ວັນທີ 24/7, ກອງປະຊຸມລັດຖະມົນຕີການຕ່າງປະເທດອາຊຽນຄັ້ງທີ 49 (AMM – 49) ດ້ວຍຫົວຂໍ້ “ ນຳວິໄສທັດໃຫ້ປະກົດຜົນເປັນຈິງເພື່ອ ປະຊາຄົມອາຊຽນທີ່ຂະຫຍັນຂັ່ນເຄື່ອນ ” ໄດ້ຖືກໄຂຂຶ້ນຢູ່ນະຄອນຫຼວງວຽງຈັນຢ່າງເປັນທາງການ. ພ້ອມກັບການໃຫ້ບຸລິມະສິດຊຸກຍູ້ການຮ່ວມມືພາຍໃນກຸ່ມ ກໍຄືສາຍພົວພັນລະຫວ່າງອາຊຽນກັບບັນດາຄູ່ຮ່ວມມື, ສານລວມທີ່ບັນດາ ລັດຖະມົນຕີການຕ່າງປະເທດຂອງ 10 ປະເທດອາຊຽນ ໄດ້ເຫັນດີເປັນເອກະສັນຍົກອອກມາໃນກອງປະຊຸມຄັ້ງນີ້ ແມ່ນອາຊຽນຄວນເສີມຂະຫຍາຍບົດບາດໃຈກາງຢູ່ພາກພື້ນ ໃນການພົວພັນກັບບັນດາຄູ່ຮ່ວມມື ກໍຄືແກ້ໄຂບັນດາບັນຫາທີ່ເຄັ່ງຮ້ອນ ສົ່ງຜົນສະທ້ອນເຖິງສັນຕິພາບ, ສະຖຽນລະພາບ ແລະ ຄວາມໝັ້ນຄົງໃນພາກພື້ນ.
ກອງປະຊຸມລັດຖະມົນຕີການຕ່າງປະເທດອາຊຽນຄັ້ງທີ 49 (TTXVN) |
ກ່ອນທີ່ຈະດຳເນີນພິທີໄຂກອງປະຊຸມ, ທ່ານລັດຖະມົນຕີການຕ່າງປະເທດລາວ ສະເຫຼີມໄຊ ກົມມະສິດ ໂດຍຕ່າງໜ້າໃຫ້ປະເທດເປັນປະທານອາຊຽນ 2016 ໄດ້ເນັ້ນໜັກເຖິງຜົນສຳເລັດຂອງກອງປະຊຸມ AMM – 49 ຄັ້ງນີ້ ຈະສ້າງພື້ນຖານຢ່າງໜັກແໜ້ນໃຫ້ແກ່ກອງປະຊຸມສຸດຍອດອາຊຽນ ແລະ ບັນດາກອງປະຊຸມປີນອ້ອມທີ່ຈະຈັດຂຶ້ນໃນເດືອນ 9 ນີ້ຢູ່ນະຄອນຫຼວງວຽງຈັນ. ເພາະສະນັ້ນ, ຍິ່ງກວ່າເວລາໃດໝົດ, ອາຊຽນຄວນເສີມຂະຫຍາຍຄວາມສາມັກຄີ, ເປັນຈິດໜຶ່ງໃຈດຽວ ແລະ ບົດບາດໃຈກາງໃນການແກ້ໄຂທຸກບັນຫາ.
ໃຫ້ບຸລິມະສິດປັບປຸງ, ເພີ່ມທະວີຄວາມສາມັກຄີ,ເປັນຈິດໜຶ່ງໃຈດຽວໃນອາຊຽນ
ໃນເກືອບ 5 ທົດສະວັດທີ່ຜ່ານມາ, ອາຊຽນໄດ້ຜ່ານການຜັນແປຫຼາຍຢ່າງ, ແຕ່ປະຈຸບັນໄດ້ກາຍເປັນພາກພື້ນສັນຕິພາບ ແລະ ສະຖຽນລະພາບ. ອາຊຽນບັນລຸໄດ້ບັນດາໝາກຜົນໃນ 49 ປີທີ່ຜ່ານມາ ແມ່ຍຍ້ອນມີສະພາບແວດລ້ອມທີ່ມີສະຖຽນລະພາບ ແລະ ຄວາມໝັ້ນຄົງໃນພາກພື້ນ, ກໍຄືການຮ່ວມມື ແລະ ສະໜັບສະໜູນຂອງບັນດາປະເທດຄູ່ຮ່ວມເຈລະຈາ, ສອດຄ່ອງກັບບັນດາຫຼັກການຂອງອາຊຽນ. ການສ້າງຕັ້ງປະຊາຄົມອາຊຽນເມື່ອວັນທີ 31/12/2015 ກໍຄືການຮັບຮອງເອົາ ວິໄສທັດປະຊາຄົມອາຊຽນ 2025 ພ້ອມກັບ 3 ແຜນການສັງລວມປະຊາຄົມອາຊຽນ ພວມສືບຕໍ່ສ້າງທ່ວງທ່າໃຫ້ແກ່ບັນດາຄວາມມານະພະຍາຍາມໃນປະຈຸບັນຂອງບັນດາປະເທດສະມາຊິກແນໃສ່ປັບປຸງ ແລະ ເພີ່ມທະວີການເຊື່ອມໂຍງເຂົ້າກັບສາກົນ.
ເພາະສະນັ້ນ, ດ້ວຍຫົວຂໍ້ : “ນຳວິໄສທັດໃຫ້ປະກົດຜົນເປັນຈິງເພື່ອ ປະຊາຄົມອາຊຽນທີ່ຂະຫຍັນຂັ່ນເຄື່ອນ ”, ບັນດາລັດຖະມົນຕີການຕ່າງປະເທດອາຊຽນໄດ້ເນັ້ນໜັກເປັນພິເສດວ່າ ອາຊຽນຄວນໃຫ້ບຸລິມະສິດອັນດັບໜຶ່ງກ່ຽວກັບການປັບປຸງ, ເພີ່ມທະວີຄວາມສາມັກຄີ,ເປັນຈິດໜຶ່ງໃຈດຽວ, ເພາະວ່າ ນີ້ແມ່ນໜຶ່ງໃນບັນດາເງື່ອນໄຂຕັດສິນຜົນສຳເລັດຂອງວິວັດທະນາການກໍ່ສ້າງປະຊາຄົມອາຊຽນ. ນີ້ກໍແມ່ນພື້ນຖານເພື່ອໃຫ້ອາຊຽນຢັ້ງຢືນ ແລະ ເສີມຂະຫຍາຍບົດບາດ, ຄວາມຮັບຜິດຊອບ ແລະ ສຽງເວົ້າໃນການແກ້ໄຂບັນດາບັນຫາຍຸດທະສາດທີ່ກ່ຽວຂ້ອງເຖິງສັນຕິພາບ, ຄວາມໝັ້ນຄົງ ແລະ ສະຖຽນລະພາບໃນພາກພື້ນ, ເຊີດຊູພາບພົດ ແລະ ອິດທິພົນຊື່ສຽງຂອງປະຊາຄົມອາຊຽນ. ໃນພິທີໄຂ, ທ່ານນາຍົກລັດຖະມົນຕີລາວ ທອງລຸນ ສີສຸລິດ ໃນນາມເປັນປະທານອາຊຽນ 2016, ໄດ້ເນັ້ນໜັກວ່າ : (ເທບ) : “ ໃນສະພາບການສາກກົນ ແລະ ພາກພື້ນທີ່ພວມມີການຜັນແປຢ່າງສັບສົນ ດ້ວຍບັນດາສິ່ງທ້າທາຍ ແລະ ກາລະໂອກາດ, ການຂັດແຍ່ງກ່ຽວກັບເຂດນ້ຳແດນດິນ ແລະ ຫົວຮຸນແຮງ, ໄພກໍ່ການຮ້າຍ, ການປ່ຽນແປງຂອງດິນຟ້າອາກາດ, ການອົບພະຍົບຢ່າງຜິດກົດໝາຍ, ການຄ້າມະນຸດ ແລະ ບັນຫາອື່ນໆ. ນອກຈາກນັ້ນ, ສິ່ງທ້າທາຍຢູ່ບາງພາກພື້ນໃນໂລກເຊັ່ນ ເຫດການ “ Brexit ” ຢູ່ເອີລົບ ກໍຄືຜົນສະທ້ອນ ແລະ ການກະທົບເຖິງພາກພື້ນ, ມັນຮຽກຮ້ອງໃຫ້ຮ່ວມມືຢ່າງແໜ້ນແຟ້ນກວ່າອີກລະຫວ່າງບັນດາປະເທດອາຊຽນ. ໃນສະພາບການເຊັ່ນນັ້ນ, AMM – 49 ແລະ ບັນດາຄູ່ຮ່ວມມືຈະຊ່ວຍຊຸກຍູ້ບັນດາການສົນທະນາຢ່າງຕັ້ງໜ້າ ແລະ ສ້າງສັນ, ປະກອບສ່ວນເຂົ້າໃນການຮັກສາສັນຕິພາບ, ສະຖຽນລະພາບ ແລະ ວັດທະນາຖາວອນໃນພາກພື້ນ ແລະ ໃນທົ່ວໂລກ ”
ຢັ້ງຢືນບົດບາດໃຈກາງຂອງອາຊຽນ
ປະຈຸບັນ, ອາຊຽນໄດ້ຮັບການຕີລາຄາວ່າ ແມ່ນອົງການຮ່ວມສຳພັນໃນພາກພື້ນຢ່າງສຳເລັດຜົນ. ບັນດາຜົນງານທີ່ອາຊຽນຍາດມາໄດ້ນັ້ນ ແມ່ນຍ້ອນເປົ້າໝາຍສັນຕິພາບ, ສະຖຽນລະພາບໃນພາກພື້ນໃນຄຳໝັ້ນສັນຍາໃນກຸ່ມ. ພ້ອມກັນນັ້ນ ແມ່ນການຮ່ວມມືຢ່າງຕັ້ງໜ້າຂອງປະເທດສະມາຊິກ, ການສະໜັບສະໜູນຂອງບັນດາປະເທດຄູ່ຮ່ວມເຈລະຈາພາຍນອກ; ດ້ວຍບັນດາກົນໄກຮ່ວມມືພາຍໃຕ້ບົດບາດການຊັກຈູງຂອງອາຊຽນ ຄື : ອາຊຽນ + 1, ອາຊຽນ +3, EAS, ARF. ການເຂົ້າຮ່ວມຂອງບັນດາປະເທດມະຫາອຳນາດໃນໂລກໃນບັນດາເວທີປາໄສນີ້ ໄດ້ປະກອບສ່ວນເຂົ້າໃນການເພີີ່ມທະວີການຮ່ວມມື, ຄວາມເຊື່ອໝັ້ນຕໍ່ກັນ, ຊຸກຍູ້ການຮ່ວມມື, ສັນຕິພາບ, ຄວາມໝັ້ນຄົງ ແລະ ສະຖຽນລະພາບໃນພາກພື້ນ ແລະ ໃນໂລກ. ການພົວພັນລະຫວ່າງ ອາຊຽນກັບບັນດາປະເທດຄູ່ຮ່ວມມື, ຄູ່ເຈລະຈາ ໄດ້ມີຄວາມຄືບໜ້າຢ່າງກະໂດດຂັ້ນ. ປະຈຸບັນ, ມີເຖິງ 86 ຄູ່ຮ່ວມມື ແຕ່ງຕັ້ງເອກອັກຄະລັດຖະທູດປະຈຳອາຊຽນ ແລະ 50 ຄະນະກຳມະການອາຊຽນຢູ່ປະເທດທີ 3 , ເຫັນດີພ້ອມກັນປະກອບສ່ວນສ້າງການຮ່ວມມືລວມໃນພາກພື້ນ, ແກ້ໄຂບັນດາສິ່ງທ້າທາຍທີ່ໄດ້ວາງອອກ ກໍຄືການໜູນຊ່ວຍອາຊຽນຜັນຂະຫຍາຍວິໄສທັດ 2025, ເຊື່ອມຕໍ່ ແລະ ຮັດແຄບຄວາມຜິດໂຕນໃນການພັດທະນາ. ເມື່ອຢືນຢັນລັກສະນະປະສິດທິຜົນໃນການຮ່ວມມືລະຫວ່າງອາຊຽນ ແລະ ບັນດາຄູ່ຮ່ວມມື, ທ່ານລັດຖະມົນຕີການຕ່າງປະເທດລາວ ສະເຫຼີມໄຊ ກົມມະສິດ ຊີ້ແຈ້ງວ່າ :
“ ບັນດາກອບການຮ່ວມມືໃນອາຊຽນ ແລະ ລະຫວ່າງອາຊຽນກັບບັນດາຄູ່ຮ່ວມມື ພວມສ້າງພື້ນຖານ ບໍ່ພຽງແຕ່ຊຸກຍູ້ການຮ່ວມມືພາຍໃນກຸ່ມເທົ່ານັ້ນ, ຫາກຍັງເພີ່ມທະວີການພົວພັນລະຫວ່າງອາຊຽນກັບບັນດາຄູ່ຮ່ວມມື ແລະ ຄູ່ເຈລະຈາ. ພິເສດແມ່ນການເຂົ້າຮ່ວມຂອງບັນດາປະເທດໃຫຍ່ ຊຶ່ງໄດ້ຊ່ວຍເພີ່ມທະວີຄວາມເຂົ້າອົກເຂົ້າໃຈກັນ, ຊຸກຍູ້ສະພາບແວດລ້ອມແຫ່ງສັນຕິພາບ, ສະຖຽນລະພາບ, ການຮ່ວມມືໃນພາກພື້ນ. ອາຊຽນຈະເດີນຕາມນະໂຍບາຍເປີດກ້ວາງ ກໍຄືເພີ່ມທະວີບົດບາດໃຈກາງຂອງອາຊຽນໃນການສ້າງໂຄງປະກອບພາກພື້ນໃຫ້ເປັນຮູບປະທຳ ອີງໃສ່ບັນດາກົນໄກໂດຍອາຊຽນຊັກຈູງ”
ຄວາມສຳຄັນຂອງທະເລຕາເວັນອອກທີ່ມີຕໍ່ສັນຕິພາບໃນພາກພື້ນ
ພ້ອມກັບບັນດາເນື້ອໃນເພີ່ມທະວີຄວາມສາມັກຄີພາຍໃນກຸ່ມ, ການປັບປຸງການພົວພັນກັບຕ່າງປະເທດຂອງອາຊຽນ, AMM – 49 ອີກເທື່ອໜຶ່ງໄດ້ຢືນຢັນຄວາມສຳຄັນຂອງທະເລຕາເວັນອອກທີ່ຕິດພັນກັບສັນຕິພາບ, ສະຖຽນລະພາບ ແລະ ການຮ່ວມມືໃນພາກພື້ນ. ບັນດາລັດຖະມົນຕີໄດ້ເນັ້ນໜັກວ່າ ໃນສະພາບການປະຈຸບັນ, ອາຊຽນຄວນເສີມຂະຫຍາຍບົດບາດໃຈກາງ, ປະກອບສ່ວນເຂົ້າໃນການຮັກສາສັນຕິພາບ, ສະຖຽນລະພາບ, ຮຽກຮ້ອງໃຫ້ລະງັບໃຈ ແລະ ສ້າງສະພາບແວດລ້ອມທີ່ສະດວກໃຫ້ແກ່ການແກ້ໄຂການຂັດແຍ້ງກັນໂດຍສັນຕິວິທີ ແລະ ບັນຫາທະເລຕາເວັນອອກ ກໍແມ່ນ ການທົດສອບສຳລັບຄວາມເປັນເອກະພາບ ແລະ ບົດບາດໃຈກາງຂອງອາຊຽນ.
ຜ່ານໄລຍະເກືອບ 50 ປີແຫ່ງການສ້າງຕັ້ງ, ອາຊຽນໄດ້ບັນລຸບັນດາບາດກ້າວໃຫຍ່, ບໍ່ພຽງແຕ່ເປີດກ້ວາງຂອບຂະໜາດພາຄີເທົ່ານັ້ນ, ຫາກຍັງໄດ້ຫັນຈາກສະມາຄົມປະຊາຊາດໄປສູ່ປະຊາຄົມເປັນເອກະພາບ. ບັນດາຜົນສຳເລັດທີ່ອົງການນີ້ບັນລຸມາໄດ້ນັ້ນ ພວມສືບຕໍ່ໄດ້ຮັບການເສີມຂະຫຍາຍ ຍ້ອນມີການຮ່ວມມືຢ່າງຕັ້ງໜ້າຂອງທຸກໆປະເທດສະມາຊິກ.