ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ
|
1. ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ປະສົບຜົນສຳເລັດຢ່າງຈົບງາມ
ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກ ດຳເນີນແຕ່ວັນທີ 20 -28/1 ຢູ່ ຮ່າໂນ້ຍ ແມ່ນເຫດການການເມືອງມີຄວາມໝາຍສຳຄັນພິເສດໃນປີ 2016. ມະຕິຂອງກອງປະຊຸມໃຫຍ່ ໄດ້ກຳນົດ 6 ຫນ້າທີ່ຈຸດສຸມໃຫ້ແກ່ໄລຍະ 2016-2021 ກ່ຽວກັບການເພີ່ມທະວີວຽກງານກໍ່ສ້າງພັກ, ພັດທະນາເສດຖະກິດ ສັງຄົມ, ສູ້ຊົນນຳປະເທດຫວຽດນາມກາຍເປັນປະເທດອຸດສາຫະກຳຕາມທິດທັນສະໄຫມໂດຍໄວ; ເດັດດ່ຽວ, ຢຶດໝັ້ນຕໍ່ສູ້ປົກປັກຮັກສາເອກະລາດ, ອະທິປະໄຕ, ເອກະພາບ, ຜືນແຜ່ນດິນອັນຄົບຖ້ວນຂອງປະເທດຊາດຢ່າງໝັ້ນຄົງ. ທ່ານ ຫງວຽນຟູຈ້ອງ ສືບຕໍ່ໄດ້ຮັບເລືອກຕັ້ງເປັນເລຂາທິການໃຫຍ່ພັກກອມມູນິດຫວຽດນາມ.
ທ່ານ ເຈີນດ້າຍກວາງ, ກຳມະການກົມການເມືອງ ຮັບດຳລົງຕຳແຫນ່ງເປັນປະທານປະເທດ
|
2. ການເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນທຸກຂັ້ນ; ບູລະນະກົງຈັກລັດ
ຜູ້ມີສິດເລືອກຕັ້ງກວ່າ 67 ລ້ານຄົນ, ກວມເອົາກວ່າ 99% ຈຳນວນຜູ້ມີສິດເລືອກຕັ້ງ ເຂົ້າຮ່ວມການປ່ອນບັດ. ຜົນສຳເລັດຂອງການເລືອກຕັ້ງສະມາຊິກສະພາແຫ່ງຊາດຊຸດທີ 12 ແລະ ສະມາຊິກສະພາປະຊາຊົນທຸກຂັ້ນອາຍຸການ 2016-2021 ເມື່ອວັນທີ 20/5 ແມ່ນບາດກ້າວສຳຄັນໃນວິວັດການກໍ່ສ້າງ, ປັບປຸງ ແລະ ສ້າງລັດແຫ່ງ ກົດໝາຍ ແລະ ພື້ນຖານປະຊາທິປະໄຕສັງຄົມນິຍົມ. ສະພາແຫ່ງຊາດເລືອກຕັ້ງ ທ່ານ ເຈີນດ້າຍກວາງ, ກຳມະການກົມການເມືອງ ຮັບດຳລົງຕຳແຫນ່ງເປັນປະທານປະເທດ; ທ່ານ ຫງວຽນຊວນຟຸກ, ກຳມະການກົມການເມືອງ ຮັບດຳລົງຕຳແຫນ່ງເປັນນາຍົກລັດຖະມົນຕີ; ທ່ານນາງ ຫງວຽນທິກີມເງິນ, ກຳມະການກົມການເມືອງ ຮັບດຳລົງຕຳແຫນ່ງເປັນປະທານສະພາແຫ່ງຊາດ.
ທ່ານຫງວຽນຮູຍຮ່ວາງ, ອະດີດລັດຖະມົນຕີກະຊວງອຸດສາຫະກຳແລະ ການຄ້າຖືກປົດຕຳແຫນ່ງເລຂາຄະນະພັກກະຊວງ
|
3.ພັກສະແດງໃຫ້ເຫັນຄວາມຕັດສິນໃຈດ້ານການເມືອງຢ່າງສູງໃນການເຮັດໃຫ້ຖັນແຖວສະມາຊິກພັກປອດໃສ
ມະຕິກອງປະຊຸມຄັ້ງທີ 4 ຄະນະບໍລິຫານງານສູນກາງພັກຊຸດທີ 12 ສືບຕໍ່ຢືນຢັນຄວາມຕັດສິນໃຈ ແລະ ວາງອອກບັນດາມາດຕະການຢ່າງແຮງເພື່ອເພີ່ມທະວີການກໍ່ສ້າງ, ປັບປຸງພັກ; ສະກັດກັ້ນ, ຍູ້ການເຊື່ອມທາດຂາດຄຸນດ້ານແນວຄິດການເມືອງ, ຄຸນສົມບັດ, ແບບແຜນການດຳລົງຊີວິດ, ບັນດາປະກົດການ “ຜັນແປເອງ”, “ຫັນປ່ຽນເອງ” ຢູ່ພາຍໃນໃຫ້ຖອຍໄປ. ພ້ອມກັບບັນດາຄະດີໃຫຍ່ໄດ້ຍົກອອກມາພິພາກສາຢ່າງເຂັ້ມງວດ, ມີກຳມະການສູນກາງພັກ 3 ຄົນ ແລະ ຫລາຍອົງການ, ພະນັກງານຂັ້ນສູງອື່ນກໍຖືກປະຕິບັດວິໄນຍ້ອນມີສ່ວນກ່ຽວຂ້ອງເຖິງປະກົດການຫຍໍ້ທໍ້, ການສໍ້ລາດບັງຫລວງ. ບັນດາວຽງການນີ້ໄດ້ຮັບຄວາມຊົມເຊີຍຈາກຫາງສຽງ, ເປັນການປັບປຸງຄວາມໄວ້ເນື້ອເຊື່ອໃຈຂອງພະນັກງານ ສະມາຊິກພັກ ແລະ ປະຊາຊົນທີ່ມີຕໍ່ພັກ, ລັດ.
ຈຳນວນວິສາຫະກິດໄດ້ຮັບການສ້າງຕັ້ງໃຫມ່ບັນລຸຕົວເລກສະຖິຕິ
ພາບປະກອບ:
|
4. ຈຳນວນວິສາຫະກິດໄດ້ຮັບການສ້າງຕັ້ງໃຫມ່ບັນລຸຕົວເລກສະຖິຕິ
ນາຍົກລັດຖະມົນຕີ ໄດ້ເລືອກເຟັ້ນປີ 2016 ແມ່ນປີແຫ່ງຊາດແຫ່ງການເລີ່ມປະກອບອາຊີບ. ຍ້ອນມີຄວາມມານະພະຍາຍາມຫລາຍຢ່າງ ແລະ ຄວາມຕັດສິນໃຈ, ປີ 2016 ຈຳນວນວິສາຫະກິດໄດ້ຮັບການສ້າງຕັ້ງໃຫມ່ເພີ່ມຂຶ້ນຫລາຍ ແລະ ມີບາດກ້າວຫັນປ່ຽນຢ່າງຈະແຈ້ງກ່ຽວກັບຄຸນນະພາບ. ໄລ່ຮອດເດືອນ 12/2016, ມີວິສາຫະກິດໄດ້ຮັບການສ້າງຕັ້ງໃຫມ່ ກວ່າ 103.000 ແຫ່ງ ເມື່ອທຽບໃສ່ 94.700 ແຫ່ງໃນປີ 2015. ພ້ອມກັບຈຳນວນວິສາຫະກິດສ້າງຕັ້ງໃຫມ່ນັ້ນ, ທົ່ວປະເທດ ມີວິສາຫະກິດກວ່າ 24.500 ແຫ່ງໄດ້ກັບຄືນສູ່ເຄື່ອນໄຫວ, ເພີ່ມຂຶ້ນເກືອບ 32% ເມື່ອທຽບໃສ່ໄລຍະດຽວກັນຂອງປີກາຍ.
ບັນດາວິສາຫະກິດ, ບໍລິສັດດຳເນີນທຸລະກິດເຂົ້າຮ່ວມຕະຫລາດໃນບັນຍາກາດເລີ່ມປະກອບອາຊີບຢ່າງຟົດຟື້ນ ຍ້ອນຄຳໝັ້ນສັນຍາຂອງການນຳປະເທດ ກ່ຽວກັບລັດຖະບານສ້າງສັນ, ຊັດສື່ບໍລິສຸດ, ຮັບໃຊ້ທຸກການພັດທະນາຕັ້ງຫນ້າຂອງວິສາຫະກິດ. ຫວຽດນາມ ກໍເພີ່ມຂຶ້ນ 9 ຂັ້ນ ກ່ຽວກັບສະພາບແວດລ້ອມແຫ່ງດຳເນີນທຸລະກິດໃນປີ 2016 ຕາມການຕີລາຄາຂອງທະນາຄານໂລກ ຍ້ອນມີການປັບປຸງລະບຽບການສ້າງຕັ້ງວິສາຫະກິດ, ການເສຍອາກອນ, ໄດ້ຊົມໃຊ້ໄຟຟ້າ. ກະແສການເລີ່ມປະກອບອາຊີບຢ່າງແຮງ ແລະ ຄວາມໄວ້ເນື້ອເຊື່ອໃຈດັ່ງກ່າວຈະສົ່ງຜົນກະທົບຢ່າງຕັ້ງຫນ້າເຖິງສະພາບການພັດທະນາເສດຖະກິດສັງຄົມຂອງປະເທດຊາດໃນປີ 2017 ແລະ ຊຸມປີຕໍ່ໄປ.
 ເປີດສະຫລອງກິດຈະກຳເຂື່ອນໄຟຟ້ານ້ຳຕົກ ລາຍເຈົາ
|
5. ເປີດສະຫລອງ ໂຮງງານເຂື່ອນໄຟຟ້ານ້ຳຕົກ ລາຍເຈົາ ກ່ອນແຜນການທີ່ວາງອອກ 1 ປີ
ໂຄງການເຂື່ອນໄຟຟ້ານ້ຳຕົກ ລາຍເຈົາ ແມ່ນກິດຈະການເຂື່ອນໄຟຟ້ານ້ຳຕົກໃຫຍ່ອັນດັບ 3 ຊື່ງໄດ້ຮັບການກໍ່ສ້າງຢູ່ແມ່ນ້ຳ ຊົງດ່າ ລວມມີ 3 ຫ້ອງເຄື່ອງຈັກ ດ້ວຍຍອດກຳລັງການຜະລິດ 1.200 MW; ມີຫນ້າທີ່ຕ້ານໄພນ້ຳຖ້ວມເມືື່ອລະດູຝົນວຽນມາ, ສະຫນອງນ້ຳໃນລະດູແລ້ງໃຫ້ແກ່ເຂດທົ່ງພຽງທາງພາກເຫນືອ. ກິດຈະກຳດັ່ງກ່າວໄດ້ຮັບການກໍ່ສ້າງສຳເລັດກ່ອນແຜນການທີ່ວາງອອກ 1 ປີ ດ້ວຍການສະຫນອງໃຫ້ແກ່ລະບົບໄຟຟ້າແຫ່ງຊາດເກືອບ 4,7 ຕື້ ກິໂລວັດ, ສ້າງຜົນປະໂຫຍດໃຫ້ແກ່ງົບປະມານແຫ່ງລັດປະມານ 5000 ຕື້ດົງ, ປະກອບສ່ວນສຳຄັນ ຮັບປະກັນຄວາມໝັ້ນຄົງດ້ານພະລັງງານແຫ່ງຊາດ.
ກາບກອນຄວັດແກະສະຫລັກເທິງພາບໃມ້ຢູ່ພະລາດຊະວັງ ເຫ້ວ
|
6. ເພີ່ມທະວີການອະນຸລັກຮັກສາ, ເສີມຂະຫຍາຍ ແລະ ໂຄສະນາບັນດາຄຸນຄ່າດ້ານວັດທະນະທຳ
ປີ 2016, ມີມໍລະດົກວັດທະນະທຳຂອງຫວຽດນາມ ຕື່ມອີກໄດ້ຮັບການຮັບຮອງຈາກ UNESCO ແມ່ນມໍລະດົກວັດທະນະທຳບໍ່ມີຮູບຮ່າງເປັນຕົວແທນໃຫ້ມວນມະນຸດ ນັ້ນແມ່ນການການເຫລື້ອມໃສບູຊາພະແມ່ 3 ພະນາງ ຂອງຫວຽດນາມ ຍົກສູງຈຳນວນມໍລະດົກວັດທະນະທຳບໍ່ມີຮູບຮ່າງເປັນຕົວແທນໃຫ້ມວນມະນຸດ ຢູ່ຫວຽດນາມ ຂຶ້ນເຖິງ 11 ມໍລະດົກ. ນອກນັ້ນ 2 ມໍລະດົກອື່ນຄື ກາບກອນຄວັດແກະສະຫລັກເທິງພາບໃມ້ຢູ່ພະລາດຊະວັງ ເຫ້ວ ແລະ ແມ່ພິມເອກະສານ ໂຮງຮຽນ ຟຸກຢາງ ກໍໄດ້ຮັບການຮັບຮອງຈາກ UNESCO ແມ່ນມໍລະດົກວັດຖຸເອກະສານ ຂຶ້ນກັບໂຄງການຄວາມຊົງຈຳຂອງໂລກ ພາກພື້ນ ອາຊີ ປາຊີຟີກ.
ຕ້ອນຮັບນັກທ່ອງທ່ຽວສາກົນ10 ລ້ານເທື່ອຄົນ
|
7. ຂະແຫນງທ່ອງທ່ຽວຫວຽດນາມຕ້ອນຮັບນັກທ່ອງທ່ຽວສາກົນ10 ລ້ານເທື່ອຄົນ
ຂະແຫນງທ່ອງທ່ຽວມີບາດກ້າວພັດທະນາເປັນຫນ້າປະທັບໃຈ ເມື່ອບັນລຸຕົວເລກຈຳນວນນັກທ່ອງທ່ຽວສາກົນມາຢ້ຽມຢາມຫວຽດນາມແມ່ນ 10 ລ້ານເທື່ອຄົນ ແລະ ນັກທ່ອງທ່ຽວພາຍໃນປະເທດກວ່າ 62 ລ້ານເທື່ອຄົນ. ຫວຽດນາມ ພວມຢັ້ງຢືນແມ່ນຈຸດນັດພົບອັນດູດດື່ມ, ມີຄວາມປອດໄພ ແລະ ໄມຕີຈິດໃນພາກພື້ນ ອາຊີ ປາຊີຟີກ. ນີ້ແມ່ນປະຖົມປັດໄຈສຳຄັນເພື່ອໃຫ້ຂະແຫນງທ່ອງທ່ຽວປະຕິບັດເປົ້າໝາຍກາຍເປັນຂະແຫນງເສດຖະກິດປາຍແຫລມຂອງປະເທດຊາດໃນປີ 2020.
ມົນລະພິດຢູ່ທະເລພາກກາງຫວຽດນາມ
|
8.ເຫດມົນລະພິດສິ່ງແວດລ້ອມທະເລເກີດຂຶ້ນຢ່າງຮ້າຍແຮງຢູ່ພາກກາງຫວຽດນາມ
ເລື່ອງບໍລິສັດເຫລັກກ້າ ຮືງງຽບ Formosa ຮ່າຕິ້ງ ຈຳກັດ ໄດ້ປ່ອຍທາດພິດລົງສູ່ທະເລຢ່າງຜິດກົດໝາຍ ໄດ້ທຳລາຍສິ່ງແວດລ້ອມທະເລຢູ່ບັນດາແຂວງພາກກາງ ຈາກ ແຂວງ ຮ່າຕີງ ເຖິງແຂວງ ເທື່ອທຽນເຫ້ວ ຢ່າງຮ້າຍແຮງ, ໄດ້ສົ່ງຜົນສະທ້ອນເຖິງປະຊາຊົນນັບແສນໆຄົນທີ່ພວມດຳລົງຊີວິດໂດຍອີງໃສ່ການທຳມາຫາກິນຢູ່ທະເລ. ເຫດມົນລະພິດສິ່ງແວດລ້ອມທະເລຢູ່ພາກກາງ ແມ່ນບົດຮຽນກ່ຽວກັບການເລືອກເຟັ້ນໂຄງການລົງທຶນ, ເດັດຂາດບໍ່ເອົາ ສິ່ງແວດລ້ອມແລກຜົນປະໂຫຍດດ້ານເສດຖະກິດ. ບັນດາອົງການມີຫນ້າທີ່ຄວາມຮັບຜິດຊອບ ໄດ້ ແລະ ພວມພິຈາລະນາ ເພື່ອແກ້ໄຂຄວາມຮັບຜິດຊອບຂອງບັນດາອົງການ, ສ່ວນບຸກຄົນທີ່ກ່ຽວຂ້ອງເຖິງເຫດການດັ່ງກ່າວ.
ໄພແຫ້ງແລ້ງຢູ່ເຂດ ໄຕງວຽນ
|
9.ໄພທຳມະຊາດຜັນແປຢ່າງສັບສົນຢູ່ພາຍໃນປະເທດ
ໄພແຫ້ງແລ້ງ, ນ້ຳເຄັມຊຶມເຂົ້າຢູ່ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ, ເຂດໄຕງວຽນ, ທາງທິດໃຕ້ພາກກາງ ຢ່າງຮ້າຍແຮງທີ່ສຸດໃນ 100 ປີຜ່ານມາ ຊື່ງເຮັດໃຫ້ປະຊາຊົນນັບສີບໆລ້ານຄົນຖືກຜົນສະທ້ອນ, ໄດ້ກໍ່ຄວາມເສຍຫາຍນັບພັນໆຕື້ດົງ. ໄພແຫ້ງແລ້ງ ເກີດຂຶ້ນໃນຂອບເຂດ 70% ເນື້ອທີ່ປູກຝັງຢູ່ເຂດໄຕງວຽນ ແລະ ທາງທິດໃຕ້ພາກກາງ. ນ້ຳເຄັມຊຶມເຂົ້າເລິກເຂດທົ່ງພຽງແມ່ນ້ຳຂອງເຖິງ 90 ກິໂລແມັດແມ່ນເຫດການທີ່ບໍ່ເຄີຍປະກົດມີມາຢູ່ ຫວຽດນາມ. ໃນຊຸມມື້ທ້າຍປີ, ຝົນຕົກຫນັກໄພນ້ຳຖ້ວມເກີດຂຶ້ນຢ່າງລຽນຕິດຢູ່ພາກກາງໄດ້ເຮັດໃຫ້ມີຜູ້ຖືກເສຍຊີວິດ ແລະ ຫາຍສາບສູນ ເກືອບ 100 ຄົນ, ເຮືອນຊານເກືອບ 200.000 ຫລັງຖືກນ້ຳຖ້ວມ. ຍອດຄວາມເສຍຫາຍຄາດວ່າຂຶ້ນເຖິງເກືອບ 10.000 ຕື້ດົງ.
ການຜະລິດນ້ຳປາ
|
10. ການປະໝາດກໍຄືຄວາມອ່ອນດ້ອຍກ່ຽວກັບຄວາມຮັບຮູ້ຂອງມະນຸດໄດ້ກໍ່ຄວາມເສຍຫາຍບໍ່ແມ່ນຫນ້ອຍ
ໃນປີ 2016, ໄດ້ເກີດບັນດາເຫດອັກຄີໄຟໄຫມ້ຢ່າງຮ້າຍແຮງຢູ່ ຮ່າໂນ້ຍ, ນະຄອນ ໂຮ່ຈິມີນ, ບີງເຢືອງ, ດົງນາຍ, ລອງອານ, ບີງທ້ວນ, ໃນນັ້ນມີບາງເຫດໄດ້ເຮັດໃຫ້ຫລາຍຄົນເສຍຊີວິດ. ອຸປະຕິເຫດຄົມມະນາຄົມເຖິງວ່າໄດ້ຫລຸດຜ່ອນຫລາຍສົມຄວນກໍຕາມ, ແຕ່ໃນທົ່ວປະເທດຍັງຄົງເກີດຂຶ້ນອຸປະຕິເຫດທາງຄົມມະນາຄົມຢ່າງຮ້າຍແຮງຫລາຍຄັ້ງ, ໄດ້ກໍ່ຄວາມເສຍຫາຍຢ່າງຫນັກຫນ່ວງ. ອຸປະຕິເຫດທາງຄົມມະນາຄົມ ບໍ່ພຽງແຕ່ກໍ່ຄວາມເຈັບປວດສູນເສຍໃຫ້ແກ່ຜູ້ຖືກປະສົບໄພເທົ່ານັ້ນ ຫາກຍັງກໍ່ຜົນຮ້າຍຢ້ອນຫລັງໃຫ້ແກ່ຄອບຄົວແລະ ທົ່ວສັງຄົມອີກດ້ວຍ. ຄຳປະກາດຂອງສະມາຄົມມາດຖານ ແລະ ປົກປ້ອງຜູ້ໃຊ້ສອຍຫວຽດນາມ (Vinastas) ກ່ຽວກັບນ້ຳປາ ມີປະລິມານທາດພິດລື່ນກາຍລະດັບທີ່ໄດ້ກຳນົດໄດ້ເຮັດໃຫ້ຫາງສຽງມີຄວາມວິຕົກກັງວົນ ແລະ ເກີດຄວາມຂັດຂ້ອງໃນສັງຄົມ. ອົງການມີຫນ້າທີ່ຮັບຜິດຊອບໄດ້ກວດກາຢັ້ງຢືນວ່າ ນີ້ແມ່ນບັນດາຂ່າວຄາວທີ່ຜິດຄວາມຈິງ ແລະ ມີສັນຍານລະເມີດບັນດາຂໍ້ກຳນົດຂອງກົດໝາຍ. ເຫດການນີ້ໄດ້ຮັບຖືວ່າແມ່ນບັ້ນໂຄສະນາ “ຊົ່ວຮ້າຍ” ເພື່ອຍູ້ຂະແຫນງການຜະລິດນ້ຳປາຕົກເຂົ້າສູ່ສະພາບບໍ່ມີທາງອອກ.