(vovworld)- ວັນທີ 18/3, ແມ່ນວັນທີ່ Crimea ໂຮມເຂົ້າລັດເຊຍຄົບຮອບ 1 ປີ ດ້ວຍເລື່ອງ ປະທານາທິບໍດີລັດເຊຍVladimir Putin ເຊັນຂໍ້ຕົກລົງໂຮມ ສາທາລະນະລັດຄຸ້ມຄອງດ້ວຍຕົນເອງ Crimea ເຂົ້າລັດເຊຍ ແລະ ນະຄອນ Sevastopol ຂຶ້ນກັບສະຫະພັນລັດເຊຍ. ພາຍຫລັງ 1 ປີໂຮມເຂົ້າລັດເຊຍ, ສະຫະພັນລັດເຊຍ ພວມຕັ້ງຫນ້າລົງທຶນເຂົ້າ Crimea ພ້ອມທັງເດັດດ່ຽວໂຕ້ຕອບບັນດາກຳລັງດັນຈາກຝ່າຍຕາເວັນຕົກ. ບົດລວບລວມຂອງນັກຂ່າວວິທະຍຸກະຈາຍສຽງຫວຽດນາມ ດ້ວຍຫົວຂໍ້ວ່າ: Crimea ພາຍຫລັງ 1 ປີໂຮມເຂົ້າລັດເຊຍ.
ແຫຼມCrimeaສະເຫຼີມສະຫຼອງ 1 ປີ ທີ່ໂຮມເຂົ້າລັດເຊຍ
ພິທີສະເຫລີມສະຫລອງ 1 ປີແຫ່ງວັນແຫລມ Crimea ໂຮມເຂົ້າສະຫະພັນລັດເຊຍ ພາຍຫລັງການລົງປະຊາມະຕິ ດ້ວຍ 97% ຈຳນວນຜູ້ມີສິດເລືອກຕັ້ງ ເຫັນດີກັບຄືນສູ່ລັດເຊຍ ພາຍຫລັງ 60 ປີຢູ່ພາຍໃຕ້ການຄຸ້ມຄອງຂອງ Ukraina ຖືກຈັດຂຶ້ນໃນວັນທີ 16/3/2015. ກ່າວຄຳເຫັນເນື່ອງໃນໂອກາດນີ້, ທ່ານນາຍົກລັດຖະມົນ Crimea Seigei Aksyonov ໄດ້ຍ້ອງຍໍຂໍ້ຕົກລົງປະຫວັດສາດ ແລະ ຢືນຢັນ ບໍ່ກັບຄືນເປັນສ່ວນຫນຶ່ງຂອງUkraina ຢ່າງເດັດຂາດ.
ລົງທຶນພັດທະນາພື້ນຖານໂຄງລ່າງ, ເສດຖະກິດ, ການປ້ອງກັນຊາດຢ່າງຮອບດ້ານ
ພາຍຫລັງ Crimea ໂຮມເຂົ້າລັດເຊຍ, ບັນດາຂົງເຂດຊີວິດສັງຄົມຂອງ Crimea ໄດ້ມີການປ່ຽນແປງຫລາຍຢ່າງ. ວິວັດທະນາການນຳ Crimea ເຊື່ອມໂຍງເຂົ້າກັບເສດຖະກິດ, ການເງິນ, ສິນເຊື່ອ, ນິຕິກຳຂອງລັດເຊຍ ພວມດຳເນີນໄປຢ່າງຕັ້ງຫນ້າຢູ່ແຫລມ Crimea. ສະກຸນເງິນ ຣຸບ ໄດ້ກາຍເປັນເງິນຕາຂອງ Crimea ພາຍຫລັງກົດໝາຍສະຫະລັດກ່ຽວກັບເລື່ອງໂຮມ Crimea ເຂົ້າລັດເຊຍ ໄດ້ຮັບການໃຫ້ສັດຕະຍາບັນ. ເດືອນ 4/2014, ການປະຕິຮູບລະບົບການສຶກສາໄດ້ປະຕິບັດຢູ່ Crimea ຕາມບັນດາມາດຕະຖານການສຶກສາຂອງລັດເຊຍ. ເງິນເບ້ຍບຳນານ ແລະ ເງິນເດືອນຂອງປະຊາຊົນ Crimea ກໍໄດ້ເພີ່ມຂຶ້ນ. ອັດຕາຫວ່າງງານຢູ່ Crimea ພວມຄ່ອຍໆຫລຸດລົງ. ລັດເຊຍ ໄດ້ວາງແຜນການກໍ່ສ້າງສູນທ່ອງທ່ຽວ ແລະ ບັນເທິງ 11 ແຫ່ງຢູ່ Crimea. ໂຄງການສະຫະລັດພິເສດ ໄດ້ສະຫງວນຈຳນວນເງິນເກືອບ 800 ລ້ານ USD ເພື່ອພັດທະນາພື້ນຖານໂຄງລ່າງພະລັງງານໃຫ້ Crimea.
ເລື່ອງ Crimea ໂຮມເຂົ້າລັດເຊຍ ນັ້ນ, ກໍ່ນຳມາເຊິ່ງການປ່ຽນແປງໃນລະບົບສົ່ງເສີມສຸຂະພາບຢູ່ແຫຼມນີ້ຢ່າງແນ່ນອນ. ຕາມທ່ານຮອງນາຍົກລັດຖະມົນຕີ Crimea, Alla Pashkunova ແລ້ວ, ປະຈຸບັນຊາວ Crimea, ນັບທັງຜູ້ໄດ້ກິນເບ້ຍບຳນານແລ້ວກໍ່ລ້ວນແຕ່ໄດ້ຊົມໃຊ້ການບໍລິການສົ່ງເສີມສຸຂະພາບ ແລະ ການແພດໂດຍບໍ່ຕ້ອງເສຍຄ່າ. ປີ 2015, ອຳນາດການປົກຄອງ Crimea ຈະໃຊ້ເງິນປະມານ 50 ລ້ານ USD ເພື່ອສ້າງບັນດາໂຮງໝໍເປັນທັນສະໄໝ.
ປະຈຸບັນ, ລັດເຊຍ ພວມລົງທຶນເຂົ້າພື້ນຖານໂຄງລ່າງ ແລະ ກໍ່ສ້າງຂະແໜງອຸດສາຫະກຳຂອງ Crimea ຄືນໃໝ່. ບັນດາຮາກຖານຜັກຜ່ອນຢ່ອນອາລົມ, ລະບົບທາງບົກ, ທາງລົດໄຟ, ທໍ່ສົ່ງອາຍແກສເກືອບທັງໝົດຂອງ Crimea ລ້ວນແຕ່ໄດ້ຮັບການກໍ່ສ້າງຄືນໃໝ່. ຄຽງຂ້າງນັ້ນ, ບັນດາອົງການກ່ຽວຂ້ອງຂອງ Crimea ກໍ່ພວມພັດທະນາບັນດາແຜນຮ່າງສະໜອງນຳ້ຈືດໃຫ້ແກ່ເຂດດັ່ງກ່າວ, ພາຍຫຼັງທີ່ອຳນາດການປົກຄອງ Kiev ຕັດແຫຼ່ງສະໜອງນຳ້ຈືດໃຫ້ແກ່ Crimea.
ໄປຄຽງຄູ່ກັບການລົງທຶນພັດທະນາເສດຖະກິດ - ສັງຄົມ, ສະຫະພັນລັດເຊຍ ກໍ່ເພີ່ມທະວີການສ້າງກຳລັງການທະຫານຢູ່ແຫຼມ Crimea ເປັນທັນສະໄໝ. ຕາມທ່ານລັດຖະມົນຕີວ່າການກະຊວງປ້ອງກັນປະເທດລັດເຊຍ Sergei Shoigu ແລ້ວ, ມາຮອດປະຈຸບັນ, ລັດເຊຍ ໄດ້ສ້າງຕັ້ງ 7 ກອງພົນ ແລະ 8 ກອງພັນໃຫຍ່ຢູ່ Crimea ດ້ວຍບັນດາບົດບາດໜ້າທີ່ທີ່ແຕກຕ່າງກັນ. ນອກນັ້ນ, ພາຍຫຼັງໂຮມເຂົ້າລັດເຊຍ, ມີພົນທະຫານກວ່າ 9.000 ຄົນ ແລະ ຊາວ Ukraina 7.000 ຄົນຢູ່ Crimea ຈະເຂົ້າຮ່ວມກອງທັບລັດເຊຍ. ລັດເຊຍ ກໍ່ໄດ້ສົ່ງເຮືອບິນສູ້ຮົບຫຼາຍລຳເຖິງຖານທີ່ໝັ້ນກອງທັບອາກາດ Belbek ຢູ່ Crimea. ລະບົບປ້ອງກັນອາກາດຢູ່ທີ່ນີ້ກໍ່ໄດ້ຮັບລູກສອນໄຟ S -300 PMU ແລະ Pantsi-S1 ລຸ້ນໄໝ່. ຕາມແຜນການ, ກອງທັບເຮືອທະເລດຳ ກໍ່ຈະໄດ້ຮັບກຳ່ປັ່ນຂັບໄລ່ 6 ລຳ, ກຳ່ປັ່ນດຳນຳ້ 6 ລຳ. ນອກນັ້ນ, ບັນດາກຳ່ປັ່ນລູກສອນໄຟ Buyan – M ກໍ່ຖືກສົ່ງເຖິງ Crimea ເປັນປະຈຳ.
ລັດເຊຍຍັງຄົງປະເຊີນໜ້າກັບກຳລັງດັນທີ່ເພີ່ມຂຶ້ນຈາກຝ່າຍຕາເວັນຕົກ
ຕາມຜົນແຫ່ງການຢັ່ງຫາງສຽງຫວ່າງແລ້ວນີ້ ໂດຍສູນຄົ້ນຄ້ວາຫາງສຽງລັດເຊຍ ປະຕິບັດແລ້ວ, ກວ່າ 90% ຈຳນວນຜູ້ຖືກຖາມຊາວ Crimea ໃຫ້ຮູ້ວ່າ, ຖ້າຫາກດຳເນີນການລົງປະຊາມະຕິຄືນໃໝ່, ເຂົາເຈົ້າຍັງຄົງເຫັນດີຕໍ່ເລື່ອງ Crimea ໂຮມເຂົ້າລັດເຊຍ. ເຖິງຢ່າງໃດກໍ່ຕາມ, ຝ່າຍຕາເວັນຕົກພັດຖືການລົງປະຊາມະຕິນີ້ແມ່ນບໍ່ຖືກຕ້ອງຕາມກົດໝາຍ. ສຳລັບເຂົາເຈົ້າແລ້ວ, ເລື່ອງໂຮມ Crimea ເຂົ້າລັດເຊຍ ແມ່ນເຫດການສຳຄັນໃນວິກິດການ Ukraine, ເຮັດໃຫ້ການພົວພັນລະຫວ່າງລັດເຊຍ ແລະ ຝ່າຍຕາເວັນຕົກນັບມື້ນັບເຄັ່ງຕຶງ. ຍາມໃດຝ່າຍຕາເວັນຕົກກໍ່ຖື Crimea ແມ່ນເຄື່ອງມືທີ່ສຳຄັນເພື່ອກໍ່ກຳລັງດັນໃຫ້ລັດເຊຍ. ດ້ວຍຫຼາຍມາດຕະການລົງໂທດຂອງຝ່າຍຕາເວັນຕົກ ພ້ອມກັບເລື່ອງນຳ້ມັນດິບຖືກຕົກລາຄານັ້ນ, ໄດ້ເຮັດໃຫ້ເສດຖະກິດລັດເຊຍ ຕົກເຂົ້າສູ່ສະພາບຊຸດໂຊມ, ຄາດຄະເນວ່າຈະຢູ່ໃນລະດັບ 3 – 5% ໃນປີ 2015. ຫວ່າງແລ້ວນີ້, ອົງການ NATO ພັດກ່າວຫາວ່າ: ລັດເຊຍ ຍັງສືບຕໍ່ສະຫນອງອາວຸດໃຫ້ແກ່ກຳລັງແຍກຕົວອອກຢູ່ພາກຕາເວັນອອກ Ucraine. Nato ກໍຢືນຢັນຫລາຍຄັ້ງວ່າໄດ້ພົບເຫັນ ເຮືອບິນສູ້ຮົບຂອງລັດເຊຍ ລ່ວງລ້ຳເຂດນ່ານຟ້າຂອງບັນດາປະເທດສະມາຊິກ Nato ໃນປີ 2014. ໃນຂະນະທີ່ປະຕິເສດບັນດາຄຳກ່າວຫາຂອງ Nato, ລັດເຊຍ ໄດ້ດຳເນີນການຊ້ອມຮົບຢູ່ຂົ້ວໂລກເຫນືອ ໃນໂອກາດສະຫລີມສະຫລອງ 1 ປີແຫ່ງວັນໂຮມ Crimea ເຂົ້າລັດເຊຍ. ນີ້ແມ່ນຫນຶ່ງໃນບັນດາການໂອ້ອວດກຳລັງໃຫຍ່ສຸດຂອງວັງ Kremlin ນັບແຕ່ເມືອ່ Crimea ໂຮມເຂົ້າລັດເຊຍ. ໃນໂອກາດນີ້, ປະທານາທິບໍດີ ລັດເຊຍ V. Putin ໄດ້ອອກຄຳສັ່ງຈັດວາງແມ່ທັບເຮືອທະເລເຫນືອ ຂຶ້ນກັບກອງທັບເຮືອຂອງປະເທດນີ້ຢູ່ໃນສະພາວະການກຽມພ້ອມສູ້ຮົບສູງສຸດ. ນອກນັ້ນ ແມ່ນການຊ້ອມຮົບດ້ວຍພົນທະຫານ 5000 ຄົນຢູ່ເຂດການທະຫານທາງທິດຕາເວັນອອກ.
ພາຍຫລັງ 1 ປີໂຮມ Crimea ເຂົ້າລັດເຊຍ, Crimea ພວມປ່ຽນແປງແຕ່ລະມື້ ຄ່ອຍໆກາຍເປັນທີ່ໝັ້ນຂອງລັດເຊຍ. ເຖິງວ່າ ສຳລັບອາເມລິກາ ແລະ ເອີລົບ ຍາກທີ່ຈະເຮັດໃຫ້ເຂົາເຂົ້າຮັບຮູ້ເລື່ອງ Crimea ແມ່ນສ່ວນຫນຶ່ງຂອງ ລັດເຊຍ, ແຕ່ຄວາມຈິງແມ່ນຄືແນວນັ້ນ ແລະ ບໍ່ມີສິ່ງໃດສາມາດປ່ຽນແປງສິ່ງດັ່ງກ່າວໄດ້.