(vovworld)- ປີ 2016 ເປັນຂີດໝາຍແຫ່ງໄລຍະທາງ 30 ປີແຫ່ງການປ່ຽນແປງໃຫມ່ ແລະ ພັດທະນາຂອງປະເທດຊາດ. ຫວຽດນາມ ຈາກປະເທດມີລາຍຮັບຕ່ຳບືນຕົວຂຶ້ນກາຍເປັນປະເທດມີລາຍຮັບປານກາງ, ເສດຖະກິດພັດທະນາ ດ້ວຍລະດັບຈະເລີນເຕີບໂຕສະເລ່ຍກວ່າ 6%/ປີ, ຊີວິດການເປັນຢູ່ຂອງປະຊາຊົນນັບມື້ນັບໄດ້ຮັບການປັບປຸງ. ໃນບັນດາຜົນງານອັນໃຫຍ່ຫລວງນັ້ນ ຕ້ອງເວົ້າເຖິງບົດບາດບໍ່ແມ່ນຫນ້ອຍຂອງຂະແຫນງການທູດ, ປະກອບສ່ວນນຳຫວຽດນາມ ເຊື່ອມໂຍງຢ່າງເລິກເຊິ່ງກວ້າງຂວາງກັບໂລກ, ມີທີ່ຕັ້ງບົດບາດນັບມື້ນັບສຳຄັນໃນເວທີສາກົນ. ບົດຂຽນ “30 ປີແຫ່ງການປ່ຽນແປງໃຫມ່ ແລະ ບັນດາບົດຮຽນການທູດໃຫຍ່” ຂອງນັກຂ່າວ ເຈົາແອງ.
ທ່ານນາຍົກລັດຖະມົນຕີຫງວຽນເຕີນຢູງ ແລະ ທ່ານເລຂາທິການໃຫຍ່
ປະທານປະເທດລາວ ຈູມມາລີ ໄຊຍະສອນ (9/2015)
ພາບ:baogiaothong.vn
|
ໃນການພັດທະນາລວມຂອງປະເທດຊາດ, ວຽກງານການພົວພັນຕ່າງປະເທດກໍໄດ້ມີບັນດາການປະກອບສ່ວນອັນໃຫຍ່ຫລວງ ແລະ ສະແດງໃຫ້ເຫັນຜ່ານບັນດາຂົງເຂດ. 30 ປີແຫ່ງການປ່ຽນແປງໃຫມ່ ໄດ້ປະໄວ້ໃຫ້ວຽກງານການຕ່າງປະເທດຫລາຍບົດຮຽນໃຫຍ່.
ຍາມໃດກໍຖືຜົນປະໂຫຍດຂອງຊາດເຫນືອກວ່າສິ່ງໃດໝົດ
ພາຍຫລັງ 30 ປີແຫ່ງການປ່ຽນແປງໃຫມ່, ໂສມຫນ້າການພົວພັນກັບສາກົນຂອງຫວຽດນາມ ມີການປ່ຽນແປງຢ່າງເລິກເຊິ່ງ. ທ່ານ ບູ່ຍແທງເຊີນ, ລັດຖະມົນຕີຊ່ວຍວ່າການກະຊວງການຕ່າງປະເທດ ຫວຽດນາມ ໄດ້ຢືນຢັນ: ການພົວພັນຕ່າງປະເທດ ໄດ້ປະກອບສ່ວນຢ່າງຕັ້ງຫນ້າເຂົ້າໃນການປ່ຽນແປງນັ້ນ.
“ພວກເຮົາໄດ້ສ້າງການພົວພັນກັບ 185 ປະເທດ ໃນຍອດຈຳນວນ 193 ປະເທດ ຂອງ ສປຊ. ທີສອງ ພວກເຮົາກໍເຂົ້າຮ່ວມ 70 ອົງການສາກົນ, ພາກພື້ນ ແລະ ສວມບົດບາດຕັ້ງຫນ້າ ເປັນເຈົ້າການ ແລະ ມີຄວາມຮັບຜິດຊອບ. ທີສາມ, ສຽງເວົ້າຂອງພວກເຮົາໃນເວທີສາກົນກໍໄດ້ຮັບຄວາມເຄົາລົບຈາກບັນດາປະເທດໃນພາກພື້ນ, ຂໍ້ລິເລີ່ມຫລາຍຂໍ້ຂອງພວກເຮົາໄດ້ຮັບການຊົມເຊີຍຈາກປະຊາຄົມໂລກ.”
ຫວຽດນາມ ກໍໄດ້ປະກອບສ່ວນຢ່າງຕັ້ງຫນ້າ ແລະ ສ້າງຂີດໝາຍຢູ່ບັນດາເວທີປາໄສຫລາຍຝ່າຍ, ມີທີ່ຕັ້ງບົດບາດສຳຄັນໃນບັນດາກົນໄກຮ່ວມມືຫລາຍຝ່າຍ ແລະ ເປັນກຳມະການບໍ່ປະຈຳຂອງສະພາຄວາມໝັ້ນຄົງ ສປຊ ອາຍຸການ 2008 -2010, ຄະນະກຳມະການເສດຖະກິດສັງຄົມ ຂອງ ສປຊ, ຄະນະກຳມະການ ມໍລະດົກຂອງອົງການວິທະຍາສາດ, ການສຶກສາ ຂອງ ສປຊ (UNESCO). ພິເສດ, ວຽກງານກ່ຽວກັບຊາວຫວຽດນາມ ອາໄສຢູ່ຕ່າງປະເທດ ໃນ 30 ປີຜ່ານມາ ບັນລຸໄດ້ຜົນງານໃຫຍ່ຫລວງຫລາຍຢ່າງ.
ບັນລຸໄດ້ບັນດາຜົນງານດັ່ງກ່າວ ຍ້ອນວຽກງານການພົວພັນຕ່າງປະເທດ ຍາມໃດກໍຖືຜົນປະໂຫຍດຂອງຊາດເຫນືອກວ່າສິ່ງໃດໝົດ. ໃນກິດຈະການປ່ຽນແປງໃຫມ່, ຍາມໃດຫວຽດນາມ ກໍຮັບຮູ້ ຕ້ອງຮັກສາສັນຕິພາບ, ສະຖຽນລະພາບຢ່າງໝັ້ນຄົງ, ສຸມແຫລ່ງກຳລັງເພື່ອພັດທະນາປະເທດຊາດ, ພ້ອມທັງເດັດດ່ຽວຢືດໝັ້ນການຕໍ່ສູ້ປົກປັກຮັກສາອະທິປະໄຕຜືນແຜ່ນດິນອັນຄົບຖ້ວນ, ເພີ່ມທະວີການພົວພັນລະຫວ່າງຫວຽດນາມ ກັບເພື່ອນມິດສາກົນ. ທ່ານ ບູ່ຍແທງເຊີນ, ລັດຖະມົນຕີຊ່ວຍວ່າການກະຊວງການຕ່າງປະເທດ ຫວຽດນາມ ຖືວ່າ:
“ນີ້ທັງແມ່ນຫລັກການ ທັງແມ່ນຈຸດໝາຍ. ດ້ວຍຈຸດໝາຍນັ້ນ ໃນຕະຫລອດ 30 ປີແຫ່ງການປ່ຽນແປງໃຫມ່ ພວກເຮົາ ໄດ້ມີບັນດາລັດຖະນະໂຍບາຍເພື່ອແກ້ໄຂ ສະພາບການຜັນແປໃນແຕ່ລະໄລຍະຢ່າງເໝາະສົມ ເພື່ອຍາດແຍ່ງການສະຫນັບສະຫນູນ ການຊ່ວຍເຫລືອຈາກເພື່ອນມິດສາກົນທີ່ມີຕໍ່ພາລະກິດປ່ຽນແປງໃຫມ່ຂອງພວກເຮົາ.”
ແລະ ກໍຕາມ ທ່ານ ບູ່ຍແທງເຊີນ, ລັດຖະມົນຕີຊ່ວຍວ່າການກະຊວງການຕ່າງປະເທດ ຫວຽດນາມ ແລ້ວ, ພາຍຫລັງ 30 ປີແຫ່ງການປ່ຽນແປງໃຫມ່ ການຕ່າງປະເທດ ແມ່ນການສົມທົບລະຫວ່າງກຳລັງແຮງຂອງຊາດ ກັບກຳລັງແຮງຂອງຍຸກສະໄຫມ. ບົດຮຽນນີ້ ໂດຍທ່ານປະທານໂຮ່ຈິມີນ ໄດ້ເນັ້ນຫນັກເຖິງເມື່ອຂະແຫນງການທູດໄດ້ຮັບການສ້າງຕັ້ງ. ໃນ 30 ປີແຫ່ງການປ່ຽນແປງໃຫມ່ ແຕ່ລະໄລຍະມີບັນດາການຜັນແປແຕກຕ່າງກັນ, ຫວຽດນາມ ກໍໄດ້ໝູນໃຊ້ບົດຮຽນນັ້ນຢ່າງຄ່ອງແຄ້ວ ແລະ ສຳເລັດຜົນ.
ເສີມຂະຫຍາຍຜົນງານໃນໄລຍະເຊື່ອມໂຍງໃຫມ່
ປະຈຸບັນ, ສະພາບການໂລກພວມມີການຜັນປ່ຽນ ຫລາຍຢ່າງທີ່ເລິກເຊິ່ງ, ວ່ອງໄວ ແລະ ສັບສົນ. ຢູ່ຫລາຍພາກພື້ນຂາດຄວາມສະຫງົບປອດໄພ. ການກໍ່ການຮ້າຍ, ບັນຫາຊາວອົບພະຍົບ, ພິເສດແມ່ນການປ່ຽນແປງຂອງດິນຟ້າອາກາດພວມສົ່ງຜົນກະທົບຢ່າງຫຍໍ້ທໍ້ເຖິງບັນດາປະເທດໃນພາກພື້ນເກືອບທັງໝົດ. ໃນສະພາບການນັ້ນ, ວຽກງານການຕ່າງປະເທດສືບຕໍ່ຍູ້ແຮງວຽກງານຄົ້ນຄ້ວາ, ຄາດຄະເນສະພາບການຢ່າງວ່ອງໄວ, ເປັນເຈົ້າການ, ທັນການກວ່າອີກ ເພື່ອມີຍຸດທະສາດ ແລະ ນະໂຍບາຍໃກ້ຊິດຕິດແທດກັບຄວາມຈິງ, ມີປະສິດທິຜົນ, ມີໄຫວພິບ, ຮັບປະກັນຜົນປະໂຫຍດຂອງຊາດ, ຍາດແຍ່ງບັນດາກາລະໂອກາດຢ່າງສູດຂີດ, ແກ້ໄຂບັນດາຄວາມສ່ຽງຢ່າງມີປະສິດທິຜົນ, ປະກອບສ່ວນສ້າງທີ່ຕັ້ງ ແລະ ແຫລ່ງກຳລັງໃຫ້ປະເທດຊາດ.
ທ່ານ ບູ່ຍແທງເຊີນ, ລັດຖະມົນຕີຊ່ວຍວ່າການກະຊວງການຕ່າງປະເທດ ຫວຽດນາມ ຖືວ່າ: ໃນສະພາບການນັ້ນ, ວຽກງານການຕ່າງປະເທດແມ່ນສຸມໃສ່ເຂົ້າໃນບັນດາຫນ້າທີ່ຕົ້ນຕໍ. ທີຫນຶ່ງ ແມ່ນຊາບຊຶມການໝູນໃຊ້ຜັນຂະຫຍາຍແນວທາງການຕ່າງປະເທດ ຊື່ງກອງປະຊຸມໃຫຍ່ຄັ້ງທີ 12 ຂອງພັກໄດ້ວາງອອກ. ໃນນັ້ນ ມີ 2 ບັນຫາຕົ້ນຕໍ ນັ້ນແມ່ນ ສືບຕໍ່ຮັກສາສະພາບແວດລ້ອມສັນຕິພາບ, ສະຖຽນລະພາບ ເພື່ອສຸມໃສ່ພັດທະນາເສດຖະກິດ. ທີສອງ ແມ່ນສືບຕໍ່ຢືດໝັ້ນເດັດດ່ຽວຕໍ່ສູ້ປົກປັກຮັກສາອະທິປະໄຕຜືນແຜ່ນດິນອັນຄົບຖ້ວນໃຫ້ຍືນຍົງ. ທີສາມແມ່ນສືບຕໍ່ນຳການພົວພັນຂອງພວກເຮົາກັບບັນດາປະເທດເຂົ້າສູ່ລວງເລິກ.
“ເພື່ອປະຕິບັດຈຸດໝາຍນີ້ ຕ້ອງສ້າງໂຄງການດຳເນີນງານຢ່າງລະອຽດ. ພວກເຮົາພວມກ້າວເຂົ້າສູ່ໄລຍະເຊື່ອງໂຍງໃຫມ່ ພາຍຫລັງລົງນາມໃນສັນຍາການຄ້າເສລີສອງຝ່າຍ ຫລື ຫລາຍຝ່າຍຫລາຍສະບັບ, ຫນ້າທີ່ຂອງພວກເຮົາໃນໄລຍະຈະມາເຖິງ ນັ້ນແມ່ນຕ້ອງໂຄສະນາ, ເຜີຍແຜ່, ອັບເດັດຂໍ້ມູນຂ່າວສານຢ່າງຄົບຖ້ວນໃຫ້ປະຊາຄົມ, ວິສາຫະກິດ ເຂົ້າໃຈແຈ້ງກາລະໂອກາດ ແລະ ສິ່ງທ້າທາຍ, ຍາດແຍ່ງ ແລະ ຫັນສິ່ງທ້າທາຍເປັນກາລະໂອກາດເພື່ອຮັບໃຊ້ວຽກງານເຊື່ອມໂຍງເຂົ້າກັບເສດຖະກິດສາກົນ.”
ປີ 2016 ແມ່ນປີທຳອິດ ທີ່ຫວຽດນາມ ຜັນຂະຫຍາຍແນວທາງການຕ່າງປະເທດ ແລະ ແຜນນະໂຍບາຍໃຫຍ່ຂອງພັກ ກ່ຽວກັບແຜນການພັດທະນາເສດຖະກິດສັງຄົມໄລຍະ 2016- 2020. ຖືຜົນປະໂຫຍດຂອງຊາດເຫນືອກວ່າສິ່ງໃດໝົດ , ຢືດໝັ້ນເອກະລາດ, ເປັນເຈົ້າຕົນເອງ, ພ້ອມທັງເປັນເຈົ້າການ ແລະ ຕັ້ງຫນ້າເຊື່ອມໂຍງເຂົ້າກັບສາກົນ ບົນພື້ນຖານຄວາມສະເຫມີພາບ, ຕ່າງຝ່າຍຕ່າງມີຜົນປະໂຫຍດ, ສົມທົບ ການເສີມຂະຫຍາຍກຳລັງແຮງຂອງຊາດກັບກຳລັງແຮງຂອງຍຸກສະໄຫມ ເພື່ອສ້າງສາ ແລະ ປົກປັກຮັກສາປະເທດ ສສ ຫວຽດນາມ ຢ່າງໝັ້ນຄົງແມ່ນການກຳນົດທິດຂອງວຽກງານຕ່າງປະເທດໃນໄລຍະຈະມາເຖິງ.