(vovworld)- ຫນຶ່ງໃນບັນດາເນື້ອໃນສຳຄັນຊື່ງໄດ້ຮັບການປຶກສາຫາລືທີ່ກອງປະຊຸມຄັ້ງທີ 4 ຄະນະບໍລິຫານງານສູນກາງພັກກອມມູນິດຫວຽດນາມ ຊຸດທີ 12 ພວມດຳເນີນຢູ່ ຮ່າໂນ້ຍ ນັ້ນແມ່ນ “ເພີ່ມທະວີການກໍ່ສ້າງ, ປັບປຸງພັກ; ສະກັດກັ້ນ, ຍູ້ການເສື່ອມເສຍແນວຄິດການເມືອງ, ຄຸນສົມບັດ, ແບບແຜນການດຳລົງຊີວິດ, ປະກົດການ “ການຜັນແປເອງ”, “ການຫັນປ່ຽນເອງ”ພາຍໃນໃຫ້ຖອຍໄປ. ຫາງສຽງ ມະຫາຊົນ ກໍມີຄວາມເຫັນດີເຫັນພ້ອມ ດ້ວຍຫນ້າທີ່ກໍ່ສ້າງ, ປັບປຸງພັກ ເພາະວ່ານີ້ແມ່ນບັນຫາມີຄວາມເປັນຕາຍຂອງພັກ ແລະ ການຄົງຕົວຂອງລະບອບ.
ກອງປະຊຸມສູນກາງພັກຄັ້ງທີ 4 ຊຸດທີ 12
ພາບ:nguoilaodong
|
ເມື່ອເຕື້ອງເຖິງເນື້ອໃນກໍ່ສ້າງ, ປັບປຸງພັກ, ທີ່ກອງປະຊຸມສູນກາງພັກຄັ້ງທີ 4 ຊຸດທີ 12, ທ່ານເລຂາທິການໃຫຍ່ ຫງວຽນຟູຈ້ອງ ໄດ້ເນັ້ນຫນັກວ່າ: ການຊີ້ນຳນຳພາຂອງພັກ ແມ່ນປະຖົມປັດໃຈຕົ້ນຕໍເພື່ອຕັດສິນຊີ້ຂາດທຸກໄຊຊະນະຂອງການປະຕິວັດຫວຽດນາມ. ການກໍ່ສ້າງ, ປັບປຸງພັກ ຍາມໃດກໍແມ່ນຫນ້າທີ່ສຳຄັນພິເສດ, ມີຄວາມໝາຍເປັນຕາຍສຳລັບພັກ, ລະບອບ. ກອງປະຊຸມຄັ້ງນີ້ ຈະວາງອອກມະຕິກ່ຽວກັບການເພີ່ມທະວີການກໍ່ສ້າງ, ປັບປຸງພັກ, ສະກັດກັ້ນ, ຍູ້ການເສື່ອມເສຍແນວຄິດການເມືອງ, ຄຸນສົມບັດ, ແບບແຜນການດຳລົງຊີວິດ, ປະກົດການ “ການຜັນແປເອງ”, “ການຫັນປ່ຽນເອງ”ພາຍໃນໃຫ້ຖອຍໄປ.
ກ່ອນຫນ້ານັ້ນ, ທີ່ບັນດາກອງປະຊຸມໃຫຍ່ຂອງພັກ ຊຸດທີ 8, 9, 10 ແລະ 11, ພັກກອມມູນິດຫວຽດນາມ ກໍໄດ້ເນັ້ນຫນັກຢ່າງແຮງເຖິງຄວາມຈຳເປັນຕ້ອງສະກັດກັ້ນ, ຍູ້ ສະພາບເສື່ອມເສຍແນວຄິດການເມືອງ, ຄຸນສົມບັດ, ແບບແຜນການດຳລົງຊີວິດໃນສະມາຊິກພັກໃຫ້ຖອຍໄປ.
ຫນ້າທີ່ສຳຄັນເປັນປະຈຳຂອງພັກກອມມູນິດຫວຽດນາມ
ແຜນຮ່າງເພີ່ມທະວີການກໍ່ສ້າງ, ປັບປຸງພັກ ໂດຍຄະນະບໍລິຫານງານສູນກາງພັກ ໄດ້ຜັນຂະຫຍາຍກໍ່ສ້າງ ແລະ ໄດ້ຮັບການປຶກສາຫາລືທີ່ກອງປະຊຸມຄັ້ງນີ້ ໄດ້ຢືນຢັນ:ເພື່ອຍົກສູງກຳລັງຄວາມສາມາດການຊີ້ນຳນຳພາ ແລະ ກຳລັງຕໍ່ສູ້, ພັກກອມມູນິດຫວຽດນາມ ໄດ້ມີການປ່ຽນແປງໃຫມ່, ປັບປຸງເປັນປະຈຳ ແລະ ຖືເປັນສຳຄັນການກໍ່ສ້າງພັກກ່ຽວກັບການເມືອງ, ແນວຄິດ, ການຈັດຕັ້ງ ແລະ ບັນລຸໄດ້ໝາກຜົນສຳຄັນຫລາຍຢ່າງ. ເຖິງຢ່າງໃດກໍຕາມ, ວຽກງານກໍ່ສ້າງພັກ ຍັງມີຂໍ້ຈຳກັດຫລາຍຢ່າງ. ສະພາບການເສື່ອມເສຍດ້ານແນວຄິດການເມືອງ, ຄຸນສົມບັດ, ແບບແຜນການດຳລົງຊີວິດ ແລະ ບັນດາປະກົດການອາດຍາສິດ, ການສໍ້ລາດບັງຫລວງ, ການຟຸມເຟືອຍ, ການສະແຫວງຫາຜົນປະໂຫຍດເປັນກຸ່ມໃນພາກສ່ວນຫນຶ່ງຂອງພະນັກງານ, ສະມາຊິກພັກບໍ່ແມ່ນຫນ້ອຍ, ໃນນັ້ນ ມີການນຳ, ຜູ້ຄຸ້ມຄອງ ແລະ ຫົວຫນ້າຂັ້ນຕ່າງໆບໍ່ທັນໄດ້ຮັບການສະກັດກັ້ນ, ຍູ້ໃຫ້ຖອຍໄປ . ດ້ານອື່ນ, ການຈັດຕັ້ງປະຕິບັດບັນດາມະຕິຂອງສູນກາງກ່ຽວກັບການກໍ່ສ້າງ, ປັບປຸງພັກ ຍັງບໍ່ທັນບັນລຸຄາດໝາຍ, ຄຳຮຽກຮ້ອງຕ້ອງການທີ່ໄດ້ວາງອອກ.
ຈາກຂໍ້ສັງເກດດັ່ງກ່າວ, ແຜນຮ່າງເພີ່ມທະວີການກໍ່ສ້າງ, ປັບປຸງພັກ ໄດ້ເຕື້ອງເຖິງການປ່ຽນໃຫມ່ວິທີການຊີ້ນຳນຳພາ, ບູລະນະການຈັດຕັ້ງກົງຈັກຂອງພັກ, ກົນໄກເຄື່ອນໄຫວ, ວຽກງານພະນັກງານ, ກຳນົດບາງບັນຫາໃຫມ່ ແລະ ວາງອອກບາງມາດຕະການບຸກທະລຸໃນວຽກງານກໍ່ສ້າງ, ປັບປຸງພັກໃນສະພາບການປະຈຸບັນ.
ຫາງສຽງສັງຄົມມີຄວາມເຫັນດີເຫັນພ້ອມກັບຄວາມຕັດສິນໃຈດ້ານການເມືອງຂອງພັກ
ຫາງສຽງພະນັກງານສະມາຊິກພັກ, ປະຊາຊົນ ມີຄວາມເຊື່ອໝັ້ນຕໍ່ຄວາມຕັດສິນໃຈດ້ານການເມືອງຂອງສູນກາງພັກ ໃນວຽກງານກໍ່ສ້າງ, ປັບປຸງພັກ, ເຮັດແນວໃດໃຫ້ພັກມີຄວາມປອດໃສ, ໝັ້ນຄົງເຂັ້ມແຂງ, ຍົກສູງກຳລັງຄວາມສາມາດ, ກຳລັງຕໍ່ສູ້ຂອງພັກ. ຫາງສຽງກໍຍົກອອກຫລາຍຄຳເຫັນ.
ເພື່ອສະກັດກັ້ນ, ຍູ້ສະພາບເສື່ອມເສຍກ່ຽວກັບແນວຄິດດ້ານການເມືອງ, ຄຸນສົມບັດແບບການດຳລົງຊີວິດ, ທ່ານຮອງສາດສະດາຈານ, ປອ ຟານມີງເຕີນ, ຮອງປະທານສະຫະພັນບັນດາສະມາຄົມວິທະຍາສາດເຕັກນິກນະຄອນ ໂຮ່ຈິມີນ ຖືວ່າ: ສິດອຳນາດຕ້ອງໄດ້ຮັບການຄວບຄຸມຢ່າງແຫນ້ນແຟ້ນ, ບໍ່ປະໃຫ້ເກີດການສໍ້ລາດບັງຫລວງ. ມີທັດສະນະເຊັນດຽວກັນ, ທ່ານ ຫງວຽນຕຸກ, ກຳມະການຄະນະປະທານຄະນະກຳມະການສູນກາງແນວໂຮມປະເທດຊາດຫວຽດນາມ ເນັ້ນຫນັກເຖິງບົດບາດຂອງຜູ້ນຳຫນ້າໃນວຽກງານປ້ອງກັນ ແລະ ຕ້ານການສໍ້ລາດບັງຫລວງ, ປະກົດການຫຍໍ້ທໍ້.
“ໃນສະພາບການປະຈຸບັນ, ສຳລັບບັນດາຜູ້ນຳຫນ້າ, ນອກຈາກສຳເລັດຫນ້າທີ່ທີ່ໄດ້ຮັບການມອ ບໝາຍເປັນຢ່າງດີແລ້ວ, ຕົວເອງ ຕ້ອງຮັກສາຈິດໃຈໂປ່ງໃສ. ສິດຜົນປະໂຫຍດທີ່ໄດ້ຮັບຕ້ອງເປີດເຜີຍ”
ຫາງສຽງກໍຖືວ່າ ສະມາຊິກພັກແຕ່ລະຄົນ ຕ້ອງມີຈິດໃຈຕ້ານຄືນປະກົດການ “ຜັນແປເອງ”, “ຫັນປ່ຽນເອງ”, ພ້ອມທັງຄວນມີກົນໄກຄວບຄຸມສິດອຳນາດ, ສຳເລັດລະບອບນະໂຍບາຍເພື່ອຕ້ານຄືນການເສື່ອມທາດຂາດຄຸນໃນໝູ່ພະນັກງານ, ສະມາຊິກພັກ.
ມີຄຳເຫັນຫລາຍຢ່າງກໍຖືວ່າ: ການກໍ່ສ້າງ ແລະ ປັບປຸງພັກ ປະຈຸບັນຄວນມີກົນໄກຄວບຄຸມສິດອຳນາດ, ສ້າງລະບອບໃຫ້ສຳເລັດເພື່ອຕ້ານຄືນການເສື່ອມເສຍໃນພະນັກງານ, ສະມາຊິກພັກ. ຖ້າຫາກບໍ່ສ້າງກົນໄກຄວບຄຸມສິດອຳນາດ, ການເສື່ອມທາດຂາດຄຸນໃນພັກຂອງພະນັກງານ, ສະມາຊິກພັກ, ອາດຈະເກີດຂຶ້ນ. ຮອງສາດສະດາຈານ, ປອ ຫງວຽນຈ້ອງຟຸກ, ສະຖາບັນການເມືອງແຫ່ງຊາດໂຮ່ຈິມີນ ຖືວ່າ:
“ການຄວບຄຸມສິດອຳນາດໃນເງື່ອນໄຂພັກກຳອຳນາດ, ລັດແຫ່ງອຳນາດກົດໝາຍ. ຫວ່າງແລ້ວນີ້ ການຄວບຄຸມປະຕິບັດບໍ່ທັນໄດ້ຄືຄາດໝາຍວາງອອກ. ການຄວບຄຸມຍັງແມ່ນບັນຫາໃຫຍ່. ເຮັດແນວໃດບົດບາດຂອງພັກກຳອຳນາດ ພັກຕ້ອງເປັນຜູ້ຕິດຕາມກວດກາ, ຄວບຄຸມເປັນຢ່າງດີ. ໃນກົງຈັກລັດ ອຳນາດນິຕິບັນຍັດ, ອຳນາດຕຸລາການ, ອຳນາດບໍລິຫານ ຕ້ອງຄວບຄຸມສິດອຳນາດເປັນຢ່າງດີ.”
ການກໍ່ສ້າງ, ປັບປຸງພັກ ແມ່ນຫນ້າທີ່ຫລັກແຫລ່ງ, ໄດ້ຮັບການປະຕິບັດໃນໄລຍະຍາວ. ດ້ວຍຄວາມຕັດສິນໃຈດ້ານການເມືອງໃນທົ່ວພັກ, ຄວາມເອົາໃຈໃສ່, ຕິດຕາມກວດກາຂອງຫາງສຽງ, ກິດຈະການນີ້ຈະບັນລຸຄາດໝາຍກໍ່ສ້າງພັກນັບມື້ນັບໝັ້ນຄົງເຂັ້ມແຂງ. ນີ້ກໍແມ່ນປັດໄຈສຳຄັນເພື່ອໃຫ້ຫວຽດນາມ ສືບຕໍ່ປະຕິບັດບັນດາຍຸດທະສາດກໍ່ສ້າງ, ພັດທະນາປະເທດຊາດໃຫ້ສຳເລັດຜົນ.