(vovworld) - ສະຖາບັນນະໂຍບາຍສັງກັດສະມາຄົມ ອາຊີ (Asia Society Institute) ຢູ່ ອາເມລິກາ ຫາກໍ່ຈັດຕັ້ງເຫດການປະກາດບົດລາຍງານ “ກຳນົດເສັ້ນທາງໃຫ້ການເຊື່ອມໂຍງເສດຖະກິດ - ການຄ້າໃນພາກພື້ນ ອາຊີ - ປາຊີຟິກ”. ສະພາບການຄ້າທົ່ວໂລກເວົ້າລວມ ແລະ ພາກພື້ນປາຊີຟິກ ເວົ້າສະເພາະ ປະຈຸບັນພວມຖືກຜົນກະທົບຈາກສິ່ງທ້າທາຍຫລາຍຢ່າງ, ບົດລາຍງານ ວາງອອກໜ້າທີ່ໃຫ້ພາກພື້ນ ຕ້ອງຊອກຫາທິດທາງໃໝ່ໃຫ້ການເຊື່ອມໂຍງເຂົ້າກັບພາກພື້ນຢ່າງຮີບດ່ວນ.
ເຫດການປະກາດບົດລາຍງານ “ກຳນົດເສັ້ນທາງໃຫ້ການ
ເຊື່ອມໂຍງເສດຖະກິດ - ການຄ້າໃນພາກພື້ນ ອາຊີ - ປາຊີຟິກ”
(ພາບ: TTXVN)
ການຄ້າໃນທົ່ວໂລກໄດ້ຕົກຕ່ຳ, ບັນດາສັນຍາການຄ້າໃນປະຈຸບັນ ບໍ່ສາມາດທ່ວງທັນກັບການພັດທະນາຂອງການຄ້າ, ພິເສດແມ່ນກະແສຟອງປະຊາຊົນມີຄວາມລະແວງສົງໄສ, ຊ້ຳບໍ່ໜຳແມ່ນຕ້ານການຫັນການຄ້າເປັນເສລີ ແລະ ຫັນເປັນໂລກາພິວັດພວມນັບມື້ນັບແຮງຂຶ້ນ, ຊຶ່ງສະແດງອອກຜ່ານໝາກຜົນການລົງປະຊາມະຕິເລື່ອງ ອັງກິດ ຖອນອອກຈາກ ອີຢູ ແລະ ການເລືອກຕັ້ງປີ 2016 ຢູ່ ອາເມລິກາ, ອາເມລິກາ ຖອນອອກຈາກສັນຍາຄູ່ຮ່ວມມືຂ້າມປາຊີຟິກ (TPP)…ບັນດາສິ່ງດັ່ງກ່າວ ພວມຕັ້ງນະໂຍບາຍດ້ານການຄ້າຂອງພາກພື້ນ ອາຊີ - ປາຊີຟິກ ຢືນຢູ່ຕໍ່ໜ້າບັນດາບາດລ້ຽວທີ່ສຳຄັນ.
ຊອກຫາທິດທາງໃໝ່ໃຫ້ການເຊື່ອມໂຍງເຂົ້າກັບພາກພື້ນ
ຕໍ່ໜ້າບັນດາການປ່ຽນແປງຂອງໂລກ ທີ່ສົ່ງຜົນກະທົບບໍ່ໜ້ອຍເຖິງການຄ້າໃນທົ່ວໂລກ, ພາກພື້ນ ອາຊີ - ປາຊີຟິກ ຈຳເປັນຕ້ອງຊອກຫາທິດທາງໃໝ່ໃຫ້ຕົນເອງ ເພື່ອແບກຫາບຄວາມຮັບຜິດຊອບແມ່ນພາກພື້ນປະກອບເກືອບ 60% GDP ໃນທົ່ວໂລກ ແລະ ກວມເກືອບ 50% ມູນຄ່າການແລກປ່ຽນຄ້າຂາຍໃນໂລກ.
ເພາະສະນັ້ນ, ບົດລາຍງານ ໂດຍບັນດານັກຊ່ຽວຊານຊັ້ນນຳກ່ຽວກັບດ້ານການຄ້າພາກພື້ນ ອາຊີ - ປາຊີຟິກ, ຍົກອອກຂໍ້ສະເໜີແນະໃຫ້ບັນດານັກວາງນະໂຍບາຍອາຊີ - ປາຊີຟິກ ຄວນຖືບັນດາສັນຍາການຄ້າມີມາດຕະຖານສູງ ສືບຕໍ່ແມ່ນວິທີແກ້ໄຂດີທີ່ສຸດ ເພື່ອຊຸກຍູ້ການເຊື່ອມໂຍງເສດຖະກິດພາກພື້ນ. ຕາມນັ້ນແລ້ວ ສືບຕໍ່ນຳໃຊ້ຮູບແບບມາດຕະຖານສູງຂອງ TPP ຢູ່ພາກພື້ນ, ລວມມີທັງເລື່ອງນຳບັນດາມາດຕະຖານນີ້ ເຂົ້າການປະຕິຮູບຂອງແຕ່ລະປະເທດ ແລະ ເຂົ້າໃນບັນດາຂອບເຂດເຈລະຈາ 2 ຝ່າຍ, ຫລາຍຝ່າຍອື່ນໆ; ພ້ອມກັນນັ້ນ ແມ່ນເລື່ອງເພີ່ມທະວີມາດຕະຖານໃນວິວັດການເຈລະຈາສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP), ເດີນຕາມບັນດາໂອກາດຫັນການຄ້າພາກພື້ນເປັນເສລີ ໂດຍຜ່ານຄວາມານະພະຍາຍາມ 2 ຝ່າຍ, ຫລາຍຝ່າຍ, ພິເສດແມ່ນຢູ່ບັນດາເວທີປາໄສຄື APEC.
ທີ່ກອງປະຊຸມສຸດຍອດເວທີປາໄສຮ່ວມມືເສດຖະກິດ ອາຊີ - ປາຊີຟິກ (APEC) ຊຶ່ງດຳເນີນໃນທ້າຍປີ 2016 ຢູ່ປະເທດ ເປຣູ, ບັນດາການນຳລ້ວນແຕ່ຢັ້ງຢືນຄຳໝັ້ນສັນຍາຄືນໃໝ່ ຈະຍຶດໝັ້ນກັບເລື່ອງຫັນການຄ້າເປັນເສລີ. ເຖິງວ່າມີຄວາມວິຕົກກັງວົນກ່ຽວກັບບັນດານະໂຍບາຍຂອງອຳນາດການປົກຄອງໃໝ່ຂອງ ອາເມລິກາ ກໍ່ຕາມ ແຕ່ບັນດາການນຳຂອງ 21 ພື້ນຖານເສດຖະກິດສະມາຊິກ APEC ລ້ວນແຕ່ຖືວ່າ: ເລື່ອງ ອາເມລິກາ ຖອນອອກຈາກ TPP ບໍ່ສາມາດສົ່ງຜົນສະທ້ອນຕໍ່ເປົ້າໝາຍສຸຸມໃສ່ຊຸກຍູ້ຫັນການຄ້າເປັນເສລີ ແລະ ບັນດາຂໍ້ຕົກລົງການຄ້າເສລີ (FTA).
ມີຫລາຍການເລືອກເຟັ້ນການຄ້າອື່ນໆ
ປະຈຸບັນ ຫລາຍປະເທດພວມຊອກຫາບັນດາຂໍ້ຕົກລົງການຄ້າເສລີອື່ນ ເພື່ອທົດແທນໃຫ້ TPP, ໃນນັ້ນ ຂໍ້ຕົກລົງຄູ່ຮ່ວມມືເສດຖະກິດຮອບດ້ານພາກພື້ນ (RCEP), ທີ່ເຕົ້າໂຮມ 10 ປະເທດ ອາຊຽນ ພ້ອມກັບ ຈີນ, ຍີ່ປຸ່ນ, ນິວຊີແລນ ແລະ ອົດສະຕາລີ, ເບິ່ງຄືວ່າ ພວມແມ່ນການເລືອກເຟັ້ນມີປະສິດທິຜົນທີ່ສຸດ. ວິວັດການເຈລະຈາ RCEP ຍັງຄົງສືບຕໍ່ດຳເນີນ ແລະ ຄາດວ່າ ຈະສິ້ນສຸດລົງໃນກາງປີນີ້. ຖ້າຫາກວ່າ ສັນຍາ TPP ເລັ່ງໃສ່ບັນດາຂົງເຂດສຳຄັນທີ່ມີຕໍ່ບັນດາປະເທດພັດທະນາ, ຍົກຕົວຢ່າງຄື ບັນດາເງື່ອນໄຂດຳເນີນທຸລະກິດ, ບັນດາມາດຕະຖານ, ຂໍ້ກຳນົດ ແລະ ການປົກປ້ອງຊັບສິນທາງປັນຍານັ້ນ, ສັນຍາ RCEP ກໍເລັ່ງໃສ່ຕົ້ນຕໍເຂົ້າໃນການຫຼຸດຜ່ອນພາສີອາກອນ ແລະ ຫັນການບໍລິການເປັນເສລີ. ຕາມບັນດານັກສັງເກດການແລ້ວ, ສິ່ງນີ້ບໍ່ໝາຍຄວາມວ່າ ສັນຍາ RCEP ບໍ່ມັກໃຫຍ່ໃຝ່ສູງກວ່າ ສັນຍາ TPP, ແຕ່ກົງກັນຂ້າມ, ສັນຍາ RCEP ບໍ່ມີການຈຳແນກປະພຶດ, ຍົກຕົວຢ່າງຄື ວາງອອກບັນດາມາດຕະຖານຂອງ “ ປະເທດພັດທະນາ ” ຊຶ່ງບັນດາປະເທດຫວັງຢາກເຂົ້າຮ່ວມສັນຍາຕ້ອງຕອບສະໜອງຕາມ. ຍົກຕົວຢ່າງຄືຫັນການຄ້າຂາຍສິນຄ້າເປັນເສລີ 100%ດ້ວຍຂອບເຂດນຳໃຊ້ຢ່າງຮອບດ້ານ, ຈະຊ່ວຍສ້າງຄວາມສະດວກໃຫ້ແກ່ການຄ້າໃນພາກພື້ນ, ສົ່ງເສີມການຮ່ວມມື. ຈີນ, ຊຶ່ງແມ່ນປະເທດເຄີຍຖືກປັດເຂ່ຍອອກຈາກ ສັນຍາ TPP, ແນ່ນອນວ່າພວມຍາດແຍ່ງກາລະໂອກາດນີ້ເພື່ອຟື້ນຟູຮູບພາບດ້ານການຄ້າຢູ່ອາຊີດ້ວຍການຊຸກຍູ້ບັນດາຂໍ້ຕົກລົງການຄ້າສະເພາະຂອງຕົນ. ນອກຈາກ ສັນຍາ RCEP ແລ້ວ, ເພື່ອເພີ່ມທະວີການສົ່ງຜົນສະທ້ອນໃນພາກພື້ນ, ປັກກິງພວມຍູ້ໄວໂຄງການເຂດການຄ້າເສລີ ອາຊີ-ປາຊີຟິກ (FTAAP) ຊຶ່ງເຕົ້າໂຮມ 21 ປະເທດສະມາຊິກ APEC.
ຕາມບັນດາຜູ້ຊ່ຽວຊານແລ້ວ, ໃນພື້ນຖານເສດຖະກິດໂລກາພິວັດ, ເລື່ອງອາເມລິກາຊຶ່ງແມ່ນພື້ນຖານເສດຖະກິດໃຫຍ່ກວ່າໝູ່ໃນໂລກໄດ້ຫັນໄປສູ່ລັດທິປົກປ້ອງນັ້ນ, ແນ່ນອນວ່າ ຈະສົ່ງຜົນກະທົບບໍ່ໜ້ອຍເຖິງການຄ້າທົ່ວໂລກ, ກົດໜ່ວງການຄ້າ ແລະ ການລົງທຶນ. ໃນສະພາວະທີ່ບັນດາເຫດການປັ່ນປ່ວນໄດ້, ພວມ ແລະ ຈະເກີດຂຶ້ນສຳລັບພື້ນຖານເສດຖະກິດທົ່ວໂລກ, ພາກພື້ນອາຊີ-ປາຊີຟິກຄວນສືບຕໍ່ສວມບົດບາດໃຈກາງ ແລະ ປະສານງານໃນພາກພື້ນນີ້ ປຽບເໝືອນສະຫະພັນເສດຖະກິດທີ່ໄດ້ຮັບຄວາມໄວ້ເນື້ອເຊື່ອໃຈ ແລະ ມີຜົນສະທ້ອນຫຼາຍທີ່ສຸດໃນພາກພື້ນ, ແນໃສ່ສ້າງປະຊາຄົມວັດທະນາຖາວອນ ແລະ ຂະຫຍັນຂັນເຄື່ອນ. ດ້ວຍຂໍ້ຕົກລົງ FTA ກວ່າ 140 ສະບັບ ທີ່ມີຢູ່ແລ້ວລະຫວ່າງບັນດາພື້ນຖານເສດຖະກິດໃນພາກພື້ນ, ພ້ອມກັບບັນດາໂຄງການສ້າງຄວາມສະດວກແກ່ການຄ້າຄື RCEP , ເວທີປາໄສຮ່ວມມື APECຍັງຄົງໄດ້ຮັບຖືວ່າ ແມ່ນຂອບເຂດທີ່ສຳຄັນເພື່ອໃຫ້ບັນດາປະເທດສະມາຊິກແລກປ່ຽນແນວຄວາມຄິດ ແລະ ປຶກສາຫາລືບັນດາມາດຕະການ ແນໃສ່ຊຸກຍູ້ການຄ້າ, ພິເສດໃນສະພາບການໂລກພວມມີການຜັນປ່ຽນຄືປະຈຸບັນ. /.