ຍັງອີກບໍ່ຮອດ 4 ເດືອນ, ຫວຽດນາມຈະຮັບບົດບາດເປັນປະເທດເຈົ້າພາບຈັດກອງປະຊຸມເວທີປາໄສຮ່ວມມືເສດຖະກິດອາຊີ-ປາຊີຝິກ APEC ປີ 2017 ຈາກເປຣູ. ວຽກງານກະກຽມໃຫ້ແກ່ເຫດການພົວພັນຕ່າງປະເທດທີ່ສຳຄັນອັນດັບໜຶ່ງນີ້ ພວມໄດ້ຮັບການຜັນຂະຫຍາຍຢ່າງຮີບເຮັ່ງຈາກຫວຽດນາມ, ຈາກການກະກຽມດ້ານເນື້ອໃນຕະຫຼອດຮອດການຮັບໃຊ້, ພິທີການ, ເຮັດແນວໃດເພື່ອໃຫ້ເຫດການນີ້ເຂັ້ມຂົ້ນໄປດ້ວຍຂີດໝາຍຫວຽດນາມ.
ບັນດາປະມຸກລັດທີ່ກອງປະຊຸມ APEC 2006 ຊຶ່ງຈັດຂຶ້ນຢູ່ຮ່າໂນ້ຍ |
ນີ້ເປັນຄັ້ງທີ 2, ພາຍຫຼັງ 10 ປີທີ່ຫວຽດນາມເປັນປະເທດເຈົ້າພາບຈັດກອງປະຊຸມ APEC. ການຕົກລົງເປັນເຈົ້າພາບຈັດກອງປະຊຸມ APEC 2017 ແມ່ນການຜັນຂະຫຍາຍການເຊື່ອມໂຍງເຂົ້າກັບສາກົນຢ່າງຮອບດ້ານ ແລະ ຍົກລະດັບການພົວພັນຫຼາຍຝ່າຍຂອງຫວຽດນາມໃນໄລຍະໃໝ່.
ຕອບສະໜອງຄວາມຮຽກຮ້ອງຕ້ອງການໃໝ່ຂອງການຮ່ວມມື, ຮ່ວມສຳພັນໃນ APEC
ປີ APEC 2017 ແມ່ນມີຄວາມໝາຍທີ່ແທດຈິງສຳລັບຫວຽດນາມໃນການຍາດແຍ່ງແຫຼ່ງກຳລັງສາກົນຢ່າງແຂງແຮງກວ່າເພື່ອຮັບໃຊ້ການພັດທະນາ, ເຮັດໃຫ້ບັນດາສາຍພົວພັນ 2 ຝ່າຍຍິ່ງເລິກເຊິ່ງກວ່າ, ເພີ່ມທະວີການລົງນາມໃນບັນດາສັນຍາ, ໂຄງການຮ່ວມມືຂອງບັນດາທ້ອງຖິ່ນ, ວິສາຫະກິດ. ພ້ອມກັນນັ້ນ, ນີ້ກໍແມ່ນໂອກາດເພື່ອໂຄສະນາພາບພົດຫວຽດນາມອອກສູ່ເວທີສາກົນຢ່າງກ້ວາງຂວາງ. ມີການຮັບຮູ້ຢ່າງຈະແຈ້ງເຊັ່ນນັ້ນ, ດັ່ງນັ້ນຫວຽດນາມໄດ້ຜັນຂະຫຍາຍວຽກງານກະກຽມໂດຍໄວ ຊຶ່ງເລີ່ມແຕ່ປີ 2013. ແຕ່ມທ້າຍປີ 2013 ຫາ 2014, ຫວຽດນາມໄດ້ສ້າງຕັ້ງກຸ່ມປະຕິບັດງານລະຫວ່າງຂະແໜງ ແລະ ໄດ້ສ້າງຕັ້ງຄະນະກຳມະການແຫ່ງຊາດເພື່ອຊີ້ນຳວຽກງານກະກຽມໃຫ້ແກ່ປີ APEC 2017. ແບ່ງປັນກ່ຽວກັບວຽກງານກະກຽມນີ້. ທ່ານນາງ ເອກອັກຄະລັດຖະທູດຫວຽດນາມ ຫງວຽນງຽດງາ ທີ່ປຶກສາລະດັບສູງ ຄະນະເລຂາ APEC 2017 ໃຫ້ຮູ້ວ່າ :
“ ມາຮອດປະຈຸບັນ, ພວດເຮົາໄດ້ກະກຽມຢ່າງລອບຄອບຖີ່ຖ້ວນໃນທຸກໆຂົງເຂດວຽງການ. ຈາກການກະກຽມດ້ານເນື້ອໃນ, ການຮັບໃຊ້, ພິທີການ, ວັດຖຸຕະຫຼອດຮອດວຽກງານຂົນຂວາຍພະນັກງານ, ພວກເຮົາໄດ້ຍາດແຍ່ງການສະໜັບສະໜູນຫຼາຍຢ່າງຈາກບັນດາຄູ່ຮ່ວມມື, ບັນດາພື້ນຖານເສດຖະກິດພາຄີ APEC. ປະຈຸບັນ, ພວກເຮົາໄດ້ທາບທາມແລກປ່ຽນເປັນຫຼາຍຄັ້ງກັບບັນດາເພື່ອນກ່ຽວກັບວຽກງານກະກຽມດ້ານເນື້ອໃນ. ຈະມີກອງປະຂຸມນ້ອຍໃຫຍ່ປະມານ 200 ຄັ້ງ, ໃນນັ້ນມີກອງປະຊຸມຂັ້ນລັດຖະມົນຕີຂຶ້ນໄປປະມານ 20 ຄັ້ງ ແລະ ສັບປະດາລະດັບສູງ. ເປັນອັນວ່າ ພວກເຮົາຕ້ອງຈັດຕັ້ງຢ່າງລອບຄອບຖີ່ຖ້ວນໃນຂອບເຂດທົ່ວປະເທດຈາກພາກເໜືອລົງຮອດພາກໃຕ້ ທັງໂຄສະນາກ່ຽວກັບຫວຽດນາມ ທັງສ້າງກາລະໂອກາດທຳມາຄ້າຂາຍໃຫ້ແກ່ວິສາຫະກິດ ”
ໂດຍມີຄວາມແຕກຕ່າງກັບການເຈົ້າພາບຈັດກອງປະຊຸມ APEC ຄັ້ງກ່ອນ, ສະພາວະ APEC ໃນປະຈຸບັນ, ພ້ອມກັບບັນດາດ້ານດີ, ມີຄວາມສະດວກນັ້ນ, ຍັງມີສິ່ງທ້າທາຍຫຼາຍຢ່າງ, ຮຽກຮ້ອງໃຫ້ວຽກງານການຈັດຕັ້ງທຸກດ້ານ ຕ້ອງຍົກສູງກວ່າເກົ່າ ເພື່ອຕອບສະໜອງຄວາມຮຽກຮ້ອງຕ້ອງການໃໝ່ຂອງການຮ່ວມມື ແລະ ຮ່ວມສຳພັນໃນ APEC. ເພາະສະນັ້ນ, ພ້ອມກັບການກະກຽມວຽກງານຮັບໃຊ້ກອງປະຊຸມ, ການຮັບປະກັນຄວາມປອດໄພໃນສະພາວະທີ່ມີຄວາມວິຕົກກັງວົນຕໍ່ໄພກໍ່ການຮ້າຍ, ຫວຽດນາມໄດ້ເລັ່ງໃສ່ການລະດົມແຫຼ່ງກຳລັງ ປະກອບສ່ວນບັນດາຂໍ້ລິເລີ່ມ, ບັນດາເນື້ອໃນທີ່ສອດຄ່ອງກັບຄວາມຮຽກຮ້ອງຕ້ອງການໃໝ່ຂອງ APEC. ທ່ານນາງ ເອກອັກຄະລັດຖະທູດຫວຽດນາມ ຫງວຽນງຽດງາ ທີ່ປຶກສາລະດັບສູງ ຄະນະເລຂາ APEC 2017 ໃຫ້ຮູ້ຕື່ມອີກວ່າ :
“ ປະຈຸບັນ, ພວກຂ້າພະເຈົ້າເລັ່ງໃສ່ບັນດາບຸລິມະສິດໃຫຍ່ຂອງ APEC, ສອດຄ່ອງກັບຄວາມຮຽກຮ້ອງຕ້ອງການໃໝ່ຂອງການຂະຫຍາຍຕົວ ແລະ ຮ່ວມສຳພັນ. ໃນນັ້ນ, ສິ່ງທີ່ໃຫຍ່ກວ່າໝູ່ແມ່ນການເຕີບໂຕທາງດ້ານຄຸນນະພາບ, ການເຊື່ອມຕໍ່, ການສ້າງໂຄງປະກອບເສດຖະກິດຄືນໃໝ່. ສິ່ງນີ້ ແມ່ນສອດຄ່ອງກັບຄວາມຮຽກຮ້ອງຕ້ອງການຂອງຫວຽດນາມ ແລະ ຄວາມຮຽກຮ້ອງຕ້ອງການໃໝ່ຂອງ APEC ໃນປະຈຸບັນໃນສະພາວະທີ່ມີລະດັບຊຸດໂຊມດ້ານເສດດຖະກິດຂອງພາກພື້ນ. ພິເສດແມ່ນຂໍ້ລິເລີ່ມເພີ່ມທະວີການໜູນຊ່ວຍໃຫ້ແກ່ວິສາຫະກິດຂະໜາດກາງ ແລະ ນ້ອຍ, ຂໍ້ລິເລີ່ມກ່ຽວກັບການກໍ່ສ້າງແຫຼ່ງຊັບພະຍາກອນມະນຸດ…ນີ້ແມ່ນບັນດາບັນຫາທີ່ບໍ່ພຽງແຕ່ຫວຽດນາມມີຄວາມຕ້ອງການເທົ່ານັ້ນ, ຫາກຍັງນັບທັງ APEC ມີຄວາມຕ້ອງການອີກດ້ວຍ. ”
ສະແດງໃຫ້ເຫັນວັດທະນະທຳເຊື່ອມໂຍງໃໝ່ຂອງຫວຽດນາມ
ປີ 2017 ກໍແມ່ນປີທຳອິດທີ່ບັນດາການນຳ APEC ໄດ້ເຫັນດີເປັນເອກະສັນຈັດຕັ້ງບັນດາການເຄື່ອນໄຫວພົບປະແລກປ່ຽນວັດທະນະທຳໃນຂອບເຂດການຮ່ວມມື APEC. ສຳລັບຫວຽດນາມແລ້ວ, ໃນປີ 2017 ກໍແມ່ນປີທີ່ຫວຽດນາມເປັນປະເທດເຈົ້າພາບຈັດກອງປະຊຸມ APEC, ສອດຄ່ອງກັບແຜນນະໂຍບາຍ ແລະ ບັນດາຄວາມມານະພະຍາຍາມຂອງຫວຽດນາມໃນການໂຄສະນາພາບພົດຫວຽດນາມ, ສະແດງໃຫ້ເຫັນມູນເຊື້ອວັດທະນະທຳມະນຸດ, ຄຸນຄ່າວັດທະນະທຳຂອງຫວຽດນາມ. ທ່ານນາງ ເອກອັກຄະລັດຖະທູດຫວຽດນາມ ຫງວຽນງຽດງາ ທີ່ປຶກສາລະດັບສູງ ຄະນະເລຂາ APEC 2017 ເນັ້ນໜັກວ່າ :
“ ໃນສະພາບການພາກພື້ນ ແລະ ໂລກພວມຢືນຢູ່ຕໍ່ໜ້າບັນດາສິ່ງທ້າທາຍກ່ຽວກັບສັນຕິພາບ ແລະ ຄວາມໝັ້ນຄົງນັ້ນ, ຍິ່ງກວ່າເວລາໃດໝົດ, ວິທີການແກ້ໄຂເພື່ອປົກປັກຮັກສາສັນຕິພາບ, ສະຖຽນລະພາບໃນພາກພື້ນ ແລະ ໃນໂລກ ແມ່ນການພົວພັນມິດຕະພາບລະຫວ່າງມະນຸດດ້ວຍກັນ. ສິ່ງພົວພັນແລກປ່ຽນ, ຍິ່ງເຊື່ອມຈອດ ແລະ ເຂົ້າໃຈວັດທະນະທຳ, ເຄົາລົບຊຶ່ງກັນ ແລະ ກັນນັ້ນ ກໍຈະມີເງື່ອນໄຂເພື່ອເພີ່ມທະວີການສົນທະນາ ແລະ ຮ່ວມມື, ປົກປັກຮັກສາສັນຕິພາບ ”
ການຕົກລົງເປັນເຈົ້າພາບຈັດກອງປະຊຸມ APEC 2017 ແມ່ນແຜນນະໂຍບາຍຜັນຂະຫຍາຍການເຊື່ອມໂຍງເຂົ້າກັບສາກົນຢ່າງຮອບດ້ານ ແລະ ຍົກລະດັບການພົວພັນຫຼາຍຝ່າຍຂອງຫວຽດນາມ. APEC 2017 ຈະນຳມາເຊິ່ງພາບພົດຫວຽດນາມທີ່ເຂັ້ມຂົ້ນໄປດ້ວຍວັດທະນະທຳທີ່ເປັນມູນເຊື້ອ, ສະໜິດຕິດພັນ, ຮັກແພງແຂກ, ເປັນເຈົ້າການ, ຕັ້ງໜ້າ, ປະກອບສ່ວນສ້າງອາຊີ-ປາຊີຝິກທີ່ຂະຫຍັນຂັນເຄື່ອນ, ເຊື່ອຈອດ, ປະກອບສ່ວນເຂົ້າໃນສັນຕິພາບ, ການພັດທະນາ, ຮ່ວມສຳພັນ ແລະ ວັດທະນາຖາວອນຂອງພາກພື້ນອາຊີ-ປາຊີຝິກ.