(vovworld) - ພາຍຫລັງເຮັດວຽກມາເປັນເວລາກືອບ 1 ເດືອນ ດ້ວຍຈິດໃຈມີຄວາມຮັບຜິດຊອບສູງ ແລະ ຮີບເຮັ່ງຈາກບັນດາສະມາຊິກສະພາແຫ່ງຊາດ (ສສຊ), ກອງປະຊຸມສະໄຫມສາມັນເທ່ືອທີ 4 ສະພາແຫ່ງຊາດ ຫວຽດນາມ ຊຸດທີ 13 ໄດ້ອັດລົງໃນວັນທີ 23/11. ສະພາແຫ່ງຊາດໄດ້ສຳເລັດວຽກງານສຳຄັນຫລາຍຢ່າງ, ຮັບຮອງເອົາກົດໝາຍຫລາຍສະບັບ, ອອກມະຕິສຳຄັນທີ່ກ່ຽວຂ້ອງເຖິງຈຸດໝາຍ, ການກຳນົດທິດກໍຄືວິວັດແຫ່ງການພັດທະນາເສດຖະກິດ ສັງຄົມ, ການປ້ອງກັນຊາດປ້ອງກັນຄວາມສະຫງົບ, ການຕ່າງປະເທດຂອງປະເທດຊາດໃນໄລຍະຈະມາເຖິງ. ກອງປະຊຸມຂອງສະພາແຫ່ງຊາດເທ່ືອນີ້ສະແດງໃຫ້ເຫັນຢ່າງຈະແຈ້ງຈິດໃຈປ່ຽນໃຫມ່, ປະຊາທິປະໄຕ ແລະ ມີປະສິດທິຜົນ.
ກອງປະຊຸມສະໄຫມສາມັນເທື່ອທີ 4 ສະພາແຫ່ງຊາດ ຫວຽດນາມ ຊຸດທີ 13
ພາບ: internet
|
ກອງປະຊຸມສະໄຫມສາມັນເທື່ອທີ 4 ສະພາແຫ່ງຊາດ ຫວຽດນາມ ຊຸດທີ 13 ໄດ້ຮັບຮອງເອົາຮ່າງກົດໝາຍ 9 ສະບັບ. ໃນນັ້ນ ມີຮ່າງກົດໝາຍບາງສະບັບກ່ຽວຂ້ອງເຖິງຊີວິດດ້ານເສດຖະກິດສັງຄົມຢ່າງແທດຈິງ ຄື: ກົດໝາຍວ່າດ້ວຍການປ້ອງກັນ ແລະ ຕ້ານການສໍ້ລາດບັງຫລວງ ສະບັບປັບປຸງ, ກົດໝາຍວ່າດ້ວຍນະຄອນຫລວງ; ກົດໝາຍວ່າດ້ວຍການປັບປຸງ, ເພີ່ມເຕີມບາງຂໍ້ມາດຕາຂອງກົດໝາຍວ່າດ້ວຍອາກອນລາຍຮັບສ່ວນບຸກຄົນ. ມີມະຕິສຳຄັນ 2 ສະບັບກໍໄດ້ຮັບການຮັບຮອງເອົາ ນັ້ນແມ່ນມະຕິກ່ຽວກັບການລົງມະຕິ, ປ່ອນບັດໄວ້ວາງໃຈສຳລັບຜູ້ຮັກສາຕຳແຫນ່ງໂດຍສະພາແຫ່ງຊາດ, ສະພາປະຊາຊົນເລືອກຕັ້ງຫລືໃຫ້ສັດຕະຍາບັນ; ມະຕິກ່ຽວກັບການຮັບເອົາຄຳເຫັນຈາກປະຊາຊົນກ່ຽວກັບຮ່າງປັບປຸງລັດຖະທຳມະນູນປີ 1992. ນອກນັ້ນ, ສະພາແຫ່ງຊາດກໍໄດ້ປຶກສາຫາລື, ປະກອບຄຳເຫັນໃສ່ຮ່າງກົດໝາຍອື່ນ 6 ສະບັບ ເພື່ອສືບຕໍ່ປັບປຸງ, ສ້າງໃຫ້ສົມບູນແບບ ເພື່ອຮັບຮອງເອົາໃນກອງປະຊຸມຄັ້ງຕໍ່ໄປ. ຕາມທ່ານ ຫງວຽນແຫ້ງຟູກ, ຫົວຫນ້າຫ້ອງວ່າການສະພາແຫ່ງຊາດແລ້ວ, ກອງປະຊຸມຂອງສະພາແຫ່ງຊາດເທື່ອນີ້ປະສົບຜົນສຳເລັດໃນຫລາຍດ້ານ.
“ບັນດາ ສສຊ ສົນທະນາຢູ່ຫໍປະຊຸມຢ່າງກົງໄປກົງມາ, ນັບມື້ນັບສະແດງໃຫ້ເຫັນລັກສະນະປະຊາທິປະໄຕ. ບັນດາຄຳເຫັນຂອງ ສສຊ ມີລັກສະນະສ້າງສັນ, ດ້ວຍຄວາມປາດຖະຫນາຈະເຮັດແນວໃດເພື່ອໃຫ້ການບໍລິຫານຂອງລັດຖະບານດີກວ່າເກົ່າ. ກອງປະຊຸມຄັ້ງນີ້, ສະພາແຫ່ງຊາດຮັບຮອງເອົາມະຕິກ່ຽວກັບການປ່ອນບັດໄວ້ວາງໃຈ, ລົງມະຕິສຳລັບບັນດາຕຳແຫນ່ງໂດຍສະພາແຫ່ງຊາດ, ສະພາປະຊາຊົນເລືອກຕັ້ງ ຫລື ໃຫ້ສັດຕະຍາບັນ. ນີ້ແມ່ນພື້ນຖານໃຫ້ແກ່ການຕິດຕາມກວດກາບັນດາສະມາຊິກໂດຍແມ່ນສະພາແຫ່ງຊາດ, ສະພາປະຊາຊົນເລືອກຕັ້ງ ຫລື ໃຫ້ສັດຕະຍາບັນ, ເຮັດໃຫ້ເຂົາເຈົ້າຕອ້ງຍົກສູງຄວາມຮັບຜິດຊອບຕໍ່ພັກ, ຕໍ່ປະຊາຊົນ. ຂ້າພະເຈົ້າເຫັນວ່າ ນີ້ແມ່ນຈຸດໃຫມ່.”
ບັນດາ ສສຊ ສົນທະນາຢູ່ຫໍປະຊຸມຢ່າງກົງໄປກົງມາ
|
ຫນຶ່ງໃນບັນດາຈຸດໃຫມ່ຂອງກອງປະຊຸມຄັ້ງນີ້ ນັ້ນແມ່ນ ລັດຖະບານມີບົດລາຍງານສັງລວມຕໍ່ສະພາແຫ່ງຊາດ ກ່ຽວກັບການປະຕິບັດບັນດາມະຕິຂອງສະພາແຫ່ງຊາດກ່ຽວກັບການຊັກຖາມ ແລະ ຕອບຄຳຊັກຖາມທີ່ກອງປະຊຸມສະໄຫມສາມັນເທື່ອທີ 2, ທີ 3 ສະພາແຫ່ງຊາດ ຫວຽດນາມ ຊຸດທີ 13. ນີ້ເປັນຄັ້ງທຳອິດທີ່ ລັດຖະບານມີບົດລາຍງານລະອຽດກ່ຽວກັບການປະຕິບັດບັນດາເນື້ອໃນ ຊື່ງບັນດາສະມາຊິກລັດຖະບານໄດ້ໝັ້ນໝາຍຕໍ່ສະພາແຫ່ງຊາດ ແລະ ຜູ້ມີສິດເລືອກຕັ້ງໃນທົ່ວປະເທດໃນວາລະຊັກຖາມ ແລະ ຕອບຄຳຊັກຖາມທີ່ບັນດາກອງປະຊຸມຄັ້ງກ່ອນ. ໃນບົດລາຍງານຕໍ່ສະພາແຫ່ງຊາດກ່ຽວກັບບັນຫານີ້, ຕາງຫນ້າໃຫ້ລັດຖະບານ, ທ່ານຮອງນາຍົກລັດຖະມົນຕີ ຫງວຽນຊວນຟູກ ຍົກອອກບັນດາວຽກງານທີ່ລັດຖະບານປະຕິບັດສຳເລັດຜົນ ແລະ ບໍ່ທັນສຳເລັດຜົນເພື່ອໃຫ້ ສສຊ ແລະ ຜູ້ມີສິດເລືອກຕັ້ງຮູ້ຈັກເຖິງ.
ຖ້າຫາກກອງປະຊຸມຄັ້ງກ່ອນນີ້, ບົດລາຍງານກ່ຽວກັບວຽກງານປ້ອງກັນ ແລະ ຕ້ານການສໍ້ລາດບັງຫລວງ ພຽງແຕ່ຖືກສົ່ງເຖິງບັນດາ ສສຊ ຄົ້ນຄ້ວາ, ແຕ່ໃນກອງປະຊຸມຄັ້ງນີ້, ລັດຖະບານໄດ້ລາຍງານວຽກງານປ້ອງກັນ ແລະ ຕ້ານການສໍ້ລາດບັງຫລວງ 2012 ຕໍ່ສະພາແຫ່ງຊາດໃນມື້ໄຂກອງປະຊຸມ. ຜູ້ມີສິດເລືອກຕັ້ງໃນທົ່ວປະເທດຕີລາຄາສູງການປ່ຽນໃຫມ່ນີ້, ປະກອບສ່ວນສ້າງການຫັນປ່ຽນຢ່າງຕັ້ງຫນ້າໃນວຽກງານປ້ອງກັນ, ຕ້ານການສໍ້ລາດບັງຫລວງໃນໄລຍະຈະມາເຖິງກວ່າ.
ທີ່ກອງປະຊຸມຄັ້ງນີ້, ສະພາແຫ່ງຊາດໄດ້ພິຈາລະນາ, ປຶກສາຫາລື, ໃຫ້ຄຳເຫັນຄັ້ງທຳອິດກ່ຽວກັບຮ່າງປັບປຸງລັດຖະທຳມະນູນປີ 1992 ແລະ ຮັບຮອງເອົາມະຕິກ່ຽວກັບການຮັບເອົາຄຳເຫັນຈາກປະຊາຊົນກ່ຽວກັບຮ່າງປັບປຸງລັດຖະທຳມະນູນປີ 1992. ພາຍຫລັງຮັບເອົາຄຳເຫັນຈາກປະຊາຊົນ, ຮ່າງປັບປຸງລັດຖະທຳມະນູນຈະຖືກຍື່ນສະເຫນີຕໍ່ສະພາແຫ່ງຊາດຮັບຮອງເອົາໃນກອງປະຊຸມສະໄຫມສາມັນເທື່ອທີ 6 ສະພາແຫ່ງຊາດ ຫວຽດນາມຊຸດທີ 13 ໃນເດືອນ 10/2013. ທ່ານຮອງປະທານສະພາແຫ່ງຊາດ ຫວຽດນາມ ອວງຈູລືວ ໄດ້ເນັ້ນຫນັກວ່າ: ລັດຖະທຳມະນູນເມື່ອໄດ້ຮັບການປັບປຸງໃຫ້ສຳເລັດ ຈະຊ່ວຍກົງຈັກບໍລິຫານແຫ່ງລັດເຄື່ອນໄຫວຢ່າງມີປະສິດທິຜົນ, ສະແດງລັກສະນະດີເລີດຂອງສັງຄົມນິຍົມ.
“ການປັບປຸງລັດຖະທຳມະນູນຄັ້ງນີ້ ເພື່ອຕອບສະຫນອງຄວາມຮຽກຮ້ອງຕ້ອງການພັດທະນາແບບຍື່ນຍົງຂອງປະເທດຊາດໃນສະພາບການໃຫມ່. ລັດຖະທຳມະນູນສະບັບປັບປຸງໄດ້ຢືນຢັນວ່າ: ປະຊາຊົນແມ່ນຜູ້ມີສິດອຳນາດແຫ່ງລັດສູງສຸດ, ສິດອຳນາດແຫ່ງລັດທັງໝົດແມ່ນຂຶ້ນກັບປະຊາຊົນ, ເຊິ່ງພື້ນຖານແມ່ນຊົນຊັ້ນກຳມະກອນ, ຊົນຊັ້ນຊາວນາ ແລະ ຖັນແຖວປັນຍາຊົນໂດຍພັກກອມມູນິດ ຫວຽດນາມ ນຳພາ. ການປັບປຸງລັດຖະທຳມະນູນຄັ້ງນີ້ແມ່ນການເສີມຂະຫຍາຍຢ່າງພຽງພໍ ແລະ ເຊີດຊູປັດໃຈມະນຸດ, ຢືນຢັນ ຍາມໃດ ລັດກໍເຄົາລົບ ຮັບປະກັນສິດອັນເປັນພື້ນຖານຂອງມະນຸດ, ສິດພົນລະເມືອງ, ເບິ່ງແຍງດູແລຄວາມຜາສຸກ ແລະ ການພັດທະນາຢ່າງເສລີຂອງແຕ່ລະຄົນ.”
ວຽກງານຖະແຫລງຂ່າວ, ໂຄສະນາກ່ຽວກັບກອງປະຊຸມຄັ້ງນີ້ ກໍໄດ້ຮັບການປັບປຸງບາດກ້າວຫນຶ່ງ. ຈຳນວນວາລະປະຊຸມຂອງສະພາແຫ່ງຊາດໄດ້ອອກອາກາດ, ຖ່າຍທອດສົດແມ່ນ 13 ຄັ້ງ. ພິເສດ ສະພາແຫ່ງຊາດໄດ້ສະຫງວນເວລາສ່ວນຫລາຍເພື່ອປຶກສາຫາລືທິດທາງພັດທະນາເສດຖະກິດ ສັງຄົມໃນໄລຍະຈະມາເຖິງ ແລະ ຮັບຮອງເອົາບັນດາຄາດໝາຍພື້ນຖານຂອງປີ 2013 ນັ້ນແມ່ນ: ລະດັບຈະເລີນເຕີບໂຕ GDP ເພີ່ມທະວີ 5,5%, ໄພເງິນເຟີ້ ຢູ່ໃນລະດັບ 7 - 8%, ສ້າງວຽກເຮັດງານທຳໃຫ້ແກ່ຄົນງານເກືອບ 1,6 ລ້ານຄົນ.
ທີ່ກອງປະຊຸມຄັ້ງນີ້, ບັນດາ ສສຊ ເສີມຂະຫຍາຍຈິດໃຈປະຊາທິປະໄຕ, ພູມປັນຍາ, ມີຫລາຍຄຳເຫັນທີ່ມີຄຸນນະພາບປະກອບໃຫ້ແກ່ບັນດາເນື້ອໃນນິຕິບັນຍັດ, ຕິດຕາມກວດກາ ແລະ ຕັດສິນຫລາຍບັນຫາສຳຄັນຂອງປະເທດຊາດ. ກອງປະຊຸມຄັ້ງນີ້ ສະແດງຄວາມຕັດສິນໃຈປ່ຽນໃຫມ່ການເຄື່ອນໄຫວຂອງສະພາແຫ່ງຊາດ ຊື່ງຜູ້ມີສິດເລືອກຕັ້ງ ແລະ ປະຊາຊົນໃນທົ່ວປະເທດມີຄວາມມຸ່ງຫວັງ, ຜ່ານນັ້ນ ປະກອບສ່ວນນຳປະເທດຊາດກ້າວຂຶ້ນ, ປະຕິບັດກິດຈະການປ່ຽນແປງໃຫມ່ສຳເລັດຜົນ, ເພື່ອພາລະກິດປະຊາຊົນຮັ່ງມີ, ປະເທດຊາດເຂັ້ມແຂງ, ສັງຄົມຍຸຕິທຳ, ປະຊາທິປະໄຕ ແລະ ສີວິໄລ.