ຄວາມມານະພະຍາຍາມຕ້ານໂລກ Ebola ຂອງປະຊາຄົມໂລກໄດ້ມີສັນຍານໃໝ່ຂະນະທີ່ອົງການອະນາໄມໂລກ WHO ໄດ້ປະກາດບາງປະເທດອາຟະລິກາຕາເວັນຕົກໄດ້ຫຼຸກພົ້ນອອກຈາກໂລກ Ebola ແລະ ຢາວັກຊິນທົດລອງງວດທຳອິດໄດ້ນຳມາເຊິ່ງໝາກຜົນທີ່ໜ້າຊື່ນຊົມ. ແຕ່ເພື່ອສະກັດກັ້ນໂລກລະບາດນີ້, ໂລກຕ້ອງການມີແຫຼ່ງກຳລັງຕື່ມອີກ ນັບທັງດ້ານການເງິນ , ບຸກຄະລາກອນ ແລະ ການສູ້ຮົບຕ້ານ ໂລກ Ebola ນີ້ ແນ່ນອນວ່າຕ້ອງໃຊ້ເວລາຍາວນານ.
(ພາບປະກອບ )
|
ຕາມແຈ້ງການຫຼ້າສຸດຂອງອົງການອະນາໄມໂລກ WHO, ໄລ່ຮອດຈຸດເວລາເກີດກໍລະນີຄົນເຈັບຕິດໂລກ Ebola ຄົນທຳອິດເມື່ອເດືອນ 3/2014 ມາຮອດປະຈຸບັນ, ໂລກ Ebola ໄດ້ເຮັດໃຫ້ມີຜູ້ເສຍຊີວິດ 4.500 ຄົນ ແລະ ປະຈຸບັນ, ຈຳນວນຜູ້ຕິດໂລດດັ່ງກ່າວຢູ່ທັງພາກພື້ນອາຟະລິກາຕາເວັນຕົກ ໄດ້ລື່ນກາຍຕົວເລກ 9.200 ຄົນ ແລະ ໄດ້ແຜ່ລະບາດອອກສູ່ບັນດາປະເທດອື່ນໆ. ອັດຕາການຕາຍກໍໄດ້ເພີ່ມຂຶ້ນຢູ່ 3 ປະເທດທີ່ຖືກຖືວ່າແຫ່ງກຳເນີດໂລກລະບາດເຊັ່ນ : ລີເບເຣຍ, ຊີຣາລີອອນ ແລະ ກີເນ. ຢູ່ອາເມລີກາ, ເມື່ອບໍ່ດົນມານີ້, ໄດ້ກວດພົບ 2 ກໍລະນີຕິດເຊື້ອໂລກ Ebola. ສ່ວນຢູ່ແອດສະປາຍ ຊຶ່ງແມ່ນປະເທດທຳອິດຢູ່ເອີລົບ ກໍໄດ້ຍອມຮັບມີກໍລະນີຄົນເຈັບຕິດໂລກ Ebola ແລະ ປະເທດນີ້ ກໍພວມຮີບຮ້ອນກວດສຸຂະພາບບັນດາຜູ້ທີ່ຖືກລະແວງສົງໄສຕິດໂລກ Ebola.
ບັນດາສັນຍານທີ່ໜ້າຊື່ນຊົມທຳອິດ
ໃນຂະນະດຽວກັນ, ບັນດາສັນຍານໃໝ່ກ່ຽວກັບການຕໍ່ສູ້ຕ້ານໂລກລະບາດນີ້ໄດ້ມີຂຶ້ນ, ເມື່ອຢາວັກຊິນປິນປົວໂລກ Ebola VSV – EBOV ໂດຍບັນດານັກວິທະຍາສາດ ການາດາ ຜະລິດໄດ້ຖືກນຳມາທົດລອງປິນປົວສຳລັບຄົນ, ອັນໄດ້ນຳມາເຊິ່ງຄວາມປາຖະໜາທີ່ໜ້າຊື່ນຊົມ. ຢາວັກຊິນບັນດາກວດທຳອິດໃນຈຳນວນ 800 ກວດທີ່ໃຊ້ທົດລອງຂອງການາດານີ້, ປະຈຸບັນໄດ້ຖືກສົ່ງໄປຍັງອົງການອະນາໄມໂລກ WHO ຢູ່ເຊີແນວ ແລະ ປາຖະໜາວ່າ ແຕ່ນີ້ຮອດທ້າຍປີ, ໂລກຈະມີ ຢາວັກຊິນເພື່ອປິນປົວໂລກ Ebola. ໃນຂະນະນັ້ນ, ບາງປະເທດອື່ນຄື : ລັດເຊຍ, ໄທ ກໍໄດ້ປະກາດສາມາດຜະລິດ ຢາວັກຊິນໃໝ່ເພື່ອປ້ອງກັນ ແລະ ຕ້ານໂລກ Ebolaໃນ 2-3 ເດືອນຂ້າງໜ້າ. ວັນທີ 20/10, ອົງການອະນາໄມໂລກ WHO ໄດ້ປະກາດ ນີເຢເຣຍ ຫຼຸກພົ້ນອອກຈາກໂລກ Ebola . ກ່ອນໜ້ານັ້ນ, ເຊເນການ ກໍແມ່ນປະເທດທຳອິດໄດ້ຮັບການເລືອກເຟັ້ນ ຍ້ອນບໍ່ມີກໍລະນີຕິດໂລກ Ebola ຄົນໃໝ່ໃນຮອບເວລາ 42 ວັນ ນັບຕັ້ງແຕ່ວັນທີ 18/10. ໃນຂະນະນັ້ນ, ຢູ່ແອດສະປາຍ, ສຸຂະພາບຂອງຜູ້ຕິດໂລກ Ebola ຄົນທຳອິດ ສືບຕໍ່ດີຂຶ້ນ. ກໍເຊັ່ນດຽວກັນຢູ່ອາເມລິກາ, ອາການສຸຂະພາບຂອງນາງພະຍາບານຊາວອາເມລິກາເຊື້ອຊາດຫວຽດນາມ ກໍມີສັນຍານທີ່ໜ້າຊື່ນຊົມ.
ໂລກມານະພະຍາຍາມຮັບມືກັບໂລກ Ebola
ນັບແຕ່ເວລາໂລກລະບາດລະເບີດຂຶ້ນ, ປະຊາຄົມໂລກ ຊຶ່ງນຳໜ້າແມ່ນອັງກິດ, ອາເມລິກາ ໄດ້ມີຄວາມມານະພະຍາຍາມຫຼາຍຢ່າງໃນການໜູນຊ່ວຍບັນດາປະເທດເກີດໂລກລະບາດ ກໍຄືສະກັດກັ້ນການແຜ່ລະບາດຂອງມັນ, ແຕ່ໝາກຜົນກໍບໍ່ບັນລຸດັ່ງຄວາມຫວັງດ້ວຍບັນດາກໍລະນີຄົນເຈັບຕິດໂລກ Ebolaເພີ່ມຂຶ້ນຢ່າງກະໂດດຂັ້ນ. ຍ້ອນເຫດນີ້ເອງ, ໃນປະຈຸບັນ, ບັນດາມາດຕະການສະກັດກັ້ນໂລກລະບາດນີ້ ໄດ້ຮັບການປະຕິບັດຢ່າງຮີບດ່ວຍຍິ່ງກວ່າເວລາໃດໝົດຈາກປະຊາຄົມໂລກ.
ພ້ອມກັບການຄວບຄຸມບັນດາສະຖານທີ່ເກີດໂລກລະບາດ, ໃຫ້ຄຳໝັ້ນສັນຍາຊ່ວຍເຫຼືອດ້ານການເງິນ, ບັນດາປະເທດຍັງໝັ້ນໝາຍຈັດສົ່ງກຳລັງພາລະກອນການແພດໄປໜູນຊ່ວຍແກ່ເຂດເກີດໂລກ Ebola, ພ້ອມທັງຂຶ້ນແຜນການເພີ່ມທະວີການຄວບຄຸມລະບົບສະໜາມບິນ, ທ່າກຳປັ່ນເພື່ອແນໃສ່ສະກັດກັ້ນການແຜ່ລະບາດຂອງໂລກ Ebola.
ຫັນບັນດາ ຄຳໝັ້ນສັນຍາຊ່ວຍເຫຼືອດ້ານການເງິນ ແລະ ມະນຸດສະທຳໃຫ້ປະກົດຜົນເປັນຈິງ
ຕາມຂໍ້ສັງເກດຂອງ ອົງການອະນາໄມໂລກ WHO , ຈະຕ້ອງໃຊ້ເວລາຫຼາຍອາທິດ, ຊ້ຳບໍໜຳແມ່ນຫຼາຍເດືອນເພື່ອດັບມອດໂລກ Ebolaໄດ້. ໃນຈຸດເວລານີ້, ສິ່ງສຳຄັນແມ່ນຕ້ອງສະກັດກັ້ນການແຜ່ລະບາດຂອງ ໂລກ Ebolaອອກສູ່ປະເທດອື່ນໆ. ແຕ່ເພື່ອເຮັດໄດ້ສິ່ງດັ່ງກ່າວ, ໂລກຕ້ອງການມີແຫຼ່ງກຳລັງຫຼາຍຕື່ມອີກ, ໃນນັ້ນມີແຫຼ່ງການເງິນ. ໃນເນື້ອໃນຂອງ “ ຈົດໝາຍສົ່ງເຖິງໂລກ ” , ປະທານາທິບໍດີ ລີເບເຣຍ Sirleaf ໄດ້ກ່າວເຕືອນວ່າ ໂລກ Ebola ຢູ່ ອາຟະລິກາຕາເວັນຕົກ ບໍ່ພຽງແຕ່ແມ່ນວິກິດການດ້ານສາທາລະນະສຸກເທົ່ານັ້ນ, ຫາກຍັງກໍ່ໃຫ້ເກີດໄພພິບັດເສດຖະກິດ, ແລະ ໄພອັນຕະລາຍອື່ນໆ. ປະທານາທິບໍດີ ລີເບເຣຍ Sirleaf ເນັ້ນໜັກວ່າ ໂລກລະບາດນີ້ ບໍ່ມີພົມແດນ ແລະ ປະຊາຄົມໂລກຕ້ອງມີການກະທຳຢ່າງແທດຈິງ, ຊ້ຳບໍໜຳ ຖ້າຫາກລັ່ງເລໃຈໃນການປະກອບການເງິນຫຼືໜູນຊ່ວຍມະນຸດສະທຳ ແມ່ນອດຈະເຮັດໃຫ້ ໂລກ Ebola ກາຍເປັນມະຫັນຕະໄພທົ່ວໂລກ