ສະຫະພາບເອີລົບ EU ຕ້ອງປະຕິບັດບັນດາບາດກ້າວເດີນຕໍ່ໄປຄືແນວໃດ ສຳລັບການປະທະກັນຢູ່ຢູແກຼນທີ່ພວມນັບມື້ນັບເຄັ່ງຮ້ອນຂຶ້ນ ? ຈະມີການຕໍ່ກຳນົດເວລາແກ່ຄຳສັ່ງລົງໂທດລັດເຊຍຕື່ມອີກ 6 ເດືອນຫຼືບໍ່? ຫຼືວ່າ EU ຄວນໜູນຊ່ວຍດ້ານການທະຫານໃນລະດັບສູງສຸດໃຫ້ ຢູແກຼນຫຼືບໍ່ ?...ນັ້ນແມ່ນບັນດາຄຳຖາມຖືກຍົກອອກມາທີ່ກອງປະຊຸມສຸດຍອດ ສະຫະພາບເອີລົບ EU ຊຶ່ງຈັດຂຶ້ນໃນວັນທີ 19/3 ຢູ່ນະຄອນຫຼວງ ບຣຸກແຊນຂອງແບນຊິກ. ກອງປະຊຸມຄັ້ງນີ້ ໄດ້ຮັບຖືວ່າແມ່ນການທົດສອບທີ່ມີຕໍ່ຄວາມສາມັກຄີ ແລະ ເປັນເອກະພາບກັນຂອງ EU ໃນການແກ້ໄຂບັນດາວິກິດການ ຢູແກຼນ
(ພາບປະກອບ) |
ພ້ອມກັບບັນຫາຕ່າງໆພາຍໃນກຸ່ມຄື ວິວັດທະນາການປະຕິຮູບຂອງເກຼັກ, ອະນາຄົດໃນການພັດທະນາຂອງພາກພື້ນໃຊ້ສະກຸນເງິນລວມ ເອີໂຣ …ນັ້ນ, ມີເນື້ອໃນປະການໜຶ່ງໄດ້ຖືກນຳມາປຶກສາຫາລືຢູ່ທີ່ກອງປະຊຸມ, ນັ້ນແມ່ນບັນຫາຢູແກຼນ ແລະ ການໂຕ້ຕອບຄືແນວໃດກັບມົດສກູ. ກວ່າ 1 ປີທີ່ໄດ້ຜ່ານພົ້ນໄປ, ທຸກໆວິທີການແກ້ໄຂຍັງຄົງຖືກຕົກຢູ່ໃນສະພາບບໍ່ມີທາງອອກ ແລະ ການສູ້ຮົບຢູ່ ຢູແກຼນ ພວມນັບມື້ນັບມີການຜັນແປຢ່າງສັບສົນ ແລະ ເປັນອັນຕະລາຍກວ່າ. ຄວາມສັບສົນໄດ້ເກີດຂຶ້ນຊ້ຳແລ້ວຊ້ຳອີກ, ຂະນະທີ່ບັນດາຝ່າຍດຳເນີນການເຈລະຈາຢຸດຍິງ, ແລ້ວຊ້ຳພັດລະເມີດຄຳສັ່ງຢຸດຍິງ. ເປັນໜ້າສົນໃຈ, ນັ້ນແມ່ນວິທີການແກ້ໄຂແບບແຂງກະດ້າງ, ບັນດາຄຳສັ່ງຂວ້ຳບາດ, ລົງໂທດຕ້ານລັດເຊຍ ບໍ່ກວມທ່າດີອີກແລ້ວ ແລະ ພວມກໍ່ຄວາມແບ່ງແຍກຢ່າງເລິກເຊິ່ງຢູ່ພາຍໃນປະເທດສະຫະພາບເອີລົບ EU
ຄວາມບໍ່ລົງລອຍກັນດ້ານທັດສະນະ
ບັນດາການໂຕ້ແຍ້ງກັນກ່ຽວກັບເລື່ອງຝ່າຍຕາເວັນຕົກຄວນມີປະຕິກິລີຍາຄືແນວໃດສຳລັບການປະທະກັນຢູ່ ຢູແກຼນທີ່ພວມນັບມື້ນັບເຄັ່ງຮ້ອນ ? ມີການຂັດແຍ້ງ ແລະ ແບ່ງແຍກຫຼາຍຢ່າງລະຫວ່າງບັນດາປະເທດ EU ໃນນະໂຍບາຍສຳລັບລັດເຊຍ ແລະ ວິທີສຳພັດກັບການແກ້ໄຂ ແກ້ໄຂວິກິດການຢູ່ພາກຕາເວັນອອກ ຢູແກຼນ ໄດ້ເລີ່ມປະຕິບັດ.
ກ່ອນທີ່ດຳເນີນກອງປະຊຸມສຸດຍອດສະຫະພາບເອີລົບ EU , ຢ່າງໜ້ອຍກໍມີ 7 ປະເທດ EU ໄດ້ຄັດຄ້ານເລື່ອງແກ່ຍາວຄຳສັ່ງລົງໂທດລັດເຊຍ ແລະ ພ້ອມແລ້ວທີ່ຈະຢັບຢັ້ງຕໍ່ບໍ່ວ່າມະຕິລົງໂທດສະບັບໃດຖືກຍົກອອກມາ. ເປັນໜ້າສົນໃຈ ຝະລັ່ງ, ອີຕາລີ ແລະ ແອັສປາຍ ຍັງຖະແຫຼງວ່າ ເປັນທີ່ຈະແຈ້ງແລ້ວວ່າ ເຂົາເຈົ້າບໍ່ຢາກທຳລາຍຂໍ້ຕົກລົງຢຸດຍິງທີ່ບໍ່ແນ່ນອນນີ້. ໃນຂະນະນັ້ນ, ອັງກິດ ແລະ ບາງປະເທດເຂດບານຕິກ ແລະ ເອີລົບເໜືອ ພັດສະແດງໃຫ້ເຫັນແຈ້ງທັດສະນະທີ່ແຂງກະດ້າງ, ຢາກສືບຕໍ່ຮັກສາຄຳສັ່ງລົງໂທດລັດເຊຍ ແລະ ຖືວ່າຄຳສັ່ງລົງໂທດຈະພາໃຫ້ລັດເຊຍ ຕ້ອງມີຄວາມຮັບຜິດຊອບຫຼາຍກວ່າທີ່ມີຕໍ່ຂໍ້ຕົກລົງຢຸດຍິງຢູ່ ພາກຕາເວັນອອກ ຢູແກຼນ. ມາຮອດປະຈຸບັນ, ມີພຽງເຢັຍລະມັນເທົ່ານັ້ນ ແມ່ນປະເທດເປັນກາງລະຫວ່າງ 2 ຝ່າຍໃນ EU ກ່ຽວກັບບັນຫາລົງໂທດລັດເຊຍ ຂະນະທີ່ໄດ້ຍົກອອກບັນດາບຸລິມະສິດສຳລັບ “ການປະທະກັນ”, ທັງຢາກສະແດງໃຫ້ເຫັນຄວາມແຂງກະດ້າງຕໍ່ລັດເຊຍ ຂະນະທີ່ຍັງຄົງຢາກຮັກສາຄວາມສາມັກຄີຂອງເອີລົບ.
ການລົງໂທດແມ່ນບໍ່ສາມາດແກ້ໄຂເຖິງກົກເຖິງຮາກຂອງບັນຫາ
ພາຍຫຼັງທີ່ລັດເຊຍໂຮມກະຣຶມເຂົ້າດິນແດນຂອງຕົນເປັນເວລາ 1 ປີ, ເອີລົບໄດ້ຢຸດດຳເນີນການເຈລະຈາກ່ຽວກັບການຄ້າ ແລະ ການອອກວີຊາກັບລັດເຊຍ, ພ້ອມທັງຈັດລາຍຊື່ນັກການເມືອງ ແລະ ເຈົ້າໜ້າທີ່ກອງທັບຫຼາຍຄົນເຂົ້າໃນບັນຊີລາຍຊື່ປິດລ້ອມຊັບສົມບັດ ແລະ ຈຳກັດການໄປມາ. ໃນເດືອນ 1 ທີ່ຜ່ານມາ,ບັນດາມາດຕະການລົງໂທດນີ້ ໄດ້ຖືກຕໍ່ກຳນົດເວລາຕື່ມອີກ 6 ເດືອນ ແລະ ຄາດວ່າຈະໝົດກຳນົດໃນເດືອນ 7 ທີ່ຈະເຖິງ. ຄວາມຈິງແລ້ວ, ໃນ 1 ປີທີ່ຜ່ານມາ, ບັນດາມາດຕະການລົງໂທດນີ້ໄດ້ສົ່ງຜົນກະທົບອັນຫຍໍ້ທໍ້ບໍ່ຫຼາຍກໍໜ້ອຍເຖິງພື້ນຖານເສດຖະກິດລັດເຊຍ. ແຕ່ບໍ່ສະເພາະລັດເຊຍເທົ່ານັ້ນ, ຫາກຍັງມີບັນດາປະເທດ EU ກໍຖືກຜົນເສຍຫາຍບໍ່ໜ້ອຍອີກດ້ວຍ. ແຕ່ບັນຫາວິກິດການ ຢູແກຼນ ຍັງຄົງບໍ່ມີທາງອອກ ແລະ ຍັງບໍ່ທັນໄປສູ່ວິທີການແກ້ໄຂສຸດທ້າຍເທື່ອ. ບັນດາຜູ້ຊ່ຽວຊານເອເມລິກາ ໄດ້ຍອມຮັບວ່າ ບັນດາຄຳສັ່ງລົງໂທດລັດເຊຍ ບໍ່ນຳມາເຊິ່ງປະສິດທິຜົນ ແລະ ເຖິງເວລາແລ້ວ, ຄວນຄິດໄລ່ຄືນກ່ຽວກັບປະສິດທິຜົນຂອງມາດຕະການເຫຼົ່ານີ້.
ໃນເດືອນ 2 ທີ່ຜ່ານມາ, ປະທານາທິບໍດີ ສ. Cyprus ທ່ານ Nicos Anastasiades ໄດ້ໄປຮອດລັດເຊຍ ແລະໄດ້ອະນຸຍາດໃຫ້ກອງທັບເຮືອລັດເຊຍມີສິດເຂົ້າ-ອອກຈາກທ່າກຳປັ່ນຕ່າງໆຂອງປະເທດເກາະນີ້. ໃນເດືອນ 3 , ວັງກແຣມລິນ ໄດ້ຕ້ອນຮັບນາຍົກລັດຖະມົນຕີອີຕາລີ Matteo Renzi ແລະ ທ່ານ Putin ໄດ້ຖືທ່ານ Matteo Renzi ແມ່ນຄູ່ຮ່ວມມືໄດ້ຮັບບຸລິມະສິດ.
ໃນສະພາບການແບ່ງແຍກຄືໃນປະຈຸບັນ, EU ຈະສາມາດຊອກຫາໄດ້ສຽງເວົ້າລວມເພື່ອສະແດງໃຫ້ເຫັນຄວາມສາມັກຄີ ແລະ ເປັນເອກະພາບກັນໃນນະໂຍບາຍສຳລັບລັດເຊຍໄດ້ຫຼືບໍ່ ? ຕາມບັນດານັກຊ່ຽວຊານແລ້ວ, ໃນກອງປະຊຸມຄັ້ງນີ້, ບັນດາປະເທດນີ້ ອາດຈະບໍ່ເຫັນດີເປັນເອກະສັນກັນ ຕໍ່ກຳນົດເວລາຄຳສັ່ງລົງໂທດ ແລະ ໂຈະການອອກຂໍ້ຕົກລົງຈົນກວ່າຄຳສັ່ງລົງໂທດລັດເຊຍໝົດກຳນົດໃນເດືອນ 6/2015. ເຖິງວ່າຈະໂຈະການອອກຂໍ້ຕົກລົງເຖິງເວລາໃດກໍຕາມ, ແມ່ນຍັງເຫຼືອພຽງ 2-3 ເດືອນອີກ, EU ຕ້ອງຍົກອອກຂໍ້ຕົກລົງສຸດທ້າຍ. ຄຳຖາມນີ້ ຍັງພວມລໍ່ຖ້າບັນດາການນຳບັນດາປະເທດ EU ຊອກຫາຄຳຕອບ.