດປະລິມານການຜະລິດທັນຍາຫານທັງປີບັນລຸເກືອບ 44 ລ້ານໂຕນ; ຍອດວົງເງິນສົ່ງອອກຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳບັນລຸກວ່າ 25 ຕື້ໂດລາສະຫະລັດ, ໃນນັ້ນເຂົ້າສານ, ກາເຟ, ໝາກຜິກໄທ…ບຶນຕົວຂຶ້ນຢືນດັບໜຶ່ງຂອງໂລກ.
ປີ
2012, ເສດຖະກິດຫວຽດນາມ ຍັງເປັນປົກກະຕິ ແລະ ຮັກສາລະດັບເຕີບໂຕ
ດ້ວຍ GDP ເພີ່ມຂຶ້ນກວ່າ 5%, ໄພເງິນເຟີ້ຕ່ຳກວ່າ 7% ເຫດການທີ 4. ການປົກປັກຮັກສາອະທິປະໄຕຢູ່ເຂດຊາຍແດນ, ທະເລເກາະໄດ້ຮັບຄວາມເອົາໃຈໃສ່ພິເສດຈາກປະຊາຊົນທົ່ວປະເທດ
ຫວຽດນາມມີແຜນນະໂຍບາຍປົກປັກຮັກສາອະທິປະໄຕ, ຜືນແຜ່ນດິນອັນຄົບຖ້ວນຂອງຊາດ ແລະ ແກ້ໄຂການພິພາດບົນພື້ນຖານເຄົາລົບຄວາມຈິງປະຫວັດສາດ, ກົດໝາຍສາກົນ, ໂດຍຜ່ານການເຈລະຈາ, ຮັກສາສັນຕິພາບ, ສະຖຽນລະພາບໃນພາກພື້ນ ແລະ ຢູ່ໃນໂລກ. ບໍ່ພຽງແຕ່ບັນດານັກວິທະຍາສາດ, ນັກຄົ້ນຄ້ວາປະຫວັດສາດພາຍໃນປະເທດ ແລະ ສາກົນເທົ່ານັ້ນ, ຫາກປະຊາຊົນຫຼາຍຄົນ, ໃນນັ້ນມີຊາວຫວຽດນາມທີ່ພວມດຳລົງຊີວິດຢູ່ຕ່າງປະເທດ ໄດ້ສະໜອງເອກະສານ, ຫຼັກຖານປະຫວັດສາດຫຼາຍຢ່າງ ເຊິ່ງກ່ຽວຂ້ອງເຖິງບັນຫາອະທິປະໄຕຂອງຫວຽດນາມ ທີ່ມີຕໍ່ໝູ່ເກາະ ຮ່ວາງຊາ ແລະ ເຈື່ອງຊາ.
ຮູບພາບທຸງຊາດສີແດງດາວເຫຼືອງຢູ່ໝູ່ເກາະ ເຈື່ອງຊາໃຫຍ່, ເມືອງເກາະເຈື່ອງຊາ, ແຂວງແຄ໋ງຮ່ວາ
ເຫດການທີ 5. ປີແຫ່ງຄວາມສາມັກຄີ, ມິດຕະພາບຫວຽດນາມ - ລາວ ແລະ ປີມິດຕະພາບຫວຽດນມ - ກຳປູເຈຍ ຖືກຈັດຂຶ້ນຢ່າງສົມກຽດ
ມີການເຄື່ອນໄຫວຫຼາຍຢ່າງຖືກຈັດຂຶ້ນຢູ່ຫວຽດນາມ, ລາວ, ກຳປູເຈຍ, ຢັ້ງຢືນຄວາມສາມັກຄີ, ມິດຕະພາບ, ພ້ອມກັນຕັດສິນໃຈສ້າງສາແຕ່ລະປະເທດໃຫ້ນັບມື້ນັບຮັ່ງມີເຂັ້ມແຂງ, ວັດທະນາຖາວອນ, ເພື່ອສັນຕິພາບ, ສະຖຽນລະພາບ ແລະ ການພັດທະນາຂອງສາມປະເທດອິນດູຈີນອ້າຍນ້ອງ. ໃນນັ້ນມີງານໂຮມຊຸມນຸມ, ງານພົບປະສ້າງສັນ; ການນຳຂັ້ນສູງ 3 ປະເທດດຳເນີນການຢ້ຽມຢາມເຊິ່ງກັນ ແລະ ກັນ; ເພີ່ມທະວີການແລກປ່ຽນຄະນະຜູ້ແທນ, ຮ່ວມມືທາງດ້ານເສດຖະກິດ - ການຄ້າລະຫວ່າງບັນດາກະຊວງ, ຂະແໜງການ, ທ້ອງຖີ່ນຕ່າງໆ; ແລກປ່ຽນມິດຕິພາບປະຊາຊົນ, ແລກປ່ຽນວັດທະນະທຳ, ສິລະປະ ແລະ ກິລາລະຫວ່າງສາມປະເທດ.
ສາຍພົວພັນທີ່ເປັນມູນເຊື້ອອັນດີງາມຫວຽດນາມ - ລາວ ແລະ ຫວຽດນາມ - ກຳປູເຈຍ ໄດ້ຮັບການເພີ່ມພູມຄູນສ້າງຜ່ານລຸ້ນຕ່າງໆ
ເຫດການທີ 6. ຈຳນວນອຸບັດຕິເຫດ, ຈຳນວນຜູ້ເສຍຊີວິດ ແລະ ຖືກບາດເຈບ ຖືກຫຼຸດລົງຢ່າງແຮງໃນປີແຫ່ງຄວາມປອດໄພທາງຄົມມະນາຄົມແຫ່ງຊາດ
ປີແຫ່ງຄວາມປອດໄພທາງຄົມມະນາຄົມແຫ່ງຊາດ ໂດຍທ່ານນາຍົກລັດຖະມົນຕີ ຫງວຽນເຕິນຢຸງ ປຸກລະດົມທາງວິທະຍຸກະຈາຍສຽງຫວຽດນາມ. ຕາມຕົວເລກສະຖິຕິ, ອຸບັດຕິເຫດທາງຄົມມະນາຄົມໄດ້ຫຼຸດລົງ 17%, ຈຳນວນຜູ້ເສຍຊີວິດຫຼຸດລົງ 14%, ຈຳນວນຜູ້ຖືກບາດເຈບຫຼຸດລົງ 20%. ບັນລຸໄດ້ຜົນງານດັ່ງກ່າວ ແມ່ນຍ້ອນມີການຊີ້ນຳຢ່າງເດັດດຽວຂອງລັດຖະບານ, ບັນດາກະຊວງ, ຂະແໜງການ, ທ້ອງຖີ່ນຕ່າງໆ, ແລະ ຄວາມຮັບຮູ້ຂອງປະຊາຊົນໄດ້ຮັບການຍົກສູງຂຶ້ນ ຜ່ານວຽກງານໂຄສະນາຢ່າງແຮງຂອງບັນດາພາຫະນະສື່ມວນຊົນ.
ທ່ານນາຍົກລັດຖະມົນຕີຫງວຽນເຕິ໋ນຢຸງ ສົ່ງສານປີແຫ່ງຄວາມປອດໄພທາງຄົມມະນາຄົມແຫ່ງຊາດ
ຜ່ານຄື້ນວິທະຍຸກະຈາຍສຽງຫວຽດນາມ
ເຫດການທີ 7. ກໍ່ສ້າງສຳເລັດຫຼາຍກິດຈະກຳຈຸດສຸມແຫ່ງຊາດ
ພາຍຫຼັງ 7 ປີ ແຫ່ງການກໍ່ສ້າງ, ເຂື່ອນໄຟຟ້ານ້ຳຕົກ ເຊີນລາ - ເຊິ່ງແມ່ນກິດຈະກຳເຂື່ອນໄຟຟ້ານ້ຳຕົກໃຫຍ່ກວ່າໝູ່ຢູ່ອາຊີຕາເວັນອອກສ່ຽງໃຕ້ ດ້ວຍກຳລັງໄຟຟ້າ 2.400 MW ໄດ້ເປີດສະຫຼອງກ່ອນກຳນົດເວລາ 3 ປີ, ອັນໄດ້ປະຢັດ ແລະ ສ້າງຜົນປະໂຫຍດໃຫ້ແກ່ປະເທດ 40.000 ຕື້ດົ່ງ. ກ່ອນນັ້ນ, ດ່າວທຽມໂທລະຄົມ VINASAT-2 ຖືກຍິງເຂົ້າວົງໂຄຈອນສຳເລັດຜົນ, ອັນໄດ້ຢືນຢັນອະທິປະໄຕແຫ່ງຊາດຂອງຫວຽດນາມໃນຈັກກະວານ. ພ້ອມກັນນັ້ນ, ຫວຽດນາມ ໄດ້ລົງມືກໍ່ສ້າງສູນອາວະກາດຫວຽດນາມ ຢູ່ເຂດອຸດສາຫະກຳສູງ ຮ່ວາລາກ - ຮ່າໂນ້ຍ.
ພິທີຕັດແຖບຜ້າເປີດສະຫຼອງກິດຈະກຳເຂື່ອນໄຟຟ້ານ້ຳຕົກເຊີນລາ ເຫດການທີ 8. ປີ 2012, 3 ອົງການຈັດຕັ້ງການເມືອງ - ສັງຄົມທີ່ສຳຄັນຂອງຫວຽດນາມ ຈັດກອງປະຊຸມໃຫຍ່.
ນັ້ນແມ່ນກອງປະຊຸມໃຫຍ່ຜູ້ແທນແມ່ຍິງທົ່ວປະເທດຄັ້ງທີ 11, ກອງປະຊຸມໃຫຍ່ຜູ້ແທນຊາວໜຸ່ມກອມມູນິດ ໂຮ່ຈີມິນ ທົ່ວປະເທດຄັ້ງທີ 10, ກອງປະຊຸມໃຫຍ່ຜູ້ແທນສະມາຄົມນັກຮົບເກົ່າຫວຽດນາມທົ່ວປະເທດຄັ້ງທີ 5. ຜ່ານກອງປະຊຸມໃຫຍ່, ສະມາຊິກຊາວໜຸ່ມ, ນັກຮົບເກົ່າ ແລະ ແມ່ຍິງຫວຽດນາມ ສືບຕໍ່ຢັ້ງຢືນຄວາມເຊື່ອໝັ້ນຕໍ່ການນຳພາຂອງພັກ, ເສັ້ນທາງກ້າວຂຶ້ນສັງຄົມນິຍົມ ແລະ ສູ້ຊົນປະກອບກຳລັງຂອງຕົນ ເພື່ອກໍ່ສ້າງປະເທດຊາດໃຫ້ໝັ້ນຄົງເຂັ້ມແຂງ.
ກອງປະຊຸມໃຫຍ່ຜູ້ແທນຊາວໜຸ່ມກອມມູນິດ ໂຮ່ຈີມິນທົ່ວປະເທດ ຄົ້ງທີ 10
ເຫດການທີ 9. ເຊີດຊູການເຫຼື້ອມໃສໄຫວ້ບູຊາເຈົ້າຊີວິດຮຸ່ງ ແລະ ແມ່ພິມດ້ວຍໄມ້ວັດ ວິ້ງງຽມ
ອົງການສຶກສາ, ວິທະຍາສາດ ແລະ ວັດທະນະທຳສະຫະປະຊາຊາດ (UNESCO) ໄດ້ຮັບຮອງການເຫຼື້ອມໃສໄຫວ້ບູຊາເຈົ້າຊີວິດຮຸ່ງຂອງຊາວຫວຽດນາມ ແມ່ນມໍລະດົກວັດທະນະທຳທີ່ບໍ່ມີຮູບຮ່າງ ເປັນຕົວແທນຂອງມວນມະນຸດ; ແລະ ຮັບຮອງແມ່ພິມຄຳພີດ້ວຍໄມ້ຂອງວັດ ວິ້ງງຽມ (ແຂວງບັກຢາງ) ເປັນມໍລະດົກວັດທະນະທຳ. ສິ່ງດັ່ງກ່າວ, ອີກເທື່ອໜຶ່ງ ໄດ້ຢັ້ງຢືນບັນດາຄູນຄ່າທີ່ເປັນເອກະລັກສະເພາະຂອງວັດທະນະທຳຫວຽດນາມ, ພ້ອມທັງວາງອອກຄວາມຮຽກຮ້ອງອະນຸລັກຮັກສາວັດທະນະທຳບູຮານ, ວັດທະນະທຳທີ່ມີຮູບຮ່າງ ແລະ ບໍ່ມີຮູບຮ່າງ.
ການເຫຼື້ອມໃສໄຫວ້ບູຊາເຈົ້າຊີວິດຮຸ່ງກາຍເປັນມໍລະດົກວັດທະນະທຳບໍ່ມີຮູບຮ່າງທີ່ຕາງໜ້າໃຫ້ມວນມະນຸດ
ເຫດການທີ 10. ກິລາຫວຽດນາມ ບໍ່ໄດ້ຮັບຜົນຢູ່ ໂອລີມປິກ ລອນດອນ 2012 ແລະ ການແຂ່ງຂັນບານເຕະຊິງຊະນະເລີດອາຊີຕາເວັນອອກສ່ຽງໃຕ້
ຄະນະກິລາຫວຽດນາມບໍ່ໄດ້ຮັບຫຼຽນຢູ່ໂອລີມປິກ ລອນດອນ. ໃນຂະນະນັ້ນທິມຊາດບານເຕະຫວຽດນາມ ຖືກປັດເຂ່ຍອອກຈາກການແຂ່ງຂັນບານເຕະອາຊີຕາເວັນອອກສ່ຽງໃຕ້ (AFF Cup). ສິ່ງດັ່ງສະແດງໃຫ້ເຫັນວ່າ, ກິລາຫວຽດນາມ ຍັງມີວຽກງານຫຼາຍຢ່າງທີ່ຈະຕ້ອງເຮັດ ເພື່ອມີບາດກ້າວຢ່າງໝັ້ນຄົງ ໂດຍລະອຽດແມ່ນແຜນຍຸດທະສາດ, ການຄຸ້ມຄອງ, ການລົງທຶນ, ການເຝິກແອບ, ການບຳລຸງສ້າງຖັນແຖວນັກກິລາທັງມີຈິດໃຈ ທັງມີຄວາມສາມາດ.
ທິມຊາດບານເຕະຫວຽດນາມຖືກປະລາໄຊໃນຮອບຄັດເລືອກ AFF cup