(vovworld)- ອ່ານສູນທອນພົດອັດກອງປະຊຸມໃຫຍ່ຄັ້ງທີ 12 ຂອງພັກ ໃນຕອນເຊົ້າວັນທີ 28/1, ທ່ານເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ໄດ້ເນັ້ນຫນັກວ່າ: ຜົນສຳເລັດຂອງກອງປະຊຸມໃຫຍ່ໄດ້ລະດົມກຳລັງໃຈໃຫ້ທົ່ວພັກ, ທົ່ວປວງຊົນ, ທົ່ວກອງທັບຜ່ານຜ່າຄວາມຫຍຸ້ງຍາກ, ສິ່ງທ້າທາຍ, ສູ້ຊົນນຳປະເທດຫວຽດນາມ ກາຍເປັນປະເທດອຸດສາຫະກຳຕາມທິດທັນສະໄຫມໂດຍໄວ. ໝາກຜົນຂອງກອງປະຊຸມໃຫຍ່ກໍເປີດໄລຍະພັດທະນາໃຫມ່ຂອງປະເທດຊາດ, ກ້າວຂຶ້ນສັງຄົມນິຍົມຢ່າງໝັ້ນຄົງ. ຕໍ່ໄປນີ້ ບັນນາທິການວິທະຍຸກະຈາຍສຽງຫວຽດນາມ ຄັດສະເຫນີບັນດາເນື້ອໃນຕົ້ນຕໍຂອງບົດປາໄສດັ່ງກ່າວ.
ທ່ານເລຂາທິການໃຫຍ່ ຫງວຽນຟູຈ້ອງ
ອ່ານສູນທອນພົດອັດກອງປະຊຸມໃຫຍ່ຄັ້ງທີ 12 ຂອງພັກ
|
ບັນດາຈຸດພົ້ນເດັ່ນສຳຄັນຂອງກອງປະຊຸມໃຫຍ່ໂດຍທ່ານເລຂາທິການໃຫຍ່ ຫງວຽນຟູຈ້ອງ ເຕື້ອງເຖິງ ຊື່ງລວມມີ: ເລື່ອງຮັບຮອງເອົາບັນດາເອກະສານກອງປະຊຸມໃຫຍ່; ເປັນຈິດຫນຶ່ງໃຈດຽວ ແລະ ຕັດສິນໃຈປະຕິບັດບັນດາຄາດໝາຍສັງລວມ, ສຳເລັດວຽກງານບຸກຄະລາກອນ.
ຮັບຮອງເອົາບັນດາແຜນນະໂຍບາຍ, ລັດຖະນະໂຍບາຍສຳຄັນ
ຕາມທ່ານເລຂາທິການໃຫຍ່ແລ້ວ, ກອງປະຊຸມໃຫຍ່ ໄດ້ປຶກສາຫາລືຢ່າງກົງໄປກົງມາ, ປະຊາທິປະໄຕ ແລະ ເຫັນດີເປັນເອກະພາບຢ່າງສູງ ເມື່ອຮັບຮອງເອົາບັນດາເອກະສານສຳຄັນ, ບົດລາຍງານການເມືອງ, ບົດລາຍງານຕີລາຄາໝາກຜົນແຫ່ງການປະຕິບັດຫນ້າທີ່ພັດທະນາເສດຖະກິດສັງຄົມໄລຍະ 5 ປີ ຄືແຕ່ປີ 2011-2015 ແລະ ທິດທາງ, ຫນ້າທີ່ພັດທະນາເສດຖະກິດສັງຄົມໄລຍະ 5 ປີຄືແຕ່ປີ 2016-2020, ບົດລາຍງານສຳຫລວດກວດຄືນການຊີ້ນຳນຳພາຂອງຄະນະບໍລິຫານງານສູນກາງພັກຊຸດທີ 11; ບົດລາຍງານສະຫລຸບການປະຕິບັດກົດລະບຽບຂອງພັກຊຸດທີ 11 ແລະ ບົດລາຍງານສະຫລຸບການປະຕິບັດມະຕິສູນກາງພັກຄັ້ງທີ 4 ຊຸດທີ 11 “ບາງບັນຫາຮີບດ່ວນກ່ຽວກັບການກໍ່ສ້າງພັກປະຈຸບັນ”. ບັນດາແຜນນະໂຍບາຍ, ລັດຖະນະໂຍບາຍສຳຄັນນີ້ມີຄຸນຄ່າກ່ຽວກັບການກຳນົດທິດ ແລະ ຊີ້ນຳຢ່າງເລິກເຊິ່ງ ແລະ ຄົບຊຸດວິວັດການຜັນຂະຫຍາຍການປະຕິບັດທິດທາງ, ຫນ້າທີ່ພັດທະນາປະເທດຊາດຢ່າງວ່ອງໄວ, ໝັ້ນຄົງ, ສ້າງສາ ແລະ ປົກປັກຮັກສາປະເທດຊາດ.
“ບັນດາເອກະສານນີ້ໄດ້ຮັບການສ້າງຂຶ້ນບົນພື້ນຖານສະຫລຸບທິດສະດີ ແລະ ພຶດຕິກຳຕົວຈິງຂອງ 30 ປີແຫ່ງການປ່ຽນແປງໃຫມ່, 5 ປີປະຕິບັດໂຄງການການເມືອງກ່ຽວກັບການສ້າງສາປະເທດຊາດໃນໄລຍະຂ້າມຜ່ານກ້າວຂຶ້ນສັງຄົມນິຍົມ, ຍຸດທະສາດພັດທະນາເສດຖະກິດສັງຄົມໄລຍະ 2011-2020 ແລະ 2 ປີແຫ່ງການປະຕິບັດລັດຖະທຳມະນູນປີ 2013, ສຸມພູມປັນຍາ, ເຈດຈຳນົງ, ຄວາມມຸ້ງມາດປາດຖະຫນາຂອງທົ່ວພັກ, ທົ່ວປວງຊົນ, ທົ່ວກອງທັບ. ບັນດາເອກະສານດັ່ງກ່າວແມ່ນສືບຕໍ່ຢັ້ງຢືນ, ປັບປຸງທັດສະນະ,ແນວທາງປ່ຽນໃຫມ່ຂອງພັກໃຫ້ສົມບູນແບບ ບົນພື້ນຖານໝູນໃຊ້ຢ່າງມີຫົວຄິດປະດິດສ້າງ, ພັດທະນາລັດທິ ມາກເລນີນ ແນວຄິດໂຮ່ຈິມີນ ແລະ ຮັບເອົາບັນດາບົດຮຽນສາກົນທີ່ເໝາະສົມກັບເງື່ອນໄຂຢູ່ຫວຽດນາມ; ກຳນົດຄາດໝາຍ, ຫນ້າທີ່ສ້າງສາ, ປົກປັກຮັກສາປະເທດຊາດ ໃນໄລຍະພັດທະນາໃຫມ່ທີ່ເຕັມໄປດ້ວຍແງ່ຫວັງ ແຕ່ສິ່ງທ້າທາຍກໍ່ບໍ່ແມ່ນຫນ້ອຍ.”
ຕັດສິນໃຈປະຕິບັດບັນດາຄາດໝາຍສັງລວມໃຫ້ໄດ້
ທ່ານເລຂາທິການໃຫຍ່ ຫງວຽນຟູຈ້ອງ ໄດ້ຢືນຢັນວ່າ: ກອງປະຊຸມໃຫຍ່ແມ່ນສະແດງໃຫ້ເຫັນຄວາມເປັນເອກະພາບດ້ານເຈດຈຳນົງ ແລະ ຄວາມຕັດສິນໃຈຢ່າງແຮງກ້າຂອງທົ່ວພັກ, ທົ່ວປວງຊົນ ແລະ ທົ່ວກອງທັບໃນຊຸມປີຈະມາເຖິງ, ປະຕິບັດໃຫ້ໄດ້ຄາດໝາຍສັງລວມ ນັ້ນແມ່ນ “ເພີ່ມທະວີການກໍ່ສ້າງພັກໃຫ້ປອດໃສ,ເຂັ້ມແຂງ, ຍົກສູງກຳລັງຄວາມສາມາດການຊີ້ນຳນຳພາ ແລະ ກຳລັງຕໍ່ສູ້ຂອງພັກ, ກໍ່ສ້າງລະບົບການເມືອງໃຫ້ເຂັ້ມແຂງ, ເສີມຂະຫຍາຍກຳລັງແຮງທົ່ວປວງຊົນທັງຊາດ ແລະ ປະຊາທິປະໄຕສັງຄົມນິຍົມ; ຍູ້ແຮງກິດຈະການປ່ຽນແປງໃຫມ່ ຢ່າງຮອບດ້ານ, ຄົບຊຸດ, ພັດທະນາເສດຖະກິດຢ່າງວ່ອງໄວ, ໝັ້ນຄົງ, ເຂັ້ມແຂງ, ສູ້ຊົນນຳຫວຽດນາມກາຍເປັນປະເທດ
ອຸດສາຫະກຳຕາມທິດທັນສະໄຫມໂດຍໄວ, ຍົກສູງຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນ, ຢືດໝັ້ນ, ເດັດດ່ຽວ, ຕັ້ງໝັ້ນຕໍ່ສູ້ ປົກປັກຮັກສາເອກະລາດ, ອະທິປະໄຕ, ເອກະພາບ, ຜືນແຜ່ນດິນອັນຄົບຖ້ວນຂອງປະເທດຊາດ, ຮັກສາພັກ, ລັດ, ປະຊາຊົນ ແລະ ລະບອບສັງຄົມນິຍົມຢ່າງໝັ້ນຄົງ, ຮັກສາສັນຕິພາບ, ສະຖຽນລະພາບ, ເປັນເຈົ້າການ ແລະ ຕັ້ງຫນ້າເຊື່ອມໂຍງເຂົ້າກັບສາກົນເພື່ອພັດທະນາປະເທດຊາດ. ຍົກສູງທີ່ຕັ້ງບົດບາດ ແລະ ອິດທິພົນຊື່ສຽງຂອງຫວຽດນາມໃນພາກພື້ນ ແລະ ໃນໂລກ.
“ໂດຍຮັບຮູ້ຢ່າງເລິກເຊິ່ງກ່ຽວກັບພາລະກຳປະຫວັດສາດ ແລະ ພາລະຫນ້າທີ່ສຳຄັນຂອງປະເທດຊາດ, ກອງປະຊຸມໃຫຍ່ ໄດ້ຢືນຢັນຄວາມຕັດສິນໃຈສືບຕໍ່ເພີ່ມທະວີການກໍ່ສ້າງ, ປັບປຸງພັກ, ຍົກສູງຄຸນນະທາດດ້ານການເມືອງ, ກຳລັງຄວາມສາມາດ ພູມປັນຍາ, ສັດຈະທຳ ແລະ ຄຸນສົມບັດປະຕິວັດ, ເຮັດໃຫ້ພັກປອດໃສ, ເຂັ້ມແຂງຢ່າງແທ້ຈິງ, ປັບປຸງຄວາມໄວ້ເນື້ອເຊື່ອໃຈຂອງປະຊາຊົນທີ່ມີຕໍ່ພັກ. ກອງປະຊຸມໃຫຍ່ ໄດ້ເນັ້ນຫນັກຄວາມຮຽກຮ້ອງຕ້ອງການເພີ່ມທະວີຄວາມສາມັກຄີ, ເອກະພາບເຈດຈຳນົງ ແລະ ການກະທຳຂອງທົ່ວພັກ, ເພີ່ມຄວາມສະຫນິດຕິດພັນລະຫວ່າງພັກກັບປະຊາຊົນເປັນປະຈຳ.”
ສະຫລາດສ່ອງໃສໃນການຄັດເລືອກ ແລະ ເລືອກຕັ້ງຄະນະບໍລິຫານງານສູນກາງພັກຊຸດທີ 12
ທ່ານເລຂາທິການໃຫຍ່ ໄດ້ຢືນຢັນວ່າ ກອງປະຊຸມໃຫຍ່ດຳເນີນໄປຢ່າງເຂັ້ມງວດ, ຖືກຕ້ອງກັບກົດລະບຽບຂອງພັກ, ມີຄວາມສະຫລາດສ່ອງໃສໃນການຄັດເລືອກ ແລະ ເລືອກຕັ້ງບັນດາສະຫາຍທີ່ມີມາດຕະຖານເງື່ອນໄຂຄົບຖ້ວນ ແລະ ສົມເປັນສະມາຊິກຄະນະບໍລິຫານງານສູນກາງພັກຊຸດທີ 12 ຊື່ງລວມມີ: ກຳມະການສູນກາງພັກສົມບູນ 180 ທ່ານ ແລະ ກຳມະການສູນກາງພັກ ສຳຮອງ 20 ທ່ານ. ກອງປະຊຸມໄດ້ມອບຫນ້າທີ່ສຳຄັນ ໃຫ້ຄະນະບໍລິຫານງານສູນກາງພັກຊຸດທີ 12 ໃນການຊີ້ນຳນຳພາທົ່ວພັກ, ທົ່ວປວງຊົນ ແລະ ທົ່ວກອງທັບ ປະຕິບັດມະຕິກອງປະຊຸມໃຫຍ່ຢ່າງມີໄຊ. ຕາມທ່ານເລຂາທິການໃຫຍ່ ຫງວຽນຟູຈ້ອງແລ້ວ, ຄວາມສາມັກຄີເປັນຈິດຫນຶ່ງໃຈດຽວ, ສຸດຈິດສຸດໃຈເພື່ອຮັບໃຊ້ປະເທດຊາດ, ຮັບໃຊ້ປະຊາຊົນ, ພ້ອມກັບທົ່ວພັກ, ທົ່ວປວງຊົນ, ທົ່ວກອງທັບປະຕິບັດບັນດາຄາດໝາຍ, ຫນ້າທີ່ອັນຍິ່ງໃຫຍ່ຊື່ງກອງປະຊຸມໄດ້ກຳນົດຢ່າງມີໄຊ.
ຮຽກຮ້ອງຄວາມສາມັກຄີໃນທົ່ວພັກ, ທົ່ວປວງຊົນເພື່ອປະຕິບັດມະຕິກອງປະຊຸມໃຫຍ່ຢ່າງມີໄຊ.
ທ່ານເລຂາທິການໃຫຍ່ ຫງວຽນຟູຈ້ອງ ໄດ້ເນັ້ນຫນັກຜົນສຳເລັດອັນຈົບງາມຂອງກອງປະຊຸມໃຫຍ່ຄັ້ງທີ 12 ຂອງພັກ ໄດ້ລະດົມກຳລັງໃຈທົ່ວພັກ, ທົ່ວປວງຊົນ ແລະ ທົ່ວກອງທັບ ຜ່ານຜ່າຄວາມຫຍຸ້ງຍາກ, ສິ່ງທ້າທາຍ, ຍາດແຍ່ງກາລະໂອກາດໃຫມ່ ສູ້ຊົນນຳຫວຽດນາມ ກາຍເປັນປະເທດອຸດສາຫະກຳຕາມທິດທັນສະໄຫມໂດຍໄວ.
“ພາຍຫລັງກອງປະຊຸມໃຫຍ່, ອົງຄະນະພັກ, ອົງການຈັດຕັ້ງພັກທຸກຂັ້ນ ຄວນປະຕິບັດການເຜີຍແຜ່, ໂຄສະນາໝາກຜົນກອງປະຊຸມຢ່າງເລິກເຊິ່ງກວ້າງຂວາງໃນທົ່ວພັກ, ທົ່ວປວງຊົນ ແລະ ທົ່ວກອງທັບ, ຄົ້ນຄ້ວາ, ໍຊາບຊືມມະຕິ ແລະ ບັນດາເອກະສານກອງປະຊຸມໃຫຍ່ຢ່າງເລິກເຊິ່ງ. ຮີບເຮັ່ງກໍ່ສ້າງ, ຜັນຂະຫຍາຍໂຄງການ, ແຜນການດຳເນີນງານ, ປຸກລຸກຂະບວນການແຂ່ງຂັນຮັກຊາດຢ່າງເລິກເຊິ່ງກວ້າງຂວາງໃນປະຊາຊົນທຸກຊັ້ນວັນນະ, ນຳມະຕິກອງປະຊຸມໃຫຍ່ເຂົ້າສູ່ຊີວິດຕົວຈິງ. ກອງປະຊຸມໃຫຍ່ໄດ້ຮຽກຮ້ອງໃຫ້ທົ່ວພັກ, ທົ່ວປວງຊົນ, ທົ່ວກອງທັບ, ປະຊາຊົນຢູ່ພາຍໃນ ແລະ ຕ່າງປະເທດ ເສີມຂະຫຍາຍຈິດໃຈຮັກຊາດ, ເຈດຈຳນົງ ເພີ່ງຕົນເອງ ສ້າງຄວາມເຂັ້ມແຂງດ້ວຍຕົນເອງ, ກຳລັງແຮງມະຫາສາມັກຄີທົ່ວປວງຊົນທັງຊາດ, ແຂ່ງຂັນປະຕິບັດມະຕິກອງປະຊຸມໃຫຍ່ຢ່າງມີໄຊ, ເປີດໄລຍະພັດທະນາໃຫມ່ຂອງປະເທດຊາດຢ່າງສະຫງ່າລາສີ, ຈົບງາມ, ກ້າວຂຶ້ນສັງຄົມນິຍົມຢ່າງໝັ້ນຄົງ."
ກອງປະຊຸມໃຫຍ່ຄັ້ງທີ 12 ຂອງພັກ ໄດ້ອັດລົງດ້ວຍການສຳເລັດຫລາຍເນື້ອໃນສຳຄັນ. ບັນດາລັດຖະນະໂຍບາຍໄດ້ຮັບການຮັບຮອງເອົາທີ່ກອງປະຊຸມໃຫຍ່ພ້ອມກັບຄວາມຕັດສິນໃຈຂອງຄະນະບໍລິຫານງານສູນກາງພັກຊຸດທີ 12 ຂອງທົ່ວພັກ, ທົ່ວປວງຊົນ ຈະນຳປະເທດຫວຽດນາມ ສືບຕໍ່ພັດທະນາສີວິໄລ, ທັນສະໄຫມ, ກ້າວຂຶ້ນສັງຄົມນິຍົມຢ່າງໝັ້ນຄົງ.