(vovwordl)- ກ່ອນນີ້ 20 ປີ, ວັນທີ 8/11/1993, ກອງປະຊຸມໂຕະມົນກ່ຽວກັບການຊ່ວຍເຫລືອພັດທະນາຢ່າງເປັນທາງການ (ODA) ສະຫງວນໃຫ້ແກ່ ຫວຽດນາມ ໄດ້ຮັບການຈັດຕັ້ງຂຶ້ນຢູ່ ປາຣີ ປະເທດ ຝລັ່ງ. ເຫດການສຳຄັນດັ່ງກ່າວເປັນຂີດໝາຍເປີດສາກໃຫ້ແກ່ສາຍພົວພັນຮ່ວມມືພັດທະນາ ລະຫວ່າງ ຫວຽດນາມ ບົນເສັ້ນທາງປ່ຽນໃຫມ່ກັບບັນດານັກອຸປະຖຳສາກົນ. ໃນໄລຍະ 20 ປີຜ່ານມາ, ຈາກປະເທດທຸກຍາກ, ດ້ອຍພັດທະນາ, ແຕ່ຍ້ອນມີກຳລັງແຮງພາຍໃນຂອງຕົນ ພ້ອມກັບການນຳໃຊ້ແຫລ່ງກຳລັງຫນູນຊ່ວຍ ODA ຂອງປະຊາຄົມສາກົນຢ່າງມີປະສິດທິຜົນ ຫວຽດນາມໄດ້ກາຍເປັນປະເທດພວມພັດທະນາມີລະດັບລາຍຮັບປານກາງ. ຫວນຄືນໄລຍະ 20 ປີແຫ່ງການຮ່ວມມືພັດທະນາລະຫວ່າງຫວຽດນາມ ແລະ ບັນດານັກອຸປະຖຳ, ບັນນາທິການວິທະຍຸກະຈາຍສຽງຫວຽດນາມ ມີບົດຂຽນທີ່ພາດຫົວເລື່ອງວ່າ: 20 ປີຮ່ວມມືພ້ອມກັບຫວຽດນາມພັດທະນາ
ຕົວເລກຊື່ງກະຊວງແຜນການ ແລະ ການລົງທຶນ ປະກາດທີ່ພິທີສະເຫລີມສະຫລອງ 20 ປີແຫ່ງການຮ່ວມມືພັດທະນາລະຫວ່າງ ຫວຽດນາມ ແລະ ບັນດານັກອຸປະຖຳ ຊື່ງດຳເນີນໃນວັນທີ 17/10 ຢູ່ ຮ່າໂນ້ຍ ໃຫ້ເຫັນວ່າ: 20 ປີຜ່ານມາ, ຍອດມູນຄ່າທຶນ ODA ໝັ້ນໝາຍຂອງບັນດານັກອຸປະຖຳທີ່ສະຫງວນໃຫ້ແກ່ຫວຽດນາມ ບັນລຸປະມານກວ່າ 78 ຕື້ USD. ບັນດາບ້ວງເງິນ ODA ຊື່ງຫວຽດນາມໄດ້ລົງນາມໃນ 20 ປີຜ່ານມາ ຄິດສະເລ່ຍປະມານ 3 ຕື້ USD/ປີ ແມ່ນແຫລ່ງກຳລັງການເງິນຫລາຍພໍສົມຄວນທີ່ຫວຽດນາມໄດ້ນຳໃຊ້ຢ່າງມີປະສິດທິຜົນໃນວິວັດການປ່ຽນໃຫມ່ຊີວິດທາງດ້ານເສດຖະກິດສັງຄົມຢ່າງຮອບດ້ານ.
ບັນລຸໄດ້ຜົນງານດັ່ງກ່າວ ແມ່ນຍ້ອນລັດຖະບານຫວຽດນາມ ຍາມໃດກໍຮັກສາຫລັກໝັ້ນຂອງຕົນໃນການຮັບແຫລ່ງທຶນ ODA, ເໝາະສົມກັບບັນດາເງື່ອນໄຂລະອຽດຂອງຫວຽດນາມ. ໂດຍຖືກກັບເນື້ອໃນຈິດໃຈຂອງສານສະບັບຫນຶ່ງຊື່ງອະດີດນາຍົກລັດຖະມົນຕີ ຫວໍວັນກຽດ ໄດ້ຝາກມາເຖິງກອງປະຊຸມໂຕະມົນກ່ຽວກັບການຊ່ວຍເຫລືອພັດທະນາຢ່າງເປັນທາງການ (ODA) ທີ່ສະຫງວນໃຫ້ແກ່ຫວຽດນາມ ຢູ່ ປາຣີ ໃນ 20 ປີກ່ອນນີ້ ວ່າ: ລັດຖະບານ ຫວຽດນາມ ຮັບຜິດຊອບຫນ້າທີ່ປະສານງານ ແລະ ນຳໃຊ້ການຊ່ວຍເຫລືອຈາກຕ່າງປະເທດ, ດ້ວຍຄວາມຮັບຮູ້ຢ່າງເລິກເຊິ່ງວ່າ ປະຊາຊົນຫວຽດນາມ ຈະແມ່ນຜູ້ແບກຫາບຜົນຢ້ອນຫລັງຈາກການປະລາໄຊຖ້າຫາກແຫລ່ງທຶນນີ້ ນຳໃຊ້ບໍ່ ປະສິດທິຜົນ, ໃນ 20 ປີຜ່ານມາ ສະເລ່ຍ 4 ປີ/ເທື່ອຫນຶ່ງ, ບັນດາດຳລັດຂອງລັດຖະບານກ່ຽວກັບການຄຸ້ມຄອງ ແລະ ນຳໃຊ້ ODA ໄດ້ຮັບການປ່ຽນໃຫມ່. ພິເສດ ແມ່ນນະໂຍບາຍແບ່ງຂັ້ນສຳລັບບັນດາອົງການຮັບຜິດຊອບໃນວິວັດການປະຕິບັດ, ເພີ່ມທະວີການຕິດຕາມກວດກາການປະຕິບັດບັນດາໂຄງການ ODA, ຈາກນັ້ນ ແຫລ່ງທຶນ ODA ຈຶ່ງໄດ້ນຳໃຊ້ ບັນດາຈຸດໝາຍພັດທະນາປະເທດຊາດຢ່າງຖືກຕ້ອງ. ສິ່ງດັ່ງກ່າວແມ່ນພິສູດໃຫ້ເຫັນວ່າ ເປັນຫຍັງແຫລ່ງທຶນໝັ້ນໝາຍ ODA ຊື່ງບັນດານັກອຸປະຖຳສະຫງວນໃຫ້ແກ່ຫວຽດນາມນັບມື້ນັບເພີ່ມຂຶ້ນ, ປີນີ້ສູງກວ່າປີກ່ອນ, ນັບທັງໄລຍະວິກິດການເສດຖະກິດໂລກ ແລະ ເສດຖະກິດຂອງບັນດານັກອຸປະຖຳປະສົບກັບຄວາມຫຍຸ້ງຍາກ. ທ່ານນາງ Victoria Kwakwa, ຜູ້ອຳນວຍການທະນາຄານໂລກປະຈຳ ຫວຽດນາມ ຢືນຢັນວ່າ:
“ຫນ່ຶງໃນບັນດາສາຍເຫດພາໃຫ້ຫວຽດນາມສຳເລັດຜົນໃນການຮ່ວມມື ODA ແມ່ນການບໍລິຫານຢ່າງໃກ້ຊິດຂອງລັດຖະບານຫວຽດນາມ, ເປັນຕົ້ນແມ່ນການກຳນົດທິດຍຸດທະສາດ, ສ້າງແຜນການພັດທະນາຢ່າງເໝາະສົມ. ຫວຽດນາມ ກໍຊອກຫາວິທີການ ນຳບັນດາແນວຄວາມຄິດ, ຄວາມຮູ້ ແລະ ຄຳເຫັນໂດຍບັນດາຄູ່ຮ່ວມມືພັດທະນາປະກອບເພື່ອໝູນໃຊ້ເຂົ້າໃນພຶດຕິກຳຕົວຈິງຂອງຫວຽດນາມ. ສາຍເຫດທີສອງ, ແມ່ນຍ້ອນລັດຖະບານຫວຽດນາມ ໄດ້ນຳໃຊ້ທຶນຊ່ວຍເຫລືອ ODA ຄືດັ່ງເຄື່ອງມືເພື່ອຕີລາຄາບັນດາການເລືອກເຟັ້ນ ແລະ ມີຕົກລົງອັນຖືກຕ້ອງກ່ຽວກັບນະໂຍບາຍສຳລັບຫລາຍຂົງເຂດແຕກຕ່າງກັນ.”
ມີຫລາຍກິດຈະກຳສຳຄັນໄດ້ຮັບການຜັນຂະຫຍາຍ
ດ້ວຍແຫລ່ງທຶນ ODA
ພາບປະກອບ: internet
|
ເຖິງວ່າໄດ້ຜ່ານ 2 ທົດສະວັດແຫ່ງການພັດທະນາແລ້ວ ແຕ່ຕາມຂໍ້ສັງເກດລວມຂອງບັນດາຜູ້ຊ່ຽວຊານ, ຫວຽດນາມ ພວມຢືນຕໍ່ຫນ້າຄວາມຫຍຸ້ງຍາກ ແລະ ສິ່ງທ້າທາຍບໍ່ແມ່ນຫນ້ອຍ ໃນໄລຍະພັດທະນາຈະມາເຖິງ. ນັ້ນແມ່ນກຳລັງດັນ ເຮັດແນວໃດຍູ້ໄວຄວາມຄືບຫນ້າໃນການປ່ອຍເງິນໃຫ້ແກ່ບັນດາໂຄງການ ODA ທີ່ໄດ້ລົງນາມໃນໄລຍະ 2006-2010 ພ້ອມທັງຕ້ອງແກ້ໄຂບັນດາແຫລ່ງທຶນຢ່າງກົມກຽວ ຂະນະທີ່ບໍ່ໄດ້ຮັບບຸລິມະສິດດ້ານການເງິນຫລາຍຄືແຕ່ກອ່ນເມື່ອຫວຽດນາມ ກາຍເປັນປະເທດມີລາຍຮັບປານກາງ. ສິ່ງທີ່ເປັນຫນ້າພາກພູມໃຈ ນັ້ນແມ່ນປະຊາຄົມສາກົນ, ບັນດານັກອຸປະຖຳ ຢືນຢັນ ສືບຕໍ່ຮ່ວມມືໃນວິວັດການພັດທະນາຂອງຫວຽດນາມ. ທ່ານ Motonori Tsuno ຫົວຫນ້າອົງການຮ່ວມມືສາກົນຍີ່ປຸ່ນ ຊື່ງແມ່ນຫນຶ່ງໃນບັນດານັກອຸປະຖຳທຶນ ODA ສອງຝ່າຍຫລາຍສຸດໃຫ້ແກ່ຫວຽດນາມ ຊີ້ແຈງວ່າ:
“ລັດຖະບານຫວຽດນາມ ວາງຈຸດໝາຍຮອດປີ 2020 ກາຍເປັນປະເທດອຸດສາຫະກຳ ແລະ ເພື່ອປະຕິບັດຈຸດໝາຍນີ້ ຫວຽດນາມ ສຸມໃສ່ 3 ບຸລິມະສິດໃຫຍ່ຄື: ທີຫນຶ່ງ ສຳເລັດພື້ນຖານໂຄງລ່າງ, ທີສອງ ແມ່ນພັດທະນາແຫລ່ງຊັບພະຍາກອນມະນຸດ ແລະ ທີສາມ ແມ່ນສຳເລັດລະບອບນະໂຍບາຍ. ພວກຂ້າພະເຈົ້າສາມາດຫນູນຊ່ວຍຫວຽດນາມປະຕິບັດບັນດາຈຸດໝາຍດັ່ງກ່າວ. ນັບແຕ່ກອ່ນມາຮອດປະຈຸບັນ, ພວກຂ້າພະເຈົ້າ ໄດ້ປະຕິບັດແລ້ວ ແລະ ໃນໄລຍະຈະມາເຖິງ ພວກຂ້າພະເຈົ້າສືບຕໍ່ຫນູນຊ່ວຍຫວຽດນາມ ນັບທັງດ້ານການເງິນກໍຄືດ້ານເຕັກນິກ, ເຕັກໂນໂລຊີ.”
ຕີລາຄາການຫນູນຊ່ວຍ, ຊ່ວຍເຫລືອຂອງປະຊາຄົມສາກົນ, ໃນພິທີສະເຫລີມສະຫລອງ 20 ປີ ແຫ່ງການຮ່ວມມືພັດທະນາລະຫວ່າງຫວຽດນາມ ແລະ ບັນດານັກອຸປະຖຳ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ເວົ້າວ່າ:
“ສຳລັບພວກຂ້າພະເຈົ້າ ການຫນູນຊ່ວຍຂອງບັນດານັກອຸປະຖຳ ບໍ່ພຽງແຕ່ແມ່ນແຫລ່ງທຶນອັນລ້ຳຄ່າ ສຳລັບໄລຍະທີ່ຫວຽດນາມພວມປະສົບກັບຄວາມຫຍຸ້ງຍາກໃນການຫັນປ່ຽນພື້ນຖານເສດຖະກິດເທົ່ານັ້ນ ຫາກຍັງສະແດງໃຫ້ເຫັນນ້ຳໃຈມິດຕະພາບ, ລັກສະນະວັດທະນະທຳມະນຸດ, ການຊ່ວຍເຫລືອເຊິ່ງກັນ ແລະ ກັນໃນວົງຄະນາຍາດອີກດ້ວຍ. ຍາມໃດລັດຖະບານຫວຽດນາມ ກໍເຄົາລົບ ແລະ ນຳໃຊ້ແຫລ່ງທຶນ ODA ຂອງປະຊາຄົມສາກົນຢ່າງມີປະສິດທິຜົນ. ”
ບົນພື້ນຖານການພົວພັນຄູ່ຮ່ວມມືທີ່ໄດ້ຮັບການສ້າງຂຶ້ນ ແລະ ພັດທະນາໃນ 20 ປີຜ່ານມາ, ຍາມໃດຫວຽດນາມ ກໍປາດຖະຫນາຢາກສືບຕໍ່ໄດ້ຮັບການຮ່ວມມືຈາກບັນດາເພື່ອນມິດສາກົນຢ່າງແຂງແຮງກວ່າ, ປະສິດທິຜົນກວ່າ ເພື່ອຫນູນຊ່ວຍຫວຽດນາມ ປັບປຸງບັນດາຜົນງານທີ່ບັນລຸໄດ້ຢ່າງໝັ້ນຄົງເຂັ້ມແຂງ, ສືບຕໍ່ເຮັດໃຫ້ປະເທດຫວຽດນາມ ພັດທະນາແບບຍືນຍົງ ແລະ ວັດທະນາຖາວອນ.