(vovworld) - ວຽກງານກະກຽມ, ຕ້ອນຮັບ ແລະ ຈັດຕັ້ງກອງປະຊຸມໃຫຍ່ສະຫະພັນ ລັດຖະສະພາສາກົນ (IPU – 132) ຢູ່ຫວຽດນາມ ໄດ້ສ້າງຄວາມເພິ່ງພໍໃຈຕໍ່ບັນດາສະມາຊິກເຂົ້າຮ່ວມ. ນັ້ນແມ່ນຄວາມຮູ້ສຶກຢ່າງຈິງໃຈຂອງບັນດາສະມາຊິກລັດຖະສະພາ, ທີ່ຕາງໜ້າໃຫ້ 166 ປະເທດໃນໂລກເຂົ້າຮ່ວມ IPU – 132, ເຊິ່ງແມ່ນເຫດການການທູດລັດຖະສະພາໃຫຍ່ສຸດຂອງໂລກທີ່ພວມດຳເນີນຢູ່ຮ່າໂນ້ຍ.
ໃນການເຄື່ອນໄຫວເປັນເວລາ 5 ມື້, ດ້ວຍເກືອບ 70 ເຫດການ, ລວມມີບັນດາວາລະປຶກສາຫາລືຕົ້ນຕໍ ແລະ ການເຄື່ອນໄຫວຢູ່ນອກ IPU – 132 ນັ້ນ, ໄດ້ສ້າງຄວາມປະທັບໃຈອັນດີງາມຕໍ່ເພື່ອນມິດສາກົນ, ກ່ຽວກັບປະເທດຫວຽດນາມ ແຫ່ງສະໜິດສະໜົມ, ສັນຕິພາບ, ຕັ້ງໜ້າ, ເປັນເຈົ້າການ ແລະ ມີຄວາມຮັບຜິດຊອບ.
ພີທີໄຂ IPU 132
ພາບ:baomoi.com
|
ເນື້ອໃນແທດຈິງກັບແຕ່ລະປະເທດ, ແຕ່ລະຊາດ
ບໍ່ພຽງແຕ່ສ້າງຂີດໝາຍດ້ວຍຄວາມປະທັບໃຈຕ່າງໆໃນເບື້ອງຕົ້ນເທົ່ານັ້ນ, ບັນດາຜູ້ແທນໄດ້ຕີລາຄາສູງເນື້ອໃນທີ່ໄດ້ຮັບການກະກຽມໃນ IPU – 132. ບັນດາບັນຫາກ່ຽວກັບບົດບາດຂອງລັດຖະສະພາໃນຂົງເຂດຄວາມປອດໄພທາງອິນເຕີແນດ, ການຄຸ້ມຄອງນຳ້, ກົດໝາຍສາກົນ, ອະທິປະໄຕແຫ່ງຊາດ, ສິດທິມະນຸດ, ຄວາມສະເໝີພາບລະຫວ່າງຍິງຊາຍ, ບັນດາບັນຫາຂອງສະຫະປະຊາຊາດ, ການສົ່ງເສີມສຸຂະພາບຂອງແມ່ ແລະ ເດັກ…ທີ່ໄດ້ຮັບການປຶກສາຫາລືໃນຂອບເຂດ IPU – 132, ແມ່ນບັນດາເນື້ອໃນແທດຈິງທີ່ສຸດສຳລັບລັດຖະສະພາແຕ່ລະປະເທດ. ທ່ານນາງສະມາຊິກລັດຖະສະພາ Hon. Rosaline J. Smith, ສະພາແຫ່ງຊາດ Sierra Leone, ຖືວ່າ:
“ຫວຽດນາມ ເຮັດວຽກງານກະກຽມໃຫ້ກອງປະຊຸມດີທີ່ສຸດ ແລະ ໄດ້ມີການປະກອບສ່ວນຫຼາຍພໍສົມຄວນໃຫ້ແກ່ IPU – 132. ກ່ຽວກັບເນື້ອໃນປຶກສາຫາລື, ຂ້າພະເຈົ້າອາດຢັ້ງຢືນໄດ້ວ່າ, ຫົວຂໍ້ປຶກສາຫາລືຂອງກອງປະຊຸມຄັ້ງນີ້ແມ່ນດີທີ່ສຸດ, ນັ້ນແມ່ນຫັນຄຳເວົ້າເປັນການກະທຳ, ຫັນບັນດາແຜນການ, ບັນດາຄຳໝັ້ນສັນຍາຂອງລັດຖະສະພາໃຫ້ປະກົດຜົນເປັນຈິງ. ຂ້າພະເຈົ້າຮູ້ສຶກປະທັບໃຈທີ່ສຸດຕໍ່ທຸກສິ່ງທຸກຢ່າງເຊິ່ງປະເທດເຈົ້າພາບຫວຽດນາມ ໄດ້ເຮັດໃນ IPU – 132“.
ຫົວຂໍ້ຂອງ IPU – 132 ແມ່ນ “ບັນດາຄາດໝາຍພັດທະນາແບບຍືນຍົງ, ຫັນຄຳເວົ້າເປັນການກະທຳຕົວຈິງ“ ໂດຍຫວຽດນາມ ຍົກອອກນັ້ນ ແມ່ນກົງກັບຈຸດເວລາທີ່ປະຊາຄົມສາກົນ ສະຫຼຸບການປະຕິບັດບັນດາຄາດໝາຍພັດທະນາສະຫັດສະວັດ (MDGs), ຮັບຮອງເອົາໂຄງການດຳເນີນງານພັດທະນາແບບຍືນຍົງ ແລະ ກຳນົດບັນດາຄາດໝາຍໃຫ້ໄລຍະຫຼັງປີ 2015. ສິ່ງດັ່ງກ່າວເຮັດໃຫ້ IPU – 132 ກາຍເປັນກອງປະຊຸມທີ່ແທດຈິງ ແລະ ມີປະສິດທິຜົນກວ່າ. ທ່ານນາງສະມາຊິກລັດຖະສະພາເຢຍລະມັນ Dagmar Freitag, ແບ່ງປັນວ່າ:
“ພວກເຮົາຄວນຮ່ວມມືເພື່ອຫັນຄຳເວົ້າເປັນການກະທຳຕົວຈິງ, ຍ້ອນວ່າມີຫຼາຍບັນຫາບໍ່ສາມາດແກ້ໄຂໃນລະດັບປະເທດໄດ້, ຫາກຕ້ອງມີການຮ່ວມແຮງຮ່ວມໃຈຂອງທັງປະຊາຄົມສາກົນ. ນັ້ນແມ່ນສາຍເຫດເຊິ່ງພວກຂ້າພະເຈົ້າມີໜ້າຢູ່ຮ່າໂນ້ຍເພື່ອພ້ອມກັນແກ້ໄຂບັນດາບັນຫາລວມ. ການເຂົ້າຮ່ວມຂອງ 166 ປະເທດຢູ່ IPU – 132 ແລະ ບັນດາມະຕິທີ່ໄດ້ຮັບການຮັບຮອງເອົານັ້ນຈະເປັນການກະທົບອັນໃຫຍ່ຫຼວງທີ່ສຸດ “.
ກຳລັງຕຳຫລວດປ້ອງກັນຄວາມສະຫງົບໃຫ້ແກ່IPU132
ພາບ:ipuvietnam132
|
ສ່ວນທ່ານ Fans Franken, ສະມາຊິກລັດຖະສະພາຮອນລັງ ຖືວ່າ, ເລື່ອງເລືອກເຟັ້ນຫົວຂໍ້ໄດ້ຮັບຄວາມເຫັນດີເຫັນພ້ອມຈາກບັນດາສະມາຊິກ IPU ແລະສະພາ IPU, ບົນພື້ນຖານຂໍ້ສະເໜີຂອງປະເທດເຈົ້າພາບ. ຫົວຂໍ້ໂດຍຫວຽດນາມ ສະເໜີໃນຄັ້ງນີ້ໄດ້ຮັບການສະໜັບສະໜູນເພາະວ່າມັນເໝາະສົມກັບຄາດໝາຍເຊິ່ງປະຊາຄົມສາກົນພວມມຸ່ງໄປເຖິງ.
“ຂ້າພະເຈົ້າ ຕີລາຄາສູງຫົວເລື່ອງ ພັດທະນາແບບຍືນຍົງທີ່ IPU 132 ຄັ້ງນີ້. ບັນດາບັນຫາບໍ່ພຽງແຕ່ແກ້ໄຂຢູ່ແຕ່ລະປະເທດເທົ່ານັ້ນ ຫາກໄດ້ຮັບການປືກສາຫາລືຢ່າງກວ້າງຂວາງໃນຂອບເຂດທົ່ວໂລກ.”
ຈະແມ່ນສິ່ງທ້າທາຍສຳລັບບັນດາປະເທດຈັດຕັ້ງ IPU ຄັ້ງຕໍ່ໄປ
ບໍ່ພຽງແຕ່ໄດ້ຮັບການຕີລາຄາສູງກ່ຽວກັບວຽກງານກະກຽມເນື້ອໃນໂຄງການດຳເນີນງານເທົ່ານັ້ນ IPU 132 ຢູ່ ຫວຽດນາມ ຍັງສ້າງຄວາມປະທັບໃຈຢ່າງເລິກເຊິ່ງກ່ຽວກັບປະເທດຫນຶ່ງທີ່ມີພື້ນຖານວັດທະນະທຳເຂັ້ມຂົ້ນໄປດ້ວຍສີສັນຊາດ, ໃກ້ຊິດສະຫນິດສະຫນົມ ແລະ ຮັກແພງແຂກ. ໃນຕະຫລອດຊຸມມື້ດຳເນີນກອງປະຊຸມ, ມີຮ້ານວາງສະແດງຜະລິດຕະພັນພື້ນເມືອງທີເຂັ້ມຂົ້ນໄປດ້ວຍສີສັນ 54 ຊົນເຜົ່າ ຫວຽດນາມ ຖືກຈັດຂຶ້ນຢູ່ ສູນກອງປະຊຸມແຫ່ງຊາດ ໄດ້ດຶງດູດຄວາມສົນໃຈຂອງຜູ້ແທນເຂົ້າຮ່ວມເປັນຈຳນວນຫລວງຫລາຍ. ຜູ້ແທນຫລາຍທ່ານ ໄດ້ເລືອກເຟັ້ນໃຫ້ແກ່ຕົນບັນດາຂອງຂວັນພິເສດຂອງຫວຽດນາມ ນັ້ນແມ່ນ ກະເປົາຜະລິດດ້ວຍແພພື້ນເມືອງໂດຍນັກສິລະປະການ ຮ່າຢາງ ຜະລິດ ຫລື ເສື້ອແພໄຫມ ຮ່າດົງ, ຊ້ຳບໍ່ໜຳ ແມ່ນຮູບຖ່າຍກັບບັນດານັກສິລະປະການຫວຽດນາມ. ພິເສດ ລາຍການດົນຕີພື້ນເມືອງ ຫວຽດນາມ ກໍໄດ້ດຶງດູດຄວາມສົນໃຈຈາກຜູ້ແທນສ່ວນຫລາຍທີ່ເຂົ້າຮ່ວມ IPU 132. ທ່ານນາງ Denise Pascal Allende, ສະມາຊິກສະພາແຫ່ງຊາດ ຈີເລ ແບ່ງປັນວ່າ:
“ຂ້າພະເຈົ້າ ນິຍົມດົນຕີ, ສິລະປະ ແລະ ວັດທະນະທຳພື້ນເມືອງຂອງຫວຽດນາມ. ຂ້າພະເຈົ້າມີໂອກາດໄດ້ໄປຢ້ຽມຢາມ ດົງໂມ ເພື່ອເຂົ້າຮ່ວມງານພົບປະແລກປ່ຽນວັດທະນະທຳໃນຂອບເຂດ IPU 132. ນີ້ແມ່ນຈຸດເວລາສ້າງຄວາມປະທັບໃຈຢ່າງເລິກເຊິ່ງກ່ຽວກັບສີສັນວັດທະນະທຳບັນດາເຜົ່າຢູ່ຫວຽດນາມ.”
ເມື່ອໂອ້ລົບກັບນັກຂ່າວ VOV, ທ່ານນາງ Rahayu Saraswati, ສະມາຊິກສະພາແຫ່ງຊາດ ອິນໂດເນເຊຍ ຍ້ອງຍໍການກະກຽມຢ່າງລອບຄອບຖີ່ຖ້ວນຂອງປະເທດເຈົ້າພາບຫວຽດນາມໃຫ້ແກ່ IPU 132 ແລະຢືນຢັນວ່າ: ຍາກທີ່ຈະມີປະເທດໃດສາມາດກະກຽມຈັດກອງປະຊຸມ IPU 132 ດີກວ່າປະເທດຫວຽດນາມໄດ້:
“ຂ້າພະເຈົ້າຄິດວ່າ ຫວຽດນາມ ປະຕິບັດຫລາຍສິ່ງຫລາຍຢ່າງດີທີ່ສຸດ. ນີ້ເປັນຄັ້ງທຳອິດຂ້າພະເຈົ້າມາຫວຽດນາມ ແລະ ຮູ້ສຶກປະທັບໃຈຕໍ່ປະເທດຫວຽດນາມ ທີ່ສະຫນິດສະຫນົມແຮກແພງແຂກຄົນ. ຂ້າພະເຈົ້າຮູ້ສຶກສະບາຍໃຈທີ່ສຸດ ຄືດັ່ງຕົນເອງພວມຢູ່ໃນຄອບຄົວຂອງຕົນແທ້.”
ຮ້ານວາງສະແດງຜະລິດຕະພັນພື້ນເມືອງບັນດາເຜົ່າຢູ່ຫວຽດນາມ
ພາບ:baomoi.com
|
“ຫວຽດນາມ ແມ່ນປະເທດສວຍງາມ ແລະ ສ້າງຄວາມປະທັບໃຈທີ່ສຸດ”. ທ່ານປະທານ IPU Saber Choudhury ໄດ້ຢືນຢັນສິ່ງດັ່ງກ່າວ ເມື່ອແບ່ງປັນຄວາມຮູ້ສຶກ ສຳລັບເລື່ອງ ຫວຽດນາມ ຈັດຕັ້ງ IPU 132. ຕາມທ່ານ Saber Choudhury ແລ້ວ ,ບັນດາການປະກອບສ່ວນຂອງຫວຽດນາມ ທີ່ IPU ຄັ້ງນີ້ ແມ່ນລື່ນກາຍຄວາມມຸ່ງຫວັງຂອງ IPU ທັງແມ່ນສິ່ງທ້າທາຍສຳລັບບັນດາປະເທດຈັດຕັ້ງ IPU ໃນອະນາຄົດ. ສຳລັບຫວຽດນາມ, ອີກຄັ້ງຫນຶ່ງໄດ້ຈັດຕັ້ງເຫດການການທູດຫລາຍຝ່າຍສຳເລັດຜົນ, ຫວຽດນາມ ມີກາລະໂອກາດຕື່ມອີກເພື່ອໂຄສະນາກ່ຽວກັບປະຫວັດສາດ, ວັດທະນະທຳ, ທ່ອງທ່ຽວ, ປະເທດຊາດ ແລະ ຊາວຫວຽດນາມ ກໍຄືການພັດທະນາເສດຖະກິດຂະຫຍັນຂັນເຄື່ອນ, ເພື່ອເປີດບັນດາກາລະໂອກາດຮ່ວມມື, ພັດທະນາໃຫມ່.