ກອງປະຊຸມໃຫຍ່ລັດຖະສະພາລະຫວ່າງຊາດບັນດາປະເທດອາຊີຕາເວັນອອກສ່ຽງໃຕ້ AIPA ໄດ້ຮັບການສ້າງຕັ້ງຂຶ້ນຢ່າງເປັນທາງການນັບແຕ່ປີ 1977. ນີ້ແມ່ນເວທີປາໄສ ເພື່ອໃຫ້ບັນດາສະມາຊິກສະພາແຫ່ງຊາດບັນດາປະເທດສະມາຊິກອາຊຽນພົບປະກັນ, ແລກປ່ຽນທັດສະນະ ແລະ ສົມທົບກັນແກ້ໄຂບັນດາບັນຫາພາກພື້ນ, ຊຸກຍູ້ການຮ່ວມມື, ແລກປ່ຽນຂໍ້ມູນຂ່າວ, ບົດຮຽນດ້ານນິຕິບັນຍັດ ກໍ່ຄືສ້າງເງື່ອນໄຂເພື່ອໃຫ້ລັດຖະບານບັນດາປະເທດສະມາຊິກປະຕິບັດບັນດາຈຸດໝາຍລວມ. ພາຍຫຼັງກວ່າ 3 ທົດສະວັດແຫ່ງການສ້າງຕັ້ງ ແລະ ພັດທະນາ, ດ້ວຍ 10 ປະເທດສະມາຊິກຢ່າງເປັນທາງການ ແລະ 12 ປະເທດສັງເກດການ. AIPA ໄດ້ປະກອບສ່ວນຢ່າງຕັ້ງໜ້າເຂົ້າໃນການກໍ່ສ້າງອາຊີຕາເວັນອອກສ່ຽງໃຕ້ໃຫ້ກາຍເປັນພາກພື້ນສັນຕິພາບ, ສະສຽນລະພາບ, ຮ່ວມມືພັດທະນາຢ່າງໝັ້ນຄົງ. AIPA ກໍ່ກາຍເປັນກົນໄກໜູນຊ່ວຍສຳຄັນຂອງອາຊຽນ ຢູ່ທຸກຂັ້ນໃນ 3 ເສົາຄຳ້ຄື: ຄວາມໝັ້ນຄົງ - ການເມືອງ, ເສດຖະກິດ ແລະ ວັດທະນະທຳ - ສັງຄົມ.
ເຂົ້າຮ່ວມກອງປະຊຸມໃຫຍ່ AIPA 35 ມີຜູ້ແທນ 400 ທ່ານທີ່ມາຈາກ 10 ປະເທດສະມາຊິກອາຊຽນ, 8 ປະເທດສັງເກດການ ຄື: ອົດສະຕາລີ, ເບລາຣູດ, ຈີນ, ອິນເດຍ, ຍີ່ປຸ່ນ, ສເກົາຫຼີ, ລັດເຊຍ, Timor - Leste.
ຊ່ອງສຳຄັນໃນການສ້າງຕັ້ງປະຊາຄົມອາຊຽນໃນປີ 2015
ດ້ວຍຫົວຂໍ້ວ່າ “ເພີ່ມທະວີການຮ່ວມມືສະພາແຫ່ງຊາດໃນປະຊາຄົມ ອາຊຽນ”, ກອງປະຊຸມໃຫຍ່ AIPA – 35 ໄດ້ສຸມໃສ່ປຶກສາຫາລືກ່ຽວກັບບົດລາຍງານຂອງ AIPA - ອາຊຽນ ທີ່ກ່ຽວຂ້ອງເຖິງກອງປະຊຸມຂັ້ນສູງ ອາຊຽນ 24, ມະຕິກ່ຽວກັບການຮັບຮອງເອົາບົດລາຍງານຂອງກອງປະຊຸມຄັ້ງທີ 6 ຂອງ AIPA ແລະ ຮ່ວມມືສະພາແຫ່ງຊາດ ໃນການສ້າງປະຊາຄົມການເມືອງ - ຄວາມໝັ້ນຄົງ ອາຊຽນ. ບັນດາຜູ້ແທນກໍ່ປຶກສາຫາລືກ່ຽວກັບການພັດທະນາຂຽວແບບຍືນຍົງ, ຊຸກຍູ້ການຮັດແຄບຊ່ອງວ່າງໃນການພັດທະນາຢູ່ພາກພື້ນ, ປຶກສາຫາລືບັນດາມາດຕະການປ້ອງກັນ, ຕ້ານໄພພິບັດຈາກຢາເສບຕິດ, ເພີ່ມທະວີການຮ່ວມມືສະພາແຫ່ງຊາດໃນວຽກງານປ້ອງກັນຕ້ານໂລກລະບາດ Ebola.
ກອງປະຊຸມກໍ່ເອົາໃຈໃສ່ເຖິງບັນຫາແພດດ້ວຍເລື່ອງປຶກສາຫາລືວິທີການເພີ່ມທະວີບົດບາດຂອງສະມາຊິກສະພາແຫ່ງຊາດຍິງໃນການສ້າງປະຊາຄົມ ອາຊຽນ, ຊຸກຍູ້ບັນດາຄວາມມານະພະຍາຍາມໃນວຽກງານປ້ອງກັນ, ຕ້ານການຈຳແນກການປະພຶດ ແລະ ໃຊ້ຄວາມຮຸນແຮງສຳລັບແມ່ຍິງ ແລະ ເດັກນ້ອຍ.
ຄາດວ່າ, ມີມະຕິປະມານ 13 ສະບັບກ່ຽວກັບບັນຫາການຈັດຕັ້ງຈະໄດ້ຍົກອອກມາປຶກສາຫາລື, ໃນນັ້ນມີມະຕິປັບປຸງຂໍ້ຕົກລົງກ່ຽວກັບການສ້າງຄະນະເລຂາ AIPA ແລະ ມະຕິປັບປຸງກົດລະບຽບ AIPA. ນອກຈາກນັ້ນ, ກອງປະຊຸມກໍ່ໄດ້ເຕື້ອງເຖິງວິທີການສຳພັດໃໝ່ໃນການຮ່ວມມື ແລະ ການພົວພັນລະຫວ່າງລັດຖະສະພາສະມາຊິກ AIPA ແລະ ບັນດາປະເທດສັງເກດການ.
ຫວຽດນາມຕັ້ງໜ້າພ້ອມກັບ AIPA ສ້າງປະຊາຄົມ ອາຊຽນ ວັດທະນາຖາວອນ
ໂດຍເຂົ້າເປັນສະມາຊິກ AIPA ຢ່າງເປັນທາງການໃນປີ 1995, ຍາມໃດ ຫວຽດນາມ ກໍ່ເປັນເຈົ້າການໃນການເຂົ້າຮ່ວມບັນດາການເຄື່ອນໄຫວຂອງພັນທະມິດ ແລະ ຕັ້ງໜ້າປະກອບສ່ວນທີ່ກອງປະຊຸມຄັ້ງຕ່າງຂອງ ສະມັດຊາໃຫຍ່ AIPA, ກໍ່ຄືໄດ້ຈັດຕັ້ງກອງປະຊຸມໃຫຍ່ AIPA – 23 (2001 – 2002), AIPA – 31 (2009 - 2010) ແລະ ບັນດາກອງປະຊຸມຫົວເລື່ອງສະເພາະ, ກອງປະຊຸມຂັ້ນຄະນະກຳມະການຄືກອງປະຊຸມກ່ຽວກັບ “ຫຼັງວິກິດການການເມືອງເສດຖະກິດໂລກ ແລະ ການພັດທະນາແບບຍືນຍົງ” ປີ 2010, ກອງປະຊຸມກ່ຽວກັບ “ບົດບາດຂອງອົງການນິຕິບັນຍັດຕໍ່ໜ້າວິກິດການການເງິນ, ເງິນຕາ” ປີ 1998 ແລະ ກອງປະຊຸມ “ຜັນຂະຫຍາຍໂຄງການຄົ້ນຄ້ວາຮ່ວມມືດ້ານນິຕິກຳໃນການປ້ອງກັນ, ຕ້ານການຄ້າແມ່ຍິງ ແລະ ເດັກນ້ອຍ” ປີ 2005 ສຳເລດຜົນ. ມີຂໍ້ສະເໜີຫຼາຍຢ່າງຂອງ ຫວຽດນາມ ໄດ້ຮັບການຕີລາຄາສູງຈາກສະມາຊິກ AIPA. ຫວຽດນາມ ກໍ່ປະກອບສ່ວນຕັ້ງໜ້າເຂົ້າໃນການຊຸກຍູ້ນ້ຳໃຈມິດຕະພາບ, ການຮ່ວມມື, ແລກປ່ຽນ ແລະ ເຂົ້າອົກເຂົ້າໃຈເຊິ່ງກັນ ແລະ ກັນໃນປະຊາຄົມ AIPA; ມານະພະຍາຍາມຍົກສູງບົດບາດ, ທີ່ຕັ້ງ ແລະ ປະສິດທິຜົນການເຄື່ອນໄຫວຂອງ AIPA ເພື່ອສັນຕິພາບ ແລະ ຄວາມວັດທະນາຖາວອນຂອງພາກພື້ນ ແລະ ໂລກ. ສະພາແຫ່ງຊາດຫວຽດນາມໄດ້ມີການປ່ຽນໃໝ່ ແລະ ປະກາດໃຊ້ຫຼາຍນະໂຍບາຍ, ເອກະສານນິຕິກຳ ເພື່ອຜັນຂະຫຍາຍບັນດາມະຕິເຊິ່ງໄດ້ຮັບການຮັບຮອງເອົາທີ່ກອງປະຊຸມໃຫຍ່ AIPA ຄັ້ງຕ່າງໆ.
ທີ່ AIPA 35, ຄະນະຫວຽດນາມໂດຍທ່ານປະທານສະພາແຫ່ງຊາດ ຫງວຽນຊິງຮຸ່ງ ນຳໜ້າ ໄດ້ເຂົ້າຮ່ວມການເຄື່ອນໄຫວຕ່າງໆຂອງກອງປະຊຸມໃຫຍ່. ການມີໜ້າຂອງທ່ານ ປະທານສະພາແຫ່ງຊາດ ຫງວຽນຊິງຮຸ່ງ ແລະ ບັນດາທ່ານຫົວໜ້າກຳມາທີການຕ່າງໆຂອງສະພາແຫ່ງຊາດຫວຽດນາມ ໄດ້ເປັນການຢືນຢັນອີກຄັ້ງໜຶ່ງວ່າ, ຫວຽດນາມຍາມໃດກໍ່ແມ່ນສະມາຊິກທີ່ມີຄວາມມານະພະຍາຍາມ, ຕັ້ງໜ້າ ແລະ ມີຄວາມຮັບຜິດຊອບໃນການກໍ່ສ້າງ ແລະ ພັດທະນາປະຊາຄົມອາຊຽນ ສັນຕິພາບ, ສະຖຽນລະພາບ, ຮ່ວມມື ແລະວັດທະນາຖາວອນ.
ດ້ວຍແຜນນະໂຍບາຍເປັນເຈົ້າການເຊື່ອມໂຍງເຂົ້າກັບສາກົນ, ຕັ້ງ ໜ້າ ແລະ ມີຄວາມຮັບຜິດຊອບ, ຫວຽດນາມຈະເພີ່ມທະວີ, ປ່ຽນໃໝ່ ແລະ ພັດທະນາການພົວພັນສາມັກຄີມິດຕະພາບ, ການຮ່ວມມືກັບປະເທດຕ່າງໆຢ່າງບໍ່ຢຸດຢັ້ງ ເພື່ອພ້ອມກັບປະເທດຕ່າງໆກໍ່ສ້າງປະຊາຄົມອາຊຽນໃນປີ 2015 ແລະ ວິໄສທັດອາຊຽນຫຼັງປີ 2015.
ດ້ວຍຄວາມມານະພະຍາຍາມຂອງແຕ່ລະປະເທດ, ກອງປະຊຸມໃຫຍ່ AIPA 35 ຈະເພີ່ມທະວີຄວາມສະໜິດຕິດພັນລະຫວ່າງລັດຖະ ສະພາບັນດາປະເທດສະມາຊິກ, ພ້ອມທັງປະກອບສ່ວນຢ່າງຕັ້ງໜ້າໃນການກໍ່ສ້າງ ແລະ ພັດທະນາປະຊາຄົມອາຊຽນສັນຕິພາບ, ສະຖຽນລະພາບ, ຮ່ວມມື ແລະ ວັດທະນາຖາວອນ.