ປະທານາທິບໍດີ ອີຕາລີ G.Napolitano (ເບື້ອງຊ້າຍ) ແລະ
ທ່ານນາຍົກລັດຖະມົນຕີ ອີຕາລີ Enrico Letta.(ເບື້ອງຂວາ).
(ພາບ: AFP)
|
ເລື່ອງອະດີດນາຍົກລັດຖະມົນຕີ Silvio Berlusconi ບັງເອີນປ່ຽນແປງ ຫຼັກໝັ້ນໃນຈຸດເວລາສຸດທ້າຍນັ້ນ, ໄດ້ຊ່ວຍໃຫ້ລັດຖະບານສຳພັນທະມິດຝ່າຍຊ້າຍ-ຂວາຂອງນາຍົກລັດຖະມົນຕີອີຕາລີ Enrico Letta ຜ່ານຜ່າການປ່ອນບັດໄວ້ວາງໃຈເມື່ອວັນທີ 2/10 ຢູ່ສະພາສູງ ແລະ ສະພາຕ່ຳ. ບໍ່ພຽງແຕ່ເຊັ່ນນັ້ນ, ມັນຍັງຊ່ວຍໃຫ້ອີຕາລີຫຼີກລ້ຽງວິກິດການໃນຄະນະລັດຖະບານຢ່າງໜັກ ແລະ ອາດຈະດຳເນີນການເລືອກຕັ້ງທົ່ວປະເທດກ່ອນກຳນົດ. ເຖິງວ່າ ໄດ້ຫຼຸດພົ້ນ ອອກຈາກໄພອັນຕະລາຍຍຸບເລີກລັດຖະບານກໍຕາມ, ແຕ່ ທ່ານນາຍົກລັດຖະມົນຕີອີຕາລີ Enrico Letta ພວມຕ້ອງ ປະເຊີນໜ້າກັບບັນດາສິ່ງທ້າທາຍທາງດ້ານເສດຖະກິດຊຶ່ງຕ້ອງແກ້ໄຂ.
ວັນແຫ່ງປະຫວັດສາດຂອງທ່ານນາຍົກລັດຖະມົນຕີອີຕາລີ Enrico Letta
ກ່ອນທີ່ດຳເນີນການປ່ອນບັດຢູ່ສະພາແຫ່ງຊາດເປັນເວລາ 1 ວັນ, ອີຕາລີ ໄດ້ຖືກສັງເກດວ່າ ພວມຢືນຢູ່ຕໍ່ໜ້າໄພອັນຕະລາຍເກີດວິກິດການການເມືອງ ພາຍຫຼັງທີ່ພັກປະຊາຊົນເສລີ PDL ກາງຂວາຂອງອະດີດ ນາຍົກລັດຖະມົນຕີ Silvio Berlusconi ຖອນລາຍຊື່ລັດຖະມົນຕີ 5 ທ່ານສັງກັດພັກນີ້ອອກຈາກລັດຖະບານສຳພັນທະມິດກັບພັກປະຊາທິປະໄຕ PD ກາງຊ້າຍຂອງ ນາຍົກລັດຖະມົນຕີ Enrico Letta.
ແຕ່ບົດປາໄສ ໄດ້ໝັ້ນໝາຍຫຼຸດຜ່ອນອັດຕາພາສີອາກອນ, ປະຕິບັດບັນດາການປະຕິຮູບດ້ານເສດຖະກິດ ແລະ ຍຸຕິທຳໃນສະພາສູງຂອງທ່ານ ນາຍົກລັດຖະມົນຕີອີຕາລີ Enrico Letta ຊຶ່ງໄດ້ຍົກອອກມາກ່ອນດຳເນີນການປ່ອນບັດ ອນັໄດ້ເຮັດໃຫ້ທ່າທີຂອງ ອະດີດນາຍົກລັດຖະມົນຕີ Silvio Berlusconi ຕ່າວປີ້ນໃນທັນທີ່. ຈາກການຄັດຄ້ານລັດຖະບານປະຈຸບັນ, ຝ່າຍຂອງທ່ານ ອະດີດນາຍົກລັດຖະມົນຕີ Silvio Berlusconi ຕັດສິນຫັນມາສະໜັບສະໜູນ.
ສະພາບການປ່ຽນແປງໂດຍບັງເອີນນີ້ ໄດ້ເຮັດໃຫ້ຄວາມເປັນຫ່ວງກັງວົນຂອງວົງການນັກການເມືອງຢູ່ອີຕາລີຜ່ອນຄາຍລົງ. ເມື່ອກ່າວຄຳເຫັນກັບວົງການນັກຂ່າວພາຍຫຼັງຍາດໄດ້ໄຊຊະນະຢູ່ສະພາສູງ, ນາຍົກລັດຖະມົນຕີອີຕາລີ Enrico Letta ຖະແຫຼງວ່າ ນີ້ແມ່ນວັນແຫ່ງປະຫວັດສາດ ແລະ ສະພາບການໄດ້ສະຫວ່າງສະໄຫວກວ່າເພື່ອໃຫ້ອີຕາລີກ້າວໄປໄກກ່ວາ. ກ່ອນໜ້ານັ້ນ, ທ່ານນາຍົກລັດຖະມົນຕີອີຕາລີ Enrico Letta ຢືນຢັນວ່າ ສະຖຽນລະພາບທາງດ້ານການເມືອງຂອງອີຕາລີ ແມ່ນສິ່ງທີ່ສຳຄັນຕັດສິນຄວາມເປັນຕາຍເພື່ອໃຫ້ເທດນີ້ສືບຕໍ່ປະຕິບັດບັນດາການປະຕິຮູບດ້ານເສດຖະກິດແນໃສ່ຜ່ານຜ່າການຊຸດໂຊມດ້ານເສດຖະກິດທີ່ຖືວ່າແມ່ນແກ່ຍາວທີ່ສຸດໃນຮອບ 20 ປີ ທີ່ຜ່ານມາ.
ໜ້າທີ່ຫຍຸ້ງຍາກໃນສະເພາະໜ້າ
ພາຍຫຼັງທ່ີ່ໄດ້ຜ່ານຜ່າການປ່ອນບັດໄວ້ວາງໃຈຢູ່ 2 ສະພາ, ບັນຫາທຳອິດ ແລະ ມີພຽງອັນດຽວຊຶ່ງທ່ານ ນາຍົກລັດຖະມົນຕີອີຕາລີ Enrico Letta ມີຄວາມສົນໃຈ ນັ້ນແມ່ນເສດຖະກິດ. ສິ່ງດັ່ງກ່າວ ກໍສະແດງໃຫ້ເຫັນວ່າ ການຟື້ນຟູເສດຖະກິດຍາມໃດກໍແມ່ນບຸລິມະສິດອັນດັບໜຶ່ງຂອງການນຳປະເທດນີ້. ທ່ານ ນາຍົກລັດຖະມົນຕີອີຕາລີ Enrico Letta ຊີ້ແຈ້ງວ່າ ຈະຊຸກຍູ້ເສດຖະກິດອີຕາລີເຕີບໂຕ 1% ໃນປີ 2014 ແລະ ສູງກ່ວາໃນຊຸມປີຕໍ່ໆໄປ. ນອກນັ້ນທ່ານຍັງຍັງໃຫ້ຄຳໝັ້ນສັນຍາຈະເຄົາລົບບັນດາຂໍ້ກຳນົດກ່ຽວກັບປີງົບປະມານ, ຕາມນັ້ນແລ້ວ ຈະຮັກສາລະດັບຂາດດູນງົບປະມານ 3% GDP ຊຶ່ງແມ່ນລະດັບທີ່ EU ວາງອອກໃຫ້ແກ່ບັນດາປະເທດພາຄີ.
ຈຸດໝາຍນີ້ແມ່ນມີພື້ນຖານ ຂະນະທີ່ຕາມບົດລາຍງານຕົ້ນເດືອນ 8 ທີ່ຜ່ານມາຂອງອົງການສະຖີຕິແຫ່ງຊາດອີຕາລີ ISTAT ແລ້ວ, ໄດ້ປະກົດມີສັນຍານຕັ້ງໜ້າສົມຄວນຊຶ່ງສະແດງໃຫ້ເຫັນວ່າ ລະດັບຊຸດໂຊມຂອງປະເທດນີ້ພວມຄ່ອຍໆຊ້າລົງ. ນັກຊ່ຽວຊານບາງທ່ານໃຫ້ຂໍ້ສັງເກດວ່າ ໃນໄຕມາດທີ 4 ປີ 2013, ພື້ນຖານເສດຖະກິດອີຕາລີອາດຈະເລີ່ມຟື້ນຕົວຄືນ.
ແຕ່ລັດຖະບານຂອງ ນາຍົກລັດຖະມົນຕີ Enrico Letta ບໍ່ບັນລຸຈຸດໝາຍດັ່ງກ່າວຢ່າງງ່າຍດາຍ, ໂດຍສະເພາະແມ່ນໃນສະພາວະພື້ນຖານເສດຖະກິດອີຕາລີພວມປະເຊີນໜ້າກັບຄວາມຫຍຸ້ງຍາກຫຼາຍຢ່າງ. GDP ໃນໄຕມາດ 2/2013 ຫຼຸດລົງ 0,3% ເມື່ອທຽບໃສ່ໄຕມາດກ່ອນ ແລະ ແມ່ນໄຕມາດບັນລຸລະດັບເຕີບໂຕທາງລົບທີ 8 ຢ່າງລຽນຕິດ. ອີຕາລີຍັງແມ່ນໜຶ່ງໃນບັນດາປະເທດທີ່ມີລະດັບໜີ້ສາທາລະນະສູງສຸດໃນເອີລົບ. ບັນດາການຄາດຄະເນຄັ້ງຫຼ້າສຸດ ໄດ້ສະແດງໃຫ້ເຫັນວ່າ ລະດັບໜີ້ສາທາລະນະຂອງປະເທດນີ້ໃນປີນີ້ອາດຈະລື່ນກາຍ 2.000 ຕື້ເອີໂຣ, ກວມເອົາ 132,9% GDP, ສູງກ່ວາຫຼາຍເມື່ອທຽບໃສ່ລະດັບ 127% GDP ຂອງປີ 2012.
ເສດຖະກິດຊັກຊ້າ ໄດ້ເຮັດໃຫ້ສະພາບວ່າງງານເພີ່ມຂຶ້ນ. ຕາມຕົວເລກຈາກ ອົງການສະຖີຕິແຫ່ງຊາດອີຕາລີ ISTAT ແລ້ວ, ໃນເດືອນ 8/2013, ອັດຕາການວ່າງງານພວມຢູ່ໃນລະດັບສູງ 12,2% ເມື່ອທຽບໃສ່ 12,1%ຂອງເດືອນ 7/2013.
ໂດຍແມ່ນປະເທດໃຫຍ່ອັນດັບ 3 ໃນພາກພື້ນໃຊ້ເງິນເອີໂຣລວມ Eurozone , ທຸກການຜັນແປຢູ່ອີຕາລີລ້ວນແຕ່ສົ່ງຜົນສະທ້ອນບໍ່ໜ້ອຍເຖິງທົ່ວພາກພື້ນ. ເລື່ອງລັດຖະບານສຳພັນທະມິດຝ່າຍຊ້າຍ-ຂວາຂອງນາຍົກລັດຖະມົນຕີອີຕາລີ Enrico Letta ຜ່ານຜ່າການປ່ອນບັດໄວ້ວາງໃຈຢູ່ສະພາແຫ່ງຊາດ ແມ່ນກາລະໂອກາດເພື່ອໃຫ້ສຳພັນທະມິດນີ້ສືບຕໍ່ພະຍາຍາມຟື້ນຟູູເສດຖະກິດ ພາຍຫຼັງຖືກຊຸດໂຊມມາເປັນເວລາ 2 ປີ ດ້ວຍຄວາມຫຍຸ້ງຍາກຫຼາຍຢ່າງ.