(vovworld)- ກອງປະຊຸມສຸດຍອດຄວາມໝັ້ນຄົງ ອາຊີຄັ້ງທີ 12 (Shangri La 12) ເລີ່ມດຳເນີນໃນ ວັນທີ 31/5 ຢູ່ສິງກະໂປ. ໃນຂອບເຂດກອງປະຊຸມ, ຜູ້ຕາງຫນ້າຂອງ 31 ປະເທດຈະເຂົ້າຮ່ວມວາລະປຶກສາຫາລືຄັ້ງຕ່າງໆ, ສຸມໃສ່ບັນດາຫົວເລື່ອງສຳຄັນກ່ຽວກັບການຮ່ວມມືປ້ອງກັນຊາດ, ປ້ອງກັນຄວາມສະຫງົບ ແລະ ສ້າງຄວາມໄວ້ເນື້ອເຊ່ືອໃຈຢູ່ພາກພື້ນ. ພິເສດທີ່ກອງປະຊຸມປີນີ້, ທ່ານນາຍົກລັດຖະມົນຕີຫວຽດນາມ ຫງວຽນເຕີນຢູງ ຈະມີບົດປາໄສໄຂກອງປະຊຸມໃນຖານະແມ່ນນັກປະຖະກະຖາຕົ້ນຕໍຂອງເຫດການສຳຄັນດັ່ງກ່າວ.
ກອງປະຊຸມ Shangri La ໄດ້ຮັບການຈັດຕັ້ງເປັນຄັ້ງທຳອິດເມື່ອປີ 2002 ແລະ ກາຍເປັນເວທີປາໄສປະຈຳປີ ໂດຍມີການເຂົ້າຮ່ວມຂອງບັນດາການນຳ, ນັກວາງແຜນນະໂຍບາຍກ່ຽວກັບການປ້ອງກັນຊາດ, ປ້ອງກັນຄວາມສະຫງົບ ແລະ ບັນດາຜູ້ຊ່ຽວຊານ, ນັກຮຽນຮູ້ມາຈາກຫລາຍປະເທດໃນພາກພື້ນ ອາຊີ ປາຊີຟີກ.
ປີນີ້ ກອງປະຊຸມ Shangri La 12 ໄດ້ດຶງດູດການເຂົ້າຮ່ວມຂອງຜູ້ແທນມາຈາກ 31 ປະເທດ ຊື່ງລວມມີ: ນາຍົກລັດຖະມົນຕີ, ລັດຖະມົນຕີປ້ອງກັນປະເທດ, ລັດຖະມົນຕີການຕ່າງປະເທດ, ຮອງລັດຖະມົນຕີປ້ອງກັນປະເທດ, ຫົວຫນ້າກົມໃຫຍ່ເສນາທິການ, ຜູ້ບັນຊາການກຳລັງປ້ອງກັນຊາດ, ຜູ້ບັນຊາການທະຫານບົກ, ເຫລົ່າທັບ, ວົງການເຈົ້າຫນ້າທີ່ການທູດ, ການປ້ອງກັນຄວາມສະຫງົບ, ບັນດານັກຄົ້ນຄ້ວາ, ນັກຮຽນຮູ້. ເນື້ອໃນຕົ້ນຕໍຂອງ ກອງປະຊຸມ Shangri La 12 ໄດ້ນຳມາປຶກສາຫາລືໃນວາລະປະຊຸມປຶກສາຫາລືພິເສດ 6 ຄັ້ງ ແລະ ວາລະປະຊຸມຄົບຄະນະ 5 ຄັ້ງ ກ່ຽວຂ້ອງເຖິງບັນດາຫົວຂໍ້ຄື: ການສຳພັດຂອງອາເມລິກາສຳລັບຄວາມໝັ້ນຄົງໃນພາກພື້ນ, ການປົກປ້ອງຜົນປະໂຫຍດແຫ່ງຊາດ, ສະກັດກັ້ນການປະທະກັນ, ຫັນການທະຫານເປັນທັນສະໄຫມ ແລະ ຄວາໂປ່ງໃສກ່ຽວກັບຍຸດທະສາດ, ບັນດາທ່າອ່ຽງໃຫມ່ໃນສະພາບແວດລ້ອມຄວາມໝັ້ນຄົງຂອງພາກພື້ນ ອາຊີ ປາຊີຟີກ, ຊຸກຍູ້ການຮ່ວມມືປ້ອງກັນຊາດຢູ່ ອາຊີ ປາຊີຟີກ.
ທ່ານນາຍົກລັດຖະມົນຕີຫວຽດນາມ ຫງວຽນເຕີນຢູງ ຈະມີບົດປາໄສໄຂກອງປະຊຸມ Shangri La 12
ພາບ:internet
|
ໂດຍແມ່ນປະເທດເຂົ້າຮ່ວມ ກອງປະຊຸມ Shangri La 12 ຢ່າງລຽນຕິດ ນັບແຕ່ກອງປະຊຸມຄັ້ງປະຖົມມະເລີກເມື່ອປີ 2002 ມາຮອດປະຈຸບັນ, ຫວຽດນາມ ໄດ້ເປັນເຈົ້າການໃນການຍົກລະດັບພາກສ່ວນເຂົ້າຮ່ວມ ເຈລະຈາ ດ້ວຍຫລາຍຂໍ້ລິເລີ່ມທີ່ຕັ້ງຫນ້າ, ສະເຫນີຄວາມຮັບຜິດຊອບສຳລັບຄວາມໝັ້ນຄົງຂອງພາກພື້ນ, ເປັນຕົ້ນແມ່ນກ່ຽວຂ້ອງເຖິງການຊຸກຍູ້ການພົວພັນຕ່າງປະເທດໃນການປ້ອງກັນຊາດ, ຮັບມືກັບສິ່ງທ້າທາຍສຳລັບຄວາມປອດໄພບົນທະເລ. ຕົວຢ່າງ: ປີ 2008, 2012 ຄະນະຜູ້ແທນຫວຽດນາມ ເຂົ້າຮ່ວມກອງປະຊຸມຂັ້ນຮອງລັດຖະມົນຕີປ້ອງກັນປະເທດ. ປີ 2009, 2010 ແລະ 2011, ຄະນະຜູ້ແທນຫວຽດນາມ ເຂົ້າຮ່ວມກອງປະຊຸມຂັ້ນລັດຖະມົນຕີປ້ອງກັນປະເທດ ພ້ອມທັງມີການພົບປະສອງຝ່າຍກັບບັນດາຄູ່ຮ່ວມມືຫລາຍຄັ້ງ. ແລະກໍທີ່ເວທີປາໄສຄັ້ງນີ້ ຄະນະຜຸູ້ແທນຫວຽດນາມ ມີບົດປະກອບຄຳເຫັນສຳຄັນຫລາຍບົດທີ່ກ່ຽວຂ້ອງເຖິງຄວາມໝັ້ນຄົງ, ການປ້ອງກັນຊາດຂອງພາກພື້ນຄື: ຊຸກຍູ້ການພົວພັນຕ່າງປະເທດໃນການປ້ອງກັນຊາດຢູ່ພາກພື້ນ ອາຊີ ປາຊີຟີກ, ປ່ຽນໃຫມ່ໂຄງປະກອບຄວາມໝັ້ນຄົງພາກພື້ນ”, ການຮັບມືກັບສິ່ງທ້າທາຍສຳລັບຄວາມປອດໄພບົນທະເລ”.
ທີ່ກອງປະຊຸມShangri La 12, ເປັນຄັ້ງທຳອິດ ນາຍົກລັດຖະມົນຕີຫວຽດນາມ ກ່າວຄຳປາໄສຕໍ່ເວທີປາໄສຄວາມໝັ້ນຄົງສາກົນ ກ່ຽວກັບນະໂຍບາຍການທູດ, ຄວາມໝັ້ນຄົງແຫ່ງຊາດກໍຄືນະໂຍບາຍການປ້ອງກັນຊາດຂອງຫວຽດນາມ ໃນສະພາບພາກພື້ນມີເກີດຄວາມເຄັ່ງຕຶງຫລາຍຢ່າງ. ທ່ານນາຍົກລັດຖະມົນຕີ ຈະວາງອອກບັນດາຂໍ້ລິເລ່ີມ, ຮຽກຮ້ອງປະຊາຄົມສາກົນພ້ອມກັນເຂົ້າຮ່ວມການແກ້ໄຂບັນດາສິ່ງທ້າທາຍ, ບົນພື້ນຖານສອດຄ່ອງກັບຜົນປະໂຫຍດລວມຂອງພາກພື້ນ ແລະ ຂອງແຕ່ລະປະເທດ. ຄຳກ່າວປາໄສຂອງຜູ້ນຳຫນ້າລັດຖະບານຫວຽດນາມ ໄດ້ຮັບຖືວ່າແມ່ນການກຳນົດທິດບັນດາເນື້ອໃນຕົ້ນຕໍໃຫ້ແກ່ ກອງປະຊຸມ Shangri La 12.
ຕາມ ດຣ John Chipman ຜູ້ອຳນວຍການໃຫຍ່ບໍລິຫານສະຖາບັນຄົ້ນຄ້ວາຍຸດທະສາດສາກົນ IISS , ຫົວຫນ່ວຍຈັດຕັ້ງ ການເຈລະຈາ Shangri La 12 ແລ້ວ, ການເຂົ້າຮ່ວມຂອງນາຍົກລັດຖະມົນຕີ ຫວຽດນາມ ແລະ ບັນດາທັດສະນະຂອງຫວຽດນາມ ກ່ຽວກັບບັນດາບັນຫາປ້ອງກັນຊາດປະຈຸບັນກໍຄືບັນດາກາລະໂອກາດແກ້ໄຂການປະທະກັນ ຈະເພີ່ມກຳລັງແຮງໃຫ້ແກ່ການປຶກສາຫາລືສຳຄັນກ່ຽວກັບຄວາມໝັ້ນຄົງຂອງພາກພື້ນ. ສາດສະດາຈານ Carlyle A Thayer ຜູ້ຊ່ຽວຊານກ່ຽວກັບອາຊີຕາເວັນອອກສຽງໃຕ້ ຢູ່ວິທະຍາຄານປ້ອງກັນຊາດ ອົດສະຕາລີ ຖືວ່າ: ທຸກບັນຫາກ່ຽວກັບຄວາມໝັ້ນຄົງທີ່ກໍ່ຄວາມວິຕົກກັງວົນຈະໄດ້ຮັບການເຕຶ້ື້ອງເຖິງຢ່າງຄົບຖ້ວນທີ່ເວທີປາໄສຄັ້ງນີ້.
ເລື່ອງທ່ານນາຍົກລັດຖະມົນຕີຫວຽດນາມ ຮັບຄຳເຊີນຂອງລັດຖະບານ ສິງກະໂປ ແລະ ຄະນະຈັດຕັ້ງ ເພື່ອເຂົ້າຮ່ວມ ແລະ ກ່າວຄຳປາໄສທີ່ວາລະໄຂກອງປະຊຸມ Shangri La 12 ໄດ້ສະແດງໃຫ້ເຫັນບົດບາດທີ່ຕັ້ງ, ອິດທິພົນຊື່ສຽງນັບມື້ນັບສູງຂອງຫວຽດນາມ. ສິ່ງດັ່ງກ່າວກໍສະແດງໃຫ້ເຫັນວ່າ: ຫວຽດນາມ ພວມຕັ້ງຫນ້າ, ເຊື່ອມໂຍງ, ພ້ອມແລ້ວ ຮ່ວມມືຢ່າງສະເໝີພາບ, ບົນຈິດໃຈສ້າງສັນ, ເພື່ອສັນຕິພາບ, ຄວາມໝັ້ນຄົງ ແລະ ການພັດທະນາຂອງພາກພື້ນ ແລະ ໂລກ.
11 ປີຜ່ານມາ, ກອງປະຊຸມ Shangri La 12ໄດ້ຮັບການຮັບຮູ້ຈາກວົງການນັກສັງເກດການສາກົນ ແລະ ລັດຖະບານຫລາຍປະເທດວ່າ ແມ່ນເວທີປາໄສສຳຄັນໃນການຍົກອອກບັນດາມາດຕະການສັນຕິພາບ, ຄວາມໝັ້ນຄົງໃຫ້ແກ່ພາກພື້ນອາຊີ ພວມມີການຫັນປ່ຽນຫລາຍຢ່າງ. ການມີຫນ້າຂອງນາຍົກລັດຖະມົນຕີ ຫງວຽນເຕີນຢູງ ດ້ວຍບົດບາດແມ່ນນັກປະຖະກະຖາຕົ້ນຕໍຢູ່ເວທີປາໄສໃຫຍ່ກ່ຽວກັບການປ້ອງກັນຊາດ, ປ້ອງກັນຄວາມສະຫງົບຂອງພາກພື້ນ ເປັນການຢັ້ງຢືນບົດບາດທີ່ຕັ້ງຂອງຫວຽດນາມຕໍ່ປະຊາຄົມໂລກ.