ກໍ່ສ້າງພັກກອມມູນິດ ຫວຽດນາມ ເປັນພັກປະຕິວັດສັດຈະທຳຢ່າງແທ້ຈິງ.

ວັນຈັນ ທີ 5 ມີນາ ຄ.ສ. 2012 | 16:36:47

ກອງປະຊຸມຄະນະບໍລິຫານງານສູນກາງພັກຄັ້ງທີ 4 ຊຸດທີ 11
ພາບປະກອບຈາກ internet

(vovworl) - ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ຫາກໍເຊັນປະກາດໃຊ້ມະຕິກອງປະຊຸມຄະນະບໍລິຫານງານສູນກາງພັກຄັ້ງທີ 4 ຊຸດທີ 11 ພາຍໃຕ້ຫົວຂໍ້ວ່າ: ບາງບັນຫາຮີບດ່ວນກ່ຽວກັບການກໍ່ສ້າງພັກປະຈຸບັນ. ມະຕິດັ່ງກ່າວໄດ້ເນັ້ນຫນັກເຖິງ 4 ໝວດມາດຕະການສຳຄັນກ່ຽວກັບການກໍ່ສ້າງພັກໃນສະພາບປະຈຸບັນ.

ເປີດສາກ, ມະຕິສະບັບນີ້ໄດ້ຢືນຢັນເຖິງບົດບາດອັນໃຫຍ່ຫລວງຂອງພັກກອມມູນິດຫວຽດນາມໃນກວ່າ 80 ປີຜ່ານມາ ເຊິ່ງໄດ້ນຳພາ, ຈັດຕັ້ງ ແລະ ເສີມ ຂະຫຍາຍກຳລັງແຮງອັນໃຫຍ່ຫລວງຂອງທົ່ວພັກ, ທົ່ວປວງຊົນ, ທົ່ວກອງທັບ ຍາດໄດ້ໄຊຊະນະຍິ່ງໃຫຍ່ໃນພາລະກິດປະຕິວັດ. ນັບແຕ່ເມື່ອປະຕິບັດແນວທາງການປ່ຽນແປງໃຫມ່, ມີແຜນນະໂຍບາຍ, ມະຕິກ່ຽວກັບການກໍ່ສ້າງ, ປັບປຸງພັກຫລາຍສະບັບໄດ້ຮັບການປະກາດໃຊ້. ພ້ອມກັບເລື່ອງບັນລຸໝາກຜົນຕັ້ງຫນ້າຫລາຍຢ່າງນັ້ນ, ວຽກງານກໍ່ສ້າງພັກ ຍັງຄົງມີຂໍ້ຈຳກັດຫລາຍຢ່າງຢູ່, ຊ້ຳບໍ່ໜຳຍັງມີຄວາມອ່ອນດ້ອຍ, ມີຂໍ້ຂາດຕົກບົກຜ່ອງທີ່ແກ່ຍາວຜ່ານຫລາຍອາຍຸການ, ເຮັດໃຫ້ຄວາມໄວ້ເນື້ອເຊ່ືອໃຈຂອງປະຊາຊົນຕໍ່ພັກຖືກຫລຸດລົງ. ມະຕິໄດ້ຢືນຢັນວ່າ ຖ້າຫາກບໍ່ໄດ້ຮັບການປັບປຸງ, ແກ້ໄຂບັນດາຂໍ້ຂາດຕົກບົກຜ່ອງນີ້ຈະເປັນສິ່ງທ້າທາຍຕໍ່ກັບບົດບາດນຳພາຂອງພັກ ແລະ ການຍືນຍົງຄົງຕົວຂອງລະບອບ.

ເພື່ອສ້າງການຫັນປ່ຽນຢ່າງເຫັນໄດ້ຊັດ, ແກ້ໄຂຂໍ້ຈຳກັດ, ຄວາມອ່ອນດ້ອຍໃນວຽກງານກໍ່ສ້າງພັກ ເພ່ືອກໍ່ສ້າງພັກກອມມູນິດຫວຽດນາມ ເປັນພັກປະຕິວັດສັດຈະທຳ, ນັບມື້ນັບປອດໃສ, ເຂັ້ມແຂງ, ມະຕິໄດ້ຢືນຢັນວ່າ ຕ້ອງເຫັນໄດ້ຄວາມເປັນຈິງ, ຕີລາຄາຖືກກັບຄວາມຈິງ, ພາວະວິໄສ, ບໍ່ເກັງໃຈຫລືຈົ່ງຈຽມ ຫລົບຫຼີກ. ຕ້ອງປະຕິບັດຢ່າງຂ້ຽວຂາດ, ຕັ້ງໝັ້ນ, ປະຕິບັດແຕ່ລະບາດກ້າວຢ່າງໝັ້ນແກ່ນ, ບໍ່ປະໃຫ້ບັນດາອິດທິກຳລັງທີ່ເປັນປໍລະປັກ, ພວກສວຍໂອກາດ, ຍຸແຍ່, ເສກສັນປັ້ນແຕ່ງກໍຄວາມວຸ້ນວາຍຢູ່ພາຍໃນ.

4 ໝວດມາດຕະການກ່ຽວກັບການກໍ່ສ້າງພັກໃນສະພາບປະຈຸບັນ ທັງມີລັກສະນະຮີບດ່ວນ ຕ້ອງປະຕິບັດເປັນປະຈຳ ແລະ ຕໍ່ເນື່ອງ. ໝວດໝາດຕະການທີຫນຶ່ງ ແມ່ນຕຳນິຕິຊົມໝູ່ເພື່ອນ ແລະ ຕຳນິຕົນເອງ, ເຊີດຊູລັກສະນະນຳຫນ້າ, ເປັນແບບຢ່າງຂອງຂັ້ນເທິງ. ຕາມນັ້ນແລ້ວ, ກົມການເມືອງ, ຄະນະເລຂາ, ຄະນະບໍລິຫານງານສູນກາງ ສຸມໃສ່ສຳຫລວດກວດກາ, ຕີລາຄາ ເຮັດແຈ້ງບັນດາສາຍເຫດ, ຂໍ້ຈຳກັດ, ຄວາມຂາດຕົກບົກຜ່ອງຊື່ງໄດ້ຍົກໃຫ້ເຫັນໃນຫລາຍປີຜ່ານມາ ແຕ່ໄດ້ຮັບການແກ້ໄຂຢ່າງຊັກຊ້າ, ເຮັດແຈ້ງສິ່ງທີ່ກີດຂວາງໃນການຊີ້ນຳປະຕິບັດບັນດາມະຕິຂອງສູນກາງກ່ຽວກັບການກໍ່ສ້າງພັກ. ບັນດາກຳມະການກົມການເມືອງ, ຄະນະເລຂາ, ກຳມະການຄະນະບໍລິຫານງານສູນກາງພັກ ຕ້ອງດຳເນີນການສຳຫລວດກວດກາ, ຕີລາຄາຕົນເອງ ກ່ຽວກັບໝາກຜົນປະຕິບັດຫນ້າທີ່ທີ່ໄດ້ຮັບມອບໝາຍ ເຊິ່ງກ່ຽວຂ້ອງເຖິງບາງບັນຫາຮີບດ່ວນທີ່ຖືກລະບຸໃນມະຕິ, ຈາກນັ້ນວາງອອກມາດຕະການແກ້ໄຂ. ບັນດາກຳມະການໃນຄະນະພັກ, ອົງຄະນະພັກທີ່ຂຶ້ນກັບສູນກາງ, ຄະນະປະຈຳຂອງບັນດາຄະນະພັກແຂວງ, ນະຄອນ ແລະ ອົງຄະນະພັກຂັ້ນຕ່າງໆ ຕ້ອງປະຕິບັດການສຳຫລວດກວດຄືນຢ່າງເຂັ້ມງວດ, ຕຳນິຕິຊົມໝູ່ເພື່ອນ ແລະ ຕຳນິຕົນເອງ, ເຊີດຊູແບບຢ່າງດ້ວຍການເຄື່ອນໄຫວທີ່ແທ້ຈິງ.

ໝວດມາດຕະການທີ 2 ແມ່ນບັນດາມາດຕະການກ່ຽວກັບການຈັດຕັ້ງ, ພະນັກງານ ແລະ ປະຊຸມຫນ່ວຍພັກ. ລະອຽດຄື ພະນັກງານ, ສະມາຊິກພັກແຕ່ລະຄົນ ກ່ອນອື່ນ ແມ່ນພະນັກງານນຳພາ, ພະນັກງານຄຸ້ມຄອງ ຕ້ອງຕຳນິຕິຊົມໝູ່ເພື່ອນ ແລະ ຕຳນິຕົນເອງຢ່າງກົງໄປກົງມາ, ປະຊາທິປະໄຕ, ເຂັ້ມງວດ, ຕິດພັນກັບການປະຕິບັດຂໍ້ກຳນົດກ່ຽວກັບບັນດາຂໍ້ຫ້າມບໍ່ໃຫ້ສະມາຊິກພັກເຮັດຕາມຖານະຕຳແຫນ່ງວຽກງານ. ປະຕິບັດການສຳຫລວດກວດກາໃຫ້ດີເພື່ອມີຫລັກຖານພິຈາລະນາ, ຄັດເລືອກຖັນແຖວພະນັກງານຂອງທັງລະບົບການເມືອງ ແລະ ກະກຽມການວາງແຜນສັບຊ້ອນພະນັກງານໃນອົງຄະນະພັກ, ບັນດາຖານະຕຳແຫນ່ງຫລັກແຫລ່ງໃນອາຍຸການຈະມາເຖິງ. ເສີມຂະຫຍາຍປະຊາທິປະໄຕຢ່າງແທ້ຈິງໃນພັກ, ປະຕິບັດບັນດາກົດລະບຽບກ່ຽວກັບການຊັກຖາມໃນພັກຢ່າງເຂັ້ມງວດ. ກ່ຽວກັບບັນຫາຈັດຕັ້ງ, ພະນັກງານ, ຈະສືບຕໍ່ປະຕິບັດແຜນນະໂຍບາຍຊັບຊ້ອນຖານະຕຳແຫນ່ງຫລັກແຫລ່ງຈຳນວນຫນຶ່ງຢູ່ຂັ້ນແຂວງ, ຂັ້ນເມືອງ ແຕ່ບໍ່ແມ່ນຊາວທ້ອງຖິ່ນ. ສືບຕໍ່ປະຕິບັດທົດລອງແຜນນະໂຍບາຍເລຂາຄະນະພັກ ທັງແມ່ນປະທານຄະນະກຳມະການປະຊາຊົນຂັ້ນຕາແສງ, ຂັ້ນເມືອງ, ຕິດພັນກັບການສ້າງກົດລະບຽບກ່ຽວກັບການກວດກາ, ຕິດຕາມກວດກາ, ຮັບປະກັນປະສິດທິຜົນຢ່າງແທ້ຈິງ, ສະກັດກັ້ນ ການສວຍໃຊ້ສິດອຳນາດ, ຕັດສິນຕາມລຳພັງໃຈ. ກຳນົດການປະຕິບັດການປ່ອນບັດໄວ້ວາງໃຈປະຈຳປີສຳລັບບັນດາຖານະຕຳແຫນ່ງການນຳໃນອົງການພັກ, ລັດ ແລະ ໝູ່ມະຫາຊົນ. ຜູ້ທີ່ຮັບບັດໄວ້ວາງໃຈໃນລະດັບຕຳ່ 2 ປີ ຢ່າງລຽນຕິດ ບໍ່ສຳເລັດຫນ້າທີ່ ຕ້ອງໄດ້ຮັບການພິຈາລະນາ, ປົດຕຳແຫນ່ງຢ່າງທັນທີ່ ບໍ່ຕ້ອງລໍຖ້າໝົດອາຍຸການ. ກ່ຽວກັບການປະຊຸມຫນ່ວຍພັກ, ມະຕິໄດ້ເນັ້ນຫນັກວ່າ ຄວນປັບປຸງການຈັດຕັ້ງ, ຍົກສູງກຳລັງຄວາມສາມາດໃນການນຳພາ, ກຳລັງຕໍ່ສູ້ຂອງອົງການພັກຂັ້ນຮາກຖານ, ຍົກສູງຄຸນນະພາບການປະຊຸມຫນ່ວຍພັກ, ຄະນະພັກ.

ໝວດມາດຕະການທີ 3 ຊຶ່ງມະຕິໄດ້ເຕື້ອງເຖິງນັ້ນແມ່ນ ກົນໄກ, ນະໂຍບາຍ.ຕາມນັ້ນແລ້ວ ຈະກວດກາຄືນ, ລົບລ້າງບັນດາກົນໄກ, ນະໂຍບາຍທີ່ຫລ້າຫລັງ, ສ້າງ, ປະກາດໃຊ້ບັນດານະໂຍບາຍຢ່າງຄົບຊຸດເພື່ອປ່ຽນແປງວຽກງານພະນັກງານຢ່າງແຂງແຮງ, ຈຸດສຸມແມ່ນຕີລາຄາພະນັກງານ, ເປັນຂໍ້ອ້າງອີງເພື່ອວາງແຜນພະນັກງານ,ການຄຸ້ມຄອງ, ບຳລຸງສ້າງ, ຊັບຊ້ອນ, ນຳໃຊ້ຖັນແຖວພະນັກງານ. ການປະກາດໃຊ້ກົດລະບຽບເພື່ອໃຫ້ຄະນະບໍລິຫານງານສູນກາງພັກປະກອບຄຳເຫັນໃນແຕ່ລະປີ, ສະແດງຄວາມໄວ້ວາງໃຈທີ່ມີຕໍ່ໝູ່ຄະນະ ແລະ ກຳມະການກົມການເມືອງ, ຄະນະເລຂາ, ຄະນະບໍລິຫານງານອົງຄະນະພັກຂັ້ນຕ່າງໆ ເພື່ອປະກອບຄຳເຫັນ, ສະແດງຄວາມໄວ້ວາງໃຈທີ່ມີຕໍ່ໝູ່ຄະນະ ແລະ ສະມາຊິກແຕ່ລະຄົນໃນຄະນະປະຈຳຄະນະພັກຂອງຕົນ. ການສ້າງ, ເພີ່ມເຕີມ, ສ້າງລະບົບກົດໝາຍໃຫ້ສົມບູນແບບເພື່ອຮັບປະກັນປະຊາທິປະໄຕ, ເປີດເຜີຍ, ໂປ່ງໃສໃນວຽກງານພະນັກງານ. ມະຕິກໍຊີ້ແຈງວ່າ ປີ 2012, ປະກາດໃຊ້ກົດລະບຽບຕິດຕາມກວດກາ ໂດຍກົງ ຫລື ທາງອ້ອມຂອງປະຊາຊົນທີ່ມີຕໍ່ພະນັກງານ, ສະມາຊິກພັກ, ອົງການພັກ ແລະ ອຳນາດການປົກຄອງຂັ້ນຕ່າງໆ.

ໃນໝວດມາດຕະການທີ 4 ກ່ຽວກັບວຽກງານການສຶກສາດ້ານການເມືອງ, ແນວຄິດ, ມະຕິໄດ້ຢືນຢັນວ່າ ຕ້ອງສືບຕໍ່ຍູ້ແຮງການຮຳ່ຮຽນ ແລະ ປະຕິບັດຕາມແບບຢ່າງຄຸນສົມບັດປະທານໂຮ່ຈິມີນ. ພ້ອມກັນນັ້ນ ແມ່ນການປ່ຽນໃຫມ່ວຽກງານໂຄສະນາ, ສຶກສາດ້ານການເມືອງ, ແນວຄິດ, ຄຸນສົມບັດ, ແບບແຜນດຳລົງຊີວິດໃຫ້ແກ່ພະນັກງານ, ສະມາຊິກພັກ ຕິດພັນກັບການສຳຫລວດກວດກາ, ຕີລາຄາ ແລະ ມີມາດຕະການແກ້ໄຂບັນຫາຮີບດ່ວນໃນວຽກງານກໍ່ສ້າງພັກທຸກຂັ້ນ.

ສຸດທ້າຍ ມະຕິໄດ້ຢືນຢັນວ່າ ດ້ວຍມູນເຊື້ືອ ແລະ ທາດແທ້ອັນດີງາມຂອງພັກກອມມູນິດຫວຽດນາມ, ພ້ອມກັບຄວາມເຫັນດີເຫັນພ້ອມ, ການສະຫນັບສະຫນູນຈາກປະຊາຊົນ, ແນ່ນອນວ່າ ມະຕິສະບັບນີ້ຈະໄດ້ຮັບການປະຕິບັດຢ່າງມີໄຊ ສ້າງເປັນບາດກ້າວຫັນປ່ຽນໃຫມ່ໃນວຽກງານກໍ່ສ້າງພັກ ແລະ ເຮັດໃຫ້ພັກນັບມື້ນັບປອດໃສ, ເຂັ້ມແຂງ.

ຮົ່ງເວີນ.