ປະຈຸບັນ, ຢູ່ຫວຽດນາມພວມດຳເນີນບັນດາການເຄື່ອນໄຫວເພື່ອກະກຽມໃຫ້ແກ່ການເລືອກຕັ້ງສະມາຊິກສະພາແຫ່ງຊາດຊຸດທີ 14 ຊຶ່ງຈະຖືກຈັດຂຶ້ນໃນວັນທີ 22/5ທີ່ຈະມາເຖິງ. ແນວໂຮມປະເທດຊາດຫວຽດນາມຂັ້ນຕ່າງໆກໍດຳເນີນບັນດາກອງປະຊຸມປຶກສາຫາລືແນະນຳບຸກຄະລາກອນ ອອກສະໝັກເລືອກຕັ້ງ ສະມາຊິກສະພາແຫ່ງຊາດຢ່າງມີປະຊາທິປະໄຕ, ຖືກຕ້ອງກັບລະບຽບກົດໝາຍ.
(ພາບປະກອບ)
|
ອາທິດແລ້ວນີ້, ຢູ່ຮ່າໂນ້ຍ, ຄະນະປະທານຄະນະກຳມະການສູນກາງ ແນວໂຮມປະເທດຊາດຫວຽດນາມໄດ້ດຳເນີນ ກອງປະຊຸມປຶກສາຫາລືຄັ້ງທີ 1, ຕົກລົງກ່ຽວກັບໂຄງປະກອບ, ພາກສ່ວນ, ຈຳນວນພະນັກງານຂອງບັນດາອົງການ, ສຳນັກງານຂັ້ນສູນກາງ ໄດ້ຮັບການແນະນຳອອກສະໝັກຮັບເລືອກຕັ້ງເປັນ ສະມາຊິກສະພາແຫ່ງຊາດຊຸດທີ 14. ຕໍ່ຈາກນັ້ນ, ຢູ່ຫຼາຍທ້ອງຖິ່ນໃນທົ່ວປະເທດ ກໍໄດ້ດຳເນີນບັນດາ ກອງປະຊຸມປຶກສາຫາລືເພື່ອກະກຽມບຸກຄະລາກອນໃຫ້ແກ່ການເລືອກຕັ້ງຄັ້ງນີ້.
ປຶກສາຫາລືແນະນຳຜູ້ອອກສະໝັກຮັບເລືອກຕັ້ງຕາມໂຄງປະກອບ, ພາກສ່ວນ
ແນວໂຮມປະເທດຊາດຫວຽດນາມມີສິດ ແລະ ຄວາມຮັບຜິດຊອບເຂົ້າຮ່ວມວຽກງານການເລືອກຕັ້ງ, ປະກອບສ່ວນຮັບປະກັນໃຫ້ການເລືອກຕັ້ງໄດ້ດຳເນີນຢ່າງມີປະຊາທິປະໄຕ, ສະເໝີພາບ, ຖືກຕ້ອງຕາມກົດໝາຍ, ມີຄວາມປອດໄພ, ປະຢັດ ແລະ ກາຍເປັນວັນບຸນຂອງປະຊາຊົນຢ່າງແທ້ຈິງ. ຍ້ອນເຫດນີ້ເອງ, ວຽກງານປຶກສາຫາລືແນະນຳບຸກຄະລາກອນອອກສະໝັກເລືອກຕັ້ງເປັນສະມາຊິກສະພາແຫ່ງຊາດແມ່ນຕ້ອງຮັບປະກັນໃຫ້ມີປະຊາທິປະໄຕ, ຖືກຕ້ອງກັບລະບຽບກົດໝາຍ ແລະ ກຳນົດເວລາທີ່ໄດ້ວາງອອກ. ທ່ານຫງວຽນວັນຟາ ຮອງປະທານຄະນະກຳມະການສູນກາງ ແນວໂຮມປະເທດຊາດຫວຽດນາມໃຫ້ຮູ້ວ່າ :
“ ພວກຂ້າພະເຈົ້າໄດ້ສະເໜີ ແລະ ແນະນຳໃຫ້ບັນດາທ້ອງຖິ່ນ ປະຕິບັດຢ່າງຖືກຕ້ອງຕາມມາດຕາ 8 ຂອງກົດໝາຍວ່າດ້ວຍການເລືອກຕັ້ງ, ເຮັດແນວໃດເພື່ອໃຫ້ຈຳນວນຜູ້ອອກສະໝັກເລືອກຕັ້ງເປັນແມ່ຍິງບັນລຸອັດຕາຢ່າງໜ້ອຍ 35%, ຈຳນວນຜູ້ອອກສະໝັກເລືອກຕັ້ງເປັນຊາວເຜົ່າສ່ວນໜ້ອຍບັນລຸອັດຕາຢ່າງໜ້ອຍ 18%. ຕາມມາດຕາ 9 ຂອງກົດໝາຍວ່າດ້ວຍການເລືອກຕັ້ງ, ຄະນະປະຈຳຄະນະກຳມະການແນວໂຮມປະເທດຊາດຫວຽດນາມຂັ້ນຕ່າງໆ ຕ້ອງເປັນເຈົ້າການແລກປ່ຽນ, ເປັນເອກະພາບກັບຄະນະປະຈຳສະພາປະຊາຊົນຂັ້ນດຽວກັນ ເພື່ອຄາດຄະເນຮ່າງໂຄງປະກອບ, ພາກສ່ວນ, ຈຳນວນຄົນທີ່ໄດ້ຮັບການແນະນຳອອກສະໝັກເລືອກຕັ້ງຢູ່ທ້ອງຖິ່ນຂອງຕົນ ”
ມາຮອດຈຸດເວລານີ້, ສູນກາງແນວໂຮມປະເທດຊາດຫວຽດນາມໄດ້ດຳເນີນ ກອງປະຊຸມປຶກສາຫາລືຄັ້ງທີ 1, ໄດ້ຕົກລົງກັນກ່ຽວກັບໂຄງປະກອບ, ພາກສ່ວນ, ຈຳນວນພະນັກງານຂອງບັນດາອົງການ, ສຳນັກງານຂັ້ນສູນກາງໄດ້ຮັບການແນະນຳອອກສະໝັກຮັບເລືອກຕັ້ງເປັນ ສະມາຊິກສະພາແຫ່ງຊາດບົນພື້ນຖານການຄາດຄະເນຂອງຄະນະປະຈຳສະພາແຫ່ງຊາດ. ຊຸມມື້ນີ້, ທ້ອງຖິ່ນຕ່າງໆເຊັ່ນ: ກວາງນິງ, ດ້ຽນບຽນ, ຕຽນຢາງ, ດັກລັກ ຕ່າງກໍສຳເລັດການດຳເນີນກອງປະຊຸມປຶກສາຫາລືຄັ້ງທີ 1 ເພື່ອຕົກລົງກ່ຽວກັບໂຄງປະກອບ, ພວກສ່ວນ, ຈຳນວນພະນັກງານໄດ້ຮັບການແນະນຳອອກສະໝັກຮັບເລືອກຕັ້ງ ແລະ ອອກສະໝັກຮັບເລືອກຕັ້ງດ້ວຍຕົນເອງເປັນ ສະມາຊິກສະພາແຫ່ງຊາດຊຸດທີ 14 ຢູ່ທ້ອງຖິ່ນ. ທ່ານນາງໂດ້ທິຮ່ວາງ ຮອງເລຂາຜູ້ປະຈຳການຄະນະພັກແຂວງ, ຫົວໜ້າຄະນະສະມາຊິກສະພາແຫ່ງຊາດແຂວງກວາງນິງໃຫ້ຮູ້ວ່າ :
“ 1 ວັນ ພາຍຫຼັງທີ່ໄດ້ດຳເນີນກອງປະຊຸມທົ່ວປະເທດຜັນຂະຫຍາຍວຽກງານເລືອກຕັ້ງສະມາຊິກສະພາແຫ່ງຊາດ, ແຂວງກວາງນິງໄດ້ຈັດຕັ້ງກອງປະຊຸມປຶກສາຫາລື. ຄະນະປະຈຳສະພາປະຊາຊົນ, ຄະນະກຳມະການແນວໂຮມປະເທດຊາດຫວຽດນາມ ໄດ້ເປັນເຈົ້າການ ໂດຍອີງໃສ່ຂອບຂະໜາດປະຊາກອນ, ລັກສະນະພິເສດສະເພາະຂອງເສດຖະກິດສັງຄົມ, ບໍລິເວນຂອງແຂວງ ເພື່ອວາງວິທີການຈັດສັນພາກສ່ວນ, ໂຄງປະກອບ, ຈຳນວນຜູ້ແທນໄດ້ຮັບການແນະນຳອອກສະໝັກຮັບເລືອກຕັ້ງ ”
ຜັນຂະຫຍາຍຫຼາຍຈຸດໃໝ່ ແຕ່ຍັງຄົງຮັບປະກັນໃຫ້ຖືກຕ້ອງຕາມກົດໝາຍວ່າດ້ວຍການເລືອກຕັ້ງ
ການເລືອກຕັ້ງສະມາຊິກສະພາແຫ່ງຊາດຄັ້ງນີ້ ໄດ້ຮັບການປະຕິບັດຕາມກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນປີ 2015. ຕາມນັ້ນແລ້ວ, ແນວໂຮມປະເທດຊາດຂັ້ນຕ່າງໆ ຈຳເປັນຕ້ອງແນະນຳ, ຮັບປະກັນທັງຈຳນວນສ່ວນເກີນບຸກຄະລາກອນອອກສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ. ທ່ານຫງວຽນວັນຟາ ຮອງປະທານຄະນະກຳມະການສູນກາງ ແນວໂຮມປະເທດຊາດຫວຽດນາມ ຢືນຢັນວ່າ ທານຄະນະກຳມະການສູນກາງ ແນວໂຮມປະເທດຊາດຫວຽດນາມໄດ້ນຳສະເໜີສະພາເລືອກຕັ້ງແຫ່ງຊາດແນະນຳບັນຫານີ້ໂດຍລະອຽດເພື່ອນຳໃຊ້ຢ່າງເປັນເອກະພາບໃນທົ່ວປະເທດ. ສິ່ງທີ່ສຳຄັນກ່ວາໝູ່ແມ່ນຕ້ອງຮັບປະກັນຢ່າງຖືກຕ້ອງຕາມກົດໝາຍໃນວິວັດການ ປຶກສາຫາລືແນະນຳບຸກຄະລາກອນອອກສະໝັກເລືອກຕັ້ງ.
ທ່ານຫງວຽນວັນຟາ ຮອງປະທານຄະນະກຳມະການສູນກາງ ແນວໂຮມປະເທດຊາດຫວຽດນາມຊີ້ແຈ້ງວ່າ :
“ ການແນະນຳຜູ້ອອກສະໝັກຮັບເລືອກຕັ້ງແມ່ນບັນດາຂັ້ນຕອນປະຕິບັດຢ່າງຮັດກຸ່ມ, ບໍ່ສະເພາະແຕ່ ແນວໂຮມປະເທດຊາດຫວຽດນາມ. ແນວໂຮມປະເທດຊາດຫວຽດນາມພຽງແຕ່ເຮັດຂັ້ນຕອນສຸດທ້າຍ, ດັ່ງນັ້ນ ເມື່ອກອງປະຊຸມປຶກສາຫາລືຈະຈັດສັນຄາດໝາຍໃຫ້ອົງການ, ສຳນັກງານ, ຫົວໜ່ວຍໃດໆ, ອົງການ, ສຳນັກງານ, ຫົວໜ່ວຍນັ້ນ ຕ້ອງຮັບຜິດຊອບກ່ຽວກັບບຸກຄະລາກອນໂດຍຕົນເອງແນະນຳຕາມລະບຽບກົດໝາຍ. ສຳລັບຜູ້ອອກສະໝັກຮັບເລືອກຕັ້ງ ທີ່ຄາດວ່າເປັນສະມາຊິກສະພາແຫ່ງຊາດສະເພາະກິດນັ້ນ ກໍຕ້ອງມີການກຳນົດສະເພາະ ຫຼືວ່າຜູ້ອອກສະໝັກເລືອກຕັ້ງແມ່ນສະມາຊິກພັກ ກໍຕ້ອງຮັບປະກັນຕາມການແນະນຳຂອງພັກ ”
ການເລືອກຕັ້ງສະມາຊິກສະພາແຫ່ງຊາດຊຸດທີ 14 ໄດ້ດຳເນີນໃນວັນທີ 22/5 ທີ່ຈະມາເຖິງ ແມ່ນເຫດການທີ່ມີຄວາມໝາຍການເມືອງສຳຄັນຍິ່ງ. ແນວໂຮມປະເທດຊາດໄດ້ ແລະ ພວມປະຕິບັດຢ່າງຖືກຕ້ອງຕາມກົດໝາຍ, ມີຄວາມຮັບຜິດຊອບເພື່ອແນະນຳກັບຜູ້ມີສິດເລືອກຕັ້ງທົ່ວປະເທດ ກ່ຽວກັບບັນດາຜູ້ຄົນສົມເປັນຜູ້ອອກສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ຊຶ່ງແມ່ນອົງການທີ່ມີສິດອຳນາດສູງສຸດຂອງປະຊາຊົນ.