(vovworld) - ໃນເດືອນ 3 ນີ້, ບັນດາປະເທດເອີລົບ ຈະສະເຫຼີມສະຫຼອງ 60 ປີແຫ່ງວັນເຊັນບັນດາສົນທິສັນຍາ Roma (1957) ສ້າງພື້ນຖານໃຫ້ສະຫະພາບເອີລົບ (ອີຢູ) ໃນປະຈຸບັນ. 60 ປີຜ່ານມາ, ເຖິງວ່າຕ້ອງຜ່ານຫລາຍໄລຍະປະຫວັດສາດກໍ່ຕາມ ແຕ່ບັນດາປະເທດເອີລົບໄດ້ພ້ອມກັນກ້າວຂຶ້ນສູ່ເສັ້ນທາງຫັນເປັນລະບອບໜຶ່ງດຽວ. ສະເຫຼີມສະຫຼອງ 60 ປີແຫ່ງວັນສົນທິສັນຍາ Roma ແມ່ນໂອກາດເພື່ອໃຫ້ບັນດາປະເທດເອີລົບ ເນັ້ນໜັກກັບຄືນສູ່ບັນດາຫລັກການ ແລະ ຄຸນຄ່າພື້ນຖານຂອງບັນດາປະເທດສະຫະພາບເອີລົບ ຊຶ່ງພວມຖືກນາບຂູ່ຈາກສິ່ງທ້າທາຍຫລາຍຢ່າງ.
ວັນເຊັນບັນດາສົນທິສັນຍາ Roma (1957)
ລັດຖະສະພາເອີລົບ EP
ປະຈຸບັນດ້ວຍ 28 ປະເທດເປັນສະມາຊິກ, ສະຫະພາບເອີລົບ (ອີຢູ) ພັດຍັງບໍ່ຢາກຢຸດຕິການປະຕິວັດບັນດາຄວາມໄຝ່ຝັນຈາກແນວຄວາມຄິດ, ຂອງແຜນການຮ່ວມມື, ດ້ວຍຄວາມມຸ່ງຫວັງບືນຕົວຂຶ້ນສູງກ່ວາ, ກ້າວໄປໄກກ່ວາ. ເຖິງຢ່າງໃດກໍ່ຕາມ, ບັນດາກະແສຟອງປະຊານິຍົມຢູ່ພາຍໃນປະເທດ, ບັນດາສິ່ງທ້າທາຍໃໝ່ເກີດຂຶ້ນບົນເວທີສາກົນ, ພິເສດ ແມ່ນບັນດານະໂຍບາຍໃໝ່ຂອງປະທານາທິບໍດີ ອາເມລິກາ ຄົນໃໝ່, ວາງອອກບັນດາສິ່ງທ້າທາຍຢ່າງໃຫຍ່ຫລວງຕໍ່ ເອີລົບ.
ບາດກ້າວຍາວນານໃນວິວັດທະນາການຫັນເປັນລະບອບໜຶ່ງດຽວ
ເມື່ອຫວນຄືນ 60 ປີຂອງ ອີຢູ ດ້ວຍບັນດາບາດກ້າວຍາວນານ ແລະ ຄວາມມຸ່ງຫວັງໃຫຍ່ໃນວິວັດການຫັນເປັນລະບອບໜຶ່ງດຽວ ດ້ວຍບັນດາບົດຮຽນສຳຄັນ. ສົງຄາມໂລກຄັ້ງທີ 2 ສິ້ນສຸດລົງ ໄດ້ສ້າງໂສມໜ້າດ້ານການເມືອງໃໝ່ໃຫ້ບັນດາປະເທດຢູ່ເອີລົບ. ເປັນຄັ້ງທຳອິດ ພາຍຫລັງຫລາຍສະຕະວັດຜ່ານມາ, ເອີລົບ ຍັງຄົງບໍ່ແມ່ນສູນກາງແຫ່ງອຳນາດຂອງໂລກອີກແລ້ວ. ຍ້ອນສະພາບການນັ້ນ, ມີແນວຄວາມຄິດໜຶ່ງທີ່ມີລັກສະນະປະຕິວັດ ໄດ້ນຳເສັ້ນທາງກ້າວໄປເຖິງຄວາມຟື້ນຟູມາສູ່ເອີລົບ. ສົນທິສັນຍາ Roma ໄດ້ກຳເນີດມາຈາກຖະແຫຼງການຂໍ້ລິເລີ່ມໄກ່ເກ່ຍປອງດອງລະຫວ່າງ ຝະລັ່ງ ແລະ ເຢຍລະມັນ ໂດຍທ່ານລັດຖະມົນຕີກະຊວງການຕ່າງປະເທດ ຝະລັ່ງ Robert Schumann ຍົກອອກມາໃນວັນທີ 09/05/1950, ຕາມນັ້ນແລ້ວ ໄດ້ຢຸດຕິການເປັນປໍລະປັກກັນລະຫວ່າງ 2 ປະເທດບ້ານໃກ້ເຮືອນຄຽງ ໂດຍຜ່ານການສ້າງຕັ້ງກົນໄກລວມ ເພື່ອຄຸ້ມຄອງການຜະລິດ ແລະ ນຳໃຊ້ຖ່ານຫີນ ແລະ ເຫຼັກກ້າ. ກົນໄກຮ່ວມມືນີ້ ກໍ່ເປີດປະຕູໃຫ້ທຸກປະເທດໃນເອີລົບ ໄດ້ເຂົ້າຮ່ວມ.
ສາຍເຫດທີ່ເອີ້ນແນວຄວາມຄິດນີ້ ມີລັກສະນະປະຕິວັດ ຍ້ອນວ່າໃນຈຸດເວລານັ້ນ, ຍັງບໍ່ທັນມີຮູບແບບການຮ່ວມມືສາກົນໃດ ໄດ້ຮັບການສ້າງຕັ້ງຂຶ້ນແຕ່ພັດອີງໃສ່ການຮ່ວມມືຂອງບັນດາປະເທດສະມາຊິກໃນຂົງເຂດຢ່າງລະອຽດ ແຕ່ບໍ່ແມ່ນແຜນການຫັນເປັນເອກະພາບໂດຍສັງລວມ ແລະ ທະເຍີທະຍານຫລາຍເກີນໄປ ເຖິງຢ່າງໃດກໍ່ຕາມ, ເມື່ອໄດ້ຮັບຄວາມເຫັນດີໃນບັນດາຂົງເຂດເສດຖະກິດ ແລະ ການເມືອງ ບັນດາປະເທດເອີລົບ ຕ້ອງເສຍເວລາຫລາຍປີ. ວັນທີ 25/3/1957, ສົນທິສັນຍາ Roma ທີ່ສ້າງຕັ້ງປະຊາຄົມເອີລົບໄດ້ຮັບການລົງນາມຢ່າງເປັນທາງການ, ອັນໄດ້ສ້າງພື້ນຖານໃຫ້ແກ່ EU ໃນວັນນີ້. ກ້າວເຂົ້າສູ່ຊຸມປີ 1970 ແລະ 1980, ວິວັດທະນາການຫັນເອີລົບເປັນເອກະພາບໄດ້ມີບັນດາບາດກ້າວໃໝ່ຕື່ມອີກ ນັບທັງທາງດ້ານປະລິມານ ແລະ ຄຸນນະພາບ. ຈາກ 6 ປະເທດ, ປະຊາຄົມເອີລົບໄດ້ຂະຫຍາຍເປັນ 9 ປະເທດ ແລ້ວກໍເປັນ 12 ປະເທດ. ຈາກສະຫະພັນພາສີ, ເອີລົບໄດ້ບືນຕົວຂື້ນສ້າງເປັນຕະຫຼາດຮ່ວມເປັນເອກະພາບດ້ວຍບັນດາຄຳໝັ້ນສັນຍາກ່ຽວກັບການຫັນສິນຄ້າ, ທຶນຮອນ, ການບໍລິການ ແລະ ຊັບພະຍາກອນມະນຸດເປັນເສລີ. ແລະ ສະຫະພັນເສດຖະກິດ - ເງິນຕາເອີລົບໄດ້ກາຍເປັນເປົ້າໝາຍສູ້ຊົນຂອງ ປະຊາຄົມເອີລົບ. ສົງຄາມເຢັນໄດ້ຢຸດຕິລົງ, ປະຊາຄົມເອີລົບໄດ້ກາຍເປັນສະຫະພາບເອີລົບ ແລະ ຮັບເອົາບັນດາສະມາຊິກໃໝ່ຕື່ມອີກ. ຈາກ 12 ປະເທດສະມາຊິກ, ສະຫະພາບເອີລົບໄດ້ກາຍເປັນກຸ່ມເຕົ້າໂຮມ 15 ແລະ 25 ປະເທດສະມາຊິກ ແລະ ສຸດທ້າຍແມ່ນ 28 ປະເທດສະມາຊິກ. ສະຫະພາບເອີລົບໃນປະຈຸບັນ ໄດ້ເຮັດສຳເລັດເປົ້າໝາຍຫັນເປັນເສລີ 4 ປະການ, ມີສະກຸນເງິນຕາລວມ ເອີໂຣ ຮັບໃຊ້ຈຳນວນກ່ວາເຄິ່ງໜຶ່ງບັນດາປະເທດສະມາຊິກ.
ບັນດາສິ່ງທ້າທາຍບົນເສັ້ນທາງສ້າງເອີລົບເປັນເອກະພາບ
ດ້ວຍຄວາມມັກໃຫຍ່ໄຝ່ສູງຂອງບັນດາຜູ້ສ້າງສົນທິສັນຍາ Roma ເມື່ອກ່ອນນີ້ 60 ປີ, EU ຕ້ອງມີບັນດາຄຸນຄ່າລວມໂດຍພື້ນຖານດ້ວຍ 3 ເສົາຄ້ຳ ຄວາມໝັ້ນຄົງ - ການເມືອງ - ເສດຖະກິດ, ດ້ວຍບັນດາລະບອບລະບຽບການ ແລະ ກົດລະບຽບລວມ, ຊາວເອີລົບໃນວັນນີ້ ມີຄວາມເອກອ້າງທະນົງໃຈຕໍ່ບັນດາໝາກຜົນຫັນເອີລົບເປັນເອກະພາບຊຶ່ງ EU ບັນລຸໄດ້. ແຕ່ເຂົາເຈົ້າຍັງມີຄວາມລັງເລໃຈ, ຊ້ຳບໍ່ໜຳແມ່ນຂາດຄວາມເຊື່ອໝັ້ນຕໍ່ອະນາຄົດຂອງສະຫະພາບນີ້ ຂະນະທີ່ໃນໄລຍະມໍ່ໆມານີ້, ມີຄຳຖາມຫຼາຍຂໍ້ພວມຕັ້ງຂຶ້ນແຕ່ຍັງບໍ່ທັນໃຫ້ຄຳຕອບເທື່ອ.
ທຳອິດແມ່ນວິກິດການເສດຖະກິດ, ສະພາບໜີ້ສາທາລະນະໄດ້ພາໃຫ້ບັນດາພື້ນຖານເສດຖະກິດພາຄີອຶດອາດຊັກຊ້າ. ໃນຂະນະທີ່ EU ຍັງບໍ່ສາມາດຟື້ນຟູໄດ້ນັ້ນ, ເຫດການ “ Brexit ” ກໍສືບຕໍ່ທັບຖົມ EU , ອັນໄດ້ກໍຄວາມເປັນຫ່ວງກັງວົນຕໍ່ອະນາຄົດຂອງທະວີບນີ້. ຂະບວນຊາວອົບພະຍົບຫຼັ່ງໄຫຼເຂົ້າມາເອີລົບ ໄດ້ເຮັດເຂົາເຈົ້າມີຄວາມລະແວງສົງໄສກ່ຽວກັບສີສັນຂອງເອີລົບ. EU ຈະອີງໃສ່ບັນດາຄຸນຄ່າເລີ່ມຕົ້ນ, ນັ້ນແມ່ນຈິດໃຈຂອງສາສະໜາຄິດຫຼືຕ້ອງຍອມຮັບການປະສານສົມທົບດ້ວຍບັນດາຄຸນຄ່າຂອງປະຊາຄົມສາສະໜາອິດສະລາມເຂົ້າເມືອງ ? ຄຳຖາມນີ້ ແມ່ນຍັງບໍ່ທັນມີຄຳຕອບໃນສະພາບການປະຈຸບັນ.
EU ພວມຕົກຢູ່ໃນຈຸດເວລາທີ່ເປັນບານພັບດ້ວຍບັນດາການຜັນປ່ຽນທີ່ຮ້າຍແຮງທີ່ມີຕໍ່ກຸ່ມນີ້ໃນໄລຍະທີ່ຜ່ານມາ. ວິກິດການໜີ້ສາທາລະນະ, ວິກິດການຊາວອົບພະຍົບ, Brexit ແລະ ໃນມໍ່ໆມານີ້, ແມ່ນຄວາມແຕກສະຫຼາຍຂອງການພົວພັນແບບສຳພັນທະມິດອັນເປັນຕາຍກັບອາເມລິກາ, ພວມນາບຂູ່ຕໍ່ການຄົງຕົວຂອງກຸ່ມນີ້. ຕ້ອງຮັບມືກັບໄພອັນຕະລາຍເຫຼົ່ານັ້ນໃນພາບດຽວ ກໍແມ່ນສິ່ງທ້າທາຍອັນໃຫຍ່ຫຼວງທີ່ເອີລົບຕ້ອງປະເຊີນໜ້າ. ສະເຫຼີມສະຫຼອງ 60 ປີແຫ່ງສົນທິສັນຍາ Roma ຈະແມ່ນໂອກາດເພື່ອໃຫ້ EU ຢ້ຳຄືນເຖິງບັນດາຫຼັກການ ແລະ ຄຸນຄ່າພື້ນຖານຂອງຕົນຫຼືບໍ່ ? ຄຳຖາມນີ້ພວມໄດ້ຮັບຄວາມລໍຄອຍຈາກຫາງສຽງ. /.