ການບຸກໂຈມຕີຕ່າງໆເກີດຂຶ້ນຢູ່ Afghanistan ໃນວັນທີ 15/4 (ພາບ: AP)
(vovworld) - ທ້າຍອາທິດຜ່ານມາ, ກຳລັງຕາລີບານ ໄດ້ບຸກໂຈມຕີນະຄອນຫຼວງ Kabul ແລະ 3 ແຂວງໃກ້ຄຽງ Paktia, Logar ແລະ Nangarhar ຢູ່ Afghanistan, ອັນໄດ້ເຮັດໃຫ້ນັບສິບຄົນຖືກເສຍຊີວິດ ແລະ ຮັບບາດເຈັບ. ນີ້ຖືກຖືວ່າແມ່ນໜຶ່ງໃນບັນດາການບຸກໂຈມຕີຂະໜາດໃຫຍ່ທີ່ເລັ່ງໃສ່ນະຄອນຫຼວງ Kabul ນັບແຕ່ເມື່ອທະຫານອາເມລິກາມີໜ້າຢູ່ Afghanistan ໃນກວ່າ 10 ປີທີ່ຜ່ານມາ. ເຖິງວ່າພາຍຫຼັງເກີດເຫດການ 1 ວັນ ລັດຖະບານສາມາດຄວບຄຸມສະຖານະການໄດ້ແລ້ວກໍ່ຕາມ, ແຕ່ສິ່ງດັ່ງກ່າວສະແດງໃຫ້ເຫັນວ່າ, ກຳລັງຕາລີບານຍັງແຂງແຮງຢູ່ ແລະ ໝາຍຄວາມວ່າ ສະພາບຂາດສະຖຽນລະພາບຈະນັບມື້ນັບເພີ່ມຂຶ້ນຢູ່ປະເທດອິດສະລາມນີ້.
ການບຸກໂຈມຕີເກີດຂຶ້ນ, ພາຍຫຼັງທີ່ຕາລີບານປະກາດດຳເນີນບັ້ນຕ່າວບຸກໂຈມຕີລະດູບານໃໝ່. ສະຖານທີ່ 7 ແຫ່ງຢູ່ໃຈກາງນະຄອນຫຼວງ Kabul ໄດ້ກາຍເປັນເປົ້າໝາຍບຸກໂຈມຕີຂອງກຳລັງນີ້, ນັ້ນແມ່ນ ບັນດາສະຖານທູດ, ໃນນັ້ນມີສະຖານທູດອາເມລິກາ, ອັງກິດ, ເຢຍລະມັນ ແລະ ຍີ່ປຸ່ນ, ພ້ອມກັບສຳນັກງານຂອງ NATO ແລະ ສຳນັກງານສະພາແຫ່ງຊາດ Afghanistan. ຕາມບັນດານັກໄຈ້ແຍກແລ້ວ, ການບຸກໂຈມຕີເຫຼົ່ານັ້ນ ບໍ່ແມ່ນເລື່ອງບັງເອີນ, ແຕ່ພັດພາໃຫ້ຊາວ Afghanistan ຕົກສະເງີ້ ຍ້ອນຂອບຂະໜາດ ແລະ ລະດັບການປະສານສົມທົບ. ອະທິບາຍໃຫ້ແກ່ການກະທຳຂອງຕົນ, ໂຄສົກຂອງຕາລີບານ ທ່ານ Zabihullah Mujahid ໃຫ້ຮູ້ວ່າ, ການບຸກໂຈມຕີເຫຼົ່ານັ້ນ ແມ່ນເພື່ອແນໃສ່ໂຕ້ຕອບເລື່ອງທະຫານອາເມລິກາຈູດປື້ມຄຳພີ Koran ແລະ ເລື່ອງສາມັນຊົນ Afghanistan ຖືກເຂັ່ນຂ້າກ່ອນນັ້ນ. ແຕ່ເຖິງຢ່າງໃດກໍ່ຕາມ, ການກະທຳນີ້ໄດ້ປະສົບກັບການຄັດຄ້ານຢ່າງຮຸນແຮງຂອງທ່ານເລຂາທິການໃຫຍ່ສະຫະປະຊາຊົນ Banki-Moon ແລະ ທ່ານຖືວ່າຄວນເພີ່ມທະວີຄວາມມານະພະຍາຍາມ ເພື່ອຕ້ານລັດທິກໍ່ການຮ້າຍ, ພ້ອມທັງໜູນຊ່ວຍການປ້ອງກັນຄວາມສະຫງົບໃຫ້ແກ່ລັດຖະບານ Afghanistan. ທ່ານນາງ Catherine Ashton ເຈົ້າໜ້າທີ່ຮັບຜິດຊອບນະໂຍບາຍພົວພັນຕ່າງປະເທດຂອງສະຫະພາບເອີລົບກໍ່ກ່າວປະນາມການບຸກໂຈມຕີຂອງ ຕາລີບານ ໃນວັນທີ 15/4.
ການບຸກໂຈມຕີເຫຼົ່ານັ້ນໄດ້ເພີ່ມທະວີຄວາມວິຕົກກັງວົນຕໍ່ສະພາບຂາດສະຖຽນລະພາບຢູ່ Afghanistan. ຕາມບັນດານັກສັງເກດການແລ້ວ, ເຖິງວ່າພຽງແຕ່ດຳເນີນພາຍໃນເວລາບໍ່ທັນຮອດ 1 ມື້ກໍ່ຕາມ, ແຕ່ການບຸກໂຈມຕີເຫຼົ່ານັ້ນ ໄດ້ເຮັດໃຫ້ການເຄື່ອນໄຫວຫຼາຍຢ່າງຂອງອຳນາດການປົກຄອງ Kabul ຖືກຢຸດສະງັກ. ຍິ່ງໄປກວ່ານັ້ນ, ການບຸກໂຈມຕີດັ່ງກ່າວລ້ວນແຕ່ເລັ່ງໃສ່ບັນດາສະຖານທີ່ ທີ່ໄດ້ຮັບການປ້ອງການຢ່າງເຂັ້ມງວດຢູ່ນະຄອນຫຼວງ Kabul . ສິ່ງດັ່ງກ່າວໄດ້ເຮັດໃຫ້ຫາງສຽງໂລກ ແລະ ເຈົ້າໜ້າທີ່ Afghanistan ຫຼາຍທ່ານຕ້ອງຕັ້ງຄຳຖາມກ່ຽວກັບຄວາມສາມາດດ້ານການສືບຂ່າວຂອງກຳລັງປ້ອງກັນຄວາມສະຫງົບ Afghanistan. ປະທານາທິບໍດີ Afghanistan Hamid Karzai ຕ້ອງຍອມຮັບວ່າ, ການບຸກໂຈມຕີເຫຼົ່ານັ້ນຂອງຕາລີບານ ແມ່ນການປະລາໄຊດ້ານສືບຂ່າວຂອງກຳລັງປ້ອງກັນຄວາມສະຫງົບ Afghanistanກໍ່ຄືຂອງ NATO ຢູ່ປະເທດນີ້. ທ່ານກໍ່ໄດ້ສະເໜີໃຫ້ເປີດການສືບສວນຢ່າງເຂັ້ມງວດກ່ຽວກັບເຫດການດັ່ງກ່າວ. ສະມາຊິກສະພາແຫ່ງຊາດ ທ່ານນາງ Shukria Barakzai ໃຫ້ຮູ້ວ່າ, ທ່ານນາງສົງໄສຕໍ່ຄວາມສາມາດຂອງກຳລັງປ້ອງກັນຄວາມສະຫງົບ Afghanistan ເພື່ອຮັບມືກັບພວກລຸກຮຶ້ຂຶ້ນ ເມື່ອບໍ່ມີການຊ່ວຍເຫຼືອຈາກສາກົນ. ທ່ານນາງກໍ່ຫວັງວ່າບັນດາເຈົ້າໜ້າທີ່ລັດຖະບານຕ້ອງມີຄຳຕອບຢ່າງລະອຽດກ່ຽວກັບເລື່ອງ ເປັນຫຍັງຕ້ອງໃຊ້ເວລາຫຼາຍທີ່ສຸດ ເພື່ອຢຸດຕະການບຸກໂຈມຕີ. ບໍ່ພຽງແຕ່ເທົ່ານັ້ນ, ການບຸກໂຈມຕີຍັງເຮັດໃຫ້ຊາວ Afghanistan ຂາດຄວາມເຊື່ອໝັ້ນຕໍ່ຄວາມໝັ້ນຄົງຢູ່ປະເທດນີ້ອີກດ້ວຍ.
ຕາມບັນດານັກໄຈ້ແຍກແລ້ວ, ການບຸກໂຈມຕີຂອງຕາລີບານ ບໍ່ພຽງແຕ່ສົ່ງຜົນສະທ້ອນເຖິງສະພາບພາຍໃນປະເທດເທົົ່ານັ້ນ, ຫາກຍັງສົ່ງຜົນສະທ້ອນບໍ່ດີເຖິງອິດທິພົນຂອງປະທານາທິບໍດີອາເມລິກາ Barak Obama ໃນສະພາບການທີ່ການເລືອກຕັ້ງປະທານາທິບໍດີອາເມລິກາ ໃກ້ຈະມາຮອດແລ້ວ. ສິ່ງດັ່ງກ່າວສະແດງໃຫ້ເຫັນຄວາມອ່ອນດ້ອຍຂອງທະຫານ Afghanistan . ວົງການນັກໄຈ້ແຍກຍັງຖືວ່າ, ສະພາບຄວາມສະຫງົບປອດໄພຢູ່ Afghanistan ອາດຈະສັບສົນກວ່າອີກ, ເມື່ອກຳລັງຕາລີບານປະກາດຈະປຸກລະດົມການບຸກໂຈມຕີຕ່າງໆທີ່ຄ້າຍຄືກັນອີກ. ໃນສະຖານະການຄືດັ່ງກ່າວ, ລັດຖະບານ Afghanistan ຍາກທີ່ຈະອີງໃສ່ການໜູນຊ່ວຍຈາກອາເມລິກາ ແລະ NATO ໃນໄລຍະຍາວໄດ້. ເພາະວ່າ, ວັນທີ 16/4, ເຈົ້າໜ້າທີ່ອາເມລິກາທ່ານໜຶ່ງໄດ້ເວົ້າວ່າເຫດການນີ້ບໍ່ສົ່ງຜົນສະທ້ອນເຖິງແຜນການຖອນທະຫານຂອງອາເມລິກາ ແລະ NATO ໃນທ້າຍປີ 2014 ເພື່ອມອບໜ້າທີ່ຮັບຜິດຊອບດ້ານຮັບປະກັນຄວາມສະຫງົບປອດໄພໃຫ້ແກ່ທະຫານ Afghanistan. ນີ້ແມ່ນການເລືອກເຟັ້ນຂອງປະທານາທິບໍດີອາເມລິກາ Barak Obama ເພື່ອແນໃສ່ ຢຸດຕິສົງຄາມທີ່ແກ່ຍາວມາເປັນເວລາກວ່າ 10 ປີທີ່ຜ່ານມາ, ເຊິ່ງໄດ້ກໍ່ຄວາມເສຍຫາຍຢ່າງໜັກໜ່ວງທັງດ້ານວັດຖຸ ແລະ ຊີວິດອີນຊີໃຫ້ແກ່ອາເມລິກາ.
ດ້ວຍທຸກສິ່ງທຸກຢ່າງທີ່ພວມເກີດຂຶ້ນນັ້ນ, ເບິ່ງຄືວ່າລັດຖະບານ Afghanistan ນັບມື້ນັບປະສົບກັບຄວາມຫຍຸ້ງຍາກໃນການຮັບປະກັນຄວາມສະຫົງບໃຫ້ແກ່ຊາວ Afghanistan ກໍ່ຄືຄວາມມີສະຖຽນລະພາບຢູ່ປະເທດອິດສະລາມນີ້.