ປະຈຸບັນ, ຫວຽດນາມພວມຢູ່ໃນຈຸດເວລາກ້າວເຂົ້າສູ່ບັນດາສັນຍາການຄ້າ ເສລີ (FTA), ພ້ອມກັນນັ້ນ ແມ່ນບັນດາການຜັນແປໃໝ່ຂອງສະພາບການຄວາມໝັ້ນຄົງໃນພາກພື້ນ ຊຶ່ງໄດ້ ແລະ ພວມສົ່ງຜົນກະທົບໂດຍກົງເຖິງສະພາບແວດລ້ອມແຫ່ງການລົງທຶນຢູ່ຫວຽດນາມ. ເຮັດແນວໃດເພື່ອນຳໃຊ້ກາລະໂອກາດໂດຍບັນດາສັນຍາ FTA ນຳມາໃຫ້ນັ້ນ ? ແລະ ເຮັດແນວໃດເພື່ອສ້າງຄວາມເຊື່ອໝັ້ນເພື່ອທຳການຜະລິດດຳເນີນທຸລະກິດໃຫ້ແກ່ບັນດານັກລົງທຶນຕໍ່ໜ້າຜົນກະທົບຈາກສະພາບການໃໝ່. ນີ້ແມ່ນເນື້ອໃນທີ່ໄດ້ນຳມາປຶກສາຫາລືທີ່ເວທີປາໄສວິສາຫະກິດຫວຽດນາມກາງສະໄໝ 2014 (VBF 2014) ໂດຍກະຊວງແຜນການແລະ ການລົງທຶນຫວຽດນາມ, ອົງການການເງິນສາກົນ ແລະ ທະນາຄານໂລກສົມທົບກັນຈັດຂຶ້ນໃນວັນທີ 5/6 ຢູ່ຮ່າໂນ້ຍ .
ທ່ານນາຍົກລັດຖະມົນຕີຫວຽດນາມ ຫງວຽນເຕິ້ນຢຸງເຂົ້າຮ່ວມ
ເວທີປາໄສວິສາຫະກິດຫວຽດນາມກາງສະໄໝ 2014.
(ພາບ:http://baodientu.chinhphu.vn/)
|
ພ້ອມກັບບັນດາເນື້ອໃນພື້ນຖານຂອງພື້ນຖານເສດຖະກິດຫວຽດນາມຊຶ່ງບັນດານັກລົງທຶນຕ່າງປະເທດຍັງຄົງມີຄວາມສົນໃຈຄື ທະນາຄານ ແລະ ຕະຫຼາດທຶນຮອນ, ການລົງທຶນ ແລະ ການຄ້າ, ພື້ນຖານໂຄງລ່າງ, ແຮງງານ, ວຽກເຮັດງານທຳ, VBF 2014 ສຸມໃສ່ປຶກສາຫາລືບັນດາຜົນກະທົບ, ກາລະໂອກາດ ແລະ ສິ່ງທ້າທາຍຂອງຫວຽດນາມເມື່ອເຂົ້າຮ່ວມບັນດາສັນຍາ FTA ກັບບັນດາຄູ່ຮ່ວມມືໃຫຍ່ໃນໂລກ. ແລະ ຫົວເລື່ອງ VBF 2014 “ ຈາກແຜນການເຖິງການກະທຳ - ການກະກຽມໃຫ້ແກ່ບັນດາສັນຍາການຄ້າໃໝ່ ” ໄດ້ສ່ອງແສງເນື້ອໃນຈິດໃຈຂອງເວທີປາໄສປີນີ້.
ພື້ນຖານນະໂຍບາຍສະເໝີຕົ້ນສະເໝີປາຍໃນການດຶງດູດການລົງທຶນ
ຫວຽດນາມພວມຢູ່ໃນຈຸດເວລາກ້າວເຂົ້າສູ່ບັນດາສັນຍາການຄ້າ ເສລີ FTA ກັບບັນດາ ຄູ່ຮ່ວມມືໃຫຍ່ກວ່າໝູ່ໃນໂລກ, ສັນຍາຄູ່ຮ່ວມມືຂ້າມປາຊີຟິກ TPP ພວມຢູ່ໃນໄລຍະຮີບຮ້ອນປະຕິບັດ. ສັນຍາການຄ້າເສລີຫວຽດນາມ - ສະຫະພາບເອີລົບ (EVFTA) ຄາດວ່າຈະສຳເລັດການເຈລະຈາໃນເດືອນ 10 ປີນີ້. ປະຊາຄົມເສດຖະກິດອາຊຽນພວມຄ່ອຍກ້າວໄປສູ່ຫຼັກໝາຍປີ 2015. ດັ່ງນັ້ນ, ວຽກງານກະກຽມເພື່ອພ້ອມແລ້ວຮັບເອົາບັນດາກາລະໂອກາດກໍຄືຜ່ານຜ່າສິ່ງທ້າທາຍຈາກບັນດາສັນຍາ FTA ຊຶ່ງຖືກວາງອອກໃນຈຸດເວລານີ້ ແມ່ນຮີບດ່ວນກ່ວາເວລາໃດໝົດ.
ຕາມທ່ານ ວູ້ຕ້ຽນໂລກ, ປະທານຫ້ອງການການຄ້າ ແລະ ອຸດສາຫະກຳຫວຽດນາມ VCCI , ປະທານຮ່ວມພັນທະພາບ VBF 2014 ແລ້ວ, ບັນດາມາດຕະການປະຕິຮູບທີ່ສຳຄັນເພື່ອສ້າງສະພາບແວດລ້ອມແຫ່ງການລົງທຶນທີ່ດູດດື່ມໃຫ້ແກ່ບັນດາວິສາຫະກິດຕ່າງປະເທດໂດຍຫວຽດນາມປະຕິບັດໃນໄລຍະທີ່ຜ່ານມານັ້ນ ກໍແມ່ນພື້ນຖານສຳຄັນເພື່ອໃຫ້ຫວຽດນາມສືບຕໍ່ປະຕິຮູບ ສະພາບແວດລ້ອມແຫ່ງການລົງທຶນ, ດຳເນີນທຸລະກິດຢ່າງແຂງແຮງໃນໄລຍະປະຈຸບັນ. ທ່ານ ວູ້ຕ້ຽນໂລກ, ປະທານຫ້ອງການການຄ້າ ແລະ ອຸດສາຫະກຳຫວຽດນາມ ກ່າວວ່າ :
“ ພວກຂ້າພະເຈົ້າໄດ້ສ້າງລະບົບກົດໝາຍໂດຍບໍ່ຈຳແນກການປະພຶດລະຫວ່າງບັນດາວິສາຫະກິດທັງຢູ່ພາຍໃນ ແລະ ຕ່າງປະເທດ. ບັນດາວິສາຫະກິດຕ່າງປະເທດເມື່ອເຂົ້າເຄື່ອນໄຫວຢູ່ຫວຽດນາມໄດ້ຮັບບຸລິມະສິດ, ນະໂຍບາຍຄືກັບ ບັນດາວິສາຫະກິດຢູ່ພາຍໃນປະເທດ. ພວກເຮົາຍັງສົ່ງເສີມການຮ່ວມສຳພັນລະຫວ່າງບັນດາວິສາຫະກິດຕ່າງປະເທດກັບວິສາຫະກິດຫວຽດນາມ. ບັນດາກະຊວງ, ຂະແໜງການ, ທ້ອງຖິ່ນຕ່າງໆຍາມໃດກໍຖືເປັນສຳຄັນການລົງທຶນຂອງຕ່າງປະເທດ ແລະ ໜູນຊ່ວຍແກ່ບັນດາໂຄງການຢ່າງຕັ້ງໜ້າ.
ບັນດາວິທີການແກ້ໄຂບຸກທະລຸ
ເພື່ອສືບຕໍ່ປົວແປງສະພາບແວດລ້ອມແຫ່ງການລົງທຶນ ແລະ ດຳເນີນທຸລະກິດ, ນຳໃຊ້ບັນດາທ່າໄດ້ປຽບເມື່ອເຂົ້າຮ່ວມອົງການການຄ້າໂລກ, ພ້ອມກັບ ບັນດາວິທີການແກ້ໄຂບຸກທະລຸກ່ຽວກັບພື້ນຖານໂຄງລ່າງ, ແຫຼ່ງຊັບພະຍາກອນມະນຸດ, ລະບອບລະບຽບການ, ຫວຽດນາມພວມມີບັນດາບາດກ້າວປະຕິຮູບທີ່ສຳຄັນກ່ຽວກັບການປະຕິຮູບລະບຽບການບໍລິຫານ ຊຶ່ງແມ່ນບັນຫາໜຶ່ງຍັງບໍ່ທັນເຮັດໃຫ້ບັນດານັກລົງທຶນເພິງພໍໃຈ.
ມະຕິເລກທີ 19 ຂອງລັດຖະບານລົງເດືອນ 3/2014 ໄດ້ຮັບຖືວ່າ ແມ່ນບາດກ້າວບຸກທະລຸກ່ຽວກັບການປະຕິຮູບລະບຽບການບໍລິຫານ, ລວມທັງບັນດາວິທີການແກ້ໄຂໂດຍປ່ຽນແປງໃໝ່ ແນໃສ່ຫຼຸດຜ່ອນຄ່າໃຊ້ຈາຍ, ເວລາ, ຄວາມສ່ຽງໃນການເຄື່ອນໄຫວດຳເນີນທຸລະກິດຢູ່ຫວຽດນາມ. ທັງນີ້ກໍເປັນການສ້າງຄວາມເຊື່ອໝັ້ນໃຫ້ແກ່ບັນດານັກລົງທຶນທັງຢູ່ພາຍໃນ ແລະ ຕ່າງປະເທດ.
ເປັນເຈົ້າການສ້າງແຫຼ່ງກຳລັງພາຍໃນການເຄື່ອນໄຫວຜະລິດດຳເນີນທຸລະກິດ
ຕໍ່ໜ້າສະພາບການເສດຖະກິດ- ການເມືອງສືບຕໍ່ມີການຜັນແປຢ່າງສັບສົນນັບແຕ່ຕົ້ນເດືອນ 5 ມາຮອດປະຈຸບັນ. ພາຍຫຼັງທີ່ຈີນໄດ້ຕັ້ງຮ້ານເຈາະນ້ຳມັນໄຮຢາງ 981 ເຂົ້າເຄື່ອນໄຫວໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ, ການເຄື່ອນໄຫວຜະລິດດຳເນີນທຸລະກິດຂອງບັນດານັກລົງທຶນຢູ່ຫວຽດນາມກໍພວມໄດ້ຮັບຜົນສະທ້ອນບໍ່ແມ່ນໜ້ອຍ. ທາງດ້ານເສດຖະກິດ, ຫວຽດນາມພວມຢືນຢູ່ຕໍ່ໜ້າບັນດາຄວາມຮຽກຮ້ອງໃໝ່ໃນການຮັກສາການພົວພັນການຄ້າເປັນປົກກະຕິກັບຈີນ, ພ້ອມກັນນັ້ນ ກໍເພີ່ມທະວີບັນດາມາດຕະການຈຳກັດການອາໄສຕະຫຼາດນີ້.
ເຂົ້າຮ່ວມບັນດາສັນຍາ FTA, ພິເສດແມ່ນດ້ວຍຂອບເຂດເຊື່ອມໂຍງຢ່າງເລິກເຊິ່ງກ້ວາງຂວາງຄືສັນຍາ TPP , ບັນດາຂະແໜງເສດຖະກິດປາຍແຫຼມຂອງຫວຽດນາມຄື ຕຳ່ແຜ່ນຕັດຫຍິບ, ເກີບໜັງ, ສິນໃນນ້ຳ ໄດ້ຮັບການຕີລາຄາວ່າ ແມ່ນບັນດາຂະແໜງທີ່ສາມາດນຳມາເຊິ່ງບັນດາກາລະໂອກາດໃຫຍ່ໃຫ້ແກ່ເສດຖະກິດຂອງປະເທດຊາດ. ເພື່ອເປັນເຈົ້າການໃນການເຄື່ອນໄຫວຜະລິດດຳເນີນທຸລະກິດ, ບັນດາວິສາຫະກິດຢູ່ພາຍໃນພວມມີບັນດາບາດກ້າວເດີນທີ່ແທດເໝາະ, ຍົກສູງຄວາມສາມາດແກ່ງແຍ້ງ, ເປີດກ້ວາງຂອບຂະໜາດລົງທຶນ, ເປັນເຈົ້າຕົ້ນເອງໃນການຊອກຫາແຫຼ່ງວັດຖຸດິບ. ທ່ານເລຕ້ຽນເຈືອງ ຮອງຜູ້ອຳນວຍການໃຫຍ່ກຸ່ມບໍລິສັດຕຳ່ແຜ່ນຕັດຫຍິບຫວຽດນາມໃຫ້ຮູ້ວ່າ :
“ ຂະແໜງ ຕຳ່ແຜ່ນຕັດຫຍິບຫວຽດນາມໄດ້ເປັນເຈົ້າການໃນການລົງທຶນຕື່ມອີກໃນການຜະລິດວັດຖຸດິບ. ມາຮອດຈຸດເວລານີ້, ພວກເຮົາສາມາດເປັນເຈົ້າການໃນການຜະລິດເສັ້ນຝ້າຍ. ພ້ອມກັນນັ້ນ, ກໍພວມຕັ້ງໜ້າກະກຽມໃຫ້ແກ່ຂົງເຂດຕຳ່ແຜ່ນທໍໄໝເພື່ອມີອັດຕາສ່ວນແຜ່ນແຜ່ຮັບໃຊ້ຂະແໜງຕັດຫຍິບໃຫ້ດີກ່ວາ. ດ້ວຍຜົນກະທົບຈາກ TPP , ພວກຂ້າພະເຈົ້າປາດຖະໜາວ່າ ເຖິງປີ 2015 ແນ່ນອນວ່າ ພວກເຮົາຈະລື່ນກາຍ 60% ອັນຕາສ່ວນຜະລິດຕະພັນເຄື່ອງຕ່ຳແຜ່ນຕັດຫຍິບຫວຽດນາມໃນທ້ອງຕະຫຼາດ”
ປະຈຸບັນ, ຫວຽດນາມມານະພະຍາຍາມປະຕິຮູບຢ່າງແຂງແຮງເພື່ອບໍ່ພາດໂອກາດໂດຍການເຊື່ອມໂຍງເຂົ້າກັບສາກົນນຳມາໃຫ້. VBF 2014 ແນ່ນແນວ່າແມ່ນແຫ່ງເພື່ອສົນທະນາທີ່ສຳຄັນລະຫວ່າງລັດຖະບານຫວຽດນາມ ແລະ ບັນດານັກລົງທຶນ, ແນໃສ່ຈຸດປະສົງສ້າງ ສະພາບແວດລ້ອມແຫ່ງການດຳເນີນທຸລະກິດທີ່ສະດວກ, ຊຸກຍູ້ການພັດທະນາເສດຖະກິດແບບຍືນຍົງຢູ່ຫວຽດນາມ.