ຂະຫຍາຍສະມາຊິກພັກ ແມ່ນໜຶ່ງໃນບັນດາເນື້ອໃນທີ່ສຳຄັນຂອງວຽກງານກໍ່ສ້າງພັກ, ມີຄວາມໝາຍຕັດສິນຊີ້ຂາດຕໍ່ການຄົງຕົວ ແລະ ພັດທະນາຂອງພັກກອມມູນິດຫວຽດນາມ. ປະຈຸບັນ, ສະເລ່ຍໃນແຕ່ລະປີມີຊາວໜຸ່ມດີເດັ່ນແຕ່ 120.000 ຫາ 125.000 ຄົນໄດ້ຮັບເຂົ້າເປັນ ສະມາຊິກພັກ.
ຂະຫຍາຍສະມາຊິກພັກ ແມ່ນໜຶ່ງໃນບັນດາເນື້ອໃນທີ່ສຳຄັນຂອງວຽກງານກໍ່ສ້າງພັກ |
ຄວາມຈິງໃນ 85 ປີທີ່ຜ່ານມາ, ນັບແຕ່ເວລາ ພັກກອມມູນິດຫວຽດນາມໄດ້ຮັບການສ້າງຕັ້ງຂຶ້ນເມື່ອວັນທີ 3/2/1930 ມາຮອດປະຈຸບັນ, ຢູ່ຫວຽດນາມມີພຽງພັກການເມືອງດຽວເທົ່ານັ້ນ, ນັ້ນແມ່ນ ພັກກອມມູນິດຫວຽດນາມຊຶ່ງມີຄຸນນະທາດ, ພູມປັນຍາ, ບົດຮຽນ, ອິດທິພົນຊື່ສຽງ ແລະ ຄວາມສາມາດນຳພາປະເທດຊາດຜ່ານຜ່າທຸກຄວາມຫຍຸ້ງຍາກ, ການທົດສອບນາໆປະການເພື່ອນຳກຽດອັນສະຫງ່າມາສູ່ຊາດຫວຽດນາມ. ເພື່ອສືບທອດພາລະກຳອັນສຳຄັນນີ້, ພັກໄດ້ຂະຫຍາຍກຳລັງຢ່າງບໍ່ຢຸດຢັ້ງ, ນັ້ນແມ່ນລຸ່ນຊາວໜຸ່ມທີ່ດີເດັ່ນ.
ເອົາໃຈໃສ່ເຖິງກຳລັງນັກຮຽນ, ນັກສຶກສາ
ໂດຍໄດ້ຮັບເຂົ້າເປັນສະມາຊິກພັກ ນັບແຕ່ເວລາຍັງເປັນນັກຮຽນສາມັນ, ກ່ຽວແອງ ນັກສຶກສາສັງກັດມະຫາວິທະຍາໄລແພດສາດຮ່າໂນ້ຍ, ຍາມໃດກໍເຫັນວ່າ ນີ້ທັງແມ່ນຄວາມເປັນກຽດ, ທັງແມ່ນກຳລັງຊຸກຍູ້ເພື່ອໃຫ້ຕົນເອງພະຍາຍາມຝຶກຝົນຫຼໍ່ຫຼອມຫຼາຍກ່ວາອີກໃນການຮ່ຳຮຽນ ແລະ ວິຖີຊີວິດ. ນັບແຕ່ເວລາເລີ່ມເຂົ້າຮຽນຢູ່ມະຫາວິທະຍາໄລ, ກ່ຽວແອງໄດ້ເຂົ້າເປັນສະມາຊິກໃນຄະນະບໍລິຫານງານສະມາຄົມນັກສຶກສາມະຫາວິທະຍາໄລແພດສາດຮ່າໂນ້ຍ, ຈັດຕັ້ງບັນດາຂະບວນການອາສາສະໝັກໃຫ້ແກ່ນັກສຶກສາໃນໂອກາດບັນດາວັນບຸນໃຫຍ່. ກ່ຽວແອງໃຫ້ຮູ້ວ່າ :
“ ໂດຍໄດ້ກາຍເປັນສະມາຊິກພັກມາເປັນເວລາເກືອບ 5 ປີ, ໄດ້ພາໃຫ້ຂ້າພະເຈົ້າມີກຳລັງຊຸກຍູ້ເພື່ອພະຍາຍາມສູ້ຊົນ. ເມື່ອເຂົ້າຮ່ວມການດຳເນີນຊີວິດພັກ, ຂ້າພະເຈົ້າໄດ້ເຂົ້າຮ່ວມບັນດາຊຸດອົບຮົມການເມືອງ, ຜັນຂະຫຍາຍບັນດາມະຕິຂອງພັກ. ຜ່ານນັ້ນ, ຂ້າພະເຈົ້າມີໂອກາດໄດ້ຝຶກຝົນຫຼໍ່ຫຼອມທາງດ້ານເຈດຈຳນົງ, ຄຸນນະທາດປະຕິວັດ, ທິດສະດີການເມືອງ, ດັ່ງນັ້ນ ຈີນຕະນາການ, ຄວາມນຶກຄິດຂອງຕົນກໍໜັກແໜ້ນກວ່າ”
ເພີ່ມທະວີບົດບາດຂອງຄະນະຊາວໜຸ່ມກອມມູນິດໂຮ່ຈິມິນ
ໄລຍະທີ່ຜ່ານມາ, ຄະນະຊາວໜຸ່ມກອມມູນິດໂຮ່ຈິມິນໄດ້ຍູ້ແຮງບັ້ນຂົນຂວາຍ “ຊາວໜຸ່ມສູ້ຊົນກາຍເປັນ ສະມາຊິກພັກກອມມູນິດຫວຽດນາມ”. ທ່ານດັ້ງກ໋ວກຕວານ ເລຂາສູນກາງຊາວໜຸ່ມກອມມູນິດໂຮ່ຈິມິນ ໃຫ້ຮູ້ວ່າ ສະເລ່ຍໃນແຕ່ລະປີມີຊາວໜຸ່ມດີເດັ່ນແຕ່ 120.000 ຫາ 125.000 ຄົນໄດ້ຮັບເຂົ້າເປັນສະມາຊິກພັກກອມມູນິດຫວຽດນາມ, ກວມກວ່າ 60%ຍອດຈຳນວນສະມາຊິກພັກທີ່ຫາກໍໄດ້ຮັບເຂົ້າເປັນສະມາຊິກພັກ. ໝາກຜົນນີ້ໄດ້ສະແດງໃຫ້ເຫັນວ່າ ວຽກງານບຳລຸງຊາວໜຸ່ມຜູ້ດີເດັ່ນເພື່ອແນະນຳໃຫ້ໜ່ວຍພັກພິຈາລະນາຮັບເຂົ້າເປັນສະມາຊິກ ແມ່ນໄດ້ຮັບການປະຕິບັດຈາກຄະນະຊາວໜຸ່ມຂັ້ນຕ່າງໆຢ່າງມີປະສິດທິຜົນ. ໃນໄລຍະທີ່ຈະມາເຖິງ, ບັນດາອົງການຊາວໜຸ່ມຂັ້ນຮາກຖານຈະເປີດກ້ວາງເປົ້າໝາຍເພື່ອ ຮັບເຂົ້າເປັນສະມາຊິກພັກ ນັ້ນແມ່ນກຳມະກອນລັດຖະກອນ, ກຳລັງປະກອບອາວຸດ, ພ້ອມທັງເພີ່ມທະວີການບຳລຸງ ຊາວໜຸ່ມຜູ້ດີເດັ່ນທີ່ເປັນກຳມະກອນພວມເຮັດວຽກຢູ່ຕາມບໍລິສັດເອກະຊົນ. ທ່ານດັ້ງກ໋ວກຕວານ ເລຂາສູນກາງຊາວໜຸ່ມກອມມູນິດໂຮ່ຈິມິນ ໃຫ້ຮູ້ວ່າ :
“ ໃນວຽກງານສຶກສາອົບຮົມຊາວໜຸ່ມ, ສູນກາງຊາວໜຸ່ມ ແລະ ບັນດາຄະນະຊາວໜຸມກອມມູນິດໂຮ່ຈິມິນ ຂັ້ນແຂວງ, ນະຄອນ ສືບຕໍ່ຜັນຂະຫຍາຍແຜນຮ່າງເພີ່ມທະວີການສຶກສາອຸດົມການປະຕິວັດ ແລະ ຄຸນສົມບັດ, ວິຖີຊີວິດໃຫ້ແກ່ຊາວໜຸ່ມເຍົາວະຊົນ. ໂດຍຜ່ານພຶດຕິກຳຈັດຕັ້ງບັນດາຂະບວນການເພື່ອໃຫ້ພວກເພື່ອນມີເງື່ອນໄຂລົງຕົວຈິງ, ຝຶກຝົນຫຼໍ່ຫຼອມຜ່ານພຶດຕິກຳເພື່ອອຸທິດສ່ວນເຫື່ອແຮງຂອງຕົນ.
ເຖິງວ່າຈະຢູ່ໃນໄລຍະປະຕິວັດໃດກໍຕາມ, ໄວໜຸ່ມຫວຽດນາມຍາມໃດກໍແມ່ນກຳລັງນຳໜ້າໃນການກໍ່ສ້າງ ແລະ ປົກປັກຮັກສາປະເທດຊາດ. ຍ້ອນເຫດນີ້ເອງ, ຄະນະຊາວໜຸ່ມກອມມູນິດໂຮ່ຈິມິນຕ້ອງປ່ຽນໃໝ່ດ້ານເນື້ອໃນ, ແບບວິທີການເຄື່ອນໄຫວຢ່າງບໍ່ຢຸດຢັ້ງ, ສ້າງຄວາມສາມັກຄີ, ເຕົ້າໂຮມຊາວໜຸ່ມດ້ວຍຫຼາຍຮູບການ, ຖ່າຍທອດອຸດົມການປະຕິວັດ ເພື່ອໃຫ້ເຂົາເຈົ້າເຫັນວ່າ ເຂົ້າເປັນສະມາຊິກພັກ ແມ່ນຈຸດໝາຍບຸລິມະສິດໃນໄລຍະເວລາເປັນໄວໜຸ່ມ. ທ່ານ ຫງວຽນມິນຕ້ວນ ຫົວໜ້າສະຖາບັນກໍ່ສ້າງພັກ ເນັ້ນໜັກວ່າ :
“ ກ່ອນອື່ນໝົດ, ພວກເຮົາຕ້ອງໂຄສະນາໃຫ້ຊາວໜຸ່ມກ່ຽວກັບຈຸດໝາຍ, ອຸດົມການ, ວິຖີຊີວິດ. ສິ່ງນີ້ບໍ່ມີລັກສະນະນາມທຳ, ແຕ່ລຽບງ່າຍທີ່ສຸດ ໝາຍຄວາມວ່າ ພັກໄດ້ນຳມາເຊິ່ງຊີວິດທາງດ້ານວັດຖຸ ແລະ ຈິດໃຈມາໃຫ້ປະຊາຊົນ, ໝູ່ບ້ານ, ອົງການສຳນັກງານຂອງຕົນ ”
ນັບແຕ່ເວລາໄດ້ຮັບການສ້າງຕັ້ງ, ພັກກອມມູນິດຫວຽດນາມໄດ້ຮັບເອົາຊາວໜຸ່ມບັນດາຜູ້ດີເດັ່ນເຂົ້າເປັນສະມາຊິກພັກ ເພື່ອໃຫ້ເຂົາເຈົ້າໄດ້ຝຶກຝົນຫຼໍ່ຫຼອມ, ຜ່ານການທົດສອບໃນພຶດຕິກຳຕົວຈິງ ເພື່ອກາຍເປັນພະນັງານການນຳຂອງປະເທດຊາດ. ພາຍຫຼັງ 85 ປີແຫ່ງການສ້າງຕັ້ງ ແລະ ຂະຫຍາຍຕົວ, ພັກກອມມູນິດຫວຽດນາມຍັງຄົງສືບຕໍ່ຂະຫຍາຍຖັນແຖວ ສະມາຊິກພັກ ຊຶ່ງແມ່ນໄວໜຸ່ມທີ່ສຸດຈິດສຸດໃຈກັບວຽກງານເພື່ອໃຫ້ ພັກກອມມູນິດຫວຽດນາມຍືນຍົງຄົງຕົວພ້ອມກັບຊາດຕະຫຼອດໄປ.