(vovworld) – ວັນທີ 15/7, ກອງປະຊຸມບັນດາພື້ນຖານເສດຖະກິດທີ່ຫາກໍ່ພົ້ນເດັ່ນຂຶ້ນ BRICS ໄດ້ໄຂຂຶ້ນຢູ່ ບະເລຊິນ ດ້ວຍການເຂົ້າຮ່ວມຂອງບັນດາການນຳຂັ້ນສູງ 5 ປະເທດສະມາຊິກຄື: ລັດເຊຍ, ອິນເດຍ, ຈີນ, ບະເລຊິນ ແລະ ອາຟະລິກາໃຕ້. ກອງປະຊຸມຄັ້ງນີ້ຈະຮັບຮອງເອົາຂໍ້ຕົກລົງສຳຄັນຫຼາຍຂໍ້, ພິເສດແມ່ນໃນຂົງເຂດເສດຖະກິດ, ເພື່ອແນໃສ່ຍົກສູງທີ່ຕັ້ງຂອງ BRICS ໃນຊີວິດທາງດ້ານເສດຖະກິດ - ການເມືອງທົ່ວໂລກ.
ການນຳບັນດາປະເທດໃນກຸ່ມ BRICS
(ພາບ: ອິນເຕີແນດ)
BRICS ກວມປະມານ 1/3 ຈຳນວນພົນລະເມືອງ ແລະ ກວ່າ 1/4 ເນື້ອທີ່ດິນທັງໝົດຂອງໂລກ. ຕາມກອງທຶນເງິນຕາສາກົນ (IMF), ບັນດາປະເທດ BRICSມີຍອດຈີດີພີກວ່າ 16.000 ຕຶ້ ໂດລາສະຫະລັດໃນປີ 2013. ຄາດຄະເນວ່າ, BRICS ສາມາດລື່ນກາຍກຸ່ມ 7 ປະເທດອຸດສາຫະກຳພັດທະນາ (G7) ໃນປີ 2027. ໃນກຸ່ມປະເທດດັ່ງກ່າວ, ຈີນໄດ້ຮັບຖືວ່າແມ່ນ “ໂຮງງານຂອງໂລກ“, ບະເລຊິນແມ່ນແຫຼ່ງວັດຖຸດິບທີ່ສຳຄັນໃຫ້ຕະຫຼາດທົ່ວໂລກ, ລັດເຊຍແມ່ນ “ປຳ້ນຳ້ມັນຂອງໂລກ“, ສ່ວນອິນເດຍແມ່ນ “ຫ້ອງການຂອງໂລກ“ ແລະ ອາຟະລິກາໃຕ້ແມ່ນສາງຊັບພະຍາກອນຂອງອາຟະລິກາ.
ປີ 2000, ຈີດີພີຂອງ 5 ພື້ນຖານເສດຖະກິດນີ້ກວມກວ່າ 8% ຈີດີພີທັງໝົດຂອງໂລກ, ແຕ່ຕາມການຄາດຄະເນຂອງອົງການ (EIU) ຂອງອັງກິດແລ້ວ, ຮອດປີ 2016, ອັດຕາປະກອບສ່ວນຂອງ BRICS ເຂົ້າໂລກຈະບັນລຸເກືອບ 30%. ເຖິງວ່າລະດັບເຕີບໂຕໃນມໍ່ໆມານີ້ຈະຊັກຊ້າກໍ່ຕາມ, ແຕ່ບັນດາພື້ນຖານເສດຖະກິດ BRICS ຍັງຄົງໄດ້ຮັບຖືວ່າມີຄວາມສາມາດບົ່ມຊ້ອນໃນການໜູນຊ່ວຍເສດຖະກິດທົ່ວໂລກ.
ສ້າງທ່າໄດ້ປຽບທາງດ້ານເສດຖະກິດໂລກ
ກ່ອນຈັດກອງປະຊຸມສຸດຍອດ BRICS, ມີຫຼາຍແຫຼ່ງຂ່າວໃຫ້ຮູ້ວ່າ, ທີ່ກອງປະຊຸມຄັ້ງນີ້, ລັດເຊຍ, ອິນເດຍ, ຈີນ, ບະເລຊິນ ແລະ ອາຟະລິກາໃຕ້ ຈະເຊັນອະນຸມັດຕໍ່ເລືອງສ້າງຕັ້ງກອງທຶນສະສົມເງິນຕາ ແລະ ທະນາຄານພັດທະນາແຫ່ງໜຶ່ງ. ກ່ອນນັ້ນ, ປີ 2013, ກຸ່ມ BRICS ໄດ້ເປີດເຜີຍໂຄງການສ້າງຕັ້ງທະນາຄາດພັດທະນາແຫ່ງໜຶ່ງ ແລະ ກອງທຶນເງິນຕາແຫ່ງໜຶ່ງເພື່ອແກ່ງແຍ້ງກັບທະນາຄານໂລກ (WB) ແລະ ກອງທຶນເງິນຕາສາກົນ (IMF) ດ້ວຍສາຍເຫດ, ສອງອົງການນີ້ຖືກອາເມລິກາ ແລະ ເອີລົບຄອບງຳ. ດັ່ງນັ້ນເລື່ອງມຸ່ງໄປສູ່ທະນາຄານລວມແຫ່ງໜຶ່ງ ໄດ້ຮັບຖືວ່າແມ່ນມາດຕະການເພື່ອໃຫ້ BRICS ມີຜົນສະທ້ອນໃຫຍ່ກວ່າໃນເວທີສາກົນ.
ຕາມທ່ານລັດຖະມົນຕີການຕ່າງປະເທດລັດເຊຍ Anton Silouanov ແລ້ວ, ທະນາຄານພັດທະນາ BRICS ຈະມີຈຳນວນທຶນເບື້ອງຕົ້ນແມ່ນ 10 ຕື້ໂດລາສະຫະລັດ, ຫຼັງຈາກນັ້ນອາດຈະເພີ່ມຂຶ້ນເຖິງ 100 ຕື້ໂດລາສະຫະລັດ. ແຕ່ລະປະເທດໃນກຸ່ມຈະປະກອບທຶນເທົ່າກັນ. ໃນເບື້ອງຕົ້ນແມ່ນ 10 ຕື້ໂດລາສະຫະລັດໃນຮອບເວລາ 7 ປີ. ຫຼັງຈາກນັ້ນຍອດຈຳນວນທຶນຂອງທະນາຄານຈະບັນລຸ 100 ຕື້ໂດລາສະຫະລັດ. ນີ້ແມ່ນທະນາຄານສະເພາະສຳລັບບັນດາກິດຈະກຳພື້ນຖານໂຄງລ່າງ ແລະ ຈະເລີ່ມເຄື່ອນໄຫວນັບແຕ່ປີ 2016 ເປັນຕົ້ນໄປ. ທະນາຄານນີ້ກໍ່ສ້າງເງື່ອນໄຂໃຫ້ບັນດາປະເທດສະມາຊິກສະຫະປະຊາຊາດເຂົ້າຮ່ວມ. ເຖິງຢ່າງໃດກໍ່ຕາມ, ອັນຕາທຶນຂອງ BRICS ຕ້ອງກວມກວ່າ 55%.
ພ້ອມກັບທະນາຄານລວມນັ້ນ, ກອງທຶນສະສົມເພື່ອປົກປ້ອງບັນດາພື້ນຖານເສດຖະກິດໃນກຸ່ມ BRICS ຕໍ່ໜ້າການຜັນແປຂອງຕະຫຼາດກໍ່ໄດ້ຮັບການສ້າງຕັ້ງຂຶ້ນ, ດ້ວຍຈຳນວນທຶນໃນເບື້ອງຕົ້ນແມ່ນ 100 ຕື້ໂດລາສະຫະລັດ. ໃນນັ້ນ, ຈີນຈະປະກອບ 41 ຕື້ໂດລາສະຫະລັດ; ບະເລຊິນ, ອິນເດຍ ແລະ ລັດເຊຍ, ແຕ່ລະປະເທດປະກອບ 18 ຕື້ໂດລາສະຫະລັດ, ອາຟະລິກາໃຕ້ປະກອບ 5 ຕື້ໂດລາສະຫະລັດ. ກອງທຶນ BRICS ໄດ້ຮັບການສ້າງຕັ້ງຂຶ້ນ ເພື່ອຊ່ວຍປະເທດຕ່າງໆສ້າງຄວາມດຸນດຽງໃນການຊຳລະ, ບໍ່ໃຫ້ສະກຸນເງິນພາຍໃນປະເທດບຸບລາຄາ.
ການທ້າທາຍຫຼາຍຢ່າງ
ເພື່ອທຳການເຄື່ອນໄຫວ, ທະນາຄານ ແລະ ກອງທຶນ BRICS ຕ້ອງລໍຖ້າ ອົງການນິຕິບັນຍັດຂອງບັນດາປະເທດສະມາຊິກ BRICS ເຊັນອະນຸມັດ, ດັ່ງນັ້ນຕ້ອງການເວລາຢ່າງໜ້ອຍສຸດແມ່ນໜຶ່ງປີຈຶ່ງສາມາດຜັນຂະຫຍາຍໄດ້. ນັ້ນແມ່ນບໍ່ທັນເຕື້ອງເຖິງຈຳນວນທຶນປະກອບໃຫ້ກອງທຶນ BRICS ແມ່ນ 100 ຕື້ໂດລາສະຫະລັດ, ກວມ 2.2% ຈຳນວນທຶນສະສົມທັງໝົດຂອງ BRICS ແມ່ນ 4,3 ພັນ ຕື້ໂດລາສະຫະລັດ, ຖືກຖືວ່າບໍ່ທັນຫຼາຍ ເພື່ອເຮັດໃຫ້ບັນດາຄາດໝາຍຂອງກອງທຶນປະກົດຜົນເປັນຈິງ.
ວົງການນັກໄຈ້ແຍກກໍ່ຖືວ່າ, ຈຳນວນທຶນທັງໝົດຂອງທະນາຄານ ແລະ ກອງທຶນ BRICS ແມ່ນບໍ່ຫຼາຍເພື່ອຊຸກຍູ້ການເຕີບໂຕເສດຖະກິດ, ໃນສະພາບບັນດານັກລົງທຶນຕ່າງປະເທດບໍ່ສົນໃຈຫຼາຍ, ສ່ວນບັນດາປະເທດສະມາຊິກພັດສຸມໃສ່ບັນດາບັນຫາພາຍໃນ. ນັກຊ່ຽວຊານ Arvind Subramanian, ທີ່ຂຶ້ນກັບສະຖາບັນຄົ້ນຄ້ວາເສດຖະກິດສາກົນ Peterson ຖືວ່າ, ສຳລັບອິນເດຍ, ການເຕີບໂຕເສດຖະກິດແລະ ການຄວບຄຸມໄພເງິນເຟີ້ ມີຄວາມສຳຄັນກວ່າການຮ່ວມມືຂອງ BRICS. ສ່ວນລັດເຊຍຫວັງວ່າບັນດາການນຳ BRICS ຈະປຶກສາຫາລືບັນດາບັນຫາສາກົນ ແລະ ຕ້ານຄືນຄຳສັ່ງຂວຳ້ບາດຈາກບັນດາປະເທດຝ່າຍຕາເວັນຕົກ.
ປະຈຸບັນ, ບັນດາປະເທດສະມາຊິກ BRICS ພວມຢືນຢູ່ຕໍ່ໜ້າກາລະໂອກາດໃໝ່ ເພື່ອເພີ່ມຜົນສະທ້ອນຂອງຕົນໃນຊີວິດທາງດ້ານເສດຖະກິດ - ການເມືອງໂລກ ພາຍຫຼັງວິກິດການການເງິນເມື່ອປີ 2008. ການສ້າງຕັ້ງທະນາຄານພັດທະນາ ແລະ ກອງທຶນສະສົມລວມຂອງ BRICS ຈະແມ່ນບາດກ້າວທີ່ມີລັກສະນະບຸກທະລຸໃນຕະຫຼາດການເງິນທົ່ວໂລກ. ລັດເຊຍ, ອິນໂດເນເຊຍ, ຈີນ, ບະເລຊິນ, ອາຟະລິກາໃຕ້ຈະບໍ່ພາດໂອກາດນີ້ໃນ 2 ວັນທີ່ດຳເນີນກອງປະຊຸມສຸດຍອດ BRICS ຄັ້ງທີ 6 ນີ້ຢ່າງແນ່ນອນ.