(ພາບປະກອບ)
|
vovworld-ການສ້າງປະມວນຂໍ້ກຳນົດກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ(COC)ລະຫວ່າງອາຊຽນ ແລະ ຈີນພວມມີສັນຍານທີ່ໜ້າຊື່ນຊົມ, ຂະນະທີ່ ເມື່ອມໍ່ໆມານີ້, ບັນດາເຈົ້າໜ້າທີ່ຂັ້ນສູງຂອງ 2 ຝ່າຍໄດ້ພົບປະກັນຢູ່ໄທ ຊຶ່ງໄດ້ພ້ອມກັນຢືນຢັນຄວາມຕັດສິນໃຈດຳເນີນວິວັດທະນາການນີ້ໂດຍໄວ. ເຖິງວ່າຫາງສຽງໃຫ້ຂໍ້ສັງເກດວ່າຕ້ອງໃຊ້ເວລາຫຼາຍ, ເອກະສານນິຕິກຳທີ່ມີລັກສະນະຜູກຮັດນີ້ຈຶ່ງອາດຈະປະກົດຜົນເປັນຈິງໄດ້, ແຕ່ນິ້ີຖືກຖືວ່າ ແມ່ນບາດກ້າວເປີດສາກທີ່ສຳຄັນໃນວິວັດການຊອກຫາວິທີການຮັບປະກັນຄວາມໝັ້ນຄົງຢູ່ ທະເລຕາເວັນອອກ ຊຶ່ງໄດ້ມີການຜັນແປຫຼາຍຢ່າງໃນໄລຍະທີ່ຜ່ານມາ.
ໃນການຜັນແປເມື່ອມໍ່ໆມານີ້, ວັນທີ 30/10, ດ້ວຍຄຳຖະແຫຼງພາຍຫຼັງການ ປະຊຸມຢ່າງບໍ່ເປັນທາງການກ່ອນທີ່ດຳເນີນກອງປະຊຸມສຸດຍອດອາຊຽນ, ບັນດາ ເຈົ້າໜ້າທີ່ຂັ້ນສູງຂອງອາຊຽນ ແລະ ຈີນໄດ້ພ້ອມກັນຢືນຢັນຄວາມສຳຄັນຂອງການປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ຊຶ່ງໄດ້ຮັບການຮັບຮອງເອົາເມື່ອປີ 2002 ຢ່າງເຂັ້ມງວດ, ກໍຄື ສົມທົບກັນສູ້ຊົນເພື່ອສາມາດດຳເນີນການປຶກສາຫາລືກ່ຽວກັບວິວັດທະນາການສ້າງ ປະມວນຂໍ້ກຳນົດກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC) ໂດຍໄວ. ຫົວໜ້າຄະນະຜູ້ແທນປະເທດເຈົ້າພາບໄທ ທ່ານ Sihasak Phuangketkeow ໃຫ້ຮູ້ວ່າ ບັນດາຝ່າຍໄດ້ບັນລຸຄວາມເຫັນດີເປັນເອກະສັນທີ່ສຳຄັນ ແລະ ມີຄວາມເອົາໃຈໃສ່ລວມໃນການຮັກສາສັນຕິພາບ ແລະ ສະຖຽນລະພາບຢູ່ ທະເລຕາເວັນອອກ. ເພາະວ່າສາຍພົວພັນອາຊຽນ-ຈີນບໍ່ພຽງແຕ່ເພື່ອຜົນປະໂຫຍດທີ່ນຳມາໃຫ້ແກ່ທັງ 2 ຝ່າຍເທົ່ານັ້ນ, ຫາກຍັງແມ່ນເສົາຄ້ຳທີ່ສຳຄັນໃຫ້ແກ່ສັນຕິພາບ ແລະ ສະຖຽນລະພາບໃນພາກພື້ນອີກດ້ວຍ.ສ່ວນທ່ານເລຂາທິການໃຫຍ່ອາຊຽນ ສຸຣິນພິສຸວັນ ໄດ້ຢືນຢັນເມື່ອວັນທີ່ 31/10 ວ່າ ອາຊຽນ ແລະ ຈີນພວມສະແດງໃຫ້ເຫັນສະຕິແບບຮີບດ່ວນ ໃນຄວາມມານະພະຍາຍາມຫຼຸດຜ່ອນຄວາມເຄັ່ງຕຶງ. ຕາມທ່ານແລ້ວ, ອາຊຽນໄດ້ມີບົດຮຽນຂະນະທີ່ເປັນຄັ້ງທຳອິດໃນໄລຍະ ປະຫວັດສາດ 45 ປີ, ກອງປະຊຸມລັດຖະມົນຕີການຕ່າງປະເທດອາຊຽນສິ້ນສຸດລົງເມື່ອເດືອນ 6/2012, ແຕ່ບໍ່ສາມາດອອກຖະແຫຼງການຮ່ວມໄດ້ຍ້ອນບັນດາຄວາມບໍ່ລົງລອຍກັນລະຫວ່າງບັນດາປະເທດໃນວິທີການສຳຜັດກັບບັນຫາທະເລຕາເວັນອອກ. ດັ່ງນັ້ນ, ຈຸດເວລານີ້ ແມ່ນກາລະໂອກາດທີ່ດີເພື່ອໃຫ້ອາຊຽນເຊື່ອມຈອດ, ຊຸກຍູ້ການເຈລະຈາປະມວນຂໍ້ກຳນົດກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC)ກັບຈີນ, ແນໃສ່ສ້າງກົນໄກເພື່ອຮັກສາສັນຕິພາບ ແລະ ສະຖຽນລະພາບໃນພາກພື້ນ. ກ່ອນໜ້ານັ້ນ, ລັດຖະມົນຕີການຕ່າງປະເທດສິງກະໂປກໍເນັ້ນໜັກວ່າ ຄວາມເປັນເອກະສັນກັນດຳເນີນການເຈລະຈາ COC ແມ່ນບາດກ້າວເປີດສາກທີ່ດີງາມ, ສະແດງໃຫ້ເຫັນຄວາມມານະພະຍາຍາມຂອງບັນດາຝ່າຍທີ່ມີຕໍ່ການແກ້ໄຂການພິພາດອະທິປະໄຕຜືນແຜ່ນດິນຢູ່ທະເລຕາເວັນອອກໂດຍສັນຕິວິທີ. ປະຈຸບັນ, ບັນດາປະເທດອາຊຽນໄດ້ສ້າງສຳເລັດບັນດາປັດໄຈພື້ນຖານໃນ COC ແລະ ພວມກະກຽມນຳມາເຈລະຈາກັບຈີນ, ຫຼັງຈາກນັ້ນ,ຈະຍືນສະເໜີຕໍ່ກອງປະຊຸມສຸດຍອດອາຊຽນທີ່ຈະຈັດຂຶ້ນຢູ່ກຳປູເຈຍໃນທ້າຍເດືອນນີ້.
ແນວຄວາມຄິດກ່ຽວກັບ COC ໃຫ້ແກ່ພາກພື້ນ ໄດ້ຖືກຍົກອອກມາແຕ່ດົນນານໃນຖະແຫຼງການອາຊຽນປີ 1992. ແຕ່ຕ້ອງເສຍເວລາ 10 ປີ ດຳເນີນການຂົນຂວາຍ, ເຈລະຈາ, ຮອດປີ 2002, ຢູ່ພະນົມເປັນປະເທດກຳປູເຈຍ, ລັດຖະມົນຕີການຕ່າງປະເທດບັນດາປະເທດອາຊຽນ ແລະ ຈີນຈຶ່ງສາມາດກ້າວເດີນໄດ້ເຄິ່ງໜຶ່ງຂອງໄລຍະທາງດ້ວຍການເຫັນດີເປັນເອກະສັນຮັບຮອງເອົາ DOC . ແລະ ກໍຍັງຕ້ອງເສຍເວລາເກືອບສິບປີອີກ, ໃນກອງປະຊຸມທີ່ຈັດຂຶ້ນຢູ່ເກາະບາລີປະເທດອີນໂດເນເຊຍເມື່ອເດືອນ 11/2011, ລັດຖະມົນຕີການຕ່າງປະເທດບັນດາປະເທດອາຊຽນ ແລະ ຈີນຈຶ່ງບັນລຸຄວາມເຫັນດີເປັນເອກະສັນ ແລະ ຮັບຮອງເອົາຂໍ້ກຳນົດແນະນຳການປະຕິບັດ DOC ຢ່າງເປັນທາງການ. ຍ້ອນ ທະເລຕາເວັນອອກມີຄວາມສຳຄັນເປັນພິເສດທາງດ້ານເສດຖະກິດ ແລະ ທີ່ຕັ້ງຍຸດທະສາດ, ດັ່ງນັ້ນ ທະເລຕາເວັນອອກຍາມໃດກໍຊ້ອນແຝງບັນຫາເກີດຄວາມຂາດສະຖຽນລະພາບໃນທຸກເວລາຖ້າຫາກວ່າບັນດາຝ່າຍທີ່ກ່ຽວຂ້ອງບໍ່ຍອມເຄົາລົບກົດໝາຍສາກົນ, ແລະບໍ່ຍອມເຄົາລົບປະຫວັດສາດ. ເພາະສະນັ້ນ, ຕ້ອງເຮັດແນວໃດເພື່ອໃຫ້ ທະເລຕາເວັນອອກກາຍເປັນເຂດທະເລສັນຕິພາບ ແລະ ຮ່ວມມື ແມ່ນສິ່ງທີ່ບໍ່ພຽງແຕ່ບັນດາປະເທດມີຝັ່ງທະເລ ແລະ ບໍ່ມີຝັ່ງທະເລໃນພາກພື້ນມີຄວາມເປັນຫ່ວງເທົ່ານັ້ນ, ຫາກນັບທັງບັນດາປະເທດທີ່ມີຜົນປະໂຫຍດກ່ຽວຂ້ອງອີກດ້ວຍ.
ຜ່ານໄລຍະ 10 ປີ ແຫ່ງການປະຕິບັດ ຖະແຫຼງການ DOC, DOC ໄດ້ສະແດງໃຫ້ເຫັນແຈ້ງບັນດາຈຸດອ່ອນເພາະວ່າ ມັນບໍ່ແມ່ນສົນທິສັນຍາສາກົນ ແລະ ບໍ່ມີຄຸນຄ່າຜູກຮັດທາງດ້ານນິຕິກຳ. DOC ພຽງແຕ່ສະແດງໃຫ້ເຫັນຄຳໝັ້ນສັນຍາດ້ານການເມືອງລະຫວ່າງບັນດາປະເທດເທົ່ານັ້ນ, ພ້ອມກັນນັ້ນ, ມັນກໍບໍ່ມີກົນໄກຮັບປະກັນການປະຕິບັດຢ່າງໜັກແໜ້ນ. ດັ່ງນັ້ນ, ຄວາມຫວັງໃຫ້ມີເອກະສານທີ່ມີລັກສະນະຜູກຮັດດ້ານນິຕິກຳສູງກ່ວາເພື່ອ ແກ້ໄຂການພິພາດອະທິປະໄຕຢູ່ ທະເລຕາເວັນອອກໂດຍສັນຕິວິທີ ແມ່ນຄວາມຮຽກຮ້ອງໂດຍຈຳເປັນລະຫວ່າງອາຊຽນ ແລະ ຈີນໃນໄລຍະປະຈຸບັນ. ແຕ່ຕາມບັນດານັກໄຈ້ແຍກແລ້ວ, ເພື່ອໃຫ້ການເຈລະຈາ COC ອາຊຽນ ແລະ ຈີນໄປສູ່ເປົ້າໝາຍປາຍທາງ ກໍແມ່ນທັງຂະບວນວິວັດທີ່ຍາວນານ, ຕ້ອງການມີຄວາມມານະພະຍາຍາມສ້າງຄວາມເຊື່ອໝັ້ນຕໍ່ກັນລະຫວ່າງທຸກໆຝ່າຍ. ອາຊຽນ ແລະ ຈີນຕ້ອງເປັນເອກະພາບກັນໂດຍໄວໃນ 3 ບັນຫາໃຫຍ່, ນັ້ນແມ່ນເຮັດແນວໃດກຳນົດໄດ້ບໍລິເວນເກີດການພິພາດ ແລະ ບໍ່ພິພາດ, ກຳນົດລະອຽດກ່ຽວກັບບັນດາການກະທຳທີ່ຕ້ອງເກືອດຫ້າມ ແລະ ກົນໄກຕິດຕາມກວດກາ, ແກ້ໄຂການພິພາດ. ເພື່ອແກ້ໄຂບັນດາຄວາມຫຍຸ້ງຍາກໃນການສ້າງ COC ແມ່ນຈຳເປັນຕ້ອງມີເຈດຕະນາດີໃນການຮ່ວມມືຂອງຝ່າຍຕ່າງໆທີ່ມີສິດຜົນປະໂຫຍດຢູ່ ທະເລຕາເວັນອອກ, ອີງບົນກົດໝາຍສາກົນ, ໃນນັ້ນມີກົດໝາຍທະເລຂອງ ສ.ປ.ຊ ປີ 1982. ຖ້າຫາກບັນດາຝ່າຍບໍ່ເປັນເອກະພາບກັນສຳລັບເນື້ອໃນເຫຼົ້ານັ້ນ, ປະມວນຂໍ້ກຳນົດກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC) ຍັງຄົງພຽງແຕ່ແມ່ນຖະແຫຼງການການເມືອງໂດຍສະໝັກໃຈ ແລະ ປຽບເໝືອນ DOC ເທົ່ານັ້ນ.
ປີນີ້, ອາຊຽນ ແລະ ຈີນຈັດຕັ້ງສະເຫຼີມສະຫຼອງ 15 ປີແຫ່ງວັນສ້າງການພົວພັນຄູ່ຮ່ວມມື, ຈາກບັນດາການຜັນແປໃນປະຈຸບັນ, ຫາງສຽງປາດຖະໜາວ່າ 2 ຝ່າຍຈະບັນລຸບັນດາບາດກ້າວລິເລີ່ມທີ່ສຳຄັນ, ສາມາດອອກຖະແຫຼງການຮ່ວມກ່ຽວກັບການສ້າງ COC ໂດຍໄວເພື່ອຍືນສະເໜີຕໍ່ກອງປະຊຸມສຸດຍອດອາຊຽນທີ່ຈະຈັດຂຶ້ນຢູ່ກຳປູເຈຍໃນທ້າຍເດືອນນີ້. ນີ້ແມ່ນບາດກ້າວເດີນທີ່ສຳຄັນເພື່ອກ້າວໄປເຖິງພື້ນຖານສັນຕິພາບແບບຍືນຍົງຢູ່ ທະເລຕາເວັນອອກ.